Overblog Suivre ce blog
Editer l'article Administration Créer mon blog
17 mars 2013 7 17 /03 /mars /2013 13:06

Mahana Toru 27 no Mäti 2013

 

Taiòraa : Taramo 148 – Ruta Ev.20/45 – 21/1-38

Tumu Parau : « Ia haamaitaì te mau mea atoà i te Tumu o te Ora. »

         E òaòa rahi tera e ìtehia ra i roto i teie taata taramo. Ta na ia e tïtau ra i te mau rahu atoà ia haamaitaì i te Atua, no te mea te Atua te tumu o te mau mea ora atoà.

         Ia ìte mai ra tätou, e tumu te taata taramo i tïtau ai i te mau mea ora atoà ia pärahi i roto i te haamaitaìraa. No te mea, mea na roto mai to na nunaa te tahi oraraa fifi, mai roto mai i te faatïtïraa. I teie ra taime ua faahoìhia ratou i roto i to ratou fenua. Te auraa, ua arataìhia mai ratou mai roto atu i te pohe e ua tae i roto i te ora.

         Ua hoì ratou i roto i to ratou òire tumu, oia hoi, o Ierutarema. Teie òire ta ratou i faaruè èra ê te tau, o tei nïnähia. Aita e mea i toe faahou i te raveraa a te ènemi. E òire âpï e te nehenehe maitaì teie e tià mai nei i mua ia ratou. Ua tià faahou te hiero e to na mau patu, ua horoà faahou te fenua i te ora, ua heeuri. Ua haamaitaì-faahou-hia to ratou fenua e te Atua. No reira, i mua i tera haamaitaì ta te Atua ia ratou, te tïtau nei o ia i te mau mea ora atoà ia haamaitaì i te Tumu o te Ora.

         To te raì, te vähi teitei tei hiòhia ei parahiraa no te Atua ; to te fenua e te mau î tei hiòhia ei taahiaraa âvae no te Atua, e te taata mä te mäìti òre i te tiàraa, te feïa mana e te mau taata atoà e tae noa atu te mau tamarii, te hohoà ia e te huru o te Atua, ia haamaitaì ratou i te Atua, to te raì, to te fenua e to na î e te mau taata atoà e pärahi ra i nià iho.

         E au ra e, ia hiòhia te manaò o teie taata taramo, e tarià to te mau mea atoà ta te Atua i rahu no te faaroo mai i ta na tiàororaa. Te amo noa ra teie taata i te òhipa ta te Atua i faaue nä taata matamua, « ia mana ôrua i nià i te mau mea atoà ta te Atua i hamani ». Ia ìte te mau mea ora atoà e, no roto mai i te Atua to ratou parau te tupuraa mai.

         Aita roa te taata taramo e faaìte ra e na hea te raì e te fenua i te haamaitaì i te Atua. Te auraa, e mea tiàmä ratou i mua i ta ratou huru haamaitaìraa. Ia hiò anaè tatou i te parau no te raì, te parau no te fenua, te parau no te tai, e ta ratou huru haamaitaìraa, mea na roto ia i te mau mea ta ratou e horoà mai nei no te ora ia o te taata. Aita e reo, aita e parau, te haamaitai ra ra i te Atua, te faaìte ra i te maitai o te Atua i roto i te taata, mai ta te taramo 19/1-4 e parau ra.

         Te piti, o tatou atoà te taata, tera e tïtauhia ra e haamaitaì i te Atua.

         Te tïtau nei o ia i to te raì, te fenua e to na î, e te mau taata atoà e parahi ra i nià iho ia faatüàti ia ratou no te haamaitaìraa. Mai tera ta te Fatu i parau e, « Te vähi e âmui ai e toopiti e e tooturu mä to ù nei ioà tei rotopu atoà ia vau ia ratou i reira. » Eita anei e tano atoà e parau e, te vähi e âmui ai to te fenua, to te raì e te reo o te taata mä te iòa o te Fatu, te reira atoà te Atua, te tumu no te mau mea ora atoà.

         E nunaa tatou no te Atua, e nunaa faaroo e ora nei i roto i teie ao mäòhi. I te tahi taime eere i te mea ôhie, ua rau te mea e faaturori nei i to tatou faaroo. I roto ra i te reira mau taime, aita atu ta na e raveà o te hororaa i te Atua ra na roto i te haamoriraa e te pure. Te tauturu nei ra te pure ia tatou i te ìteraa i te mau mea e vai ra i roto ia tatou.

         Aita e mea huna ta tatou i te Atua, e tano tatou e parau i te mau mea atoà e vai ra i roto i to tatou aau. Ua here te Atua ia tatou, e to na hinaaro o te oraraa ia i pihai iho ia tatou. Na roto i te pure te pahono nei tatou i taua here horoà noa no na ra. Na roto i te pure, te faahanahana nei, te haamauruuru nei, te haamaitaì nei e te ani nei tatou i te Atua.

         Ia ani anaè tatou i te Atua, eere ia no te faaìte ia na i te mau mea ta tatou e hinaaro ra, ua ìte ê na o ia i te reira. Te ani nei ra tatou i te Atua ia tauturu ia tatou i te faatupuraa i te parau tià e te parau mau i roto i teie nei ao. Eere ra na te Atua e òhipa no tatou, e faatura noa o ia ia tatou, e to na hinaaro ia rave tatou i ta tatou tuhaa.

         Te pureraa o te faaroo-atoà-raa ia i te Atua tei parahi fatata ia tatou. Te faaroo ra tatou i te reo o te Atua na roto i ta na parau, na roto anei i te tahi taata, e aore ra na roto i te tahi mau òhipa e tupu ra i roto i to tatou oraraa.

         Te maha teie o te mahana to tatou parahiraa i roto i te pure. Ia ìte ra tatou e, i roto i teie hepetoma pureraa na tatou, eere te tütonu-noa-raa i nià i te parau no te mau àti o te Fatu. Eere te faariroraa i te mau àti o te Fatu ei àti na tatou. Ia riro ra to na mau àti ei haamanaòraa i te taata ia tämau mäite i te hamaitaì i te Atua. No te mea no te taata teie mau àti i tupu ai i nià i te Fatu.

         No reira, ua riro noa teie hepetoma ei tautururaa ia tatou i te haamanaò i te hoì i roto i te haamaitaìraa i te Atua no ta na ôpuaraa faaora ta na i faaìte mai na roto i ta na Tamaiti.

         Te tauturu atoà mai ra o Ruta Ev.20/45 – 21/1-38, i te haamanaò i teie mau parau no te mea, ua faaara mai te Fatu i te mau òhipa e tupu mai i roto i te nunaa o te Atua. E tupu mai te fifi, te mau àti riàrià, te mau piri i roto i te raì, eiaha ra te reira ia riro ei haamataùraa i te taata. Ua riro ra ei faaitoitoraa ia tatou ia parahi noa te taata i roto i te òaòa e te haamaitaìraa. No te mea, ua faaarahia mai tatou i te òhipa e tupu mai, hou te hoìraa mai o te Fatu.

         Te auraa, tei parahi i roto i te araraa, e tei faaòhipa i te mau parau a te Fatu, eita o ia e haafifi i to na feruriraa ; eita te àti e te fifi e haataupupu ia na i te haamaitaì i to na Fatu. E haamaitaì ia na no te mea e mau tapaò te reira no te faaìte i te taata faaroo e, te fatata mai ra to na ora. No te mea, ua ìte o ia e, eere na te àti, eere na te ìno ta na e faaruru ra i roto i te oraraa e tapeà ia na i te farerei i to na Fatu. Eere na te mau mea pouri e haafifi ia na i te parahi i roto i te maramarama o te parau ; eere na te àti, te mauiui, te pohe e haafifi ia na i te tomo i roto i te ora ta te Tamaiti a te Atua i faaìte mai ia na. No reira, « Tei faaroo i te Tamaiti ra e ora mure òre to na, âreà tei òre e faaroo i te Tamaiti e òre o ia e ìte i te ora. »

Alain, Tetuanui a MAITERE òrometua.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens