Overblog Suivre ce blog
Editer l'article Administration Créer mon blog
10 août 2017 4 10 /08 /août /2017 21:28

13 Täpati no Âtete 2017.     

Päreu

Taramo 85

1 Na te Mënätehe. E Taramo na te tamarii a Tora. 2 Ua hämani maitaì mai òe, e te Fatu, i to òe ra fenua ua faahoì mai òe i te tïtï o Iatöpa ra. 3 Ua faaòre òe i te hara a to mau taata ra, e ua täpoì òe i to rätou ìno. Tera. 4 Ua faaòre òe i to òe ra riri, e ua tïoi ê atu ra òe i te ûàna o to òe ra riri. 5 E teie nei, e haafäriu òe ia mätou, e te Atua e ora ai mätou nei, e ruri ê atu hoì òe i to riri ia mätou nei. 6 E riri mai ä òe ia mätou, e a muri noa atu. E tämau ä òe i to riri e tae noa atu i te mau uì atoà ra.7 Eita änei òe e faanaanaea mai ia mätou, ia òaòa to mau taata ia òe ra. 8 E faaìte mai, e te Fatu, i to òe ra aroha, e hö mai i te ora na òe ia mätou nei. 9 E faaroo na vau i ta te Atua ra, ta te Fatu e parau mai. Te faaìte mai ra o ia i te maitaì no to na ra taata, to na ra feiä moà, eiaha rä rätou ia färiu faahou i te ìno ra.10 Te fätata mai ra te ora na na i te feiä i mataù ia na ra. E faatupu o ia i to na hanahana i to tätou nei fenua. 11 O te aroha e te parau mau, ua färerei ia räua; o te parau-tià e te hau, ua hohoì räua.12 E tupu mai te parau mau no roto i te fenua, e hiò mai hoì te parau-tià mai te raì mai.13 Na te Fatu hoì e horoà mai i te mea maitaì, e hotu mai ä hoì to tätou fenua.14 E nä mua ia na te parau-tià i te haere, e na te reira e faaìte mai i to na haereà.

1 Te mau Arii 19,9-13

9 Tae atu ra o ia i reira i roto i te hoê ana, e ua taòto iho ra i reira e inaha, ua tae mai ra te parau a te Fatu ia na, nä ô mai ra, Te aha noa na òe i ô na, e Èria. 10 Ua parau atu ra o ia, itoito noa na vau i te Atua Tapaota i te Fatu ua faaruè te tamarii a Ìteraèra i ta òe parau, e ua huri i ta òe fata i raro, ua täparahi i te mau perofeta na òe i te òè e o vau nei, o vau anaè nei tei toe e te ìmi mai nei rätou ia ù nei ia pohe. 11 Ua nä ô mai ra o ia, A haere, ei nià i te mouà tià noa ai i te aro o te Fatu. E inaha, ua haere iho ra te Fatu nä reira iho, o te mataì rahi iho ra e te ètaèta, i te haaparariraa i te mouà, e te vävähiraa i te mato i mua i te aro o te Fatu aita rä te Fatu i roto i taua mataì ra e mure aè ra te mataì, o te âueue fenua iho ra; aita rä te Fatu i roto i taua âueueraa fenua ra. 12 e oti aè ra te âueueraa fenua, e auahi aita rä te Fatu i roto i taua auahi ra e oti aè ra te auahi, e reo iti haìhaì mai ra, tei reira te Fatu. 13 E ìte aè ra Èria i taua parau nei, ua püroù o ia i to na mata i to na ra àhu, haere atu ra i räpae àu, tià noa iho ra i te tomoraa i roto i te ana ra. E inaha, te hoê reo mai ra ia na, nä ô mai ra, Te aha noa na òe i ô na, e Èria.

Röma 9,1-5

Te Atua e te nünaa ta na i mäìti

1 E parau mau hoì ta ù i te Metia, aore au i haavare, te faaìte âpipiti mai nei te Värua Maitaì e taù âau ia ù. 2 e òto rahi to ù, e te mäuiui tuu òre i roto i taù âau. 3 E tià hoì ia ù ia ànatemahia vau e taa ê atu vau i te Metia ra, i taù mau taeaè, to ù ra fëtii i te haapaòraa i te tino nei. 4 I te âti-Ìteraèra ra, no rätou te faatävai ra, e te ànaana, e te faufaa ra, e te ture i horoàhia ra, e te haamoriraa, e tei parauhia mai ra. 5 No rätou hoì te feiä tupuna, e no rätou te Metia i te haapaòraa i te tino ra, o te Atua ia i nià iho i te mau mea atoà, no na te haamaitaì mure òre. Âmene.

Mätaio 14,22-33

22 I muri mai, ua faaue atu ra Ietu i ta na mau pipi e paiùma i nià i te poti e fano nä mua ia na i te tahi pae roto, a faahoì noa ai o ia i taua tiàa rahi ra. 23 E oti aè ra te tiàa rahi i te faahoìhia, paiùma atu ra o ia i nià i te hoê mouà, i te hoê vähi moèmoè, e pure. E ruì/pö noa iho ra o ia anaè i reira.

Manaò

Ia tütonu maite tätou i teie haapotoraa no na taiòraa e maha nei, e tià ia parauhia te vai ra te faufaa te mau manaò e faahitihia ra i roto i na tau e maha i te faahitiraa a te feiä faaroo i te puai o to rätou tiàturiraa i te Atua Nui Tumu Tahi, mai te mea ra e o te tahi huru faanahoraa pure teie e tïtauhia nei i te taata taiò ia faariro èi àveià e türama ra i te tahi tuuraa âvae ia òre ia ätea i te èà, teie taua mau parau ra,

-Taramo 85, 8 E faaìte mai, e te Fatu, i to òe ra aroha, e hö mai i te ora na òe ia mätou nei.

-1 Te mau Arii 19, 10 itoito noa na vau i te Atua Tapaota i te Fatu.

-Röma 9, 5 No rätou hoì te feiä tupuna, e no rätou te Metia i te haapaòraa i te tino ra, o te Atua ia i nià iho i te mau mea atoà, no na te haamaitaì mure òre. Âmene.

-Mätaio 14, 23 E oti aè ra te tiàa rahi i te faahoìhia, paiùma atu ra o ia i nià i te hoê mouà, i te hoê vähi moèmoè, e pure. E ruì/pö noa iho ra o ia anaè i reira.

E tià ia parauhia e maha tumu òhipa e vai nei tei haafatata i te taata i te Atua, faaìte, itoito, Âmene, pure. E mau taò haa teie e ärataì nei i te taata i roto i te tiàmaraa o te manaò faatupu hau, ia hanahana te Atua.  E au atu ra ia e maha huru faanahoraa teie no te pure, tei horoà ia tätou te puai no te âmuitahiraa te värua o teie mau taò èi manaò  hoê naò noa ia i te parauraa mai te Päreu ra te huru. E àhu nehenehe mau ä teie e haapeuhia nei e tätou i te ôomo i te mau taime atoà e tae noa atu i te mau ôroà  faatupuraa òhipa i roto i te mau paroita, e te mau heiva o te fenua nei. I nià i teie àhu te taata papaì e faaìte ai i to na àravihi na roto i te itoito, ia ìtehia te parau mau oia hoì te âmene, ta te fëruriraa e faatupu ra mai te pure ra te huru ia paò i te òhiparaa a te rima i nià àhu a parauhia ai te Päreu. Teie te hoê pehepehe no te Päreu i päpaìhia e Turo  a Raapoto  i roto i te puta Tirioe. A faaroo mai na,

PÄREU

No te mana o te reo i päreu ai te päreu

Eere no te fenua e te rima i raraa mai.

E vehi faatïnana i te here tupuna,

E mäheu te parau i te päreu,

Vai tahaa noa ai te âau haavare.

Tei vahavaha i te hiroà o to na nünaa,

Ua vahavaha atoà ia i te päreu.

E haamä, e riri, e faahapa te âau tähitohito.

Eere änei no te Mäòhi te päreu i päreu ai.

Tei ènemi i te päreu, ua ènemi ia i te Mäòhi.

A tuu i te huero moorä na te maiaa moa e faaahi,

O to na mau ia fanauà ia pato mai.

A tuu atu i te fanauà moa, e tutehia mai ia.

Tei faaahi i te peu papaâ, e haapato mai ia i te vahavaha mäòhi

Òre atu ai te Mäòhi e ìte faahou ai i ta na.

E te tama o te here mäòhi e,

A päreu i to  òe here fenua,

A päreu i to  òe here tupuna,

A päreu i to  òe here ia  òe iho,

To  òe päreu, to  òe ia tura.

E tano ai ia tätou i te parauraa e, te manaò e ärataìhia ra e te Päreu mau ti ra te faatura, ia ìte te taata i te faatura ia na iho, e ìte atoà oia i te faatura i te täuaro, ia au i te manaò e, ta te taata i hinaaro ia ravehia no na, te mea atoà ia e tano e rave atu no te tahi. Ia òre to âau ia riro mai te hiò hipa i reira e puta atoà ai te parau o te tahi, hape noa ai o ia, te tano noa ra, mai ta te päpaì Taramo 85 e haamanaò mai ra i te ìrava 8 E faaìte mai, e te Fatu, i to òe ra aroha, e hö mai i te ora na òe ia mätou nei. Te taata ihoä te haamataraa o te mau mea atoà, ia täua rä e maitaì ai te oraraa, mai te òre e haamoè e, te vai atoà ra räua, nä reira hoì o rätou. Te haapii noa mai ra te reira e, i roto i te mau òhipa atoà ta tätou e rave, te reo ihoä te täviri i te ùputa o te märamarama. E maere änei hoì tätou, inaha na te Parau i ìriti i te ùputa o te märamarama e te ora. Mai te Päreu tei päpaìhia na taò e maha, faaìte, itoito, Âmene, pure.

 

Teraì òr. Faatura.

 

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens