Overblog Suivre ce blog
Editer l'article Administration Créer mon blog
17 mars 2013 7 17 /03 /mars /2013 13:13

Täpati 31 no Mäti 2013  

 

Tiàfaahouraa

 

Taiòraa : (Ruta 24, 13-33)

(21) Ua manaò mätou e, o te taata ia e ora ai Iteraèra ......

 

         Ua haere anaè tätou e ori haere nä nià i te menema, aita atu e mea ta tätou e ìte pinepine nei, teie ia : « ici repose ... » täpirihia mai te iòa e te matahiti pohe ai teie taata. Ei nià atoà i teie òfaì, ìte-atoà-hia ai te tahi mau pehepehe rii au noa, tei päpaìhia e te feiä atoà i here i teie taata pohe. E te vähi maere atoà, to te taata ia tïaì-roa-raa ia pohe, i reira e haapau ai i ta rätou moni. Hoo i te räau, te punu, te one e te mau mea atoà ànaàna ai teie menema, âreà rä te oraraa rä o teie taata, ua pärahi noa ia i roto i te veve e i roto i te fare pë.

        

         Mea maitaì ia päpü to tätou manaò e, te menema i reira to tätou fatu i te tuu-raa-hia, aita ia e reta pirü no te päpaìraa i to na iòa, aore rä i nanaòhia i nià i te òfaì tei riro e paruai faaararaa i te taata e ; « ici repose ... ». Aita tätou e hinaaro nei ia faarahihia te parau o te menema, ia haamanaò ra te taata e, no roto roa mai te vaha o nä puè merahi i te parauraa atu i teie nä toofanu vahine e, : « Ua ORA oia » (23). Àita rä teie mau vahine i ìte i te tino o Ietu. Te mea ia e haapeàpeà ra ia rätou i taua poìpoì ra, èita e òre e, e uiui rii ihoa ia to rätou manaò e, tei hea atu ra te tino. Nä reira atoà teie nä toofanu puè taata (24) i haere atoà mai i te menema, roohia mai nei e teie mau ìte matamua, teie mau vahine tei riro atu ra e mau ìte no te faaìteraa i teie parau âpï ; « Ua tià-faa-hou mai Ietu mai te pohe mai ». Te räveà ia ta te Atua i faaòhipa no te faaìteraa i te taata i te märamarama, eere te vähi hunaraa, aore rä te iòa, eere atoà te rahiraa tiàraa e mauhia ra e te taata, te parau rä, aore ra te reo. No reira, te parau, ia au i te huru o te Atua te tumu o te parau, ua faaòhipa o ia i ta na mau merahi no te haere e parau i te taata e, « Aita to ù nei, ua ora oia ». E mana te reira no te Atua i te faatupuraa i te mea i parauhia, e mea pinepine roa te reira i te ìtehia i roto i te mau parau atoà i ta te tamaiti iho i parau i roto i to na oraraa, teie te tahi mau taìraa reo ; « O vau te tiàfaahoura e te ora » « O vau te märamarama » « E haere au e faaineine i te tahi parahiraa no òutou » « Tei pihaì iho noa vau ia òutou e tae noa atu i te hopeà o teie nei ao » « E ora vau, e ora atoà òutou ». Te faaìte noa mai ra Ietu e, nä roto i ta na parau, e tuu o ia i te märamarama i roto i te taata ; te märamarama ra to te taata ia ora. Ua ìte atoà rä tätou i te fifi o teie parau, inaha hoì i roto i ta tätou parau no teie mahana, e rahi aè te parau no te faaòreraa i te ìte (16) e no te taa òre o te auraa o te mau parau i päpaìhia e Möte e te mau perofeta (27). Te mea ta tätou e hinaaro nei, eere ia te

faahaparaa i teie nä pipi toopiti e rereva ra i Èmauta, âpeehia e te fatu ra o Ietu Metia i roto i to räua tere. Te paraparau noa ra räua räua iho, te feruri noa ra i nià i teie tumu parau no te mau òhipa atoà i tupu i nià ia Ietu. Ia au i te mea ta räua e faarooroo noa ra e ta räua atoà e ìmi ra i te räveà ia matara to räua manaò i nià i teie tumu parau no te tiàfaahouraa.

 

         E parau taa maitaì paha teie no Ietu, a uiui maere noa atu ai i teie nä pipi toopiti, « e aha mau na teie mau mea ta ôrua e täuàparau noa ra mä te mata huru òto (17) » òi atoà ai te pähonoraa a Tereopa, i te nä-ô-raa atu e, : « O òe anaè paha te taata ê i Ierutarema nei, tei òre i ìte i teie mau òhipa i tupu i nià ia Ietu no Natareta ra, e perofeta mana ia i te räveà e te parau i mua i te aro o te Atua e te taata atoà hoì. (19) » « E to tätou mau tahuà rarahi e te mau haavä, i te tuuraa atu ia na ia faautuàhia, ia pohe, e ua faatatäurohia hoì ia na. (20) » Teie paha te tahi tumu parau i vaivai noa ai terä au òre i rotopü i te mau arataì no Iteraèra, e te arataì i faataahia e te Atua metua no te faatià faahou i teie nünaa i nià. I patï mai ai teie fäìraa faaroo ta teie nä pipi toopiti, i te nä-ô-raa atu ia Ietu e ; « Ua manaò mätou e, o te taata ia e ORA ai Iteraèra nei ; eere rä te reira anaè ra, o te toru hoì teie o te mahana i ravehia ai i taua mau mea ra. (21) »

         Ua parau ra Ietu ia räua e (25) : « Auë ia puè taata manaò òre e, e te faaroo taìàtä i tei hope i te parauhia mai e te mau perofeta ra e ! » (26) « Eere änei ia nä reirahia to te Metia pohe e tià ai, a reva atu ai i to na ra ao. » E hape rä tätou ia hiò i teie reo to te Fatu mai te tahi faahaparaa ia räua, riro noa ai räua e pipi nä na, ua tamata ra Ietu i te faaateatea rii noa i te ata e haapoüri noa ra i to räua feruriraa, aore rä e tätä i te riu i räpaeàu ia òre to räua âau ia rimuhia. Âhiri e ani-raa-hia na to tätou manaò i nià i te parau o te tiàfaahouraa o te Fatu. Aita atu paha mea ta tätou e faarahi maoti rä, te paruparu ia o to räua faaroo. Ua päpü atoà rä, i mua i teie huru parauraa ta räua i mua ia Ietu, tei haamanaò faahou mai i te tiàraa o te nünaa Iteraèra i mua i te parau no te tiàfaahouraa. Mai te tau e te tau, ua faariro noa na Iteraèra i to rätou mau tupuna o rätou aè te täviri ìriti i te ùputa o te tiàfaahouraa. Àita atu e ora i räpae aè ia Àperahama, ia Itaata, ia Iatöpa, ia Iotefa, ia Möte, ia Tävita e tae noa atu i te parau o te mau perofeta. Haamanaò maitaì na, i to Ietu faahuru-ê-raa-hia i nià i te mouà, ua faatiàhia mai teie nä àito o te faaroo, oia hoì, o Möte räua o Eria. Te auraa o teie parau, ua hinaaro anaè te Atua e faahoì mai i to na mau tävini mai te pohe mai, aita ia ta tätou e parau. 

 

         Te mea faufaa rä ta tätou e täpeà mai, teie ia parau ta Ietu i nià i ta na nä pipi toopiti, i te nä-ô-raa e, (27) : « Ua faaìte mai ra o ia ia räua i te auraa i te mau parau no na iho i roto i te mau parau atoà i päpaìhia ra, mai ia Möte mai ä e tae roa aè ra i te mau perofeta atoà. » E au atu ra e, e fifi roa te âau o te taata i mua i te parau, te parau tei riro mai ei taata, ua hinaaro hoì te reira parau e faaìte i to na hoêraa i roto i te Atua metua e i roto atoà i ta na tamaiti ia Ietu Metia. E òhipa tumu te reira nä Ietu i te türamaraa i te taata i te parau ora a to na metua, eita o ia e vai iho noa i te taata i roto i te mataù e te taa òre. I pärahi roa ai o ia i roto ia räua, (30) âmui atoà atu ra i nià i te àmuraa mäa, ua rave iho ra o ia i te päne, haamaitaì atu ra i te Atua, tuu atu ra ia räua ra. (31)Tuuhia iho ra te ìte i to räua mata, ìte atu ra räua ia na, moè roa atu ra Ietu. Te nä ô ra Pauro i te tahi mahana (Törinetia I 5, 7 ) : « O te Metia hoì ta tätou päta, i taparahihia ia na tätou. » Eere atu ra te toto ânimara te paraihia i nià i te pou fare, te toto rä o Ietu Metia, te toto o te faufaa âpï tei haamaniihia no tätou. E hoa here mä e, e ôpani ta tätou parau nä roto i teie manaò faatau aroha no teie nä pipi toopiti, i te nä-ô-raa e : « Ua parau iho ra räua räua iho, eere, e hoa, i ànaànatae to täua âau ia na i paraparau mai ia täua i te aratià ra, a faaìte mai ai ia täua i te auraa i te mau parau i päpaìhia ra. (32) » Terä te auraa o Päta, ua ànaàna faahou te ora e ua tae roa mai i roto i te âau o teie nä pipi toopiti, e ua haere roa mai te Atua Tamaiti e färerei ia räua. No reira, e te hui faaroo e, ia ORA na òutou i te aroha mau o to tätou Fatu ra o Ietu Metia, tei tiàfaahou, e tei ia na ra te hau, te mana e te hanahana e amuri noa atu : « Ici repose ... Amen .. »

 

 

Serge, Tehihio a FAAITE òrometua

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens