Overblog Suivre ce blog
Editer l'article Administration Créer mon blog
13 février 2013 3 13 /02 /février /2013 17:21

Tapati 17 no Mati 2013

Te taiòraa Ev Ruta 16,19 – 31

19 I parahi na te hoê taata taoà rahi, e àhu ùra e te àhu maitaì ta na e àhu, e àmuraa maa rahi nehenehe ta na i te mau mahana atoà.

20 e te hoê taata taoà òre hoì o Rataro te iòa, i vai – iho - hia i to na ra ùputa, ua àti roa i te maì.

21 ua ani atu ra i te huà rii maa i maìri no nià i te àmuraa maa a taua taata taoà ra : e ua haere mai ra te mau ùri ua mitimiti i te mau maì no na ra.

22 E pohe iho ra taua taata taoà òre ra, hopoihia atu ra ò ia e te mau merahi i nià roa iho i te òuma o Aperahama : e pohe iho ra hoì taua taata taoà rahi ra, e tanuhia iho ra.

23 e àti atu ra ò ia i te mauiui rahi i hate, ua nânâ aè ra i ta na mata i nià, ìte atu ra ia Aperahama i te atea ê, e ia Rataro i nià iho i to na òuma :

24 ua pii atu ra ò ia, na ô atu ra, E paino, e Aperahama e, e aroha mai òe ia ù, e tono mai òe ia Rataro ia uhi ò ia i ta na auru rima i te pape, èi faatoètoè i tau arero nei ; ua àti roa vau i te mauiui rahi i teie nei auahi ura.

25 Ua parau mai ra Aperahama, E tau tamaiti, a haamanaò na, e maitaì to òe i to oraraa ra, e e ìno hoì to Rataro ; i teie nei rä, ua faaîhia ò ia i te òaòa, e ua àti òe i te mauiui rahi.

26 E e area rahi hoì tei tuuhia i ropu ia tätou, e òre to ò nei e tae atu i ö òutou na ia haere atu ; e òre atoà to ò na e tae mai i ò nei i ö mätou nei.

27 Ua parau atu ra ò ia, Teie maori ta ù parau ia òe, e paino, E tono òe ia na i te fare o ta ù metua ra.

28 toopae hoì o ù taeaè, e aò atu ò ia ia rätou, o te tae atoà mai rätou i roto i teie vahi mauiui rahi.

29 Ua parau mai ra Aperahama ia na, Tei ia rätou Mote e te mau perofeta, a faaroo rätou i te reira.

30 Ua parau atu ra ò ia, Eiaha, e paino, e Aperahama, ia haere atu rä te hoê taata ia rätou mai te pohe atu, e tatarahapa ia rätou.

31 Ua parau mai ra ò ia, Ia òre rätou ia faaroo ia Mote e te mau perofeta ra  tià noa te hoê taata mai te pohe atu, e òre a rätou e faaroo i te aò.

Ei  tuatapaparaa i te auraa o te taiòraa.

Ev. Ruta 16 :19- 31.                                               

Te òaòa o te taata taoà.

Te òto o Rataro.

To raua pohe

Te mauiui o te taata taoà i mua i te Atua.

Te ärea o te ora.

Ei manaò matamua.

O Ruta anaè teie e faatià nei i teie parapore, ma te faahiti i tei iòa o te hoê taata, o Rataro. I roto i te tahi atu Mau parapore aita ia te iòa o te Mau taata e faahitihia ra Eiaha ra tatou ia  manaò e teie Rataro, o te Rataro ia ta Ioane e parau ra i roto i te pene 11.Eita e òre te tuuraa o Ruta teie iòa i roto i te parapore no te faaìte ia i te faufaa o te òhipa ta te Atua e faatupu i nià i to na Mau taata tupu. Inaha  te auraa o teie iòa, UA TAUTURU MAI TE ATUA.

E piti tuhaa päpu maitaì to teie taiòraa, te ìrava 19 e tae i te ìrava 26, te tuhaa ia e tupu i te fenua nei. Te piti o te tuhaa te ìrava 27 - 31, te òhipa ia e tupu i mua i te aro no Aperahama. Te òhipa mätamua e ìtehia  nei to raua oraraa i te fenua nei, ua vai noa te area i ropu i na taata toopiti nei, te faanaò  nei  te taata taoà i te Mau maitaì atoà, o ta na e hinaaro ra. O Rataro ra te faanaò  nei ia ò ai i te Mau toeà rii e òre e hinaarohia nei e teie taata taoà, e te òre –raa -hia e haapaò. Ia pohe raua e hopoihia o Rataro e te merahi i nià i te òuma no Aperahama, e te taata taoà e tanuhia. I te raì i mua i te aro no Aperahama. I reira ua vai a te hoê area i ropu i teie taata. Tei te vahi maitaì ia o Rataro, areà ra te taata taoà tei te tahi vahi ia èita e tano ia faaea. Te area i vai i te fenua ua tae roa i mua ia Aperahama, ua huri ra te vahi maitaì.

E tupu nei te piiraa a te taata taoà, ma te parau e toru taime e paìno e, te ìte nei teie taata i te tiàraa metua here o Aperahama. Ia horoà o Aperahama i roto ia Rataro i te hoê òhipa, no te faarariraa i ta na arero i te pape toètoè. Aita ra i tiàhia  teie aniraa, i te mea e area rahi te vai ra rotopu ia rätou

Parau faahou atu ra te taata taoà ia faahoìhia ò ia i te fenua no te faaìte i to na mau taeaè e pae ia haapaò i te parau no te tatarahapa. Aita atoà i tiàhia teie aniraa No te aha, tei ia rätou ra te Ture a Mote e te Mau perofeta.

E te aniraa hopeà a teie taata taoà, mauti ra ia, ia tuuhia te hoê taata maite pohe no te faaìte i to na Mau taeaè, aita atoà i tiàhia. No te mea e rave rahi te Mau täpaò i ravehia i mua ia rätou aita i tiàturihia, faatupu noa atu ai teie Mau täpaò e vai pöuri noa iho a teie pupu taata i te parau no te tatarahapa.

Ua manaò teie taata taoà e, to na tiàraa faahiahia i te fenua, e te rahi o ta na taoà e faufaahia te reira i mua i te aro no Aperahama. Te hinaaro nei o Aperahama e faaìte te mau òhipa o te fenua no te fenua ia, i te fenua nei e haapii ai i te ture no te aroha, i te fenua nei e faaroo i te mau parau a te Atua, i te fenua nei e haapii ai te parau no te tätarahapa, èita ra i muri aè i te pohe, e aore ra ia fatata i te pohe.

Ei hiòraa i te auraa.

Te tahi auraa e vai nei i roto i te parapore, èita ia tei nià i te rahi no te taoà a teie taata, òia te moni. Tei nià ra i te FAUFAA  NO TE  PARAU  A TE ATUA, tei  faaìtehia i roto i te Ture a te Atua, e te Mau parau a te Mau perofeta. Mai tei faaìtehia i roto i te pene 14, 15, e te 16, e Mau parau teie e faatiàhia ra ia ìte te Mau faritea, i te area ta rätou e faatupu nei ia atea ai te taata i te Atua. Te hinaaro nei o Ietu e faaära i te Mau Faritea aita i taere roa no te faahuri i te vahi e òre ai te area. Te òhipa e rave te haafaufaaraa ia  i te PARAU A TE ATUA, ia ìtehia te tätarahapa, no faaruèraa i te Mau parau te tià e faaàano te area e vai ra i ropu te taata e te taata, te taata e te Atua.

Ua tupu teie parau i roto i na vahi e piti, te fenua nei, e vahi ia i reira te taata e haapii ai ia na i te ture a te Atua, ia noaa ia na te faaitoitoraa no te faatupuraa i te Mau faaueraa a te Atua. E no te faarooraa i te reo o te Mau perofeta.  Ia tae i mua i te aro no Aperahama aita e haapiiraa faahou i reira, e haavaraa te tiaì mai ra. To na auraa ra i te fenua nei e haapuai ai te parau no te haapiiraa, eiaha ra i mua i te aro o te Atua. I te fenua nei e tävini ai i te Atua, eiaha ra ia tae i roto i te patireia, aita e täviniraa faahou to reira, e haamaitaìraa rä

I te mea na te PARAU A TE ATUA e faaî  nei te Area rahi e vai nei ropu i te taata e te taata, e i ropu i te taata e te Atua.

Te nahea nei tätou i te PARAU A TE ATUA I TEIE  MAHANA ?

E tià ia parauhia te hinaarohia mai ra ia tupu i roto i te oraraa o te taata i to na pae, te faatanoraa ia na i  te mau hinaaro o te Atua te tïtau noa nei O ia i te taata i roto i te oraraa. Inaha, ua tauàti- atoà -hia te oraraa o te taata i nià i te Atua. Tätou hoì i te tahi pae e te Atua i to na pae, na te hinaaro hoì o te aroha e täamu ra ia tätou.

 Hoê hiòraa, mai te peu, e faatano tätou i te töparaa hoë o te vaa, e tïtau –atoà -hia i to tätou pae ia haapae i te tahi huru, tei òre e au ia tätou ia rave i nià i teie vaa, no te mea e haafifi te reira i te tere maitaìraa o te vaa e tae atu ai i te tipaeraa. Te taata tei òre e hinaaro e haapae i te mau mea atoà e haafifi i te tupu maitaìraa o te hau, te maitaì e te ora hoì, tei òre i ineine i te färii e haapae i te mau mea atoà ta te hinaaro o te Atua e tïtau mai ra, e aha ia te faufaa o te mau hinaaro o te Atua i roto i te täviniraa i te Atua parau mau e te parau tià.

Ia faahope rä te taata i to na manaò, to na püai, to na àau, to na värua no te Atua anaè e no na anaè e ìtehia ai te moà o te Atua. Te taata rä i tae i nià i teie tïtauraa no te mea ia, ua noaa ia na te haapaeraa i ta te taata. Eita atoà hoì e tià i te taata ia rave i nä huru e piti atoà, no te mea, te haapäpü noa mai ra te mau hinaaro o te Atua e no teihea pae tätou. Ia hinaaro hoì o ia i te ora, e haere tià ò ia i te vähi tei reira te ora e ìtehia ai, ò ia hoì i roto i te hinaaro e te aroha o te Atua i te taata.

No reira tätou e hinaaro nei i te Atua, ia òre hoì tätou ia riàrià i te ìno, te parau –tià - òre, te haavare, te manaò ìno, aore ia e vaiiho noa tätou ia tupu ruperupe noa na taua mau ìno atoà ra, ia òre hoì tätou ia horoà i to tätou püai no te haapaò i te reira mau mea atoà e nahea ia te Atua e riro faahou ai, èi Atua no tätou, e nahea ia tätou e riro mau ai èi tamarii atoà nä na. E nahea ta na parau e riro ai èi parau maitaì no te arataì ia tätou i nià i te èà e tupu ai te hau, te maitaì e te ora. Ia òre ia tupu te tahi area i ropu ia tätou e te Atua.

Te òhipa ia e tupu nei i roto i ta tätou parapore te parau no teie taata taoà, ua tae roa ò ia i mua i aro no Aperahama aita ò ia i tatarahapa. No te aha ? No te mea aita ò ia e hinaaro nei ia faaorahia ò ia e te Atua. Te ahi e vai ra i mua ia na, e auahi ia no te faa – òre – raa hara, no te täma i te viivii o teie nei ao. Aita ra ò ia i rave ua nounou aè na na i te tutau i roto i te hara, i te faaoraraa a te Atua. Àhiri ò ia i färii e tämahia ò ia, mai te tämaraa, e tämahia nei te piru. I te mea mai teie te huru ia tämahia te piru, e tuuhia i roto i te auahi te mau vahi èita i te piru e faataahia, e toe noa mai te piru.

O ia ia tätou te taata nei e piru tätou i mua i te aro o te Atua, no te mea na to na iho rima i miri ia tätou. Te òhipa i tupu i te tau no te arii ra o Neputaneta, e te huriraahia te mau tävini o te Atua i roto i te auahi o Taniera, Apete - Neto, e o Meteta, i te mea aita rätou i tuu i te turi i mua i te tii i hamanihia e te Arii, e ua tämahia rätou e teie auahi. Òia atoà ia te reo o Ioane Päpetito, i te piiraa i te metepara, e tätarahapa e päpetito hoì au ia òutou i te pape, te vai nei te hoê e na muri mai ia ù, e päpetito ia ia òutou i te auahi. O te òhipa atoà ia i tupu i te mahana penetetote te poüraa mai te ahi mai te arero maa ra te huru i nià i te mau àpotetoro.

<<Aita ra vau e parau atu ra ia òutou e haere e tähu i te auahi no te tämaraa i to tätou viivii, i reira ra èita atu ra te tämaraa e tunu paaraa te reira >>

Te auahi e faahitihia nei e te parapore mauti ra ia te PARAU A TE ATUA, e ìtehia taua mau parau ra i roto i te PIPIRIA, tei reira te faahitiraahia te mau ture a te Atua, tei tuuhia ia Mote ra, e tae noa atu te mau perofeta, aita teie mau parau i roto i te raì, tei te fenua nei, aita e tätarahaparaa i roto i te patireia, tei te fenua nei e tätarahapa ai, aita e haamoriraa to roto i te patireia, tei fenua nei e haamori ai i te Atua. O ta Iatopa ia parau i mua i te Atua, o vau e ta ù ùtuafare e haamori mätou ia i te Atua ra ia Iehova.

 

E  o tätou, o vai ta tätou e haamori ?

Ia ora na.

Terai or. 

 

 

 

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens