Overblog Suivre ce blog
Editer l'article Administration Créer mon blog
8 juin 2017 4 08 /06 /juin /2017 12:06

Täpati 11 no Tiunu 2017.

Ao

Taiòraa.

Ioane 3,16-18.

16 I aroha mai te Atua i to te ao, e ua tae roa i te horoà mai i ta na Tamaiti Fänautahi, ia òre ia pohe te faaroo ia na ra, ia roaa rä te ora-mure-òre. 17 Aore hoì te Atua i tono mai i ta na Tamaiti i te ao nei e faahapa mai i to te ao, ia ora rä to te ao ia na. 18 Tei faaroo ia na ra, e òre o ia e faahapahia; tei òre i faaroo ra, ua faahapa-ê-hia na ia, o ia aore i faaroo i te iòa o te Tamaiti Fänautahi a te Atua ra.

Manaò

Matahurahura o teie nei ao, ta te Atua ia i faaìte i to na huru na roto i te parau tei riro mai ei fenua. Ua parau, ua tupu, ua parau, ua ìtehia. Te Atua te Fatu o te raì e te fenua. Te taata, o te òhipa ia o ta na i hämani. E i mua i te taata o ta na i hämani, te parau nei tei hämanihia, O te Fatu, o te Fatu, e Atua aroha noa, e te hämani maitaì rahi, e te faaòromaì rahi, e te maitaì rahi, e te parau mau. Te auraa te riro ra teie fäìraa mai te tahi ìteraa e te farii atoàraa hoì e, e Atua Nui Tumu Tahi. I te mea te vai ra te hinaaro o te taata e te vai ra te hinaaro o te Atua. Aita te Atua e parau ra, ua hape te taata, te vaiiho ra rä te Atua na te taata e ìte mai. E hinaaro to te Atua, e manaò to te Atua i mua i te parau no te fäìraa a tei hämanihia.

Matahurahura, e taò tumu piti teie, Mata e haamataraa, e ômuaraa, te piti Hura e püraa mai i roto i te märamarama. Tano maitaì teie parau i te ìrava 17 Aore hoì te Atua i tono mai i ta na Tamaiti i te ao nei e faahapa mai i to te ao, ia ora rä to te ao ia na. Te matahurahura teie no te ao o te Atua Nui Tumu Tahi. Teie nei, tei te taata atu ra i te faaòhiparaa, e ora mai ai te parau, aore ra, e moè roa atu ai. No te mea, i te mau taime atoà e hiòhia ai te taata i mua i te Atua, e tiàraa âpï tera, e taime âpï, e ère rä i te puòiraa no te mau òhipa i rave-noa-hia mai na.

Ia maoro anaè te ravehia te tahi òhipa, e te taata ua ìte te taata e mea nahea i te raveraa, e moèhia rä te auraa. Ua moè anaèhia te auraa, tei roto roa te taata i te rave peuraa, aore ra, tei roto te taata i te haapaò rave noa. Ua topa anaè i roto i te haapaò rave noa, aore ra, i te rave peu noa, ua moè anaèhia te auraa o te tahi òhipa, ua faufaa-òre atoà te reira òhipa.

Na te reira e haapäpü mai ia tatou e, mea fifi ia farii i tera manaò e, e peu te aroha i te taata, e aore te piiraa e haere mai e tämaa. I roto atoà ihoä ra i to tatou nunaa, aita ä i riro mai ra ei peu, eita e tano ia parauhia i teie mahana e, e peu tera, mai tera e ìtehia ra i roto i te tahi atu nünaa. I roto i to tätou nunaa; aita, ei mea faanaho-roa-hia e tae ai te taata i roto i te manaòraa e, e rave. Ia òre anaè ia faanahohia, eita e rave, aita te reira i roto i te oraraa o te taata, i roto i te parau no tona oraraa. No reira, mea fifi ia parauhia te aroha e, e peu. Te tahi tera òhipa, e mea faaâpï noa, te mau tupuraa atoà, e au ra e, ua moèhia tera i na mua mai, mea âpï teie tupuraa, taime âpï teie no te taata, tona tiàraa atu i mua i te Atua. Eita e tano ia parauhia e peu te aroha e te färii. Ia faaroo tätou i teie reo, e ua tae roa i te horoà mai i ta na Tamaiti Fänautahi, e teie, o ia aore i faaroo i te iòa o te Tamaiti Fänautahi a te Atua ra, no te mea na te reo e te faaroo e faafänau ia tätou i te òhiparaa te Aroha, te Here e tïtauhia mai ra.

Mai te peu e rave tätou i te tahi hiòraa, te haereraa i te pure, te haamataraa e auraa no te taata, e te vai ra rä te taime, e moèhia i te taata te auraa, no te aha òna i haere ai, i reira e ö mai ai te haere peu, te rave peu, ua ìte ia ia haere no te mea ua mätau òna i te ìtehia òna ia haere, te auraa rä o te òhipa o ta na e haere ra, ua moèhia.

E faaea tätou i te ani i te Atua ia haere mai o ia e tatara i te ìno ta tätou iho i faatupu, e tano rä tätou e ani i te Atua ia horoà mai ia tätou i te itoito, te püai, e te märamarama no te tatara i te fifi ta tätou i faatupu. I parau noa mai na tätou, e te parau faahou nei ä tätou e, te pohe rahi o te Mäòhi i teie mahana, to na ia ère, to na maùa, e ta na faaìno rahi i to na reo. Na na iho e tüpohe nei i te märamarama e arataì ia na i roto i te ora, oia hoì i te Atua ra. Taua märamarama ra, ua hunahia ia i roto i te reo ta na e vahavaha nei e ta na e haafaufaa òre nei i teie mahana i te haapeuraa i roto i te reo eere i to na, mai te tahi taata e haapeu ra i roto i te àhu eere i to na, te faufaa eere i ta na, te oraraa eere i to na. Tano roa ai te reo o Ietu I te ìrava 18 Tei faaroo ia na ra, e òre o ia e faahapahia tei òre i faaroo ra, ua faahapa-ê-hia na ia, o ia aore i faaroo i te iòa o te Tamaiti Fänautahi a te Atua ra. Te hopeà o teie nei parau, ia maitaì ä, ia mähanahana roa, ia hoê ä âau, e pärahi mä te hau, e tià i te Atua no na te aroha e te hau i rotopü ia tätou. E aroha tätou ia tätou iho i te hoì moà ra. Te aroha nei te feiä moà atoà ia tätou. Ei ia tätou atoà na te aroha mau a te Fatu ra a Ietu Metia, e te hinaaro o te Atua, e te au a te Värua Maitaì ra. .

I aroha mai ai te Atua ia tätou, e ua tae roa i te horoà mai i ta na Tamaiti Fänautahi, ia òre ia pohe te faaroo ia na ra, ia roaa rä te ora-mure-òre. Aore hoì te Atua i tono mai i ta na Tamaiti i te ao nei e faahapa mai i to te ao, ia ora rä to te ao ia na. Tei faaroo ia na ra, e òre o ia e faahapahia; tei òre i faaroo ra, ua faahapa-ê-hia na ia, o ia aore i faaroo i te iòa o te Tamaiti Fänautahi a te Atua ra.

Te ao ta Ietu e parau ra, aita to na e tüàtiraa i nià i te ao ta te Tenete e faaìte ra. I faahanahana ai o Ietu i te ao, no te mea ia, te ao te mätamua i färii i te maitaì o te parau a te Atua, te ao hoì tei riro ei ìte e ei faaìte i te rahi o te hanahana o te Atua. Eere rä no te mea te faahiti nei tätou i teie mau manaò i riro ai te reira ei mea òhie i te färii-atoà-hia e te taata. No roto ihoä paha te ao i te pöuri i te raveraahia mai e te Atua, te ao atoà rä te mätamua i ànaànahia e te märamarama o te Parau a te Atua, e ia fäì te Atua i te maitaì o te märamarama, ia ìte ia tätou e, eere no te märamarama anaè te reira maitaì, no te ao atoà rä i faahoì mai i te maitaì o taua märamarama ra. Te auraa vai noa te ao i roto i te märamarama e te türamaraa a te parau a te Atua, vai noa atoà mai te maitaì ei huru no te ao. Te maitaì o teie märamarama, te mea ia e, aita o ia i türama noa i te ao mai te tahi mea i nä nià mai i te tau i raro, ua nä roto atoà mai rä i te ao, nä roto i te mau täpaò ora ta te ao i faaìte mai e tei riro ei mauruüruraa na te Atua. Te mea e au no te ao e au atoà ia no te taata. Tano roa ai te mea e parauhia ra e Ioane tei roto ia na te ora, e te ora, to te taata ia märamarama Ioane pene 1 ìrava 4. Te auraa, eita te märamarama e tano ia faataa-ê-hia i te Parau, eita hoì te ora e tano ia faataa-ê-hia i te märamarama ta te reira Parau i faatupu mai. No reira e òre ai e tià ia tätou ia faaea noa i nià i te mea i parauhia, aore ra te mea i päpaìhia mai te òre e tïtau i te märamarama. Te auraa, eita te taata e ora i te parau, oia te mea i parauhia, aore ra te mea i päpaìhia, riro noa ai ei parau no te ao, aore ra ei parau no te Mäòhi, e ora rä i te märamarama o te parau, te märamarama tei riro te parau, aore ra te päpaì, ei püòhu, ei fauraò. Te faufaa o te parau, te riroraa ia ei faatupu i te märamarama, oia hoì ei tauturu i te taata i te ìteraa i te òhipa e tiaìhia ra ia na ia rave atu. E tano te fifi o te taata i te färiiraa i te parau o te fenua ia faaäuhia i te fifi o te mau pipi i te märamaramaraa i te parau o Ietu.

 

Teraì òr.Faatura.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens