Overblog Suivre ce blog
Editer l'article Administration Créer mon blog
3 mai 2017 3 03 /05 /mai /2017 23:47

Täpati 7 no Më 2017.

ÔROÀ

ùputa

Taiòraa

Ioane 10,1-10

Te parapore o te tiaì-mämoe maitaì

1 Âmene, âmene, e parau atu vau ia òutou, o të òre e nä te ùputa i te tomo i roto i te âua mämoe ra, o të paiùma nä te tahi èà ê ra, e èiä ia e te haru. 2 E nä te ùputa ä te tiaì-mämoe i te tomo. 3 E ìriti mai ia te tiaì-ôpani ra ia na, e e faaroo mai te mämoe i to na reo, e taò atu ä o ia i ta na iho mämoe mä te faahiti atu i te iòa, e e arataì o ia ia rätou i räpaeàu. 4 E ia arataì o ia i ta na iho mämoe i räpaeàu ra, e nä mua o ia ia rätou i te haere, e pee mai rätou ia na, ua ìte hoì rätou i to na reo. 5 E òre rätou e pee i te taata ê, e horo ê rätou i reira, aore hoì rätou i ìte i to te taata èê reo. 6 I parau-tià atu ra Ietu ia rätou i taua parapore nei, e aita roa i ìte i te parau ta na i parau atu ia rätou ra. O Ietu te tiaì-mämoe maitaì 7 Ua parau faahou atu ra Ietu ia rätou Âmene, âmene, e parau atu vau ia òutou: o vau te ùputa o te âua mämoe. 8 O to mua atoà ia ù nei, e èiä ia e te haru, aita rä te mämoe i faaroo ia rätou. 9 O vau te ùputa, o të nä ô nei mai ia ù nei i te tomo ra, e ora ia, e haere rätou i roto e i räpae, e noaa hoì te mäa. 10 O te èiä anaè ta te èiä i haere mai ai, e o te täparahi hoì e ia pau roa. I haere mai nei au ia noaa to rätou ora, e ia rahi atu ä te ora.

Manaò

I roto i te tärena pipiria no teie tapati mea tià ia ômuahia ta tätou parau, ma te taiò i te Taramo 23 no te faufaa o te mau parau e faahitihia ra. No te mea te parau puai e vai ra to Atua Nui Tumu Tahi òre-raa e vai iho i te pohe ia mana i nià i te tiàfaahouraa, teie taua mau parau ra. Ìrava 1 Taramo na Tävita. O te Fatu to ù tiaì, e òre roa vau e ère. 2 Te faataòto nei o ia ia ù i te mau âua heeuri ra, te arataì nei o ia ia ù nä pïhaì iho i te pape atatià ra. 3 E faahoì o ia i taù värua. E arataì o ia ia ù nä te èà tïtïàifaro, no te hanahana o to na ra iòa. 4 E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì-atoà-iho òe ia ù to räau e te tootoo tei haamähanahana mai ia ù. 5 Ua faanahonaho òe i te tahi àmuraa mäa na ù i mua i te aro o taù mau ènemi, ua faatävai òe i taù upoo e te î nei taù âuà. 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

I tià ai te Ètärëtia Porotetani Mäòhi i te faateitei to na reo, E te nünaa Mäòhi e, e te feiä atoà e pärahi i Mäòhi Nui nei, ia ìte te mau fëtii atoà, ua faariro-mau-hia tei tiàfaahou e te Atua ei Fatu e ei Metia, ia putapü to tätou âau i te òaòa, ma te tätarahapa, ia faufaahia to tätou päpetitoraahia i te iòa o Ietu Metia ia matara te hara, e horoàhia mai ia tätou te Värua Maitaì. No tätou hoì i parauhia ai no ta tätou mau tamarii, e no te feiä hoì i te ätea ê ra, ta te Fatu ta to tätou Atua e parau atu.

I papaìhia ai tätou i ta tätou iho hara, a faaòromaì ai tätou, e aha to reira haamaitaìraa, Ia pohe rä tätou mä te haapaò maitaì, a faaòromaì ai tätou, e mea au ia i te Atua. I parauhia ai hoì tätou, i pohe atoà hoì te Metia iho no tätou; e ua vaiiho hoì i te haapaòraa na tätou, ia pee tätou i to na taahiraa âvae. No te mea aore te Metia i rave i te hara, e aore roa e haavare i ìteä i to na vaha. O tei maraa hoì ia na iho ta tätou hara i to na iho tino i nià i te tätauro, ia haapaò tätou o tei matara mai i te hara ra, i te parau-tià; no to na hoì ìravarava i ora ai tätou. Mai te mämoe i haere ê ra hoì tätou; ua hoì mai rä i teie nei i te Tiaì ra i to tätou mau värua.

Faaroo-iho- nei tätou i te parau maitaì i päpaìhia e Ioane i te pene 10, i te mau ìrava 1 e tae i te 10 te parau ia no te parapore o te tiaì mämoe maitaì, Âmene, âmene, o të òre e nä te ùputa i te tomo i roto i te âua mämoe ra, o të paiùma nä te tahi èà ê ra, e èiä ia e te haru. Tei na te ùputa ra te tiaì-mämoe i te tomo. E faaroo mai te mämoe i to na reo, e taò atu ä o ia i ta na iho mämoe mä te faahiti atu i te iòa, e arataì o ia ia rätou i räpaeàu, e nä mua o ia ia rätou i te haere, e pee mai rätou ia na, ua ìte hoì rätou i to na reo. E òre rätou e pee i te taata ê, e horo ê rätou i reira, aore hoì rätou i ìte i to te taata èê reo. O Ietu te tiaì-mämoe maitaì Âmene, âmene, o vau te ùputa o te âua mämoe. O vau te ùputa, o të nä ô nei mai ia ù nei i te tomo ra, e ora ia, e haere rätou i roto e i räpae, e noaa hoì te mäa. Te èiä anaè ta te èiä i haere mai ai, e o te täparahi hoì e ia pau roa. I haere mai nei au ia noaa to rätou ora, e ia rahi atu ä te ora.

Te tahi päpä o ta tätou parau no teie mahana, te ùputa ta Ietu i parau o na ia, èita teie i te faaäuraa e haapäpüraa rä, no te mea O na te rä ia tiàma te taata i mua i te fenua te ao o te Atua Nui Tumu Tahi, i mua i te vai, i mua i te moana nui a hiva, i mua i te reva, o te Ao teie no Mäòhi Nui ta te reo Mäòhi i parau e Rähu.

Te rahu, te haapii noa nei i te taata i te ora, ia rahi atu ä te ora, E haapii te rahu i te taata i te ora. E i roto i te reira haapiiraa, te vai nei te faaära. Teie nei rä, te vai atoà ra i roto i te taata, te ìteraa i te taiò i terä faaäraraa ta te rahu e horoà noa nei i te taata. Nä ô noa tätou i te parau, to tätou mau tupuna, ua ìte rätou i te taiò, te rahu, te aru, te tai e te reva, e puta märamarama terä ia taiò. Te taata täià, ua taa ia na ia hiò te tahi mau täpaò faaära ia na, e haere änei aore ra eiaha e haere. Te taata tanu, ua ìte o na, te taime tano no te tanu i terä mäa e i terä mäa. Te reira puta, ua ìte te mau tupuna. Mai te peu ra, to tätou mau tupuna ua ìte i te ìriti i te ùputa o te märamarama i haere mai ai o Ietu e parau o vau te ùputa, te ùputa o te fenua.

Te fenua, te haapiiraa ia ta te Atua e horoà i te taata, no te tauturu ia na i roto i to na oraraa. Te Fatu, e haapiiraa atoà ta na e horoà ra no te tauturu te taata i roto i to na oraraa. E haamanaò noa na tätou i te mau parau ta te Fatu i faahiti i roto i ta tätou taiòraa o vau te ùputa. Oia hoì, e parau teie no te aroha e te here o te Atua i te taata. Mai ia na atoà e riro ra ei parau no te aroha e te here o te Atua i te taata. Tei ô te tahi türamaraa, ia ìte faahou i te faufaa e tupu ra i nià i to tätou fenua. Ta te Atua te reira tauturu ia tätou, ua rahi ra hoì tätou i te täiva e ua tae roa atoà i roto i te haafaufaa-òre-raa. Te auraa, ua haapae tätou i te ìte ta te fenua e horoà noa mai ra. Terä ìte ta te fenua e horoà mai ra, tauturu ia ia tätou. No reira, e tano atoà tätou e hiò i teie parau no te ìte òre e te ìte. E te faaitoitoraa ia tätou, ia ìmi faahou i terä ìte. Terä ìte, tei òre i päpaìhia, e haapii faahou ia tätou i te taiò i to tätou parau, taiò i te ora ta te Atua e horoà noa mai nei no tätou.

Te ùputa ta Ietu e parau ra, aita to na e tüàtiraa i nià i te ùputa tei mätauhia e tätou i te ìte. I faahanahana ai Ietu i te fenua, no te mea ia, te fenua te mätamua i färii i te maitaì o te parau a te Atua, te fenua hoì tei riro ei ìte e ei faaìte i te rahi o te hanahana o te Atua. Eere rä no te mea te faahiti nei tätou i teie mau manaò i riro ai te reira ei mea òhie i te färii-atoà-hia e te taata. No roto ihoä paha te fenua i te pöuri i te raveraahia mai e te Atua, te fenua atoà rä te mätamua i ànaànahia e te märamarama o te Parau a te Atua, e ia fäì te Atua i te maitaì o te märamarama, ia ìte ia tätou e, eere no te märamarama anaè te reira maitaì, no te fenua atoà rä i faahoì mai i te maitaì o taua märamarama ra. Te auraa vai noa ai te fenua i roto i te märamarama e te türamaraa a te parau a te Atua, vai noa ai te maitaì ei huru no te fenua. Te maitaì o teie märamarama, te mea ia e, aita o ia i türama noa i te fenua mai te tahi mea i nä nià mai i te tau i raro, ua nä roto atoà mai rä i te fenua, nä roto i te mau täpaò ora ta te fenua i faaìte mai e tei riro ei mauruüruraa na te Atua. Te auraa, eita te märamarama e tano ia faataa-ê-hia i te ùputa, eita hoì te ora e tano ia faataa-ê-hia i te märamarama ta te reira ùputa i faatupu mai. I te mea te ùputa o te fenua e matara ai te ùputa o te raì, te ora te reira o te taata.

 

Teraì òr. Faatura.

 

 

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens