Overblog Suivre ce blog
Editer l'article Administration Créer mon blog
9 juillet 2013 2 09 /07 /juillet /2013 09:34

Tapati 14 no Tiurai 2013

Ruta 10,25-37.

TE TAATA TUPU,

OIA TE TAUARO NEI

E inaha, ua tià mai ra te hoê haapii ture, ua fäfä mai ra ia na nä ô mai ra : E te òrometua, e aha vau e noaa ai te òra mure òre. 26 Ua parau atu ra Ietu ia na : E aha tei päpaìhia i roto i te ture, te nä hea ra te taiòraa. 27 Ua nä ô mai ra o ia : E here òe i to Atua ra i Te Fatu Nui mä to âau atoà, mä to värua atoà, mä to püai atoà, mä to manaò atoà ia hope, e here hoì i to tauaro mai to here ia òe iho na. 28 Ua parau atu ra Ietu: Ua tià ta òe i parau mai na, e ora òe ia nä reira.29 Areà o ia, no te hinaaro faatià ia na iho, parau mai ra ia Ietu : O vai ia to ù tauaro. 30 Ua püòi mai ra Ietu : Te hoê taata i te haereraa mai Ierutarema e Ierito, roohia iho ra o ia i te nana èiä haru, taratarahia iho ra tana àhu, e paruparu iho ra o ia ia rätou, haere ê atu ra rätou, faaruè mai ra ia na, ua fätata i te pohe. 31 Ua haere mai ra te hoê tahuà nä taua èà ra, e ìte atu ra ia na, faahahau ê atu ra, nä te tahi pae èà atu ra i te haere. 32 E âti Revi atoà tei nä taua èà ra, e fätata mai ra i taua vähi ra, ìte mai ra ia na, ôhipa ê atu ra nä te tahi pae èà. 33 E tere to te hoê taata no Tämäria i haere noa i to na haereà, tae atu ra i taua vähi ra, ìte atu ra ia na, putapü aè ra to na âau. 34 Haere atu ra i pihaì iho, ninii atu ra i te hinu e te uaina i roto i te mau puta no na ra, vehi atu ra ia na, haapärahi atu ra i nià i ta na iho puaa, pütaì atu ra ia na i te fare tīpaeraa, e utuutu atu ra ia na. 35 E ao aè ra, ia haere ê o ia ra, ua rave aè ra o ia i e piti moni veo, tuu atu ra i te taata fare ra, nä ô atu ra : E utuutu òe i teie taata, e ia hau noa atu ta òe haamäuàraa, na ù ia e horoà atu i ta òe ia hoì mai au ra. 36 I to òe manaò, o vai i taua nä taata too toru nei tei riro ei tauaro no te taata i roohia i te nana èiäharu ra. 37 Ua parau mai ra o ia: Tei aroha mai ia ia na. Ua parau atu ra Ietu ia na: A haere, e a nä reira atoà.

 

TE TAHI MAU MANAÒ RII

 

E tämataraa teie, oia hoì e räveà tei manaòhia i te faaòhipa i nià i te tahi taata ia rave o ia i te tahi òhipa ta na i òre i ôpua. I ô nei, te haaparaparauraa ia ia Ietu i nià i te ora mure òre, oia hoì te tahi parau tei riro te Atua ei tumu hoê roa.

Aita Ietu i ôtohe i mua i te tämataraa, aita atoà rä i àro atu i tei tämata mai ia na, ua färii rä i te haere i te vähi tei reira te tämata i te tiaìraa mai ia na, i te vähi ta na i manaò e, tei reira o ia i te paariraa.

I roto i ta na pähonoraa, aita Ietu i faaìte i te räveà e roaa ai te ora mure òre, ia au i te hinaaro o te haapii ture, ua haapäpü noa rä o ia, mai te türuì i nià i te ìte o te haapii ture, e ora te taata ia haapaò i te hinaaro o te Atua. Te auraa ra, te Atua noa ihoä te tumu o te ora, e aita ta Ietu e ôpereraa ora mure òre.

Te peàpeà o te haapii ture e te mea o ia i onoono faahou mai ai, to na ia hiroàraa e, na na noa iho i pähono i ta na uiraa. Ua hinaaro o ia ia parau mai Ietu i to na manaò, ei räveà pariraa atu ia na, e inaha, o na iho ta Ietu i haaparaparau.

 

O vai ia to ù tauaro : Te tanoraa mau, ia au i to na tiàraa haapii ture, e roaa noa i teie taata te pähono i ta na iho uiraa. Te hinaaro nei rä o ia e huri i te reira hopoià i nià ia Ietu, no te mea, mea òhie aè te pari i te taata i nià i te manaò ta na i parau, i te faahapa i te taata tei òre i parau i to na manaò. I ô nei atoà, aita Ietu i pätoì i te aniraa a te haapii ture, ua faatià rä o ia i te tahi parau, mai te tuu mai i te mau taata tiàraa i roto i te Faaroo, e tae noa atu i te taata tiàraa òre. Ua tuuhia teie nä taata too toru i mua i te tahi fifi. Na te hiòpoàraa i te òhipa ta rätou i rave, aore ra ta rätou i òre i rave, e tauturu i te haapii ture i te ìteraa i te pähonoraa e au i ta na uiraa.

 

I to òe manaò... I ô nei, te tïtau faahou nei Ietu i te pähonoraa a teie haapii ture.

Ua roaa faahou ia Ietu i te faariro i te taata ui, ei taata pähono i ta na iho uiraa. Eiaha rä tätou e hìo i te òhipa ta Ietu i rave mai te tahi täpaò faaìte i to na paari, i te huriraa i te fifi i nià i te taata i ìmi mai te fifi ia na. E haapäpüraa noa teie i te taata e, i roto i te oraraa, eiaha e tiàturi e, te vai ra te pähonoraa oti noa. I te mau taime atoà rä, tei te taata tätaì tahi te raveraa i te faaotiraa tei au i to na manaò, aore ra tei au i te mea ta na i märamarama. Te mea ia Ietu i ani ai i te manaò o teie taata.

Te pähonoraa ta Ietu e horoà, ua au noa ia no na, eita rä te reira e au no te tahi taata ê atu. Eere atoà rä teie i te faatanoraa i te mau huru manaò atoà e nä roto mai i te taata. Te pahonoraa maitaì, te pähonoraa ia ta te märamaramaraa o te parau i faatupu i roto i te taata. I roto i te hiòraa ta Ietu e tuu nei i mua i te Haapii ture, te vai ra te tahi tītaura i te taata ia haamätau i te hiòpoà i te tereraa o te oraraa, te tütonu i nià i te tupuraa o te mau mea tei riro o ia ei ìte, no te mea na te reira atoà e faaòhie ia na i te märamaramaraa i te auraa o te mau mea e tupu noa nei.

Tei hau roa atu rä i te faufaa, teie ia vähi e nä ô ra e: to òe manaò. E au teie parau no te taata hoê, e au atoà rä no te hoê nünaa, no te hoê fenua, i roto i to na huru, ta na peu, to na reo, to na hiroà.

Te riro atoà ra ia teie ei haapäpüraa na Ietu e, i roto i te pähonoraa tei tītauhia tätou ia pähono i te Atua, eita e tià ia tätou ia huna, ia haamoè, ia faariro ei mea faufaa òre teie hoìraa i roto ia tätou iho, ta tätou faufaa tupuna, to tätou hiroà taata no te fenua, no te mea e tupuraa te reira no te hinaaro o te Atua. Te auraa, ta te Atua i horoà na tätou, ta na e tïtau mai (Mätaio 18, 14-30). Eiaha tätou e haamoè e, te hinaaro o te Haapii ture i tià mai ai i mua ia Ietu, e te mea hoì Ietu i faatià atu ai i te parau o te taata i roohia i te èiä, te räveà ia e roaa ai ia na te ora mure òre. No reira, mea faufaa ihoäpaha te ìteraa i te parau a te Atua, oia te mea i päpaìhia, aita rä Ietu e haafaufaa òre ra i te ìteraa i to na iho parau, oia te räveà e tano ai te tahi e faaìte i to na manaò.

 

Te haapiiraa e vai ra i roto i te parau ta Ietu i faatià i te Haapii ture, teie ia : Eere na ù e mäìti i to ù tauaro, eere na ù e faaoti i te taata ta ù e färii i te tauturu e të òre au e tauturu, tano noa atu ai to ù manaò, maitaì noa atu ai ta ù mau tatararaa. No te mea i reira ra, e tauturu noa ia vau i tei au mai ia ù, mai te òre e täuà atu i tei òre i au mai ia ù. Aore ra, e tauturu vau i te taata ta ù i ìte e, e riro o ia i te faahoì mai i ta ù i rave no na, âreà te taata të òre e faahoì mai i ta ù e rave no na ra, ua òhie ia vau i te tuu i to na parau i te hiti. Mea taa ê ta Ietu hiòraa i teie parau, no na, ua riro te fifi ta te taata e färerei nei ei räveà e ìtehia ai te tupuraa e te òreraa e tupu i te taata te parau o te tauaro. Eere atu ra na ù e faaoti i te taata e au ia tauturuhia, na te taata rä i roto i te fifi e haapäpümai i to ù riroraa ei tauaro, e te òreraa hoì te reira parau i maraa ia ù i te faatupu. Te fifi e vai ra i muri mai i te uiraa a te Haapii ture, te òhieraa ia tätou i te topa i roto i te mäìtiìti taata e te manaò pae.

 

Te haapiiraa ta teie parau e heheu mai nei ia tätou, teie ia : i roto i te faatupuraa i te hinaaro o te Atua, eiaha tätou e ani i te Atua ia faaìte mai i te òhipa ta tätou e rave, na te here rä o te taata i te Atua e faaìte ia na i te mea e au ia na ia rave ia hanahana te Atua. I roto hoì i te òhipa ta te taata i faaoti i te rave e ìtehia ai te tupuraa e te òreraa e tupu te hinaaro o te Atua.

No reira, no te mea eere na te tahi e parau mai ia òe i te òhipa e au ia òe ia rave, ia färii ia òe i te tuu ia òe i mua ia òe iho, ia riro e, o òe iho ta òe hiòraa, ta òe tütonuraa, te vähi hoì e roaa ai ia òe te pähonoraa maitaì aè e ìtehia ai te tupuraa e te òreraa e tupu te hinaaro o te Atua. Te auraa, o òe iho to òe tauaro matamua roa. Ia òre òe ia färii i te faafäite ia òe iho, oia hoì ia òre òe ia färii ia òe, ia òre ia faatupu i te hau e te here i roto i to òe âau, e mata ê noa ihoäia òe ia òe iho, e faariro noa ihoäia òe i te manaò o te tahi ei pähonoraa na òe, oia hoì e tämau noa òe i te vai iho e na te tahi aè e manaò mai no òe. E inaha, ia au i te haapiiraa ta Ietu e horoà nei, te pähonoraa ta te tahi e horoà, ua au noa ia no na iho, no te mea o na iho ta na i tuu i roto i ta na parau, te auraa ra, aita ia to òe e parau i reira. Ia au rä i ta tätou i parau na, e au teie òe no te taata hoê, aore ra no te hôe nünaa.

 

I roto i te pähonoraa matamua ta Ietu i pähono atu i te Haapii ture, te nä ô atu ra o ia e : E aha tei päpaìhia i roto i te ture, te nä hea ra te taiòraa ; i roto i te piti o te pähonoraa, te ômua ra Ietu i te nä ôraa e : I to òe manaò..., te auraa, eita atoà te märamarama o te taata e roaa òhie noa i roto i te mea i päpaìhia, e e mea faufaa atoà no na te hiòraa i to na iho manaò, te hiòraa i roto i to na parau, i roto i to na iho hiroà taata tei papahia i nià i te tahi fenua, no te mea no te fenua atoà i parauhia ai to te taata, e aita hoì ta te taata e parau maoti rä, ta te fenua i haapii ia na. E no te mea no te Atua te fenua e te î atoà i nià iho, e nä roto atoà ia te Atua i te fenua i te haapii mai i te taata, i te horoàraa ia na i te pähonoraa e roaa i to na märamarama i te heheu mai.

 

I roto i te tïtauraa a Ietu, o òe te taata faufaa, no te mea no òe te parau, ta òe pähonoraa terä e hinaarohia mai ra. Mai te peu rä aita òe i färii ia òe, aita òe i here ia òe, mai te peu e rahi aè to òe vahavaha e te tähitohito ia òe, eita ia e roaa ia òe te faatupu i te tïtauraa a Ietu. No Ietu, eere òe i te âfaì parau na te tahi, mai te peu e, o te reira ra, aita ihoä ia òe. Te ìte ra tätou i te faufaa no teie parau no te faafäiteraa ia na iho, oia te faahauraa e te färiiraa ia na iho ei räveà e tupu ai te hinaaro o te Fatu.

 

Tätou e manaò nei e, mea faufaa òre to tätou manaò, ta tätou huru hiòraa, oia te hiòraa ta te fenua, te peu tumu, e te hiroà tumu i haapii ia tätou, e eita te reira e au ia ravehia i mua i te Atua, no te faatupu i te hinaaro o te Atua, te Tamaiti iho a te Atua teie e faaìte mai nei i te hape o te reira huru hiòraa. Ia parau mai Ietu e : to òe manaò, eita ia te reira parau e tupu mai te peu aita òe, mai te peu e taata ê të parau mai, nä roto noa mai ai te reira parau ia òe, eere ihoä räno òe te reira manaò.

 

Mai te peu aita ä tätou i matara i mua i teie tïtauraa ta Ietu, e i mua i teie parau no te faafäìteraa i te Atua, haamanaò noa tätou e, ua hämani te Atua i te taata ia au i to na huru e to na hohoà.Te auraa, te huru e te hohoà ta tätou e mau ra, te huru hoì e te hohoà ta te fenua i nanaò i nià ia tätou, e mea hinaarohia ia e te Atua, e ua au hoì te reira i te Atua. I teie nei räeere te taata i te âfaì hohoà noa no te Atua, e tauaro rä o ia no te Atua, oia hoì te tahi taata tei färii i te tià mai i mua i te aro o te Atua, te tahi taata tei òre i mataù i te parau i te Atua i to na hinaaro, e tei ineine i te pähono i te Atua i te taime te Atua hinaaro mai ai ia na. Te parauraa i to na iho manaò, te tiàmäraa te reira ta te Atua i horoà no te taata. No te taata rä, mea òhie aè no na te tià i muri mai i te parau a te tahi, i muri mai i te ture, te faanahoraa, aore ra ra te mau mea atoà e òre ai o ia e roohia ai i te faahaparaa ia òre ta na pähonoraa ia tano. No reira, te faafäiteraa i te Atua e haamata ia nänià i te ìteraa e te färiiraa i te Atua, mai te ìte maitaì atoà rä e, aita e ìteraa i te Atua të òre e riro atoà ei ìteraa e ei färiiraa ia na iho ei tupuraa no te ôpuaraa a te Atua.

 

Ia näreira tätou i te hiò i to tätou parau, e märamarama atoà ai tätou i te ture a te Atua ta Ietu i haamanaò mai e : here i te Atua, here i te tauaro. Ore noa atu ai räte taata i ìte i te Atua, ua riro te faatupuraa i te parau o te here ei täpaò e ìtehia ai te mau taata tei fänauhia e te Atua, e tei òre i fänauhia e te Atua (I Ioane 4, 7-8 ; Mätaio 25, 40).

 

I roto i näèà e piti ta Ietu e faatoro ra i mua i te taata ei räveà e roaa ai ta na pähonoraa i mua i ta na tïtauraa i te ora, te vai ra te märamaramaraa i te parau a te Atua, te vai atoà ra rä te märamaramaraa i to na iho parau ei räveà e roaa ai ta na pähonoraa. Te auraa, e tano te taata e faatupu i te hinaaro o te Atua mai te ìte òre i ta na parau, eere räno te ìteraa te taata i te parau a te Atua e tupu atoà ai to na hinaaro.

 

No te mea aita to te taata e parau i räpae aè i te Atua, e to te Atua hoì te hinaaro e tïtauhia nei ia na ia faatupu, ia faafäite atoà o ia ia na iho i te Atua, te auraa, ia färii atoà o ia i te Atua ia vai noa mai ia i mua ia na ei tütonuraa tämau na na. No reira, mea faufaa no te taata te tuuraa i te hau i roto ia na e te Atua. Aita te taata i àifäito i te Atua, e Atua ihoäte Atua, e taata ihoäte taata, teie fäite e parauhia nei, to te taata ia färiiraa e, aita to na e parau i räpae aè i te Atua, aita atoà räto na e parau i räpae aè i te fenua.

 

Aita atu rä e vähi e matara ai te parau o te tauaro maoti rä, i roto i te here.

 

Ei haapotoraa : here i te Atua, here ia òe iho, te räveà ia e roaa ai i te taata te ora.

 

TE TAHI MAU UIRAA

 

E aha Ietu i faahoì ai i te Haapii ture i roto i te mea I päpaìhia. Aita änei e fifi to roto i te tütonu-noa-raa i nià i te mea i päpaìhia.

 

E aha te taata tupu, te taata tumu, te tauaro. Te vai ra änei te fifi i roto i te hereraa i te taata tupu, aore ra te tauaro. I te hiòraa i te uiraa a te Haapii ture: O vai to ù tauaro, e aha te fifi e vai ra i roto i teie huru uiraa.

 

E aha te manaò faufaa ta òutou e ìte ra i roto i te parau ta Ietu i faatià. E aha ta òutou e ìte ra i roto i teie parau: e faahaparaa, e haapiiraa, aore ra e haapäpü-faahou-raa i te parau o te taata i roto i te ôpuaraa a te Atua.

 

I to òe manaò… I roto i te räveà ta Ietu e horoà nei i te taata ia ìtea ia na te èà o te ora, e aha te faufaa o teie haapäpüraa e : i to òe manaò. Ua haafaufaa änei tätou i teie parau i roto i to tätou oraraa faaroo i teie mahana. Tatara mai.

 

I te hiòraa i teie parau no te tauaro, e aha te faufaa e tano tätou e täpeà mai i roto i teie poroì ta Ietu e: A haere e a nä reira atoà. Ua ineine änei tätou i te färii i te ora ta te reira parau e heheu mai nei ia tätou.


HAAPOTORAA

 

E taata teie e tià mai nei i mua ia Ietu no te ani ia na i te räveà e roaa ai ia na te ora mure òre.

Te mea e tano ia täpeàhia mai i roto i ta Ietu pähonoraa, teie ia : Eere to Ietu tiàraa i te ôpere ora mure òre. E roaa räte reira i te taata ia haapaò i te ture, oia te parau a te Atua. Te parau rä a te Atua, riro noa ai ei parau na te Atua, ia òre te taata ia märamarama i te mea ta na e faaìte ra, ua faufaa òre ia parau.

I mua i te uiraa âpï a te Haapii ture: O vai to ù tauaro, ua faatià Ietu i te parau o te tahi taata tei roohia i te àti i nià i te èà, e te ani ra Ietu ia na : I to òe manaò, o vai i taua nä taata too toru nei tei riro ei tauaro no te taata i roohia i te nana èiä haru.

I roto i teie tïtauraa i te ora, mea faufaa atoà to òe manaò, ta òe hiòraa, ta òe märamaramaraa. Teie rä òe, e parau ia no te taata hoê, aore ra e parau no te hoê nünaa, i roto i ta na huru faanahoraa i to na parau, e ta na märamaramaraa i te tereraa o te oraraa ta na ìte ra i mua i to na mata i te mau mahana atoà.

I te hiòraa i te fifi o teie Haapii ture i te haapäpüraa i ta na pähonoraa i te aniraa a Ietu, i te hiòraa i te faufaa òre o te mau räveà ta Ietu i faaòhipa no te tautururaa i te Haapii ture, e tano ia parauhia e :

Ia òre te taata ia faafäite faahou ia na i te Atua, oia hoì ia òre ia faahau ia na i te Atua, ia òre ia färii i ta te Atua haamäramaramaraa mai ia na, eita oia e ìte nä hea i te pähono i te ora tei ineine te Atua i te horoà no te taata.

e- Ia òre te taata ia faafäite ia na iho i to na iho parau, to na reo, to na fenua, to na hiroà, ta na peu tumu, eita atoà e ìtehia ia na te pähonoraa e tae ai o ia i nià i te èà o te ora.

Te tauaro, eere ia i te räveà e ìtehia ai te òhipa e maraa ia tätou i te rave, ia au i to tätou püai e te rahi o ta tätou mau räveà, te räveà räte reira e ìtehia ai te tupuraa e te òreraa e tupu te hinaaro o te Atua ia tätou, oia hoì to tätou oraraa i te parau o te here, aore ra to tätou faariroraa i te tauaro ei räveà e hanahana ai tätou.

 

E tano teie parau ia faarirohia ei uiraa no teie tau, e aha räte pähonoraa tei ineine tätou i te faatupu.

 

Rururaa òrometua.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens