Overblog Suivre ce blog
Editer l'article Administration Créer mon blog
11 avril 2017 2 11 /04 /avril /2017 20:39

Täpati no te Tià-faahou-raa / Ôroà Päta : 16/04/2017

Òhipa 10/34-43 ; 1 Törïnetia 5/6-8 ; Mätaio 28/1-10 ; Taramo 118/1-20

 

Te Ôroà Päta marumetia i naùanei

 

« E i teie nei, a tämä na i te faahöpue tahito ra, ia riro òutou ei puèà âpï, ia òre te faahöpue ia òutou na : o te Metia hoì ta tätou Päta, i taparahihia ia na tätou » (1 Törïnetia 5/7).

 

E to te hui faaroo e, ia ora na roa i te Aroha o te Fatu i te färereiraa i teie nei Täpati Ôroà Päta !

I te mea e maha a tätou nei taiòraa, ua mäìtihia mai te tahi maa tiàororaa a Pauro ei haamatara i te haapüòiraa o nä puè parau pïpïria nei no te Tià-faahou-raa o te Metia : « E i teie nei, a tämä na i te faahöpue tahito ra, ia riro òutou ei puèà âpï, ia òre te faahöpue ia òutou na : o te Metia hoì ta tätou Päta, i taparahihia ia na tätou » (1 Törïnetia 5/7).

Eiaha roa atu rä tätou e manaò e, e teie anaè nei te ìrava e tano maitaì no te ìte i te tüàtiàtiraa e te rauraa o nä faaìteraa e maha. O tahi rä teie türamaraa i rotopü i te àuhuneraa o te mau türamaraa e vai nei no te faaitoito ia tätou i te ora i to tätou faaroo marumetia i naùanei, io tätou nei, e i te mau vähi atoà ei reira te Fatu i te tonoraa ia tätou ei mau Tiàtiàveà no te haafäite ia tätou e te Atua Metua mä te Metia e te Värua Raa nä roto i te faaroo anaè. Tei tätou rä i te tütonu tätaìtahi e te haafaufaa âmui i nä puè parau pïpïria nei tei heheu mai i te tahi tuhaa no te täviniraa àpotetoro a Pauro, Pëtero, Mätaio, Ruta Päpaì Èvaneria, e oia atoà te ârueraa a te Taramo 118 no « te tià vai-mäite-raa o te Aroha o te Fatu » e tae noa atu i te taime e hope roa mai ai te faaâpïraa a te Pätireia o te Atua.

No tätou nei, e maha parau tei täpaòhia mai, e na tätou te reira e faaravaì mäite atu. A tahi, « o te Metia ta tätou Päta » ; a piti, « to tätou haereà faaroo mä teie Päta » ; a toru, « ta tätou faaìteraa i teie Päta », e a maha, « ta tätou täviniraa mä teie Päta ». Mai te paeraa o te parau e tae noa atu ai i te rauraa, tei tätou ra ia te reira mau oho o te faaroo marumetia o tei tià roa ia ôpere-mäite-hia no te oraraa âmui o te Ètärëtia i mua i te Fatu e nä te ao nei.

 

1. O te Metia ta tätou Päta

I te mea e parau äraaraa te Ôroà Päta no te mau Âti-Iuta e ora purutia ra nä Törïnetia mä, te ìte maitaì atoà atu ra o Pauro i to rätou matara òre i mua i te parau no te Metia i faatataurohia e tei faatià-faahou-hia mai te pohe mai ei Faaora e ei Fatu no te taata atoà e färii na ei ö-faatau-aroha no te oraraa âpï mä te faaroo marumetia. E au atoà teie matara òre o te tahi mau Âti-Iuta no te mau Herëni, te mau Rätere, e tae noa atu atoà i te tahi mau marumetia e noho ra i teie pae fenua.

E inaha, aita teie matara òre i vaivai noa mai i roto anaè i ta rätou mau feruriraa e mau haaferuriraa, ua päiraira roa atoà rä i roto i to rätou oraraa no te mahana tätaìtahi. Te ùme atu ra te Âti-Iuta i te taata no te ora ia au i ta rätou faa-âti-iuta-raa mä te täiroiro e e parau faaturori taata te Tatauro o te Metia. Te huti atu ra hoì te Herëni i te taata no te ora ia au i ta rätou faa-herëni-raa mä te faatiàturi e e parau haamaamaa taata te Tatauro o te Metia. Te mau òhipa rä e ìtehia atu ra i roto i ta rätou arataìraa i te oraraa faaroo e te oraraa vaamataèinaa i Törïnetia, o te ûàna-haere-raa ia te mau taupupüraa taata tätaìtahi, ùtuafare, e oraraa âmui.

I mua i te reira mau arataìraa faaroo e vaamataèinaa, aita o Pauro i hema no te pari i te tahi e i te tahi, no te mea eere o ia i te haavä, e « tiàtiàveà » rä, e e « àpotetoro » na te Metia e no te Metia i rotopü i te hui faaroo tei püpühia e te Fatu ia âpee àpotetoro o ia. No reira, a Âti-Iuta noa atu ai te tahi pae, a Herëni noa atu ai vëtahi pae, a « Ètene » noa atu ai vëtaìtahi pae, te « tiàoro » nei Pauro i te mau marumetia no Törïnetia ia au i to rätou tiàraa « mataèinaa » tätaìtahi e faatäipehia nei e ana nä roto i te parau no te « faahöpue » e te « puèà ».

Te poroì a Pauro i ô nei, mai teie rii ia : I mua na, e « èinaa » noa òutou (Ètoto 2/5), e pee hänoa òutou i te taata e fatu ra ia òutou. I naùanei rä, i teie nei, e « mataèinaa » òutou, ua faaâpïhia e ua faatiàmähia òutou nä roto i te pohe tatauro e te tià-faahou-raa o te Metia, « ta tätou Päta ».

 

2. To tätou haereà faaroo mä teie Päta

Te « Päta », to na auraa âti-iuta e marumetia, o te haereraa ia mai te tahi pae e tae roa atu ai i te tahi atu pae, mai te tahi ôtià e tae atu i te tahi atu ôtià, mai te tahi ao tahito e tae atu i te tahi ao âpï tei reria te oraraa tiàmä i mua i te Atua, e i rotopü i te nünaa o te Atua.

Te tiàoro nei ia Pauro ia haere te taata mai to na tiàraa « èinaa » e tae atu ai o ia i to na tiàraa âpï, oia te tiàraa « mataèinaa ». Oia hoì eiaha te taata nei ia faaea « èinaa » noa, « tïtï » noa, ia ora mau rä o ia ei « mataèinaa » mä te ôtahiraa no te parau faatävai i maìrihia mai no na mai roto roa mai i te hoê Parau faaora e te faatiàmä. E taua Parau ra, o te Metia ia te Atua Metua no tätou nei. I ô nei, na te Atua Metua e « arataì päta » i te « èinaa » e täpae roa atu ia o ia ei « mataèinaa ». E haereà teie nä roto i te pohe tatauro o te Metia e « mäpiha » atu ai i te ora âpï o te tià-faahou-raa o te Metia !

O te Parau Âpï Òaòa atoà ia e haafaufaahia ra e Pëtero i roto i ta na aòraa : « […] o të faaroo ia [Ietu Metia] ra, e matara ia ta rätou hara i to na ra iòa » (Òhipa 10/43). E fäìraa faaroo teie na te mau marumetia matamua o tei niuhia i nià i te « Metia tei rïhia i nià i te räau tärava e te taata nei, e te faatià-faahou-hia e te Aroha o te Atua Metua ei Faaora e ei Fatu no ta na mau tamarii tävai ».

Te tahi maa uiuiraa i ô nei : I naùanei, i teie mahana, e « èinaa » te taata nei na vai e no vai ? E àroraa tämau teie na te Reforomätio-Porotetani io tätou nei e nä te ao nei, no te faatiàmä i te « èinaa » ei « mataèinaa » ia vaivai aè te « vaamataèinaa » i te mau vähi atoà e pupu taata to reira. Mai ia Pauro räua o Pëtero, e tae noa atu ia Ruta Päpaì Èvaneria, te vaiara atoà nei te Reforomätio-Porotetani no mua ra e no naùanei, i te huru färii àtä o te tahi mau « èinaa » ia rätou ei « mataèinaa », no te mea te au noa ra rätou i to rätou oraraa « èinaa » a pee hänoa ai i to rätou fatu.

A taa noa atu ai te reira ôtiàtiàraa tuatau, aita atoà rä te Reforomätio-Porotetani e tütau nei i ta na tautooraa i nià anaè i te tiàmäraa e te tura o te « mataèinaa » e te « vaamataèinaa », inaha mai ia Pauro mä, te tiàoro nei ia färii te « mataèinaa » ia na ei « tama faatävai na te Atua Metua mä te Metia e te Värua Raa » no te rohi hua ia riro teie nei ao ei « Rahu na te Atua » mä te tiaìturu i te tupu-hope-roa-raa mai te faaâpïraa a te « Pätireia o te Atua ». O to tätou mau ia haereà faaroo i naùanei, i teie mahana, mä te Päta, ei püòiraa i te orahia mai na e te Reforomätio-Porotetani mä te tiaìturu e te ineine mai ra te mau « ono », te mau « mono » tiàtiàveà e àpotetoro no te muriatau e fä mai ra.

 

3. Ta tätou faaìteraa i teie Päta

I te mea e faufaa rahi to te tuatua o Ìteraèra, to te Metia e tana mau pipi e mau àpotetoro, e to te mau hui faaroo marumetia matamua roa mai ta Ruta Èvaneria räua o Mätaio e faahiroà faahou mai ra. Manaò mäite rä hoì tätou mä te haamanaò atoà e e mau puna parau pïpïria teie no te tauturu mäite mai ia tätou i te ora i ta tätou faaìtera i te Päta marumetia i teie ànotau. E eiaha hoì ia moèhia ia tätou e e faaìteraa « Ruta Päpaì Èvaneria » ta te tahi, e e faaìteraa « Mätaio » hoì ta te tahi.

Aita änei o Mätaio, a taa noa atu ai te tahi mäpuhiraa aho âpï roa e vai nei i roto i ta na Pene 28, i faa-âti-iuta roa ia Ietu Metia ? Inaha, ia faaau-anaè-hia o Möte e te Ture ia Ietu Metia e te Èvaneria, ua huru Möte roa o Ietu Metia i roto i te rahiraa o ta na mau ìrava, e ua huru Ture roa te Èvaneria i roto i te rahiraa o ta na mau pene !

E o Ruta Päpaì Èvaneria hoì ? Aita änei o ia, a taa noa atu ai to na mau mau-päpü-raa i te parauatua a Pauro, i faarahi ûàna roa i te mau « û » no te faahinuhinu ànaàna maitaì i ta na faaìteraa ia Ietu Metia mai to na fänauraahia mai e tae noa atu te mau uì faaroo marumetia matamua roa ! E mau « û » änei teie tei ravehia mai roto mai i te « mau û o te änuanua » ia paò roa i roto i te taata taiò te haafäiteraa a te Atua Metua nä roto i ta na Metia e to na Värua Raa ?

E a tae ai hoì o Pauro e ta na huru päpaìraa ! E tià roa ia Pauro ia faaâpï täère roa i te papa e te arataìraa no te reo herëni ia äraaraa maitaì mai ta na faaìteraa. Eita te mau àivänaa reo herëni e rata i ta na mau päpaìraa. E e mea huru manaònaò atoà rä hoì te feiä e taiò nei i ta na mau èpitetore ! O Pauro rä ia e ta na faaìteraa èvaneria e parauatua no te Tatauro.

E ta tätou mau faaìteraa i te Päta marumetia i naùanei ? Na tätou e heheu faahou ä i te mau faaìteraa rau i orahia mai na mai te tau o te mau Tiàtiàveà Papaâ e Mäòhi matamua io tätou nei e tae roa mai i teie mahana. No teie heheuraa faufaa rahi o tei haamatahia mai e vëtahi o tätou nei, e tae noa atu ia vëtahi nä te ara, e tià roa ia faanaho faahou ä i te tahi mau mauhaa heheu, eiaha no te hämani faanehenehe noa i te tahi parau faaìteraa no te mirimiri haere nä terä mau vähi e au navenave roa ai te mau « èinaa » ! E ua ara maitaì hoì e e aniraa tuatau te reira na te « èinaa ». Eiaha atoà no te tarai hänoa i te tahi paparau faaìteraa no te tähitohito haere nä terä mau vähi e paruparuhia ra e te mau « mataèinaa » ! E ua araara maitaì atoà hoì tätou e te ìmi nei, te mäìmi nei, te päìmi nei, te ìmiìmi nei te « mataèinaa » ia tiàmä e ia tura o ia e vëtaìtahi atu « mataèinaa », ia tiàmä e ia tura o ia e te « vaamataèinaa » e vëtaìtahi atu mau « vaamataèinaa » !

Te auraa ra, te reira mauhaa heheu i to na päutuuturaa e to na ôtià (Ruta Päpaì Èvaneria) ; te reira mauhaa heheu i to na ètaètaraa e to na mötià (Mätaio) ; te reira mauhaa heheu i to na maa püai iti e to na metià (Pauro e o Pëtero) !

 

4. Ta tätou täviniraa mä teie Päta

Oia mau, te reira faaìteraa e ta na täviniraa, e ta na hoì mau oho e hotu mai ! Eere i te àhopa na tätou i te faatià i ta te hoê e te tötövä hoì i ta te tahi. Eere atoà i te òhipa na tätou i te faahapa i ta te hoê e te paèpaè auhoa hoì i ta te tahi. Te iti e aore ia te rahi o ta tätou òhipa täviniraa, aita atu ia tätou fä, maoti rä ia fänaò te taata nei i te Päta marumetia, ia fano o ia mai te pohe tatauro o te Metia e täpae atu i te tià-faahou-raa o te Metia ; oia hoì ia fänaò o ia i te haafäiteraa a te Atua Metua mä te Metia e te Värua Raa nä roto i te faaroo anaè ia au i te tumu parau no te Hoêraa o te mau Marumetia i orahia mai e tätou i te ùputa o teie matahiti âpï.

Manaò atoà rä tätou mä te haamanaò i te pehepehe a te Taramo 118 ! Ia manuia anaè ta tätou täviniraa, e tuu ia i te reira manuiaraa i roto i te « pure ârue e haamaitaì » i te Fatu, inaha « e tià to na aroha i te vai-mäite-raa » ! E ia päoa anaè hoì ra ta tätou täviniraa, e tuu ia i te reira päoaraa i roto i te « pure ani e ärai » i te Fatu, inaha « e tià to na aroha i te vai-mäite-raa » !

Eiaha roa te manuiaraa ia riro ei teòteòraa na tätou, i te mea e te rohi atoà nei te Värua o te Fatu ! Eiaha roa atoà hoì te päoaraa ia haaparuparu roa ia tätou, i te mea e aita te parau no te « èinaaraa », te « mataèinaaraa », e te « vaamataèinaraa » o te taata nei ia tätou nei, tei te reira rä taata e te reira nünaa ! E aita atoà hoì te parau no te färiiraa i te Fatu ia tätou nei anaè ra, tei te reira atoà rä taeaè e te reira tuahine ! Mä te ara tämau, e vaivai mai ä te « mea tahito » e ora âpipiti nei i te « mea âpï » i roto i te faaroo marumetia !

Te tahi rä parau faufaa rahi e tià ia haamanaòhia, o to tätou ia ârueraa, haamaitaìraa e ùmereraa i te Fatu no te mau täviniraa rau atoà tei tauturu maitaì mai i te Ètärëtia Porotetani Mäòhi mä to na Òitümeneraa, to tätou Vaamataèinaa mä to na Aunünaaraa, to tätou mau taeaè e mau tuahine mä to rätou mau àti, mau ahoaho io tätou e nä te ao nei.

 

5. Ei faaitoitoraa ia tätou i naùanei

No te püòiraa i ta tätou parau, manaò atoà rä tätou mä te haamanaò e, ia au i to tätou Reforomätioraa e Porotetaniraa, Mataèinaraa e Vaamataèinaraa, e parau rahi roa to te âpeeraa i te hui faaroo no te ora i te mau Ôroà Tumu Ètärëtia, mai teie Ôroà Päta marumetia, oia te « Ôroà Fanoraa no te Metia mai te pohe tatauro e täpae atu ai o ia i te tiàfaahouraa ». Te fänaò nei te marumetia i teie fanoraa nä roto i te Ôroà no to na Päpetitoraa mä to na Faaroo. E te haufaufaa atoà nei hoì tätou i te fanoraa nä te èà o to tätou haereà faaroo, e ta tätou mau faanahoraa Ùtuafare, Âmuiraa, Päroita, Fenua, Tuhaa, Âmaa Òhipa, Faatereraa Ètärëtia, Oraraa Ètärëtia Òitümene e Täuàparauraa Haapaòraa, Oraraa Auvaamataèinaa e Aunünaa.

Te fä o teie mau tautooraa, aita atu ia, maoti rä ia fänaò te hui faaroo i te mau vähi e te mau taime i naùanei, i teie mahana, ei reira te mau marumetia e ora ai i te Faaroo mä te pure ârue e te pure ärai, mä te faaìteraa e te täviniraa i te Fatu ; e te reira, i roto ia i te fäìraa faaroo e te fano atu ra tätou i te Pätireia i fano mai na io tätou nei, e te tiaìtururaa e e fano hope roa mai te Pätireia mä te täatoàraa o ta na faaâpïraa.

 

I te Fatu ä tätou i teie Ôroà Päta, teie Ôroà Fanoraa ! Âmene.

 

 

Antonino, Tihiri Lucas Òrometua

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens