Overblog Suivre ce blog
Editer l'article Administration Créer mon blog
18 mai 2017 4 18 /05 /mai /2017 22:08

Täpati 21 no Më 2017.

Tütuu.

Taiòraa.

Ioane 14,15-21

E tono mai te Fatu i to na Värua

15 Ua hinaaro òutou ia ù ra, e haapaò i ta ù parau. 16 Na ù hoì e ani atu i te Metua ra, e na na e horoà mai i te tahi Faaaò ia òutou, ia pärahi mau o ia e a muri noa atu io òutou nei. 17 O te Värua parau mau ra, o të òre e färiihia mai e te ao nei ra, no te mea aore i hiò ia na, aore hoì i ìte ia na. E ìte rä òutou ia na, e pärahi mau hoì o ia io òutou nei, e ei roto hoì ia òutou.18 Eita vau e vaiiho ôtare noa ia òutou, e hoì mai ä vau ia òutou nei. 19 E ia roovaù iti aè, e òre to te ao e hiò faahou mai ia ù; e hiò mai rä òutou ia ù, no te mea e ora vau, e ora atoà hoì òutou. 20 Ia tae i te reira mahana e ìte ai òutou e, tei roto hoì au i taù Metua, e tei roto hoì òutou ia ù e tei roto vau ia òutou. 21 Tei ia na ta ù ra parau e ua haapaò o ia i taua parau ra, o ia tei hinaaro mai ia ù. E tei hinaaro mai ia ù ra, e herehia mai o ia e taù Metua ra; e e here hoì au ia na, e e faaìte atu hoì au ia na ia ù iho.

Manaò

Te mau fenua i Mäòhi Nui e, a pii hua i te òaòa i te Atua Nui Tumu Tahi, e haamaitaì i to na iòa, e faariro i to na hanahana ei haamaitaìraa. E mau räveà mataùtaù, te mana rahi i aurarohia ai, haamori, e himene i to na ra iòa. Ua faarirohia te Moana Nui a Hiva ei èà tei onohia, te mana nei o ia i to na püai e a muri noa atu. Tei tiaì ia tätou e ora ai, e o tei faaitoito i to tätou âvae ia mau i nià i te ìri hörue. E tomo ä tätou i to fare mä te faatupu i ta tätou mau èuhe, tei parauhia e to tätou vaha, e na to tätou vaha i faaìte i to tätou àtiraa ra. E haere mai, e faaroo, o òutou atoà e mataù i te Atua ra, e na te Atua Nui Tumu Tahi e faaìte i ta na i rave i to tätou nei värua. Ia pii to tätou vaha, e ia faateitei to tätou arero. Ahiri rä te faatià ra to tätou âau i te ìno, e òre tätou e faaroohia mai. Ua faaroo mau rä te Atua ia tätou, e ua haapaò mai i ta tätou i ani atu. O ia aore i haapae i ta tätou e pure nei e aore hoì i faahoì i to na aroharaa ia tätou nei.

Ia rötahi mäite ra to tätou âau i te haapaòraa i te parau i parauhia mai ra. Te parau maitaì o te Pätireia o te Atua, e te iòa o Ietu Metia e pure ia horoàhia mai te Värua Maitaì ia tätou. E faateitei tätou i te Fatu i te Metia i roto i to tätou âau e ia vai ineine ä tätou i te tiàturi i roto ia tätou, mä te marü e te auraro mäite. E âau hapa-òre ä to tätou, e ta tätou i faaìno mai te mea e, e feiä rave parau ìno tätou, ia haamä tätou o tei pari haavare noa mai i ta tätou parau maitaì i te Metia ra. E mea maitaì hoì, ia tià i te Atua, ia pohe tätou i te parau maitaì, eiaha i te parau ìno. I pohe ai te Metia no te hara hoê poheraa, te taata parau-tià no te feiä parau-tià òre, ia tae tätou i te Atua ra, i täparahi-pohe-mau-hia o ia i te tino ra, i faaorahia rä e te Värua.

E tono mai te Fatu i to na Värua ia hinaaro tätou ma te haapaò i ta na parau. Na te Metua ra, e na na e horoà mai i te tahi Faaaò ia pärahi mai e a muri noa atu, O te Värua parau mau ra, e ìte tätou, e pärahi mau hoì o ia io tätou nei, e ei roto ia tätou. Eita tätou e vaiiho ôtarehia, e hoì mai ä ia tätou nei. Ia tae i te reira mahana e ìte ai tätou e, te Metua, te Tämaïti, te Värua Parau Mau, hoê ia. Tei ia na ta ù parau ua haapaò i taua parau ra, o ia tei hinaaro mai ia ù. E tei hinaaro mai ia ù ra, e herehia mai o ia e taù Metua ra e here hoì au ia na, e e faaìte atu hoì au ia na ia ù iho.

Taiòraa hinere teie, tei papaìhia e Ioane i te pene 14 mai te ìrava 15 e faaea i te 21. I te mea te faaìte nei teie taiòraa e maha tumu òhipa o ta te taata faaroo e haapaò

  1. Ia tiàturi te mau pipi ia Ietu.
  2. E hoì mai te Fatu ei haapäpüraa e, e färii mai Ò ia i te mau Pure i faataehia ma to na iòa.
  3. Eita te Fatu e faaruè i to na mau taata, e tono mai ra ò ia i te hoê Faaaò o te pärahi mai e a muri noa atu.
  4. Eita o Ietu e vaiiho ôtare noa i to na mau tävini.

Te faufaa o te taiòraa.

To Ietu ia haamäramaramaraa i te mau pipi i te mau òhipa e tià ia haapaòhia.

  1. Te parau nei o Ietu, a haapaò i ta ù mau parau, òia ia, te mau haapiiraa, te mau aòraa, te mau ture, i reira e ìte maitaìhia ai te huru mau no te tävini.
  2. Te ani Ò ia i te Metua, i te Faaaò, òia te Paruru Parau tià, ia pärahi i roto ia rätou, e faaäuraa tià teie e au i te hoê Metua tei here i ta na mau tämarii.
  3. E ara ra i te Värua Parau mau, e òre to te ao nei e färii, o òutou ra tei ìte e pärahi Ò ia i roto ia òutou, a tià atu ai ia faaìtehia.
  4. Na te reira e haapäpü e, èita vau e faaruè ôtare noa ia òutou, a tae atu ai te taime e hoì mai ai Ò ia ra, i te tau mau ra.
  5. Ia tià ra i te mau pipi ia hiò i te Metia, i te mea èita to te ao nei e hiò faahou ia na, ia ìte ra te hiò päpu i nià i te ora, i te mea e ora Te Metia, e ora atoà ia te mau pipi.
  6. E mahana parau rahi to taua taime ra, te hora e ìte ai te mau pipi tei roto te Tamaiti i te Metua, te Metua i roto i te Tamaiti, ei faaìteraa i to raua hoêraa i roto i te òhipa no te ora o te taata.
  7. Ia haapaò ia te taata i ta na mau parau Moà i reira te parau no te here e tupu ai, te here i te Metua ra, ua herehia ia e te Tamaiti Fänau tahi a te Atua, i reira te mata e matara ai, no te ìteraa i te mau òhipa taa ê a te Atua.

E aha te auraa o tei mau parau ?

To Ietu ia horoàraa i ta na mau pipi, e i te mau taata atoà e tiàturi nei, te hoê parau TUTUU ia haapaòhia i te mau taime atoà, e tae noa atu i to na hoìraa mai. Oia hoì, te faariro nei o Ietu i te taata èi feiä tuhaa i roto i ta na faufaa. Teie te parau maere, e te faahiahia to te taata faataaraahia e Ietu èi puòiraa i ta na òhipa i te fenua nei, i te mea haere nei Ò ia i te Metua ra.

 

Te parau TUTUU, te faaineineraa ia a te taata ia na no te horoàraa, i te parau faturaa i te faufaa i nià i ta na mau tämarii, e aore i nià i te tahi taata ê mai te peu e aita ta na e huaai. E ravehia teie òhipa i mua i te notera, e i mua i na ìte e piti tei mäìtihia e te fatu faufaa, eiaha ra èi taata no roto i te ôpü fetii. Teie huru parau TUTUU, e parauhia te faaìteraa faufaa te taata e faafatuhia e ìte òia te parau atoà i faanahohia. Te vai atoà nei te parau TUTUU moè, na ìte noa te faaärahia, o vai ra te fatu, àreà te taata òia te faafatuhia èita roa e ìte, ia tae roa i te taime e pohe ai te fatu faufaa. Te tahi ia faanahoraa teie e ravehia nei e te taata i teie mahana.

Teie ta Ietu, te faafanaò nei Ò ia i te huru taata atoà, e taiò nei i teie parau, ma te faaìte atoà i te òhipa e rave, e ma te tuu atoà mai te hoê Paruru, ia òre te mau fatu no teie faufaa ia vai ôtare noa. Ia riro mau ra èi mau ìte àueue òre no teie mau faufaa e hitu e faaìtehia nei i roto i ta tätou nei taiòraa.

Te tïtauraa.

Te hinaaro nei o Ietu, ia äahia to tätou faaroo i roto i te tahi faanahoraa, tei òre roa e mure e e mou. Oia hoì e ia hotu i roto ia Mäòhi Nui te hau, na te reira e faariro ia tätou ei matamehaì no te aroha e te here o te Atua. Ei reira tätou e ìte ai ia tätou iho, i roto i te mata o te taata tupu, mai te hiò hipa ra te huru. E èi reira atoà te Atua, tei òre e ìtehia e te mata taata, e tauturu ai ia tätou i te ìteraa i te tahi, to tätou taeaè, to tätou tuahine e i te feiä atoà i roto i te ère e te veve.

E no reira, te tïtau mai nei teie parau TUTUU ia tätou ia faaitoito te huifaaroo i te ìmiraa i te mau raveà atoà, i te mau taime atoà ia âmui to na oraraa atoà i roto i te Atua no te mea o te puna te reira o to tätou ora. I roto i te manaò tumu no te âmuiraa atu i roto i te Atua, ia ìte atoà ia tätou e e tufaa ta na i na pae e piti, te pae o te Atua e i te pae o te taata. I to na pae, ua ìmi pinepine te Atua i te mau raveà no te àtiraa mai Ia na i roto i te oraraa o te taata o ta Ietu e haamanaò mai nei ia tätou i te parauraa e, Eita vau e vai iho ôtare noa ia òutou.

E haapäpüraa teie, Aita o Ietu i haere mai e haavä i te taata, oia hoì eere na na e horoà i te utuà e au i te òhipa ta te taata i rave, na te taata iho rä e faahaere mai i nià ia na i te utuà e au i to na färii, aore ra to na färii òre i te märamarama ta Ietu i âfaì mai. Ta na ia e haapäpü ra ia nä ô mai o ia i te ìrava 21 Tei ia na ta ù ra parau e ua haapaò o ia i taua parau ra, o ia tei hinaaro mai ia ù. E tei hinaaro mai ia ù ra, e herehia mai o ia e taù Metua ra; e e here hoì au ia na, e e faaìte atu hoì au ia na ia ù iho. Mai te parau a te Atua i tuu i te ärea i roto i te pö e te ao, te riro atoà nei Ietu, oia te parau i riro mai ei taata, mai te vä, oia te mea e tuu i te ärea i roto i te taata. Te tahi manaò faufaa roa i roto i ta Ietu fäìraa i te tumu o to na tere i te ao nei, teie ia parau no te Tütuu. Aita e òhipa ta te Tamaiti i rave, nä reira hoì te Atua Metua, tei òre te taata i parauhia, tei òre I haapiihia, tei òre I haamäramaramahia, oia hoì tei òre o ia i ìte i teie parau tütuu. Te mea ia ta Ietu i haapäpü ai i te ìrava 18 Eita vau e vaiiho ôtare noa ia òutou, e hoì mai ä vau ia òutou nei. Tei ìriti i te tiàmäraa o te taata i te raveraa i te mea tei au i te hinaaro o to na âau ia hanahana te faaroo i te Metia. No te mea rä ua tae te parau i roto i to na âpoo tarià, e òre ai te taata e tano e tämau noa i te ora mai te mea ra, aita e mea i parauhia. Ta Ietu täpura òhipa ta na e vauvau mai nei, te mea atoà ia ta te Atua Metua i rave i te matahurahura o teie nei ao a ìriti ai o ia i te ùputa o te märamarama. No reira, e tauturu rahi të noaa i te taata no roto i teie parau tütuu ei ärataìraa ia na i te Atua ra, te tumu o te märamarama.

Ua tae i te tau, e tià i nià, e hoì i te fare metua. Aita änei hoì te mau manu moà o te fenua e haamataùtaù noa nei i te Mäòhi, aita änei e täpeàpeà noa nei ia na ia òre ia tià, ia òre ia parau i to na parau, ia òre ia hoì io na iho, i roto i ta na iho. Te vähi faufaa ta tätou e täpeà mai i roto i te mau manaò ta tätou i paraparau mai i nià i te märamarama e te pöuri, aore ra te ìte e te matapö, teie manaò e, e vai noa te parau i to na vairaa, te taata të faatano atu ia na i nià i te parau, ia au i te hiòraa no te mahana e te âvaè. I mua i teie hohoà, e tano tätou e parau e, aita e fifi to te hape, to te taata ätearaa, to na òreraa e tanohia i nià i te märamarama, aore ra to na òreraa e färii i taua märamarama ra, hau roa atu, e tano tätou e parau e, te tahi te reira tauturu no te taata, aore ra e noaa i te taata te maitaì no roto i taua hape no na ra, nä roto ihoä rä i te haamanaòraa ia na e, ua ätea o ia i te tano. Hiò na tätou i te hoê metua ia haapii i ta na tamarii i te òhipa, ia hape, aore ra ia òre ia tano ta te tamarii raveraa, te ani ra te metua ia na ia haamata âpï faahou, e tae roa atu i te taime e päpü roa ai to na rima. I reira noa te haapiiraa e haere ai i mua. Ia fati te metua i mua i te amuamu, te taì, aore ra te riri o te tamarii, eita teie tamarii e haere i mua, e aita atoà te metua e tauturu ra ia na. Te reira mau te huru o te taata haapii. Eiaha rä o ia e vare, i te manaòraa e, no te mea ua hamama to na vaha, ua märamarama ia te tamarii.

 

Terai or. Faatura.

 

 

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens