Overblog Suivre ce blog
Editer l'article Administration Créer mon blog
12 septembre 2013 4 12 /09 /septembre /2013 23:34

Taiòraa.

 Ev. Ruta 18 : 9 – 14.

 Na pure e piti.

Te piiraa a te taata hara.

Te faatiàmaraa a te Fatu.

 

Ei manaò matamua.

E piti na taata teie e haere nei i te pure, no te faaìte i mua i te Atua i te òhipa ta raua e rave nei ia maitai ta raua faateiteiraa. To raua faanahoraa mea atea te tahi i te tahi, hoê te faaìte nei i te Mau òhipa ta na e rave nei ia moè te Atua i roto i to na Mau hinaaro, eiaha ra ia ìtehia te hinaaro o te Atua  i roto i te òhipa ta na i rave. Ua rahi aè to te tahi haapaòraa te òhipa ta te tahi i rave ei haapapuraa e, o ia te mea tià aè i mua i te Atua. Te tahi ra te haapaò noa ra ia o ia  ia  na iho, ma te faaìte i to na manaò peàpeà i te òhipa ta na i rave i mua i te Atua. To na manaòraa ra eita o ia i te mea tià i mua i te Atua, ta na e hinaaro nei ia arohahia mai o ia.

O te tahi huru teie no te oraraa o te taata faaroo i teie mahana, mea au roa na te taata i te haapaò o te huru o te tahi, i te aroha atu i to na taata tupu. Eita e tià i te taata ia faaòhipa i te titauraa a te Atua, ma te òre e horoà i te tahi manaò i nià iho a rave atu ai. O te huru teie o te taata e vai nei i roto i teie ao, tei nià i teie vahi to Ietu faatiàraa i teie parapore.

 Ei tuatapaparaa.

Ua parau atu ra o ia i teie nei parapore i te hoê pae taata i manaò ia rätou iho e e feia parau tià.

I roto i te Mau evaneria ua piri i te 50 rahiraa parapore i faatiàhia e Ietu. Ta Ruta noa i papaì e fatata i te 40 tei tuàti i te tahi atu Mau evaneria. Ta Ruta ua naeàhia ia 10 e tiàhapa, aita ia i roto i te tahi atu Mau evaneria. Mai teie parapore no te Faritea e te Torona, o Ruta anaè teie e faatià nei. O Teie atoà te tahi parau i te òmua - roa- raa o Ietu e faaìte o ia no vai ma teie parapore, no te tahi pae taata i manaò ia rätou iho e e feia parau tià. I ù nei eita i te mea fifi roa te reira, i te mea te feia parau tià i roto i te pipiria, e huru fatata rätou i te feia moà. Te feia parau tià, o te Mau taata ia tei haapaò i te Mau faaueraa a te Atua ma te òtohe òre. Tei faataa i to rätou oraraa ia parahi fatata noa rätou i te Mau ture, e i te Mau hinaaro o te Atua, i te po e te ao. Oia hoì te feia parau tià, e feia te reira tei mataù i te Atua, eita rätou e vahavaha ia vetahi ê, e tupu ra to rätou aroha noa atu e enemi no rätou.

E e vahavaha hoì ia vetahi ê :

Te haapapuhia nei i ù nei i te vahi hopeà no te irava 1 te òhipa ta te taata parau tià ia òre ia rave mauti  ra ia te vahavaharaa ia vetahi ê. Tei vahavaha ia vetahi ê ra e òre roa ia o ia e tià e riro i roto i te faanahoraa a te Atua. Te Atua iho aita roa O ia i vahavaha noa atu i te taata, ua faaora ra. O teie te huru o te Atua e faaìtehia nei e Ietu, e Atua tei parahi fatata noa i te taata, to na hinaaro ia ìtehia O ia i roto i te vahi ua ère te taata i te aroha, te here, ei tautururaa. Eita ra te Atua e titau mai i te faahoìraa, eita O ia e tiai i te haamauruururaa. Teie Mau manaò ei hiòraa ia i te faanahoraa no te huru o te parapore ta Ietu e faatiàhia nei, e tià ia parauhia e tei roto i teie irava 9 to Ruta horoàraa, no vai ma teie parau, e  e aha to na fä.  Tei te irava 10 te haamataraa te parapore. Te feia e vahavaha ia vetahi ê, e tapaò te reira no te paruparu o te faaroo. E hohoà teie tei hinaaro noa e turui i nià i te tahi no te faatiàmaraa ia na iho, e rave noa o ia i te òhipa eiaha no te mea ia maitaì te tahi, ia ìtehia ra o ia te mea faahiahia aè i te tahi. To na auraa eita o ia e hape, e tano noa o ia. 

Haere atu ra e toopiti pue taata i nià i te hiero ra e pure ; e Faritea e tahi e Terona e tahi.

Te faatià nei o Ietu i teie parau, ia tià i te taata e faaroo ra ia haapaò maitai i te faufaa e horoàhia nei. O te tahi parau Mau ààu roa i te taata teie, o te faaauhia i nià i te huru taata atoà . Maite mea ra te tuuhia nei teie na taata i mua i to tätou mata, ia noaa i te hiòraa na roto i te hoê hohoà e patahia ra. Teie na taata mea taaê te tahi i te tahi, hoê e taata haapaò i te faanahoraa a te Atua, hoê ra e taata òhi moni ia tei faautuàhia i nià i te taata. Te vahi ra e àmui ai raua i te hiero ia i mua i te Atua.

Te Faritea, e taata eita e tià ia parauhia, e taata parau tià.

Te Torona, o te huru ia o te taata hara, o te hohoà o te taata tei parahi  noa i roto i te faahaparaa a te nunaa.

E na taata au – òre- hia teie e te nunaa e na taata moni, tei vahavahahia i te òhipa ta raua e rave nei. E ta raua òhipa i te mahana te taiòraa ia i te moni a te hau Roma. Te haere nei raua to piti atoà ra i te hiero no te pure.

Tià noa iho ra te Faritea o ia anaè ra, pure atu ra, na ò atu ra, e haamaitaì au ia òe, e te Atua, i te mea e ère  au mai te taata atoà nei, i te popore taoà, e te parau tià òre, e te faaturi, mai tera ra terona hoì. Taipiti a ù haapaeraa maa i te hepetoma hoê e te horoà nei au i te àhuru o te Mau taoà atoà na ù nei.

A hiò na tätou i te huru o teie Faritea, i te haapaò i te ture no te oraraa faaroo, e te oraraa tivira. Eita roa o ia e naeàhia i te faahaparaa a te ture, te rave nei o ia i te reira ma te ààu atoà . Te haapaò nei o ia i te ture mai tei papaìhia, eita o ia e hinaaro ia mairi  hoê aè  parau  o te ture, mai ta te ture e faahiti ra mai tei reira atoà to na itoito. Te ture no te tuhaa àhuru, ua faataahia ia te reira ei tautururaa i te feia veve, e te Mau òhipa no roto i te fare pureraa, te vahi e haamorihia ai te Atua. Teie nei te Mau Faritea, ua faanaho faahou rätou i te tahi atu tuhaa àhuru i nià i te Mau maa ta rätou e hoo mai i te fare toa. Ia  faaroo tätou i te pure a teie taata Faritea, aita o ia e ani nei i te Atua i te tahi atu Mau tauturu, te haamaitaì nei ra o ia i te òhipa ta na e rave nei, ma te haapapu eita o ia i te hoê taata popore taoà. Teie nei ra, te vahi tià òre o teie Faritea, to na ia faariroraa ia na ei taata, tei faaìte i te hape o te tahi, te faaìte nei o ia i te huru tià òre o te Terona i mua i te ture, e taata popore taoà, parau tià òre, e te faaturi. Teie hohoà taata, eiaha tätou e manaò e, tei roto noa i teie parapore te vairaa, ua tae atoà mai i o tätou nei i teie mahana. E parau- atoà- hia teie huru taata i te ‘’hypocrite’’ i teie ia mahana. Te vahi tià òre o teie Faritea to na ia faateiteiraa ia na iho i mua i te Atua, e tià ia parauhia e ua moè te Atua i roto i to na teòteò. Àhiri o ia i ani i te Atua no to na taeaè te Terona i te tauturu, i reira e faufaahia ai te òhipa ta na e faatupu nei i te Mau mahana atoà.

Àreà te Terona, te tià noa ra ia i te atea ê, aore i hiò noa  atu ta  na mata i nià i te raì, papaì noa iho ra i to na iho òuma, na ò atu ra, E te Atua, e aroha mai òe ia  ù i te taata hara nei.

Aita o ia e haava nei i te tahi, te haava noa nei o ia ia na iho, ma te ìte i to na atea ra i te Atua. Te ìte atoà nei tätou e, aita ta na tapura no te Mau òhipa ta na i rave, e aita atoà ta na tapura no te faahapa i te tahi . Ta na noa e hinaaro nei ia arohahia mai o ia e te Atua i te mea, te ìte nei o ia i to na paruparu, i te Mau òhipa ta na e rave nei. Ma te ìte e, aita atu e faaitoitoraa e tià ia na ia rave, oia hoì ia, to na ia ìteraa ia na iho i roto i te hara ta na i faatupu, tei haafifi i to na tiàturiraa i mua i te Atua. Ia òre te taata e ìte ia na iho i roto i te hara ta na i rave, e òre atoà o ia e ìte i te parau i te Atua e aroha mai òe ia ù. I te reira taime ra te o ra ia o ia i roto i te pupu taata no te Faritea faahapa taata. Àreà  tei ìte i ta na hara i roto ia na iho na mua roa, a tuu atu i te parau no te aroha faaòreraa hara i te Atua tei reira taata te naò ra ia o Ietu.

E faaìte atu vau ia outou, i hoì mai ra taua taata ra i te ùtuafare ma te tiàhia mai, aore te tahi ; o tei faateitei hoì ia na iho ra, e faahaehaahia ia e o tei faahaehaa ia na iho ra, e faateiteihia ia.

Te auraa teie no te parapore, i faatiàhia e Ietu, te topa nei teie parau mai te hoê haruru patiri tei faaàueue te tiàturiraa o te taata. Teie ra aita o Ietu e horoà nei i te tatararaa no teie parau. Te vaiiho nei O ia te reira i roto i te taata e taiò nei, ia tià i te reira ia horoà i to na manaò. Te vahi ra e faaarahia ra i roto i teie parapore, ia òre tätou ia topa i roto i te faatiàraa ia tätou iho i mua i te Atua.

Ei haapiiraa.

Te vai nei i roto i teie parapore, e piti tumu parau. Oia hoì, aita e taata parau tià i mua i te Atua, e taata faatiàhia ra e te Atua, E aita atoà e taata maitaì i mua i te Atua, e taata haamaitaìhia ra.

 

                                                                                                          Terai or.   

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens