Overblog Suivre ce blog
Editer l'article Administration Créer mon blog
12 février 2013 2 12 /02 /février /2013 21:55

Tapati 3 no Mati 2013

Te tahi auraa no te mau taiòraa e maha atoà

1) ETOTO 3 /1‑15

Mote i mua i te tïtauraa a te Atua

O vai te Atua

Ta te Atua arataìraa

Te iòa o te Atua (ir.2 14)

Te faarooraa i te Parau

Ìte e faaroo

          Tei nià i te mouà te tupuraa teie parau, te mouà o Horepa, mea maitaì atoà ra ia tätou ia ìte e, i roto i te tahi faahitiraa e parau – atoà - hia nei teie mouà o Tinai.

          Te vahi ra e tapeà mai mauti ra ia te òhipa e tupu ra i nià i teie mouà. To te Atua farereiraa ia Mote no te hoê täpura òhipa pä pu, èi FAATIÀMARAA i to na nunaa tei vai i roto i te FAATÎTÎRAA i te fenua Aifiti.

           E aha òhipa e tupu nei i nià i te mouà ?

O te hoê ia auähi tei àma i roto i te pü àihere, ma te pau òre te mau àmaa i te auähi.

           No Mote hoê taime faufaa roa no na i te mea hoê tupuraa teie òhipa i roto i to na oraraa. I te àparauraa i te Atua no to na mau hui tupuna (Aperahama, Itaata, Iatopa)

           Mea tïtauhia ia Mote e ìriti te tiäa i ta na àvae, i te vahi tei reira te Atua i te faaearaa e vahi moà ia. Ua mataù Mote i teie farereiraa na na i te Atua, e ua püòhu  i ta na mäta èi faaìte i to na faatura e to na faufaa òre i mua i te aro o te Atua. E tià ia parauhia o te hoê teie haamaitaìraa na te Atua no te hoê oraraa âpï.

            Te iòa ta te Atua e horoà nei ia Mote « TE VAI NEI AU, VAU E VAI NEI , e aore ra « O VAU NA VAI O VAU , e aore ra « O VAU TEIE, NA VAI O VAU . Teie na huriraa e toru nei mai roto mai i te Hepera, te faaìte nei ia te puai no te ora e horoàhia nei i te iòa o te Atua. Tei parauhia o  Iahve , o IEHOVA to na auraa, tei roto i te tau i maìri i teie mahana, e ämuri noa atu.

             E tià ia parauhia teie te 13 no te tenetere hou Ietu‑Metia, te tupuraa teie parau i te pae hopeà no te faatereraa a Faraò (Ramses II). E i te òmuaraa no te faatereraa (Meraeptah) i te matahiti 1208‑1209 hou o Ietu­ - Metia.

‑ Ua ìte te Atua i te Mauiui o to na Nunaa

‑ Ua Faaroo i te Aue

‑ Ua Pöu mai no te Faaora.

             No te ìriti i te hoê täpura òhipa âpï na Mote, eita atu ra o ia i te tiaì mamoe, e haere ra o ia e arataì i te Nunaa o te Atua i rapae i te òhipa tià ore e ravehia nei e Faraò.

 

2) TARAMO 103

E Haamaitaì i te Atua

E Faaî i te Maitaì

Te Faaìteraa

Eita te Atua e Riri vave

E Tiàturi, e Tavini

               Te Parau i faahitihia na e te Atua ia Mote i te hoê tau, te tupu nei ia te reira i roto i teie Taramo. E to Tavita faaìteraa i teie Pure i mua i te Atua. E pure mai roto mai i te hohonuraa o to na ààu, e tae noa atu i te faufaa e vai ra i roto i to na Varua.

            Te pure nei o Tavita no te mau taata e rave rahi, e haamata teie tuhaa mai te ìrava 3 e tae noa atu te ìrava 19, to Tavita faaìteraa i te mau maitaì atoà o te Atua.

‑ Te Faaòreraa i te Hapa a te mau Taata

‑ Te Fäìraa i te Vaha o te Taata Paieti i te Maitaì

‑ Te Faaâpïraa

‑ Te Aroha Metua o te Atua

‑ Te Faaìteraa i te Ruperupe o te Taata.

             E faahope o Tavita i teie pure na roto i te mau merahi, e tae noa atu te mau tavini, e te mau òhipa atoà e faatupu ra i te Hau. Te ìtehia nei teie tuhaa i te ìrava 20 e tae noa atu i te ìrava 22.

           To na auraa teie pure ta Tavita, to na ia faaìteraa i te tupuraa te òhipa i tuuhia i roto ia Mote, e i te Tamarii Iteraera.

           Ta te ìrava 7 ia e haapäpu ra. Ua faaìte o ia i ta na Haapaòraa ia Mote, e ta na òhipa i te Tamarii Iteraèra. O ia hoì ia paò te Parau a te Atua i roto i to na nunaa e tià ai.

            Teie te tahi hohoà pure e faaìtehia nei e Tavita, e faanahoraa huru taaê.

1 ) Te faaìte nei o Tavita no hia mai te faufaa o to na manaò, no roto mai ia i to na Varua, e to na tino.

2) Te faaìteraa ia i te Maitaì o te Atua e to na Tiàraa Metua.

3) Ia haamaitaì atoà te mau Merahi i te Atua.

4) Te mau Tavini

5) Te mau òhipa atoà.

Èi faahoperaa e faahoì faahou o Tavita i te Parau i nià ia na.

E haamaitaì ia Iehova, e tau varua e.

 

3) I TORINETIA 10, 1‑12

Ta te Atua i Päpetito

Te Mäto o te Ora

Te mau Tupuna tei pohe i te Metepara

Ia ara te mau Taata Paieti

          Tamaa, e Inu.

            I roto i teie epitetore na Pauro i to Torinetia, te haamanaò faahou nei o ia i te mau òhipa i tupu na i te Metepara i te tau no te Tamarii Iteraèra, te Mähutiraa mai Àifiti, e te haereraa na roto i te Metepara, e te HAERE‑ATOÀ‑RAA na roto i te Miti ùteùte, te àmuraa i te mäna, e te ïnuraa i te päpe mai roto mai i te mato.

 

E te taatoàraa o te mau Tupuna no te mau Tamarii Iteraèra, ua taòto ia i roto i te Metepara.

          Teie mau òhipa i tupu, te hinaaro nei o Pauro e faaìte i te hoê hohoà ia riro èi Faaararaa i te Ètäretia e te Piri nei Tätou i roto i te parau no te fafauraa âpï ia au i te Metia. Oia hoì, ia ara ia te Ètäretia ia òre atoà te nunaa âpï o te Atua ia topä i roto i teie huru hohoà i tupu na i tahito ra. Te reira te vahi faufaa, ia faahiti te mau òhipa i Tahito ra, ia riro èi haapiiraa no teie mahana e no ànanahi.

          Te mau Parau atoà e faahiti nei e Pauro, aita ia to na taaêraa i te mau parau i roto i te faufaa tahito e te faufaa âpï.. I  faaïnu na te Atua i to na nunaa i te Päpe, e i faaamu na i te maa i te Metepara.

           E o Ietu ua faaamu atoà i te mau taata, eiaha ra i te hoê nunaa, i te mau nunaa atoà ra o te ao nei, ma te Päpetito atoà te mau taata e tïtau nei te Ora e vai ra i roto i te faufaa a te Atua. To na auraa ra ia haapäpu ia te Ètäretia i te Faufaa o te Päpetitoraa, e te oroà Eufari.

 

4)  Ev. RUTA 13/1‑9

      Te Pohe o te mau Taata no Tarirea

       Ia Tatarahapa te Taata e Tià ai

       Te Tute Hotu Ore

       Vaiiho rii mai i Àtuàtuhia.

E piti tuhaa päpu teie e vai nei i roto i teie Parau

1) te ìrava 1 ‑ 5. Te òhipa riaria ia, i ravehia e Pirato i nià i te fëia Pupu Tutia, tei ànoìhia to rätou toto, i te toto o te Animara.

2) te Parapore no te tumu tute tei òre i hotu, i te taeraa i te taime òotiraa. Te manaò. O te Fatu e tapu i te mea te faaäpiäpi ra i te faaapu. Te manaò ra o te Tavini, e vaiiho hoê aè matahiti toe, ia àtuàtuhia.

           I roto i teie na tuhaa e piti, mea maitaì ia päpu ia tätou, te tahi vahi hohonu o teie pene parau, mau ti ra ia, ia ìte te taata i te hoì i te Atua ra. Oia hoì hoê piiraa rü teie ia tatarahapa te mau taata atoà.

           Ietu i mua i te hoê pupu taata piri i te nuu Faritea, teie o ia e uihia nei, o vai te tumu o te pohe o te mau Taata Tarirea, tei taparahihia e Pirato, e teie na taata 18 tei topahia e te patu rahi ra no te Fare i Tiroama.

           Te manaò o teie pupu taata no ta rätou hara i pohe ai rätou. I teie mahana Aita‑atoà nei ra e tupu nei teie hohoa feruriraa ?

            No Ietu aita o ia e färii nei teie huru Feruriraa manaò, te hara aita e mea rahi, aita e mea iti, e hara ra ta te mau taata, te mea pöria, te mea tiàhape, te mea taoà, te mea taoà ore, te fëia parau tià, te fëia parau tià òre, e hara anaè ta te mau taata atoà. Teie ra te faaara nei o Ietu ia òre te taata ia tatarahapa, mai te reira atoà to rätou pohe.

            Te ìrava 3 i te vähi hopeà tei reira o Ietu i te haapäpuraa teie manaò. Teie nei ua topä te parau a Ietu, mai te hoê ra òpahi te huru te tià e täpu i te vähi hapa e vai ra i nià i te taata. Tei te hea pae te rave i te tatarahapa no te oraa i roto i te òaòaraa no te ora, e aore ra te faatea‑ê‑raa i te piiraa a Ietu e, e tatarahapa.

 

Te parau ra no te tumu tute hotu ore, o te hohoà ia no te taata tei òre i tatarahapa, te manaò o te Fatu ô ra e täpu, eiaha teie tumu tute ia huti noa te maitaì o te fenua ma te faufaa òre, aita hoê aè hotu ia tae i te taime òotiraa. Te manaò ra o te taata haapaò e vaiiho rii hoê aè matahiti toe ia ruperupehia, aita anaè ra e täpu atu ai. Te horoà faahouhia nei te hoê manuiaraa no teie tumu tute. Oia atoà ia te Piiraa a Ietu ia TATARAHAPA.

 

Èi auraa no na taiòraa e maha

          Èi hiòraa i te tahi auraa no teie mau tuatapaparaa i ravehia aè nei. Te ìtehia nei ia te rahiraa o te mau parau, e te mau manaò e faahitihia ra, ia au i te hoê taime, e no te tupuraa no te hoê òhipa.

          Te ETOTO 3/1‑15. Te heheu nei te Atua ia na i mua ia Mote i nià i te mouà ra no Horepa, ia haere o ia e ìriti mai i to na Nunaa i Àifiti, no te faatiàma. Na te  VAI NEI AU  i to no mai.

          Te TARAMO 103. E faaòre te Atua i te mau hapa a te Taata.

Te I TORINETIA 10,1‑12. Te faatià mai nei o Pauro i te àamu no te nunaa o te Atua i te Metepara, tei riro ei hiòraa na tätou i teie mahana, e teie nei o tei manaò e te tià ra o ia, e ara o te Hià.

           Te EV. RUTA 13,1‑9. No te aha te tahi pae i taparahi pohe‑roa‑hia ai, aita te tahi pae? E faahaparaa anei na te Atua. Te manaò ia o te mau Àti Iuta, no to rätou ia haapaò òre, i to tätou ia manaòraa.

            Eita roa ia, e piti taime to Ietu parauraa e ia òre ra òutou ia tatarahapa, mai te reira atoà ia to òutou pohe, i te ìrava 3 e te 5 i te vahi hopeà, e ia ìtehia i roto ia Ietu te parau a te Atua “ Te vai nei au o Vau e vai nei”, e fëia hara anaè tätou. Te fëia i taparahihia e Pirato i te vahi pupuraa tutia, e te fëia i maìrihia e te patu i Tiroama, mau taata ia te reira tei ìte i ta rätou hara i mua i te Atua. Areà ra te mau Faritea aita roa ia rätou e ìte, e fëia hara atoà rätou, te manaò rätou e, te tià ra rätou.

             Te aniraa e, e vaiiho a hoê matahiti èi faaìteraa ia e, te faaâpï faahou nei te Atua i to na faaòromai, i te feia e tïtauhia ra i te tatarahapa.

             Teie atu ra te tahi auraa no na taiòraa e maha nei.

             Eita na te ìno o te Taata, e faaòre te Maitaì o te Atua. Teie parau e ìte maitehia i roto i te parau maitaì a Ietu i te pene 13 i te ìrava 1 e tae i te ìrava 9 ia au te papaìraa a Ruta.

              Te mau tatararaa manaò i horoàhia mai e Ietu i mua i te mau parau tià ore e faahitihià ra e te mau taata i te pohe no te fëia no Tarirea.

               E òhipa pinepine teie tei tupu i te tau no Ietu, mai ta tätou e faaroo atoà nei i teie mahana, te faatupuraa te tahi pae i te peàpeà.

                Te parauhia ra te pohe o te fëia no Tarirea, mea na roto ia i te hoê faahuehueraa i ravehia e teie pupu taata te Terote (Zelotes).

              E mau taata teie aita e tuàti nei i te faatereraa poritita a te hau Roma; O rätou te tahi i tupu ai teie òhipa riàrià. Tei roto i te taime no te pureraa, l te taime te ani nei rätou i te tauturu i te Atua na roto i te püpüraa tutia, i tupu ai teie àroraa i ropu i te mau faaèhau Roma, e teie pupu taata Terote.

            O te tahi teie tuatapaparaa no teie àti teimaha mau. Ta te mau taata ia, i haere mai e faaìte ia Ietu. Ia tià ia Ietu ia rave te tahi faaotiraa no teie òhipa i tupu.

            O vai ta Ietu e faahapa te mau faaèhau a Pirato, e aore ra te mau taata faahuehue? Tei arataì i te nunaa i nià i te hoê èà, aita to na e Ora. Eita o Ietu e rave i te hoê paeraa i te tahi, e i te tahi. E àpe ra o Ietu i te faanahoraa a Pirato, e tae noa atu i te feia faahuehue, e te feia i taparahihia.

             E parau ra o Ietu i te parau no te Hara e te Tatarahapa. Te tuu nei o Ietu i te feruriraa o te taata i nià atu i te hoê faito, no te titià maiteraa te tumu i haamata ai teie òhipa riàrià.

             Eiaha e hiò noa te tupuraa te òhipa, e hiò ra mea nahea te tupuraa i parau ai o Ietu i te parau no te hara, e te tatarahapa. No te reira, o Pirato, te faaèhau, te fëia faahuehue, te feia i taparahihia, te feia i haere mai e faaìte ia Ietu, e fëia hara anaè ia, no rätou atoà te parau no te tatarahapa ta Ietu e parau nei e piti taime i te ìrava 3 e i te irava5.

              Te vavahi nei o Ietu i te mau manaò haava tià òre e vai nei i roto i teie fëia. Ia au i te manaò o teie fëia, te fëia i pohe e faahaparaa te reira na te Atua, e fëia hara ia.

               I teie mahana te vai noa nei teie huru manaò, e manaò tià ore. No Ietu, aita roa te hoe tuàtiraa i roto i te fifi e te hara, i roto i te haavaraa e te tatarahapa. I te parau i te tahi o òe te tumu o teie òhipa i fifi i tae ai tätou i te haavaraa mea òhie roa. Te reira taime te horo nei ia tätou i roto i te pupu tei parauhia o te tano, ma te taa òre te tumu i tano ai, aita ia i ìte te vahi hapa roa atu ia.

            Ta Ietu ra e hinaaro nei, ia ìte maite tätou i te rave i ta tätou hopoià, ia òre ia horo vave noa i te hoê vahi tei manaòhia o te haereraa mau te reira. E inaha te haere atu ra ia na te hoê vahi eita e matara ia tatara.

            Ua haere mai teie fëia i mua ia Ietu ia tià ia ravehia te hoê faahaparaa i nià ia Pirato, e te fëia i pohe. Eita o Ietu e fariu i nià i te òhipa i tupu, e parau ra o Ietu i teie fëia, te pohe nei te fëia Tarirea, aita ta rätou hara i rahi aè i ta òutou. E mea òpuahia to rätou pohe, i te taime tei roto rätou i te haamoriraa i te Atua.

            Te faahoì nei o Ietu i te parau i nià i teie fëia àfaì parau. Ia òre òutou ia tatarahapa mai te reira atoà to òutou pohe.

             E aha te òhipa ta òutou i rave, te tupuraa teie òhipa, no teihea pae òutou no te pae o Pirato, e aore no te pae o te fëia Tarirea, e Àti Iuta òutou e aore e taata Roma. Te faahapa nei òutou i te òhipa a Pirato, oia atoà òutou tei roto atoà i te òhipa tià ore i ravehia e Pirato.

             Teie te tahi huru ìno o te taata, i te manaòraa e na te ìno e faatano i te ìno. I mua i te ìno i ravehia aita roa, i rave i te hoê òhipa e ìtehia ai te maitaì, aita roa atu i paruru noa atu, ua vaiiho ra i tupu na, ia pohe i reira e haere ai e faaìte ia Ietu. To na auraa ra, ua taparahihia te maitaì e vai ra i roto i te fëia tei ìte i teie òhipa. Eita ra na Pirato, na rätou iho, to rätou huru ra hoê a e to Pirato.

 

Te ani nei ra o Ietu o teie feia ia tano, te hiòraa i te oraraa eiaha e faatea noa no te hiò noa, e ìmi ra i te tahi raveà, eiaha atoà ra i te faaroo - ­noa ‑ raa, ia tupu atoà ra te haafatataraa no te parururaa i te Maitaì o te Atua. Hoê noa vahi mau tei reira to ù mana te vairaa, to ù ia ìteraa i te taui ia ù. I reira te maitaì e faaòre ai te ìno.

          I parau ai o Ietu i teie fëia i te òhipa i tupu i Ierutarema i te Pare ra no Tiroama. Àhuru mä vaù taata tei perehihia e te patu fare. No vai te hape, no te fëia papaì hohoà fare anei, te tamuta anei, tei òre i haapaò i te mau faaueraa no te mau faito, e aore no te fëia i patu i teie fare.

           E hoì faahou mai o Ietu i nià i ta na parau, mai te hoê reo himene tei faahoìhoì noa. Eita na te Atua, eita o ia te tumu, eita te tamataraa i te hoê faahaparaa. Te mau ìno e farereihia nei e te mau taata, no roto mai ia i to na iho haapaò òre.

                      Teie o Ietu e arai nei i te ìno, ia ore ia ùàna.

           Ietu mai te mau perofeta e faahitihia nei e te pipiria, e faaìte o ia i te mau hinaaro o te Atua. Eiaha ia mai te hoê taata, tei orero i te mau parau faaitoitoraa, no te oraraa totiare. Te faaara nei ra o ia i te taata ia taui, e ia ore ia anoì te hiòraa no te mauiui e te faahaparaa. Mea päpu maitaì te manaò o Ietu i nià i na àti riaria e piti tei tupu.

           Eiaha ra tätou e manaò e, aita o Ietu e òto atoà nei no teie òhipa i tupu. Ua ìte maitaì atoà o ia e pohe atoà te taata parau tià. O na iho, e haere o ia i Ierutarema i reira o ia e taparahihia ai i mua ia Pirato.

           Ia òre te taata ia taui ia na, mai te reira atoà to na pohe. Teie pohe ta Ietu e parau nei, eita ia te pohe i tupu i Tarirea, e i Tiroama.

            Te pohe ra i faatupuhia e te Hara, i reira te faaroo e maìhia ai, eita atu ra ia, na te òè a Pirato i taparahi, e aore na te patu o te fare. Na te faaroo òre ia te reira i taparahi.

             Àreà ra te parau no te tumu tute hotu òre hoê à ia auraa no te mau parau i tuatapapahia aè nei.

 

 

         O ia hoì, eita na te ìno o te taata e faaòre te maitaì o te Atua.

 

 

                                                                                                       Teraì or.

 

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens