Overblog Suivre ce blog
Editer l'article Administration Créer mon blog
11 mai 2017 4 11 /05 /mai /2017 11:08

Täpati 14 no Më 2017.

Rahi

Taiòraa.

Ioane 14,1-12

To Ietu haamähanahanaraa i ta na ra mau pipi

1 Eiaha e horuhoru to òutou âau. E faaroo i te Atua, e e faaroo atoà mai hoì ia ù. 2 E rave rahi te pärahiraa mau i te fare o taù Metua ra, àhiri aita ra, ua parau atu ia vau ia òutou: te haere nei au e haamaitaì i te hoê vähi no òutou. 3 E ua oti anaè i te faaäuhia e au te hoê vähi no òutou ra, e hoì mai au e arataì ia òutou io ù ra; ei reira atoà òutou i te vähi e pärahihia e au ra. 4 Ua ìte hoì òutou i teie nei vähi ta ù e haere nei, e ua ìte hoì òutou i te èà. 5 Ua parau mai ra Toma ia na E te Fatu, aita mätou i ìte i tënä na vähi ta òe e haere na. E aha hoì mätou e ìte ai i te èà? 6 Ua parau atu ra Ietu ia na O vau te èà, e te parau mau, e te ora. Aore roa e taata e tae i te Metua ra, maori ra ei ia ù. 7 Ahiri òutou i ìte na ia ù, ua ìte atoà òutou i taù Metua. E teie nei, ua ìte òutou ia na, e ua hiò hoì òutou ia na. 8 Ua parau mai ra Firipa ia na, E te Fatu, e faaìte mai ia mätou i te Metua a tirä atu ai. 9 Ua parau atu ra Ietu ia na O to ù nei hoì pärahiraa roa io òutou nei e, e aore ä òe i ìte ia ù, e Firipa O tei hiò mai ia ù ra, ua hiò ia i te Metua. E aha hoì òe i parau mai ai e E faaìte mai ia mätou i te Metua 10 Aore òe i faaroo e tei roto vau i te Metua, e tei roto te Metua ia ù E te parau ta ù e parau atu ia òutou nei, eere ia i ta ù iho, e te mau òhipa nei hoì, na te Metua ia i pärahi i roto ia ù nei, i rave. 11 A faaroo mai e tei roto vau i te Metua, e tei roto te Metua ia ù e aore ia. A faaroo mai ia ù i te mau òhipa nei. 12 Âmene, âmene, e parau atu vau ia òutou: o të faaroo mai ia ù ra, e rave atoà o ia i teie nei mau òhipa ta ù e rave nei. E e rahi atu ä ta na e rave i teie, no te mea te haere nei au i taù Metua ra.

Manaò

E òaòa tätou i to Fatu, e te feiä parau-tià, e haamaitaì ma te tïnura, te ùkurere te himene e te faaòto maitaì i te mea e parau-tià ta te Fatu, e te haavare òre. Te î nei te fenua i te maitaì, na te parau a te Fatu i oti ai te mau raì, ua haaputu o ia i te moana nui a hiva i te vahi hoê. E ao to te fenua, o te Fatu to rätou Atua, te Atua Nui Tumu tahi e te mau taata i mäìtihia e ana ei tufaa na na. To na mata o te mau tiàrama ia o te reva, tei turäma i te èà o te mau tamarii atoà a te taata. Te vähi i pärahihia e ana ra, ta na ia hiòraa mai i to te ao atoà nei. O ia anaè rä tei haafäito i to rätou âau, e o ia tei hiòpoà mai i ta rätou mau räveà. E mea faufaa òre te mau puai faatupu pohe i nià i te puai faatupu ora. Inaha, tei nià to te Fatu mata i te feiä i mataù ia na, i nià i te feiä i tiàturi i to na here e to na aroha, te tiaì nei ra to tätou värua i te Fatu o to tätou ia tauturu, e to tätou päruru. Te òaòa nei to tätou âau ia na, te tiàturi nei hoì tätou i to na ra iòa moà. E vai mäite mai ä to na here to na aroha, i nià ia tätou, mai ia tätou e tiàturi nei ra.

Te ànotau e orahia ra e tätou, te tupu nei te mau raveà puai no te faateäraa i te tiàturiraa o te taata faaroo i te tumu o te fenua. E haere noa ra i te rahiraa te mau amuamuraa, no te mea aore te mau reo tumu o te nünaa e haapaò-faahou-hia ra, te reo o te fenua. No reira eere i te mea au ia tätou ia haapae i te parau a te Atua e ua mäìtihia tätou no te faatupu i te roo maitataì, ia î i te Värua Maitaì e te paari i roto ia tätou e pure tätou eiaha e faaea, i te haapii. Ia tupu mau te parau a te Atua, i Mäòhi Nui nei,

Te haere mai nei tätou Ia na ra ma te ora ia haapaòhia mai tätou, ia patuhia tätou, ei fare vairaa parau, e au i te Atua ia Ietu Metia ra, e te maitaì rahi tei tiàturi i te reira, e òre roa ia e mäheàheà. E teie nei, tätou te feiä faaroo, e maitaì rahi to tei Tiàfaahou no te mea e feiä hoohia tätou i to na maitaì, tei parau ia tätou i roto i te pöuri, ia tae i to na ra märamarama ûmerehia ra.

Teie te reo o Ietu ia tätou i teie mahana, to na haamähanahanaraa i ta na ra mau pipi. I roto i te taiòraa i te ìrava 6, E toru taò, e faaìte ra i te püai o te manaò o Ietu O vau te èà, te parau mau e te Ora. E parau teie na Ioane i papaì i te parau ra a Ietu i te pene 14.

1-O vau Èà, Ua ìte tätou e, e vähi haereraa te èà, e vähi e faaòhie i te tere o te taata. Mai te peu rä te vai ra te haamataraa o te èà, te vai atoà ra te vähi e hope atu ai. Te maitaì o te hoê èà, eere ia to na âano aore ra to na oaoa, te ìteraahia e, e èà, nä reira hoì te vähi e hope atu ai. Te èà hoì i poì i te àihere, e tano änei ia tämau-noa-hia i te parau e, e èà. Ia parau o Ietu, o vau te Èà, eere ia no te faaìte mai i te òhipa i oti ia na i te rave. Te tumu o Ietu i parau ai ia na e, e èà. Ia ìte tätou, aita e haere i roto i te tià noa, te pärahi noa, e te faaea noa, no te mea te taata e taahi i nià i te èà, no te hinaaro ia e tïtau i te vähi ta taua èà e faatoro ra. Te auraa, no te mea ua tae te âau, i tià mai ai te taata i nià i te èà. I roto i te haere, aita atoà te parau o te mau e te vai noa, tei au i te mau mea pohe. No reira, i roto i te haere, te vai atoà ra te ìteraa i te mea e hinaarohia ra, e te türaìraa te manaò i te tino ia faaòhie i te tupuraa o te mau mea e hinaarohia ra.

2-O vau te Parau mau, Aita te reira i mauhia e te taata. E parau päpu, aueue òre eere te parau haavarevare, e parau e arataì ia tätou i te Atua ra. Te vahi te reira te taata tei reira te parau mau e te tïtauhia ra ia tätou i te ora, eere atoà te parau mau i te mea rau no te mea, e faaìte ihoä te reira parau i te Atua. Te parau mau e fäìraa faaroo atoà te reira e tïtauhia ra ia tätou i te ora i te vähi ta tätou e faaèa ra. Ia parau o Ietu O vau te parau mau, no te ìriti ia i te märamarama o te ùputa o te èà.

3-O vau te Ora, ia na nià anaè tätou te èà e te parau mau e fänaò ai tätou i te ora. Eita e mou ia tätou i te täpeà. Aita e ôtià to te Ora. Eere no te hopeà te parau o te Ora, i roto i te èà e te parau mau tei roto te parau no te ora. E faahoì te Ora ia tätou i te vähi te reira tätou i te oraraa oia hoì te fenua te reira te èà e te parau mau i te vairaa. Ia parau o Ietu, O vau te ora, te faaìte noa mai ra ia tätou, te rahi o te òhipa e vai ra.

Te riro ra teie mau parau no te èà, te parau mau, te ora, ta te Fatu e fäì nei, ei haapäpüraa i te hoêraa e vai ra i roto i teie mau taò ia faatoro tahihia. Te auraa ra, aita ia to te èà, te parau mau, te ora e parau i räpae aè ia Ietu e i te parau tei riro o ia te tupuraa. E te täviniraa hoì i te Fatu i reira ra, eere faahou ia i te rave-noa-raa i te òhipa a te Fatu, e räveà faaìte rä i te Fatu, e na te märamarama hoì o te parau e faaìte ia na i te vähi e haere, oia hoì, te èà, o te parau mau e te ora. Te ìrava 12 te faaìte i te rahi o te òhipa ia reva o ia, Âmene, âmene, e parau atu vau ia òutou o të faaroo mai ia ù ra, e rave atoà o ia i teie nei mau òhipa ta ù e rave nei. E e rahi atu ä ta na e rave i teie, no te mea te haere nei au i taù Metua ra.

 

 

Teraì òr Faatura.

 

 

 

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens