Mätaio 18,21-35 Manahune

Täpati 17 no Tetepa 2017.

Manahune

Taramo 103

1 Na Tävita. E haamaitaì i te Fatu, e taù värua, e to roto ia ù nei, i to na ra iòa moà. 2 E haamaitaì i te Fatu, e taù värua, e eiaha te hoê maitaì a ana i horoà mai ra e haamoèhia. 3 O ia tei faaòre i ta òe atoà ra mau hapa,  e o tei faaora i to òe atoà ra mau maì, 4 o tei faaora ia òe i te pohe, o tei faatoröna ia òe i te hämani maitaì e te aroha, 5 o tei faaî i to vaha i te maitaì, ia faaâpï-faahou-hia òe mai te àeto ra. 6 Te rave ra te Fatu i te parau-tià e te au i te feiä atoà i hämani-ìno-hia ra.7 Ua faaìte o ia i ta na haapaòraa ia Möte, e ta na òhipa i te tamarii a Ìteraèra. 8 E aroha e te hämani maitaì to te Fatu, e òre e riri vave, te rahi ra to na aroha.9 E òre o ia e tämau i te aò mai ia tätou e òre hoì e vaiiho märô i to na riri e a muri noa atu. 10 Aita aè nei o ia i tähoo mai ia tätou e ia fäito i ta tätou mau hara, aore hoì i faautuà mai ia tätou e ia fäito i to tätou mau ìno. 11 Mai te teiteiraa o te mau raì i nià i te fenua nei, mai te reira te rahi o to na aroha i te feiä i mataù ia na ra. 12 Mai te hitià-o-te-rä e taa ê i te tooà-o-te-rä ra, o ta na ia faataa-ê-raa i ta tätou mau hara ia tätou nei.13 Mai te aroha o te metua i ta na ra mau tamarii, o to te Fatu ia aroha i te feiä i mataù ia na ra. 14 Ua ìte hoì o ia i to tätou huru, te manaò ra o ia e, e repo tätou nei.15 O te taata nei e au to na puè mahana i te àihere nei mai te tiare i roto i te aru ra to na ruperuperaa.16 Ua farara anaè te mataì nä nià iho ra, ua mou ia, e to na vähi i tupu ai ra e òre e ìte faahou ia na.17 Âreà te aroha o te Fatu mai tahito mai ia e a muri noa atu, i te feiä i mataù ia na ra, e ta na ra parau-tià i te tamarii a ta rätou ra mau tamarii, 18 i te feiä i haapaò i ta na ra faufaa, e tei haapaò i ta na ra parau e rave ra. 19 Ua haamau te Fatu i to na ra teröno i nià i te mau raì, e ua auraro te mau mea atoà nei i to na ra pätireia.20 E haamaitaì i te Fatu, e to na ra mau merahi e, o tei hau i te püai, e ua haapaò i ta na faaueraa, i te faarooraa i ta na reo ia parau. 21 E haamaitaì i te Fatu, òutou atoà, o to na ra mau pupu, o to na ra mau tävini tei rave i to na ra hinaaro.22 E haamaitaì i te Fatu, e ta na atoà ra mau òhipa, i te mau vähi atoà ra i to na ra hau. E haamaitaì i te Fatu, e taù värua e.

Tenete 50,15-21

15 E ìte iho ra te mau tuaana o Iotëfa ra, e ua pohe roa to rätou metua täne, ua nä ô aè ra rätou, E riro paha Iotëfa i te täiroiro mai ia tätou, e i te tähoo mai i ta tätou hämani ìno ia na ra. 16 Ua tono aè ra rätou i te hoê ia Iotëfa ra, e parau atu e, I aò mai to metua täne ia mätou a pohe ai ra, nä ô mai ra, 17 e nä ô òutou ia Iotëfa, E faaòre mai òe i te hapa a to mau tuaana nei, e to rätou ìno ua hämani ìno hoì rätou ia òe. E teie nei, teie ta mätou parau ia òe, e faaòre mai òe i te hara a te mau tävini o te Atua o te metua täne ra ua òto iho ra Iotëfa i ta rätou nä-reira-raa mai ia na ra. 18 Haere atu ra hoì ta na mau tuaana, tïpapa iho ra i raro i mua i ta na aro, nä ô atu ra Inaha, ei tävini anaè mätou no òe 19 ua parau mai ra Iotëfa ia rätou, Eiaha e mataù tei ia ù änei ta te Atua 20 o ta òutou i ôpua ei maitaì ia tupu ia na ta tätou ei ìte nei, o ia te taata atoà nei e rave rahi i te oraraa i teie nei mahana. 21 E teie nei, eiaha e mataù na ù òutou e faaàmu, e ta òutou mau tamarii atoà. Nä reira atu ra o ia i te haamähanahana ia rätou, e ua parau mäite atu ia rätou ma te aroha.

Röma14, 7-9

7 Aore roa hoì te hoê o tätou e ora nei ei faatupu i ta na iho, e aore roa e taata e pohe nei ei faatupu i ta na iho. 8 Te ora nei tätou, i ora ia tätou ei faatupu i ta te Fatu e te pohe nei tätou, i pohe ia tätou ei faatupu i ta te Fatu. E teie nei, te ora nei tätou, e te pohe nei hoì, no te Fatu ä tätou. 9 No reira hoì te Metia i pohe ai, e i tiàfaahou ai i nià, e tià hoì o ia i te oraraa, ia riro o ia ei Fatu no tei pohe e no tei ora hoì.

Mätaio 18,21-35

Te faaòreraa hara i rotopü i te mau taeaè

(Rut 17.4)

21 Ua haere mai ra Pëtero ia na ra, nä ô mai ra E te Fatu, ia hämani ìno mai taù taeaè ia ù, e hia taime ta ù faaòreraa atu i ta na hara, Ia hitu änei.  22 Ua parau atu ra Ietu ia na Aore au i parau atu ia òe, ia hitu, ia hitu rä àhuru i te hituraa.

Te àmutärahu aroha òre

23 E au hoì te Hau o te raì i te hoê arii o tei hinaaro i te faaâfaro i ta na ra faufaa e to na ra mau tävini. 24 E ia haamata o ia i te faaâfaro, ua ärataìhia mai ra te hoê ia na ra, hoê àhuru tautani a na tärahu. 25 No te mea rä aita a ana e moni no te faahoì, ua faaue atu ra ta na fatu ia hoohia o ia e ta na vahine e te mau tamarii e te täatoà o ta na mau taoà, no te àufau/faahoì i ta na tärahu. 26 Ua tïpapa iho ra taua tävini ra i raro, tähopu mai ra ia na, nä ô mai ra E taù fatu, eiaha na òe e rü ia ù, na ù e faahoì atu ia òe te täatoà o ta ù tärahu 27 Aroha atu ra te fatu o taua tävini ra ia na tuu atu ra ia na mä te faaòre i ta na tärahu. 28 E tae aè ra taua tävini ra i räpaeàu, ua ìte atu ra o ia i te hoê taetaeaè tävini nö na ra, e àmutärahu nä na i te fäito hoê hänere moni veo; haru atu ra ia na, ûumi atu ra i ta na àrapoà, nä ô atu ra A faahoì mai òe i te täatoà o te moni ta òe i tärahu. 29 Ua tïpapa iho ra taua taetaeaè tävini nö na ra i raro i ta na pae âvae, ua täparu aè ra ia na, nä ô aè ra Eiaha na òe e rü ia ù, na ù e faahoì i ta òe. 30 E aita aè ra rä i tià ia na; tii atu ra ia na, huri atu ra i roto i te täpeàraa, tiaì noa ai i te peeraa o ta na tärahu. 31 Ìte aè ra rä to räua mau taetaeaè tävini i taua òhipa ra, peàpeà roa aè ra rätou, haere atu ra e faaìte i to rätou fatu i te mau mea i tupu. 32 Ua tïtau atu ra te fatu i taua tävini ra, e ua parau atu ra ia na e teie nei tävini ìno e ua faaòrehia e au te täatoà o ta òe tärahu, no te mea, ua täparu mai òe ia ù 33 eere änei i te mea tià/tano, no òe, ia aroha atoà atu òe i to òe taetaeaè tävini, mai ia ù i aroha atu ia òe. 34 Riri aè ra to na fatu ia na, tuu atu ra ia na i te feiä haamauiui ra, tiaì noa ai i te peeraa o ta na tärahu. 35 E nä reira atoà ta ù Metua i te raì ra ia òutou, ia òre òutou tätaì tahi e faaòre, mä te âau atoà i te hara a to na taeaè.

Manaò

I to tätou taiòraa e faarooraa i teie mau taiòraa, e tià  ia parauhia e te vai ra te papa o teie  mau manaò e faahitihia ra i roto i te tau i maìri, teie mahana e a muri noa atu. I te taiòraa rä tätou teie mau parau maite mea ra ia a tahi roa tätou a faaroo ai e mau tiàororaa âpï tei òre i mäheahea i te ärataìraa a te mau uì taata tiàturi  a Atua. I ìritihia mai ai te tahi mau puè ìrava no te türama i ta tätou parau no teie mahana, no te haatumu i te manaò teie taua mau ìrava rä.

-Taramo 103, 5 o tei faaî i to vaha i te maitaì, ia faaâpï-faahou-hia òe mai te àeto ra.

-Tenete 50, 21 E teie nei, eiaha e mataù na ù òutou e faaàmu, e ta òutou mau tamarii atoà.

-Roma 14, 7 Aore roa hoì te hoê o tätou e ora nei ei faatupu i ta na iho,

-Mataio 18, ia hämani ìno mai taù taeaè ia ù, e hia taime taù faaòreraa atu i ta na hara, Ia hitu änei.  

E mau ìrava teie no te taata hoê e ta na mau faaotiraa no ta na mau hopoià i mua i te mau faataupupuraa o te ora e färereihia nei e te taata. E  tià anei rä ia parauhia te î noa nei to tätou vaha i te maitaì, no te faatupu i te mau faaotiraa ia färerei te hau i te haèhaa, ia färerei te aroha faaòromaì i te here faatiàma, mai teie reo ta te puta Tenete e faahiti ra i te pene 50 i te ìrava 21 E teie nei, eiaha e mataù na ù òutou e faaàmu, e ta òutou mau tamarii atoà. I te mea ua faatupu o Iotëfa i ta na iho, i te hinaaro o te Atua Nui Tumu Tahi èita i te mea faufaa na na i te heheu i te mau òhipa ìno i tupu, èita atoà e tuu i te hoê fäito faaòreraa hara. Tütonu maite na ra tätou i nià i teie mau taò, e parau ia tätou e mau taò taata teie tei faaìte i to na turaraa i mua i ta na hopoià, to vaha, na ù òutou, ta na iho, taù faaòreraa, Te türama nei teie mau taò i te parau no te Mana, te Mana naò noa ia tätou i faahitiraa e fëruriraa manaò tei ìtehia te tupuraa te òhipa, e tei tae i nià i te ötiraa. Te mau ra te Mana i te maitaì, te ora, te tiàma, ia vai tämau noa te hau i roto i nünaa, tätou ia e parau nei te Manahune. Te vai te tahi pehepehe i päpaìhia na e Turo a Raapoto, i roto i ta na ia Pinaìnaì o te âau, i te àpi 44.

MANAHUNE.

O vai òe e te manahune

E aha òe e te manahune

Tei hea òe e te manahune

E hia  òe e te manahune

Ua hià änei òe e te manahune.

E manahune, e mana hunahia.

E manahune, e mana taahia.

E manahune, e mana haamerehia.

E manahune, e mana faatupu i te höàta,

E mana rä, e mana to òe e te manahune.

Ei hune te ùru i mau ai.

E hune ra, e hïàta atoà ia ;

E hïàta hoì ra, e mauraa ia ;

E mauraa hoì ra, e ora atoà ia,

Te manahune hoì te mauraa o te taata.

I ài noa na te manahune i te hune,

Te ài noa nei ä i te hune.

Ei haapori noa änei te manahune.

A nafea te manahune e ài atoà ai i te ì,

A nafea te faahotu e ài atoà ai i te hotu.

Te haamanaò noa mai nei teie pehepehe ia tätou, i te mau hopoià e tià ia rave, te mea noa rä e hinaarohia nei ia märamarama tätou nä roto i teie pehepehe, tei mua tätou i te tahi parau, o tätou i teie nei e teie parau, te ìte ra änei tätou i roto i teie parau, mai te mea ra, te reo atoà teie o te Atua ia tätou e te Mäòhi i teie mahana, aore ra, mai te pape e tahe ra i nià i te rauère taro, te pähee atoà atu ra teie parau i roto i te moè e te täuà òre o te taata. E au teie parau i te tahi haamanaòraa ia tätou, no te tahi ia mea tei moè i te taata, te tahi mea e hinaarohia ra i te faahoì mai i roto i to na manaò. Te tumu, no te mea te manaò, te mana òhipa te reira o te taata. E tano ai tätou e parau e, te manaò i haamätauhia i te maitaì, ua faarave ia i te taata i te maitaì ta to na âau e àtuàtu noa ra,  âreà te manaò i haamätauhia i te ìno, ua faarave ia i te taata i te ìno ta to na âau e àtuàtu noa ra. E tano atoà rä tätou e parau e, te manaò të òre e au i te tahi parau, e òhie atoà o ia i te haamoè i te reira parau ia òre te reira taata ia haapeàpeà-noa-hia.

I haamanaòhia ai rä te taata, no te mea ia ua ìte te Atua i hämani ia na, teie ta na e rave nei, aita ia e au ra i ta na i ôpua no te taata. Ia ìte maitaì mai tätou, aita te Atua i horoà i te mea ìno na te taata, aita hoì o ia i hämani i te taata no te faatupu i te ìno, e aha rä i maraa ai i te taata te parauraa i te mea maitaì e, mea ìno ; e te mea ìno ra, mea maitaì ia. Te taata noa teie e manaò nei e, ta na te tuhaa ìno, e eita o ia e ora i te mea i horoàhia na na. Eere rä e, te reira anaè, ua tae roa atoà o ia i te manaòraa e, eita to na parau e tià ia faahitihia. Tätou e te Mäòhi te mea püai roa i roto i teie manaò hape, e te tämau noa nei te mau arataì o te faaroo i te àtuàtu i te reira hape, te mea ia tätou i tupu hoìoìo noa ai.

Ia Manahune o Mäòhi Nui.

Teraì òr. Faatura.