Overblog Suivre ce blog
Editer l'article Administration Créer mon blog
24 mai 2017 3 24 /05 /mai /2017 21:07

Täpati 28 no Më 2017.

Ua oti

Mau taiòraa.

Taramo 27

Te reo aroha.

E ta ù Atua, e ta ù Ora.

Âau faatura i te Atua.

Tei faateiteihia.

Òhipa 1 : 12 - 14

Te märamarama e te ora.

Te mau pipi hoìraa i Ierutarëma

Te pureraa âmui

Te hoêraa

I Pëtero 4 : 13 – 16.

Te òaòa o te taata faaroo.

E ao to tei faaìnohia i te iòa o Ietu.

Te pohe o te taata Teretetiano.

Ia hoê te Metua, te Tamaiti i roto i te taata.

Ioane 17 : 1 – 11.

Te hora o te Metia.

Te ìteraa i te Atua

Te hanahana o te Värua Moà.

Te parau a te Atua tei haapaòhia.

Te manaònaòraa o Ietu i te Ètärëtia.

Tumu parau : Te pure.

Ìrava tumu : ìrava 3 vm TEIE HOÌ TE ORA MURE ÒRE, IA ÌTE RÄTOU IA OE I TE ATUA MAU RA

Te niu o te parau teie ia : ìrava 1 vr E TA Ù METUA UA TAE I TE HORA, A HAAMAITAÌ MAI, e te ìrava 11 vr E TA Ù METUA MOÀ RA E, IA TIÀ IA OE.

E tià ia parauhia ua patuhia ta tätou taiòraa i nia i te hanahana o te Metua, e to na anaè te hanahana ia ìtehia. Ia ìte rätou, oia hoì to te ao te Atua Nui Tumu Tahi o te Atua mau ia tumu no te Ora Mure Òre.

Ei faatüàtiraa.

Te mau parau ta tätou e farerei nei i roto i teie mau taiòraa o te tüàtiraa ia, i te mau haamaitaìraa e tïtauhia nei e te feia paieti. Ei faaìteraa ia i te mau àti e färereihia i te iòa o te Metia. Te faaravaìhia nei teie mau manaò, ma te faaära, ia tupu noa atu taua mau mea ra, ia haamanaò ia rätou e, ua faaìte-atea-hia e Ietu. I muri aè i to na faaitoitoraa i ta na mau pîpî. E pohe to òutou i teie nei ao, e faaitoito ra, ua riro te rë o teie nei ao ia ù. E te parau e faahitihia nei e te Taramo 27 E ta ù Atua, e ta ù Ora.

Te pene 17.

O te hoê ia pene taa ê no te Èvaneria a Ioane. Na te hoê taata faaroo no te 16 no te tënetere i maìri i te iòa no teie nei pene parau i te pure tahuà. E na teie pure i òpani i te färereiraa hopeà no Ietu e ta na mau pipi, hou e täìrihia ai te Tiaì mämoe e a purara atu ai te na na. Te òhipa e ravehia nei e Ietu i teie taime te haapäpüraa ia i te niu no te faaroo o te mau pipi ia òre ia àueue i mua i te mau peu o teie nei ao.

Ua tano roa te parauraahia teie nei pure i te PURE TAHUÀ, no te mea, e Tahuà Rahi no te mau Tahuà teie e pure nei. Te pure nei O ia no to na mau taata tei papaìhia to rätou iòa i roto i to na âau, mai te Tahuà Rahi no te faaäuraa mätamua tei pure no na ôpü 12, ma to rätou mau iòa i papaìhia i nià i to na täpoì ôuma (Etoto 28 : 29 ). Ma te rave atoà i te pupuraa tutia täraèhara, e oia iho te Arenio, tei hopoì ê i te hara a to te ao nei. Na te èpitetore i te mau Hepera i tatara nehenehe maitaì i te òhipa a te Metia tei riro i te taime hoê, ei Tahuà e ei täraèhara, i te pene 4, 5, 7 e tae i te 10.

Te taiòraa.

Ìrava 1 e faaea i te 11.

E tià roa ia parauhia te vai nei e piti tuhaa i roto i teie mau ìrava.

  1. Te pure nei o Ietu no na iho ìrava 1 e tae i te 5.

I roto i teie tuhaa ta tätou i te haapäpüraa e, ua oti ia Ietu te òhipa ta te Metua i horoà mai na na e rave. Ia tià i te Atua, ia papaì roa O ia i teie parau, na roto i to na Värua Maitaì, i roto i to tätou âau, ia ìte päpu tätou, ia faaroo e ia tiàturi e, ua oti mau ia Ietu te òhipa no te feia hara i te ao nei. Eiaha tätou ia faariro i te mau òhipa ta tätou e rave nei ei mea faufaa, i te mea àuaa tätou i tupu ai te òhipa a te Atua. Mai te ani òre i to tätou manaò, mai te tïtau òre, e mai te ani-òre i ta tätou tauturu, ua faatupu te Atua i ta na òhipa i raro nei na roto i ta na Tamaiti. E aha teie òhipa ta na e parau nei e, UA OTI ? Taua òhipa ra, teie ia, ua haamaitaì au i to iòa i te ao nei. E òhipa rahi taua òhipa ra, e òhipa oti-òre i te taata. Ua haamaitaì Ietu i te iòa o to na Metua na roto i to na haapaeraa i to na vahi Moà, no te haere mai i roto i teie nei ao na roto i te huru o te taata nei. I te mau tuuraa âvae atoà no na, i te mau mahana tätaì tahi, e tae noa atu i to na aho hopeà, ua faaìte noa O ia i nià i te fenua nei, i te Atua ìte-òre-hia e te mata. Hou O ia a àmu ai i te hoê tapu färaoa, ua faateitei i to na mata i nià no te haamaitaì i te Atua. E ua ànaana noa i te mau mahana atoà na roto ia Ietu, te hanahana no te Atua i rotopü i te mau taata o te ao nei. I te mau vahi atoà, ua haamaitaì O ia i te iòa o te Atua, i rotopü i te mau matapö, te mau piriòì, te mau rëpera, te feia taoà e te feia veve e i rotopü hoì i te feia pohe. I roto i teie nei ao tei maìri i roto i te hara, tei täpoìhia e te pöuri e te ìte òre, teie nei ao tei täpeàhia i roto i te manaò òre e te täiroiro i te Atua, teie nei ao tei òre i faaèa i te faaìno e i te haaviivii i te iòa o te Atua, ua haamaitaì e ua haamoà o Ietu i te iòa o te Metua, e ua haapii mai ia tätou e, e naò òutou ia pure ‘’ E to mätou Metua i te ao ra, ia raa to Òe iòa………… Ua haamaitaì Ietu i te iòa o te Atua na roto i te haapaòraa i ta na mau faaueraa tei òre i maraa i te taata i te haapaò, e ua faatura O ia i to na hinaaro na roto i te auraro mäiteraa e tae noa atu ra i te pohe tätauro. Ua na reira O ia ia noaa ia tätou te ora mure òre. I teie nei ra, ua oti taua òhipa ra, te tià nei O ia i mua i te Atua mai te hoê tävini te huru, e te parau nei ‘’ Ua haamaitaì au i to iòa i te ao nei, ua oti ia ù te òhipa ta òe i ho mai na ù e rave.’’

  1. Te pure nei o Ietu no te mau pîpî.( ìrava 6 e faaèa i te 11.)

Teie tuhaa e moti ia i te ìrava 19, ua faataahia ra no teie tuatapaparaa e faaoti i te ìrava 11, i te mea tei teie mau ìrava to Ietu haapuairaa i te faaìte i to na hinaaro i te Metua no te mau pîpî.

I te ômuaraa i ta na òhipa i te fenua nei, ua tïtau Ietu i te hoê mau taata ia pee mai ia na. Ua faaruè rätou i te mau mea atoà e ua àmui mai ia na. I roto i teie nei mau pipi tätaì tahi tei pee mai ia na te ìte ra o Ietu i te reira mai te hoê horoà no o mai i te Metua ra. Aita Ietu e tiàturi nei e ua roaa mai rätou ia na na roto i ta na iho tïtauraa, no te Atua ra rätou, e na na i horoà mai ia rätou no na. I teie taime, 11 noa iho rätou, ua reva ê te tahi. I ta tätou hiòraa, e mea iti roa. Àreà Ietu te haamaitaì nei O ia i te Atua no taua âmuiraa iti, oia hoì te tano ia parauhia, te ôteo nei te hoê faaroo âpï tei parauhia te ÈTARETIA niuhia i nia i te TIAFAAHOURAA E TE ORA MURE ÒRE. Ua ìte O ia e, te päpu nei ta na òhipa i teie nei, no te mea, na te Atua rätou i horoà mai no na. I te vahi tei reira hoê noa taata, tei vehihia ra i te mana o te Atua, e noaa i taua taata ra te mano- tini-raa e tiàturi i te Atua.

No te aha o Ietu i pure ai mai teie te huru ?

No te faaìte ia i te fenua nei e tupu ai te hanahana o te Atua Nui Tumu Tahi mai teie ta na e pure nei. I roto i te pure, te faahaèhaa nei tätou i mua i te Atua, te tuu nei i to tätou âau, to tätou manaò, to tätou värua, e to tätou püai i roto i ta tätou e parau ra i te Atua, mai te tiàturi e, e pähono mai te Atua ia tätou. I mua i te fenua, e tuu atoà tätou i te haèhaa e te faatura i roto i to tätou âau, e tuu hoì i to tätou âau, to tätou manaò, e to tätou värua, e to tätou püai i roto i ta tätou e rave. Eiaha mai te mea aita te fenua i ìte i te parau, oia, no roto mai hoì o ia i te parau, e te tiaì noa mai ra te fenua i ta tätou parau, eita rä ta tätou mäa e tupu i te paraparau noa, ei mea rave roa rä e faaìte mai ai te fenua i te hohoà o ta tätou parau. Tätou i fifi noa ai, no te haamau-noa-raa ia i to tätou tiàturiraa i nià i te mana o te parau, e te òreraa e haapäpü i to tätou tiàturiraa i nià i te mana o te rima. Haamanaò tätou e, no roto mai te fenua i te parau, te taata rä, e piti tumu to na : no roto mai o ia i te parau (Tenete 1, 26), no roto atoà mai rä o ia i te rima o te Atua (Tenete 2, 7). E mai ta Ioane e parau ra e : Tei roto ia na te ora, e taua ora ra , to te taata ia märamarama (Ioane 1, 4). Mea maitaì te taata ia märamarama òiòi e ia färii i te reira parau to na ia matara to na mau fifi atoà. E parau te fenua, tei roto ia na te ora, e ia hinaaro te taata i taua ora ra, eiaha ia e mataù i te vävähi i te àpu, eiaha e mataù i te ô e te tanu. E parau atoà te taata, tei roto te ora o te taata i to na parau, e ia hinaaro o ia i taua ora ra, eiaha atoà o ia e mataù i te vävähi i te mau mea i mätauhia no te ìmi i te märamarama e vai ra i roto i taua parau no na ra. Inaha e parau te fenua, e pähono mai o ia i te aniraa a te taata. Haamanaò tätou i te reo o te päpaì taramo e nä ô ra e Te aroha e te parau mau, ua färerei räua, te parau tià e te hau, ua hohoì räua. E tupu mai te parau mau no roto i te fenua, e hiò mai te parau tià mai te raì mai Taramo 85, 10-11. E tauturu te fenua ia òre tätou ia riro ei täparu, eere änei te vähi te reira e färerei ai te aroha e te parau mau, e hohoì ai te parau tià e te h au.

Ia ìtehia te Atua mau, te feia atoà e ìte no te Atua e noaa ia rätou te ora mure òre. O ta Ietu e haapäpü nei i te ìrava 3, TEIE HOÌ TE ORA MURE ÒRE, IA ÌTE RÄTOU IA ÒE I TE ATUA MAU RA, E IA IETU I TE METIA I TA ÒE I TONO MAI. Te manaò atoà ia i faahitihia na e Ieremia i te pene 31 i te ìrava 34 vh. Ia ìte hoì òutou ia i te Atua Nui Tumu Tahi, e ìte paatoà hoì rätou ia ù o tei haehaa e o tei rahi, te parau mai ra te Atua Nui Tumu Tahi; e faaòre hoì au i ta rätou hara, e òre au e manaò faahou i ta rätou ìno.

 

 

Terai or. Faatura.

 

Partager cet article

Repost 0
Published by Mapuanga terai - dans Aòraa
commenter cet article

commentaires

Angelilie 31/05/2017 15:13

toujours un plaisir de flâner sur vos pages. au plaisir de revenir. N"hésitez pas à visiter mon blog. lien sur pseudo. à bientôt

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens