Overblog Suivre ce blog
Editer l'article Administration Créer mon blog
13 juillet 2017 4 13 /07 /juillet /2017 00:12

Täpati 16 no Tiurai 2017.

Àmaura.

Taiòraa

Mätaio 13,1-23

Te parapore no te Hau

(Mär 4.1; Rut 8.4)

1 I taua mahana ra, haere atu ra Ietu i räpaeàu i te fare, pärahi iho ra i te hiti miti/pae tähatai. 2 E rave rahi tei putuputu mai ia na ra. Paìùma atu ra o ia i nià i te hoê poti, pärahi iho ra i reira te tià noa mai ra te tiàa rahi atoà i nià i te pae.

Te ueue huero

(Mär 4.2-9; Rut 8.5-8)

3 E rave rahi ta na parau i parau parapore atu ia rätou, nä ô atu ra, Inaha, haere atu ra te ueue huero i räpae e ueue i te huero 4 e te ueue noa ra ia, maìri iho ra e tahi pae/hiti äratià ia maùe mai te manu, àmuhia/titotitohia iho ra. 5 Maìri iho ra e tahi pae i te vähi ôfäfaì, aita reà e repo to reira tupu òiòi iho ra ia, no te mea aore i moè reà i raro i te repo; 6 ia hiti mai te mahana ôriorio iho ra e pohe atu ra, no te mea aore i äahia. 7 Maìri iho ra hoì e tahi pae i roto i te räau taratara, tupu aè ra te räau taratara e apiapi iho ra. 8 Maìri iho ra te tahi pae i te vähi repo maitaì, e höroà mai ra i te mäa hoê hänere i nià i te tahi huero, e ono àhuru i nià i te tahi, e toru àhuru i nià i te tahi. 9 E tarià tö na ra, ia faaroo ia.

No te aha Ietu i parau parapore ai

(Mär 4.10-12; Rut 8.9-10)

10 Ua haere mai ra te mau pipi, nä ô mai ra ia na, E aha òe i parau parapore ai ia rätou. 11 Ua pähono atu ra o ia ia rätou. No te mea, ua höroàhia ia òutou te ìte i te parau àro o te Hau o te raì ra, aita rä i höroàhia ia rätou. 12 E taoà tä na ra, e höroàhia atu ä tä na e ia rahi atu aita a na ra, e rave-ê-hia ia tä na e tërä atoà e vai ra. 13 No reira vau i parau parapore atu ai ia rätou, no te mea, te hiò nei rätou, aita rä e ìte ra, te faaroo nei rätou, aita rä e häroàroà ra e  taa/märamarama ra. 14 No rätou i tupu ai teie tohu a Ìtaia, o tei nä ô mai e, E pau ta òutou faaroo, e òre roa atu ihoä òutou e taa/märamarama, e pau ta òutou hiò, e òre roa atu ihoä òutou e ìte. 15 Ua ètaèta roa te âau o teie nei nünaa, ua turi roa to rätou tarià, e ua täpiri/täpö i to rätou mata, o te hiò hoì to rätou mata, o te faaroo hoì to rätou tarià, o te ìte to rätou âau, e o te haafäriuhia mai rätou, ia faaora atu vau ia rätou. 16 Teie rä, e ao to òutou mata, no te mea te ìte ra, e to òutou tarià, no te mea te faaroo ra. 17 Òia mau ta ù e parau atu ia òutou nei e rave rahi te perofeta e te feiä parau-tià i hinaaro i te hiò i te mau mea ta òutou e hiò nei, aita rä rätou i ìte; i hinaaro i te faaroo i te mau mea ta òutou e faaroo nei, aita rä rätou i faaroo.

Te tätararaa o te ueue huero

(Mär 4.13-20; Rut 8.11-15)

18 E teie nei, a faaroo mai na i te parapore o te ueue huero. 19 Ia faaroo te tahi taata i te parau o te Hau, e aore i märamarama i taua parau ra e haere mai te värua ìno/hämani ìno, e rave ê atu ra ia i tei ueuehia i roto i to na âau. O te hohoà ia o te huero tei maìri i te pae/hiti äratià ra. 20 O tei maìri i te vähi ôfäfaì ra o te taata ia tei faaroo i te parau e tei färii i taua parau ra mä te òaòa 21 no te mea rä aore i äahia i roto ia na iho, mauraa poto ia to na ia tae mai te àti e te hämani ìno tei riro hoì te parau ei tumu, mäheaitu atu ra ia o ia. 22 O tei maìri i roto i te räau taratara ra o te taata ia i faaroo i te parau no te mau manaònaòraa rä o teie nei ao e te faatïaniani/haavarevare a te taoà, apiapi iho ra te parau, e aita aè ra i hotu mai. 23 Âreà tei maìri i te vähi repo maitaì ra, o te taata ia tei faaroo e tei märamarama i te parau, hotu mai ra tä na, hoê hänere i nià i te tahi huero, e ono àhuru i nià i te tahi, e toru àhuru i nià i te tahi.

Manaò

Te tiaì mäite nei mätou e te ârue ra ia òe, e te Atua Nui Tumu Tahi tei èuhehia, e horoàhia atu ia ia òe, tei faaroo i te pure. E tae atoà mai te taata atoà ia òe. Ua upootià te ìno ia mätou  âreà ta mätou mau hara, ua täpoìhia ia e òe ra. E ao to te taata i haapaòhia e òe, e ua haafatatahia mai e òe ia pärahi i roto i to òe ra mau fare E mauruüru ia mätou i te mau mea maitataì no to òe ra fare, no to òe ra moà. Na te mau mea maitaì, e te tià ra, ta òe, ta te Atua Nui Tumu Tahi e ora ai mätou nei, e parau mai ia mätou nei o òe o tei tiàturihia e to te mau hopeà o te fenua, e te feiä atoà i te ätea ê ra i te Moana Nui a Hiva. O tei haamau i te mau mouà i to na ra püai, e ua tätuahia o ia e te mana. O tei haamanino i te haruru o te miti, te haruru o te mau aru ra, e te tiàrepu o te taata nei. To te mau hopeà o te fenua ra, ua roohia anaè e te mataù i ta òe ra mau täpaò. O tei ìteä i te haereà mai i te poìpoì, e te ahiahi, ua faaòaòahia ia e òe ra. Ua hiò mai òe e ua faararirari i te fenua, e ua rahi roa ia i te tupu ia òe i te ànavai a te Atua ra, tei î i te pape e maitaì aè ra ia òe ra, faatupu iho ra òe i ta rätou maa. Ua faarari hua mai rä òe i to na mau âivi rii i te pape, e ua faatahe mai ra òe i te ua i te vähi rii poopoo ra, ua haamarü mai ra i te reira i te tuäua ra, e ua haamaitaì mai òe i tei tupu ra. Te faatoröna nei òe i te mätahiti i to òe ra maitaì, e te töpata mai ra te maitaì i te mau haereà atoà no òe ra. Te töpata mai ra i nià i Mäòhi ui, e te òaòa nei te mau âivi, te mau päpä e àti noa aè. Ua àti te fenua i te nana puaa, e ua î te mau peho i te maa te pii nei, e te himene nei i te òaòa.

No te mea te ua mau e topa nei, no nià mai i te raì, e aore i hoì faahou ua faararirari rä i te fenua, e ua faatupu, e ua faahotu mai hoì i tä na, i noaa ai hoì te huero i te feiä e ueue, i te mäa i te feiä i àmu ra. Oia atoà te parau no roto i te vaha o te Atua Nui Tumu Tahi, e òre e hoì faufaa òre noa, e tupu rä tei ôpuahia e noaa hoì te mea i faaue atu ai au ra. No te hanahana e faaìtehia mai, i te parau a te Atua Nui Tumu Tahi, e òre teie nei mau pohe e au ia fäito i te maitaì e faaìtehia mai ia tätou nei. E faaorahia hoì te mau mea hämanihia nei i të täpeà ra o te pohe, ia noaa te tiàmä maitaì o te tamarii a te Atua ra. Ua ìte hoì tätou e, te ûuru tahi nei te mau mea atoà i hämanihia nei mä te mäuiui fänau ra e tae roa aè nei i teie nei mahana. Eere hoì o rätou anaè ra, o tätou atoà nei, o tei noaa te huero mätamua a te Värua ra, o tätou iho ä tei ûuru i roto ia tätou iho, i te tatariraa atu i te faatamarii tävai, oia te faaoraraa i to tätou nei tino.

Oia mau, i te faarooraa tätou te parau a Ietu i te päpaìraa a Mätaio i te pene 13 i te mau ìrava 1 e tae i te ìrava 23. Te parapore no te Hau ua tupu teie mau parau i  räpaeàu  i te fare i te pae tähatai Paìùma o Ietu i nià i te hoê poti, pärahi iho ra i reira te tià noa mai ra te tiàa rahi atoà i nià i te pae. Te mea mätamua ta tätou e haapaò maitaì te päpaìraa a Mataio e te huru o te faanahoraa o te mau parau, tei faaìte ia tätou i te hoê täpura òhipa rave tämau o te orahia ra e tätou i teie mahana, o ta tätou e taahi noa nei i te mau taime atoà, äratià, ôfäfaì, räau taratara, repo maitaì, ia faahope o Ietu i teie tuhaa te parau nei e, E tarià tö na ra, ia faaroo ia.

Te piti o te tuhaa te pähonoraa a  Ietu i te mau pipi, no te mea, te hiò nei rätou, aita rä e ìte ra, te faaroo nei rätou, aita rä e häroàroà ra e märamarama ra. No rätou i tupu ai teie tohu a Ìtaia, o tei nä ô mai e, E pau ta òutou faaroo, e òre roa atu ihoä òutou e märamarama, e pau ta òutou hiò, e òre roa atu ihoä òutou e ìte. Ua ètaèta roa te âau o teie nei nünaa, ua turi roa to rätou tarià, e ua täpiri i to rätou mata, o te hiò hoì to rätou mata, o te faaroo hoì to rätou tarià, o te ìte to rätou âau, e o te haafäriuhia mai rätou, ia faaora atu vau ia rätou.

Teie te tuhaa faufaa roa aè  o teie parapore i to Ietu haapäpüraa te mau vahi i faaäpiäpihia no te faatupu i te hau no te turu i ta na parau ua rave mai i te tohu a Ìtaia, maite peu e äpiäpi te mau vahi tömoraa o te parau e faufaa òre te tätararaa a Ietu no te ueue huero teie to na reo i te päpaìraa a Mataio e ta tätou faarooraa.

18 E teie nei, a faaroo mai na i te parapore o te ueue huero. 19 Ia faaroo te tahi taata i te parau o te Hau, e aore i märamarama i taua parau ra e haere mai te värua ìno/hämani ìno, e rave ê atu ra ia i tei ueuehia i roto i to na âau. O te hohoà ia o te huero tei maìri i te pae/hiti äratià ra. 20 O tei maìri i te vähi ôfäfaì ra o te taata ia tei faaroo i te parau e tei färii i taua parau ra mä te òaòa 21 no te mea rä aore i äahia i roto ia na iho, mauraa poto ia to na ia tae mai te àti e te hämani ìno tei riro hoì te parau ei tumu, mäheaitu atu ra ia o ia. 22 O tei maìri i roto i te räau taratara ra o te taata ia i faaroo i te parau no te mau manaònaòraa rä o teie nei ao e te faatïaniani/haavarevare a te taoà, apiapi iho ra te parau, e aita aè ra i hotu mai. 23 Âreà tei maìri i te vähi repo maitaì ra, o te taata ia tei faaroo e tei märamarama i te parau, hotu mai ra tä na, hoê hänere i nià i te tahi huero, e ono àhuru i nià i te tahi, e toru àhuru i nià i te tahi.

E faariro tätou teie mau parau ei räveà maitaì no te pororaa, no te horoàraa i te tahi hiòraa maitaì no te hau. Ia rahi ta tätou faahitiraa, aore ra haamanaòraa i te parau tià, no te rahi ia te òhipa hape, te tano òre, e te piò ta te taata e rave noa nei, e i mua i te rahi o te òhipa tià òre, te tià noa mai ra ihoä ia të mau rii noa ra i nià, e hia rä të topa noa atu ra i raro. Te ora ta te fenua e to na î e faaìte noa ra, tei riro ei taoà horoà na te Atua i te taata atoà, ei täpaò hoì no to na here i te taata ia tupu te hau, riro atu ra ia ei tumu no te märöraa, te èiäraa, e te mau òhipa tià òre atoà ta te taata e rave noa nei. Na te taata noa ihoä e faariro noa nei i te fenua ei tahua àroraa, ei vähi hoì e tupu ai te mauiui o te feiä atoà tei au mai ia na. E riro te taata i te manaò e, e mau parau haamoemoeä teie ia na. Te mea e tano e parau i te taata i teie mahana, teie ia  te ora, aita to mua, to muri. No te mea rä e parau riàriàhia te muri e tätou i teie mahana, e taui ia tätou i te parauraa i te nä ôraa i roto i te reo o to tahito ra e, ia Atua te Atua, ia fenua te fenua, ia taata te taata, ua maitaì roa. Teie te parau tià ia faatura e ia auraro te taata i ta te Atua faanahoraa, ia faatura e ia auraro i ta te fenua faahanoraa, e ia rave te taata i ta na täpura òhipa no reira o ia i hämanihia mai ai, ua maitaì roa te mau mea atoà.

I päpaì ai o Mataio i teie reo o Ietu i te ìrava 9 E tarià tö na ra, ia faaroo ia, te auraa, te anihia ra ia tätou e faaìte i te hohoà, e te huru mau o te Atua. I te mau taime atoà e faatupu ai tätou i te parau o te here, te Atua ta tätou e faaìte ra. Te reira te parau tià ta te Atua e hinaaro ra i te taata ia faatupu, te mea noa te reira e ìtehia ai te Atua, tirä rä hinaaro to te Atua i te taata. E tano tätou e parau e, teie parau tià, te mea ia ta tätou i parau na e ia Atua te Atua, ia fenua te fenua, ia taata te taata. I te rahuraa te Atua i teie ao, te òhipa mätamua ta na i rave, te ìritiraa ia i te ùputa o te märamarama, taa atu ra te pöiri i te märamarama, te pö i te ao. Te òhipa atoà ia i tupu i roto i ta Ietu tatararaa no te mau huero tei maìri  i nià i te fenua, ia au i to te taata färiiraa e te òreraa e färii i te parau no reira o ia i tonohia mai ai i te ao nei, te ö mai ra te feiä ìte òre i roto i te märamarama, âreà te feiä i manaò noa na e, te mea te reira i hau ai rätou i te tahi pae, te täpoìhia atu ra ia to rätou märamarama ia òre rätou ia teòteò faahou i mua i te Atua, e parauhia teie huru i te àmaura, e reo mäòhi teie e parau teie no te taata maùa.

 

 

Teraì òr. Faatura.

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens