Overblog Suivre ce blog
Editer l'article Administration Créer mon blog
5 juillet 2017 3 05 /07 /juillet /2017 23:37

Täpati 9 no Tiurai 2017.

Hei

Taiòraa

Mätaio 11,25-30

Te Metua e te Tamaiti

(Rut 10.21-22)

25 I taua taime ra, ua parau atu ra Ietu E haamaitaì au ia òe, e taù Metua, e te Fatu o te raì e te fenua, i te mea i huna ê noa òe i teie nei mau òhipa i te feiä paari e i te feiä märamarama, e ua heheu mai i te mau àiü. 26 Oia ia, e taù Metua, ua au te reira ia òe. 27 Ua hope roa te mau mea atoà i te püpühia mai e taù Metua ia ù nei, e aore roa te hoê i ìte i te Tamaiti, mäori rä o te Metua, aore hoì te hoê i ìte i te Metua, mäori rä o te Tamaiti, e ta te Tamaiti i hinaaro i te heheu atu ia na.

A rave mai i ta ù tuto

28 E haere mai òutou ia ù nei, e te feiä atoà i rohirohi, e tei teiaha i te hopoià, e höroà atu ia òutou i te faaearaa hau. 29 A rave mai i taù tuto i nià ia òutou, e ia haapiihia òutou e au, te marü nei hoì au e te haèhaa nei taù âau e e noaa hoì te faaearaa hau i to òutou värua. 30 Te marü nei hoì ta ù tuto e te mämä nei ta ù hopoià.

Manaò

E faateitei ä tätou i te Atua Nui Tumu Tahi, e haamaitaì tätou i to na ra iòa e a muri noa atu. Ma te haamaitaì i te mau mahana atoà nei, e ârue tätou i to na iòa e a muri noa atu. Te mau uì atoà të faarahi ra i ta òe òhipa, e faaìte hoì i ta òe ra òhipa mana. E parau tätou i te tura e te hanahana no to na ra mana, e te mau räveà taa ê na òe ra. E parau tätou i te manaòraa i to na ra maitaì rahi, e himene hua hoì i ta òe ra parau-tià. I te mea e hämani maitaì to te Fatu i te taata atoà, e te vai ra to na aroha faaherehere rahi i nià i ta na atoà ra mau òhipa. E parau tätou i te hanahana o to na ra pätireia, e faatià noa nei hoì i ta na ra mau räveà püai. I te faaìteraa i te mau tamarii a te taata nei i to na ra mana, e te hanahana e te manaò i to na ra pätireia. E Atua mau te Atua Nui Tumu Tahi e te haavare òre i roto i ta na mau òhipa i te mea te mau ra te Fatu i te feiä e hià ra, e ua faatià i te feiä e piò i raro ra. Te heheu nei òe i to rima, e te haamäha nei i te hiaai o te mau mea ora atoà nei. E parau-tià ta te Fatu i to na atoà ra mau haereà, e te hämani maitaì i ta na atoà ra mau òhipa. Te fätata mai ra te Fatu i te feiä e tiàoro ia na, i te feiä atoà i tiàoro ia na mä te haavare òre. E faatià o ia i te hinaaro o te feiä i mataù ia na, e faaroo mai o ia i ta rätou e tiàoro, e faaora hoì ia rätou. Te tiaì nei te Fatu i te feiä i hinaaro ia na, âreà te feiä paieti-òre ra, e haamouhia ia e ana. E parau âmui to tätou vaha mä te ârue i te Fatu, e ia haamaitaì te taata atoà i to na ra iòa moà e a muri noa atu. No te mea ta te Atua Nui tumu Tahi i faatahinu, e tävini haèhaa e te hau, e faaìte ò ia i te parau hau mai te tahi pae miti, mai te ahi pae päpe, e tae noa atu i te mau hopeà o te fenua. Ia ìte tätou i taua faufaa ra, e pärahi tätou i roto i te Värua ta te Atua Nui Tumu Tahi i haapüaì i roto ia tätou. Ia ère rä tätou i taua Värua rä eere ia o ia i te taata no na. Ia pärahi ra tätou i roto te faufaa no te Parau te ora nei ia te Värua i te parau-tià. Tei faatià ia Ietu i te poheraa ra, o tei faatià i te Metia i te poheraa ra, na na atoà ia e faaora i to tätou mau tino pohe ra i to na Värua i pärahi i roto ia tätou. Teie ra e àmutärahu tätou, eere rä i ta te tino a haapaò atu ai i ta te tino ra. Ia haapaò tätou i ta te tino ra, e pohe ia tätou ia tinai rä tätou i ta te tino ra i te Värua, e ora ia tätou.

Te faaìteraa a Ietu i te päpaìraa  Mätaio i te pene 11 i te mau ìrava 25 e moti i te ìrava 30, te parau no te Metua e te  Tamaiti, te reo o Ietu E haamaitaì au ia òe, e taù Metua, e te Fatu o te raì e te fenua, i te mea i huna ê noa òe i teie nei mau òhipa i te feiä paari e i te feiä märamarama, e ua heheu mai i te mau àiü. E taù Metua, ua au te reira ia òe. Ua hope roa te mau mea atoà i te püpühia mai e taù Metua ia ù nei, e aore roa te hoê i ìte i te Tamaiti, mäori rä o te Metua, aore hoì te hoê i ìte i te Metua, mäori rä o te Tamaiti, e ta te Tamaiti i hinaaro i te heheu atu ia na. Te feiä atoà i rohirohi, e tei teiaha i te hopoià, e höroà atu vau ia òutou i te faaearaa hau. A rave mai i taù tuto i nià ia òutou, e ia haapiihia òutou e au, te marü nei hoì au e te haèhaa nei taù âau e e noaa hoì te faaearaa hau i to òutou värua. Te marü nei hoì ta ù tuto e te mämä nei ta ù hopoià.

I mua i teie mau reo no Ietu, e tià ia tätou i te uiui e, te huru no te tupuraa teie mau parau i roto i te oraraa ta tätou e fänaò nei  i  teie parauraa e, e taù Metua, e te Fatu o te raì e te fenua. E piti tahua teie te  raì vahi teitei parahiraa no te mau tiàrama, no te mau ata, te ua, te mataì, te mau manu o te reva e noaa anei ia tätou i te faaearaa hau i reira. Te fenua, te vahi ia ta te Atua i faanaho no te taata  ei  faatupuraa i te aroha te here ia riro èi hopoià rave tämau ia noaa te faaearaa hau. Èita anei tei roto i te hopoià te hunaraahia teie mau òhipa, tei heuheuhia i te mau àiü.

 

 

 

Faaroo mai na i teie pehepehe no te ÙRU i päpaìhia e Turo a Raapoto na te mau tama.

T E   ÙRU

Upoo iti mata rau,

Arero iti parau  òre,

Iri iti hou tea

Te ùru, te hune, te paa.

E mata no te here te ùru,

E reo no te here te ùru,

E hou no te here te ùru

E täpaò  te ùru no te here metua.

Mai te peu e ui tätou e, e aha tei hunahia i roto i te maa ùru ?

Ua rau ta tätou tatararaa teie parau no te Here, te ìte noa ra tätou e, i mua i teie parau no te here, ia rahi atoà te haèhaa i roto i te âau o te taata i te ìriti-mäite-raa i te mau manaò atoà e riro i te haafifi i ta na märamaramaraa i teie parau, e tae roa atu i te taime e huru hohoà mai ai te parau o te here i roto ia na. E nä ô noa tätou e, aita tätou e mau ra i te parau mau i nià i te here, te faaitoito nei rä tätou i te ìmi i te parau mau, e färii tätou i te ìriti i te tahi mau manaò hape to tätou, riro noa ai ei mau manaò färiihia, ei räveà e huru hohoà mai ai te here tei au i te hinaaro o te Atua, e faaea tätou i te nä roto i te mata o te taata i te hiò i te tahi mea ta te Atua iho i tuu i roto i te hohonuraa o te âau o te taata tätaì tahi, e faaitoito i te heheu i te märamarama i tuuhia i roto i to tätou iho âau.

I teie parauraa na Ietu, e taù Metua, te Fatu o te raì e te fenua. No te haafatata te raì e te fenua tei täamuhia i te taura motu òre mai te hoê hei, tei haamämä i te tuto e fautuahia e tätou. Ua faahohoà tätou te Mäòhi i te here i te tahi hei, e ia au i te huru o te hei, eita e ìtehia to na haamataraa e to na faahopeàraa, te mea ia i faaòhipahia ai te parau no te taura mutu òre o te here o te Atua. Te ìte ra tätou e, te hei, eere te faanehenehe o te taata e haere i te ârearearaa, ta te Mäòhi rä te reira faahohoàraa i te here. E nä ô ia tätou e, i teie mahana, te rave taa òre noa nei te Mäòhi i te hei, te faahapa taa òre noa atoà nei rä i te hei, terä e haere atu ra i te ârearearaa, e terä e haere atu ra i te pureraa, hoê ä räua haperaa. I roto i teie parau no te hei, te ìte ra tätou e, te fenua ä teie e haapii mai nei ia tätou i te auraa o te here, tei täamuhia i nià i te raì te pärahiraa o te mau tiàrama.

 

Teraì òr. Faatura.

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens