Ev. Ruta 3, 21-38
Mahana Piti 1 no Tenuare 2013
Ev. Ruta 3, 21-38
Te päpetitoraa o Ietu
(Mät 3,13-17; Mär 1,9-11)
21 E ia Ioane i päpetito i te mau taata atoà, i päpetito-atoà-hia Ietu, e te pure ra o ia, vëtea aè ra te raì, 22 e ua pou mai ra te Värua Maitaì i nià ia na, mai te ûupa te huru, e te hoê reo mai ra no te raì, i te nä-ô-raa mai:
Taù Tamaiti here òe, ua mauruuru roa vau ia òe.
Te paparaa tupuna o Ietu
(Mät 1,1-17)
23 Ua tae aè ra i te toru o te àhuru o to Ietu matahiti ra (e mai tei manaòhia ra hoì), e tamaiti o ia na Iotëfa, na Heri, 24 na Matäta, na Revi, na Merehi, na Ianana, na Iotëfa, 25 na Matatia, na Àmota, na Naùma, na Èteri, na Nate, 26 na Maata, na Matatai, na Temei, na Iotëfa, na Iüta, 27 na Ioana, na Reta, na Töropäpera, na Taratiera, na Neri, 28 na Merehi, na Àti, na Totama, na Èremotama, na Èra, 29 na Iote, na Èrietera, na Iorima, na Matäta, na Revi, 30 na Timeona, na Iüta, na Iotëfa, na Ionana, na Èriatima, 31 na Merea, na Menana, na Matäta, na Nätana, na Tävita, 32 na Iete, na Òpeta, na Poata, na Taramona, na Naatona, 33 na Àminatapa, na Àrama, na Èteröma, na Färeta, na Iüta, 34 na Iatöpa, na Ìtaata, na Âperahäma, na Tera, na Nahora, 35 na Taruha, na Ratau, na Färeta, na Èpera, na Tara, 36 na Tainana, na Àrafatetata, na Tema, na Noa, na Rameha, 37 na Matutara, na Ènoha, na Iareta, na Marereera, na Tainana, 38 na Ènota, na Teta, na Àtamu, na te Atua.
Ômuaraa
Te faaìte nei te Èvaneria a Ruta ia Ietu mai te tahi Faaora tei fafauhia ia Ìteraèra e mai te Faaora o teie nei ao. Te haapäpü nei o Ruta e o Ietu tei piihia e te Värua o te Fatu no te «hopoi te Parau Maitaì i te feiä veve» (4.18), e teie Èvaneria, ua î ia i te manaò tauturu i te feiä atoà i roto i te mau fifi huru rau atoà. Te täpaò no te òaòa tei ìte-tämau-hia i roto i te Èvaneria a Ruta, i roto ihoä rä i te mau pene matamua tei poro i te haereà mai o Ietu, e tei ìte-atoà-hia i te pae hopeà no teie Èvaneria, i te taime i reva ai Ietu i nià i te raì. Te âài no te tupuraa e te parareraa no te faaroo maru-metia i muri aè i to Ietu revaraa, ua faahiti-atoà-hia teie parau e teie ä taata päpaì i te Puta Òhipa.
E piti tau tuhaa rarahi (pene 1-2 e te pene 9-19) tei höroà mai i te tahi mau parau o tei ìte-noa-hia i roto i teie Èvaneria, mai te âài no te himene a te mau merahi e te tere färerei o te mau tiaì mämoe i te fänauraa o Ietu, te tamaiti ra o Ietu i roto i te Hiero, te parapore no te taata Tämäria hämani maitaì e tae noa atu i te parapore no te tamaiti tei moè. I roto i te täatoà o te Èvaneria, ua haamauhia ia te manaò tumu i nià i te tumu parau o te pure, te parau no te Värua Moà, te tiàraa o te vahine i roto i te täviniraa a Ietu, e te parau no ta te Atua faaòreraa hara.
Te tahi na uiraa i nià i ta tätou parau no teie mahana
1) No te aha o Ietu te parau tià a te Atua, i päpetitohia ai i te päpetitoraa o te feiä hara ?
2) Te reo o te Atua, Tau Tamaiti here teie, ua mauruüru roa vau ia na. No te aha te mau taata tei faaroo i te reo o te Atua i taua mahana ra e faaea noa ai i roto i te pöuri ?
Ta tätou ra parau te naò ra ia, Taù Tamaiti here òe, ua mauruuru roa vau ia òe.
Te faaroo nei o Ietu i te piiraa a Ioane i te päpe no Ioritana, te âmui nei ò ia i reira no te faatupu i te mau parau tohu, i faahitihia na e Itaia i te pene 42 i te ìrava 1 a hiò na i ta ù tävini, ta ù e tauturu nei, i ta ù i hinaaro i mauruüru roa ai ta ù Värua, ua tuuhia e au ta ù Värua i nià ia na, e na na e faaìte haere i te mau ètene i te parau tià. Te haapäpü noa mai ra te reira ia tätou e, o te Atua te tumu no te mau òhipa e ravehia e Ioane Päpetito. Te riro noa ra ia o Ioane Päpetito èi mauhaa no te faatupuraa i te mau ôpuaraa a te Atua no te ora o te mau taata atoà e tiàturi nei Ia na.
Te âmui nei o Ietu i te feiä rave hara, tei hinaaro i te faaòreraa hara a te Atua, ò ia tei òre i tafetafeta i te ìno o te hara, teie ò ia e tuu nei Ia na i roto i te faanahoraa o te ao nei. Te ao tei faatea i te mau ora a te Atua, ma te manaò e, tei roto i te tämaì, te àmahamaha, te peàpeà e te faaìno, e hanahana ai te Atua, e mau òhipa anaè teie, tei haafatata i te ao nei i roto i te pohe mure òre.
Te òhipa i tupu Ioritana, i to Ietu tiàraa i roto i te päpe i mua ia Ioane Päpetito e täipe teie no te òhipa ta te Atua i rave i te taime ò ia i faatiàrepu ai i to na Värua i nià i te ìriatai, ma te parau e ia marämarama ua marämarama aè ra, i taua taime ra te matararaa nei te ùputa no te ùtuafare o te Atua. I te taime ra te töparaa te taata i roto i te turituri e te taiva, i piri faahou ai teie ùputa, no te mea ua ö te taata i roto i te hoê oraraa èita i ta te Atua, mauti ra te hara.
Ioane i mua ia Ietu te ìte nei ò ia i to na faufaa òre no te òhipa e tupu nei, na te taata hara e päpetito i te Tämaïti a te Atua. Ia au i te reo o Ioane i te naòraa, O vau hoì ta oè e päpetito e tià ai, e te haere mai na oè ia ù nei ! E reo tatarahapa teie no Ioane i mua ia Ietu, te ìte nei o Ioane ia Ietu no te taime mätamua roa, i mua i teie òhipa faahiahia, ua tiaì ra o Ioane i te pähonoraa a Ietu, no te faatupuraa i te parau atoà i faahitihia e te mau Patereäreha, e te mau perofeta.
Teie reo o Ietu no te faatupuraa i te Aroha mure òre o te Atua, ia mätara faahou te ùputa o te ùtuafare Metua i te naòraa e, A tuu noa mai na ; e na reira hoì tätou i te faatià i te mau parau- tià atoà e au ai. E reo faatupu ora teie no Ietu i te mau taata atoà e pee ia na, e tiàturi ta na mau haapiiraa. Te färii nei o Ietu i te päpetitoraa tatarahapa tei faataahia no te taata tei tïtau i te faaòreraa hara a te Atua. Te ìte atoà nei ra o Ietu i ta na hopoià e faatupu no te parau tià. Te parau tià ta Ietu e faahiti nei mauti ra ia te mau ture ia a te Atua, te ture no te ora e te hau te tià e ärataì i te mau taata atoà na te èà marämarama.
Òia hoì, te türama nei teie reo to Ietu ia tätou te aroha e te parau mau tei tuu ia tätou i mua i te Atua, tei faariro ia tätou èi tupuraa no te mau ôpuaraa ora, tei ìmi tämau i te maitaì, taua maitaì ra, o to tätou ia òaòa.
No reira ta tätou haamoriraa i teie mahana, te haapii noa mai ra te reo o Ietu ia tätou te huru no te ATUA PARUA TIÀ, tei haere mai i mua i te taata, na roto i te haèhaa e te maru, ma te färii i te mau òhipa atoà e tià ia faatupu i teie reo e, A tuu noa mai na ; e na reira hoì tätou i te faatià i te mau parau- tià atoà e au ai. I teie reo, oti aè ra Ietu i te päpetitohia, haere mai ra ò ia i nià, mai raro mai i te pape, e ìnaha, vëtea aè ra te raì ia na, hiò aè ra ò ia i te Värua o te Atua i te pouraa mai, mai te ûupa ra, e te täuraa mai i nià iho ia na : e ìnaha, o te reo mai ra no te raì mai, i te naòraa mai e, Tau Tamaiti here teie, ua mauruüru roa vau ia na.