Overblog Suivre ce blog
Editer l'article Administration Créer mon blog
15 juin 2017 4 15 /06 /juin /2017 23:12

Täpati 18 no Tiunu 2017.

Àramöina.

Taiòraa

Ioane 6,51-58

51 O vau te päne ora o tei pou mai mai te raì. O të àmu i teie nei päne, e tià ia i te oraraa. O ta ù päne e horoà atu o to ù ia tino, o ta ù ia e horoà ei ora no to te ao.52 Ua märô anaè iho ra te âti-Iüta rätou rätou iho, ua nä ô aè ra E aha teie taata e tià ai ia horoà mai i to na tino e àmu 53 Ua parau mai ra Ietu ia rätou Âmene, âmene, e parau atu vau ia òutou ia òre òutou ia àmu i te tino o te Tamaiti a te taata nei, e ia òre hoì ia inu i to na toto, aore ia e ora i roto ia òutou. 54 O të àmu i to ù tino e të inu i to ù toto, e ora-mure-òre to na, e na ù o ia e faatiàfaahou ia tae i te mahana hopeà ra. 55 E mäa mau to ù tino e e inu mau to ù toto. 56 O të àmu i to ù tino e të inu i to ù toto, e tià ia i te àtiraa mai ia ù, e e tià hoì au i te àtiraa atu ia na. 57 Mai te Metua hoì e ora ra, o tei tono mai ia ù nei ra, e te ora nei hoì au i te Metua oia atoà të àmu ia ù nei, e ora ia ia ù. 58 O te päne teie no te raì mai eere mai te mäna i âmuihia e to òutou hui metua ra, pohe atu ra hoì rätou. O të àmu i teie päne, e tià ia i te ora-mure-òre ra.

Manaò

I teie hora haamoriraa na tätou e haamaitaì i te Atua Nui Tumu Tahi e mea maitaì te himene ei haamaitaì i to tätou Atua, e mea pöpou ia, e au hoì te haamaitaì ra no te patu faahou ia Mäòhi Nui i nià i te Aroha te Here, no te haaputuputu i te Mäòhi i purara ê ra. Te feiä âau paruparu ra, ia faaitoitohia e himene mä te haamaitaì i te Fatu. O tei täpoì i te raì i te mau ata ra, o tei haapaò i te ua no te fenua, o tei faatupu i te räau rii i nià i te mau mouà, te faaàmu nei o ia i te mau fenua atoà i to na hotu ma te tiàturi. Na na i faatupu i te tiàmaraa o te hau i te mau ôtià ra, e ua paìa tätou i te maa maitaì rahi. Ua horoà mai o ia, ia tätou i te mau hotu o te fenua mai te àihere ra, e te haapurara nei i te hau paari mai te rehu auahi ra. Ua tuu mai o ia i ta na parau, e ua tärapape iho ra ia ua haafarara mai ra o ia i te mataì, ua pïnaì iho ra te vao e tahe iho ra te pape i nià i te mato. Ua faaìte o ia i ta na mau parau i roto i te reo te fauraò, i ta na mau ture e ta na mau faaäuraa, i te mau tupuna e ia tätou.

E haapaò maitaì tätou, e rave i te mau parau atoà ma te parau atu i teie nei mahana ia ora hoì tätou, e haamanaò hoì tätou i te èà ta to Atua Nui Tumu Tahi i arataì ia tätou nä nià i te Moana Nui a Hiva ra, a uì ia te uì, a mätahiti te mätahiti , ei faahaèhaaraa ia tätou, e ei tämataraa ia tätou, e ia ìteä i roto i to tätou âau e to tätou haapaòraa i ta na ra parau, e te òreraa. E ua faahaèhaa hoì o ia ia tätou, ua vaiiho noa ia tätou ia paia noa, i te maa o te fenua heeùri o Mäòhi Nui. E teie nei, e haapaò tätou i te mau parau a to Atua te Tumu Nui, e ia mataù hoì tätou ia na. Ia tae faahou tätou i te fenua maitaì ra, i te fenua tei paèpaè ia Mäòhi Nui te pape tahe, te pape pihaa, te pape roto no uta i te peho, no roto i te mouà i te pihaaraa mai. Fenua tei faahotu pupa noa te ùru i nià i te tumu, te tumu haari, te vai haari, te taro te maa vï. I te fenua àmu noa ai tätou i te mäa mä te oè òre, e aore e mea e toe ia tätou, e ia àmu tätou i te mäa ra e ia fiu e haamaitaì tätou i te Atua ra, i te fenua maitaì ra tä na i höroà mai no tätou. E ara o te möina to Atua ra te Tumu Nui ia tätou, i te haapaò òre i ta na ra mau parau, e ta na mau ture, e ta na mau haapaòraa, i faaìtehia ia tätou i teie nei mahana.

Teie mau parau i faaroohia e tätou ua âmuihia i roto i te i te hoê maa e te hoê âuà, ma te faaìteraa a Pauro Torinetia hoê i te pene 10, i na ìrava 16 e te 17 ìrava 16 Te âuà no te maitaì ta tätou e haamaitaì nei, eere änei i te âmui-atoà-raa i te toto o te Metia ra, Te päne ta tätou e ôfene nei, eere änei i te âmuiraa i te tino o te Metia ra 17 No te mea hoê ä päne, tätou atoà e rave rahi nei hoê ä ia tino; te àmu atoà nei hoì tätou i taua päne hoê ra.

Teie te huru te faaìteraa a Ioane i te pene 6, i te mau ìrava 51 e tae i te ìrava 58 te reo o te Fatu te Metia O vau te päne ora o tei pou mai mai te raì. Të àmu i teie päne, e tià ia i te oraraa. O ta ù päne e horoà atu o to ù ia tino, ei ora no to te ao. Te manaò o Âti Iuta i teie huru parauraa, E aha teie taata e tià ai ia horoà mai i to na tino e àmu, te pähonoraa a Ietu Âmene, âmene, e parau atu vau ia òutou ia òre òutou ia àmu i te tino o te Tamaiti a te taata nei, e ia òre hoì ia inu i to na toto, aore ia e ora i roto ia òutou. Te àmu i to ù tino e të inu i to ù toto, e ora-mure-òre to na, e na ù o ia e faatiàfaahou ia tae i te mahana hopeà ra. E mäa mau to ù tino e e inu mau to ù toto. O të àmu ra e tià ia i te àtiraa mai ia ù, e tià hoì au i te àtiraa atu ia na. Te Metua hoì e ora ra, o tei tono mai ia ù nei ra, e te ora nei hoì au i te Metua. O te päne teie no te raì mai eere mai te mäna i âmuihia e to òutou hui metua ra, pohe atu ra hoì rätou. O të àmu i teie päne, e tià ia i te ora-mure-òre ra.

Teie huru parauraa na Ietu te vai ra te tïtauraa ia tätou, eiaha e faaea i nià i te tino o te parau, oia te taò, e ìmi rä i te värua o te parau, oia te auraa o te parau, tei reira te ora, no te mea rä ua faaoti ê na to tätou manaò e, e parau teie no te pohe, eita ihoä ia tätou e faaroo ia Ietu. Te mea atoà ia ta tätou i parau noa mai na e, te vai ra te mea i parauhia, e te vai ra te auraa o te mea i parauhia. Eere räua i te mea piri i te mau taime atoà. I te tahi taime, tei roto noa ihoä te auraa o te parau i te mea i parauhia, i te tahi atu taime, e ìmi ia i te reira auraa i te tahi vähi ê atu. Aita atu rä mea ta Ietu e haapäpü nei maoti rä, eere na te tino, eere hoì na te pohe e horoà i te ora, na te värua rä e tauturu i te taata i te ìteraa i te ora. Mai ta Ietu ihoä e parau ra, mai te peu e faaäuraa âpï teie, aita atu ia to na auraa maoti rä, te faaâpïraa i te faaäuraa i ravehia e te Atua Metua a ani ai o ia i te taata e àmu i to te mau räau atoà o te ô i te faaìteraa a te puta Tenete i te pene 2, i te ìrava 16, ta Ietu hoì e ani nei i ta na mau pipi ia rave e àmu, ia rave hoì e inu. No reira, mai te peu e färii tätou i te parau o te maniiraa toto, aita ia tätou i roto i te faaäuraa âpï, tei roto rä i te tahi faaäuraa taa ê, të òre roa e tüàti i nià i te auraa o te hotu o te fenua, ta Ietu i rave ei faaìteraa i te here o te Atua. E ui atoà ia tätou te mea Ietu i tae roa ai i te raveraa i te täpaò o te ora, te färaoa e te uaina, ei faahohoàraa i to na pohe aore ra, te mea te parau o te ora i roto i te faaäuraa i ravehia e te Atua Metua, i riro mai ai ei parau no te pohe. E aha atu ra ia te auraa o ta Ietu haamaitaìraa i te Atua i to na raveraa i teie nä mäa.

Te ìte noa ra tätou e, eita tätou e tano e tämau noa i te parau e, tei päpaìhia ra, ua päpaìhia ia. Eiaha atoà rä ia äramoinahia ia tätou e, eere na Ietu i päpaì i teie mau parau, te mau pipi hoì, tei riro te päta ei parau faufaa no te tiàturiraa o to rätou nünaa, e âti Iuta anaè rätou, peneiaè na rätou i rave i teie faatüàtiraa i te maniiraa toto, tei tupu i te tahi tau ê atu , tei riro ei tumu no to rätou parau ei nünaa, oia te toto o te päta, e te àmuraa mäa a te Fatu ta rätou e haamanaò ra, ta rätou hoì i märamarama mai te mea, te räveà ia e roaa ai te ora.

I te tahi aè pae, e tau maoro i muri mai i te poheraa o Ietu to te tahi pae o rätou päpaìraa i teie mau parau, e tano ai te manaò e ui e, aita änei rätou i faananea rii i te parau. No te mea, eita Ietu e tano e parau e, aita o te tino faufaa, haafaufaa noa ai i te parau o te tino, te ìò, aore ra te toto, aita roa atu te reira e tüàti ra i ta na mau haapiiraa. E tano atoà rä tätou e manaò e, na rätou i rave i te teie faatüàtiraa i roto i te maniiraa toto ta rätou i ìte, e te mau parau o te ôroà ta rätou e haamanaò ra. Te vine i tävirihia, oia hoì te pape o te vine i haamaniihia, ta te paari o te taata i faariro ei uaina, ta Ietu ia e parau nei e, tona ia toto, no te faaìte e, mai te toto e horoà i te ora i te tino, te pape o te vine i te riro-atoà-raa ei täpaò no te ora i horoàhia no te nünaa e rave rahi. E ara rä, o te manaò tätou e, e ora taa ê ihoä ta te färaoa e horoà ra, i te ora e horoàhia ra e te uaina, e ua hau aè to te tahi faufaa i to te tahi. Inaha e tupuraa te reira no te aroha e te here o te Atua hoê, eita ia te tahi e tano ia faataa-ê-hia i te tahi, hoê hoì te Atua. Oia atoà te aroha e te here o te Atua ta Ietu e faaìte ra, aita te tahi i horoàhia na te tino e faaìte, e te tahi ra, na te toto ia, no te mea e parau hoê teie. Eiaha atoà rä tätou e manaò e, te aroha e te here o te Atua ta te hotu o te fenua e faaìte ra, nä reira hoì te aroha e te here o te Atua ta Ietu e faaìte ra, e piti ia parau taa ê roa. Aita, taua parau nei ä teie.

Te mea ia Ietu i tae roa ai i te parauraa no te färaoa e te uaina e taù tino tenä, taù toto tenä. No reira, mai te peu te ìte ra Ietu e, ua hope roa ta na faaìteraa i roto i terä e ravehia ra e te hotu o te fenua, e aha ia Ietu e hinaaro ai e rave i te tahi faaìteraa taa ê atu. I roto i te mau maitaì ta te fenua i faahotu mai, te vai ra te mäa paari, e te vai ra te mäa pape, e horoà anaè na te fenua aita rä te fenua e faataa ra i te mäa paari i te mäa pape, na te taata noa te reira faataaraa. Te faaäuraa ta Ietu i rave i roto i te färaoa, te uaina, to na tino, e to na hoì toto, no te faaìte ia i te tauturu rahi ta na e ìte ra i roto i te fenua e tae ai te taata i roto i te ìteraa i te Atua. Mai te aroha e te here o te Atua i riro mai ei taata, te reira hoì aroha e te reira here, ua riro atoà mai ia ei fenua mä to na î, e no te mea te ìte ra Ietu i te aroha e te here o te Atua i roto i te hotu o te fenua, i òre ai o ia i fifi noa aè i te parauraa e, to ù tino te nä ; to ù toto te nä , i horoàhia ei ora no to te ao, mai te hotu o te fenua i horoàhia ei ora no to te ao, e ta te feiä e haamori nei i te Atua e haamanaò nei. Teie te ora horoà noa a te Atua, ta te fenua e faaìte ra, e ta Ietu e fäì ra, aita to roto i te maniiraa toto. Ia inu te taata i te uaina, ta Ietu e parau ra e, to na ia toto, eere te pohe o te vine ta na e faaìte ra, àhiri e o te reira ra, ua hope ê na ia te parau o teie mäa. E tano tätou e parau e, tei ìte ia Ietu no ta na poroì i to te ao, tei ìte hoì i te fenua no ta na poroì i te mau nünaa atoà, ua ìte ia i te Atua, e here hoì te Atua. Mai ta tätou i parau mai na, te mea faufaa, eere te mäa, rau noa ai te huru ta na i rave, te mea rä ta te reira mäa e faaìte ra, te värua o te reira mäa ; ua riro noa hoì te mäa ei raveà faaìte i te aroha e te here o te Atua.

 


Teraì òr. Faatura.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens