Ioane 11,1-45

Täpati 2 no Eperera 2017.

ÔROÀ

Tähuti.

Taiòraa.

Ioane 11,1-45

Te poheraa o Rätaro

1Te pohe ra te hoê taata i te maì o Rätaro te iòa, no Pëtänia no te ôire o Märia e ta na tuaana o Märeta ra. 2 O Märia i faatähinu i te Fatu i te räau noànoà ra, e tei horoi i ta na âvae i to na iho ra rouru, no na te tuaane i pohe i te maì ra o Rätaro. 3 Ua tono atu ra nä tuahine i te veà e faaìte ia Ietu, nä ô atu ra E te Fatu, inaha, te taata here na òe ra, ua pohe i te maì. 4 E ìte aè ra Ietu i taua parau ra, ua nä ô aè ra E òre te reira maì e riro ei maì pohe; ia haamaitaìhia rä te Atua, e ia haamaitaìhia hoì te Tamaiti a te Atua i te reira. 5 E aroha Ietu ia Märeta e ta na taeaè, e ia Rätaro hoì. 6Ìte aè ra e ua pohe o ia i te maì, pärahi iho ra Ietu i taua vähi ra e ruì piti. 7E muri aè ra, ua parau atu ra o ia i ta na mau pipi Mai haere ä tätou i Iutea. 8 Ua parau mai ra te mau pipi E Rapi, i tïtau iho nei hoì te âti-Iüta ia òe e pëhi i te ôfaì, e te haere faahou nei ä hoì òe i reira. 9 Ua parau atu ra Ietu Eere änei hoê àhuru mä piti hora i te ao hoê nei, e ia haere hoì te taata i te ao ra e òre ia e turori, no te mea ua ìte o ia i te märamarama o teie nei ao. 10Âreà ia haere rä o ia i te ruì ra, e turori ia, no te mea aita e märamarama. 11 I nä reira atu ra o ia, e oti aè ra, ua parau atu ra o ia ia rätou Ua taòto to tätou hoa o Rätaro, te haere nei rä vau e faaära ia na. 12Ua parau mai ra ta na mau pipi E te Fatu, te taòto ra o ia e ora ia. 13 No te pohe te parau a Ietu i parau atu ra, i manaò rä rätou e no te taòto mau ta na i parau mai ra. 14 Ua faaìte hua atu ra Ietu ia rätou. Ua pohe roa Rätaro. 15Te òaòa nei au ia òutou i te mea aore au i reira ia faaroo hoì òutou. Mai haere rä tätou ia na ra. 16 Ua parau aè ra Toma, oia hoì Titimo ra, i te mau te taeaè pipi no na ra Mai haere atoà tätou ia pohe atoà atu O Ietu te tiàfaahouraa e te ora 17 E tae atu ra Ietu ra, ìte aè ra o ia e ruì maha atu ra o ia i roto i te âpoo. 18 Tei pïhaì iho i Pëtänia i Ierutarëma, e au i te àhuru mä pae o te tetatia ra. 19Ua haere mai ra te âti-Iüta e rave rahi ia Märeta räua o Märia ra e haamähanahana ia räua i to räua tuaane i pohe ra. 20 Ìte aè ra Märeta e, te haere mai nei Ietu, haere atu ra o ia e färerei aè ra ia na; âreà Märia, pärahi iho ra ia i roto i te fare. 21Ua parau atu ra Märeta ia Ietu E te Fatu, àhiri òe i ô nei, e òre e pohe taù tuaane. 22 Ua ìte rä vau i ta òe e ani atu i te Atua ra, na te Atua ia e horoà mai na òe i teie nei ä. 23 Ua parau mai ra Ietu ia na E tiàfaahou mai ia to tuaane. 24 Ua parau atu ra Märeta ia na Ua ìte au e, e tiàfaahou mai ä o ia ia tae i te tiàfaahouraa i te mahana hopeà ra. 25 Ua parau mai ra Ietu ia na Tei ia ù te tiàfaahouraa e te ora, o të faaroo mai ia ù ra, pohe noa ä o ia e ora ä ia. 26E te taata ora atoà nei e faaroo ia ù ra, e òre roa atu ia e pohe. 27 Ua faaroo òe i te reira Ua parau atu ra o ia ia na E te Fatu, ê, ua faaroo vau e o òe te Metia te Tamaiti a te Atua o të haere mai i te ao nei ra.

Te òtoraa Ietu

28E oti aè ra taua parau ra, hoì mai ra o ia e parau atu ra ia Märia i ta na taeaè, ômumu atu ra e Terä aè te Òrometua, e te parau mai ra ia òe. 29 E ìte aè ra Märia i te reira, tià aè ra o ia i nià i reira ra, haere atu ra ia na ra. 30Aore ä Ietu i tae i roto i te ôire, tei te vähi ä i färerei atu ai Märeta ia na ra. 31E te âti-Iüta i pärahi i roto i te fare i te haamähanahanaraa ia Märia ra, ìte aè ra ia na i te tià-òiòi-raa i nià, e te haereraa atu i räpae, ua pee mai ra ia na, nä ô aè ra: «Te haere atu ra o ia i te menema ra òto ai. 32E tae atu ra Märia i taua vähi tei reira Ietu ra, ìte atu ra ia na, haamaìri iho ra o ia i raro i ta na pae âvae, nä ô atu ra ia na E te Fatu, àhiri òe i ô nei, e òre taù tuaane e pohe. 33 E ìte aè ra Ietu ia na i te òtoraa e te âti-Iüta hoì i haere atoà mai ra, ûuru iho ra o ia e horuhoru atu ra ta na värua, 34 nä ô atu ra Tei hea o ia i te vaiiho-raa-hia e òutou. Ua nä ô mai ra rätou ia na E te Fatu, a haere mai a hiò. 35 Òto iho ra Ietu. 36Ua parau iho ra te âti-Iüta A hiò na i to na aroha ia na 37 Ua nä ô aè ra rä te hoê pae o rätou E òre änei e tià ia na ia faaora mai i te pohe o teie nei taata, o tei faaora hoì o ia i te taata matapö ra. Ua ora faahou mai o Rätaro 38 Ua ûuru faahou iho ra Ietu i roto ia na iho, e tae atu ra i te menema ra e ana, e ôpanihia te ùputa i te hoê ôfaì. 39 Ua parau atu ra Ietu A huri ê atu na i te ôfaì.

Ua parau mai ra Märeta, te tuahine o taua taata i pohe ra E te Fatu, ua hauà i tënä na, o te ruì maha hoì teie.

40 Ua parau atu ra Ietu ia na Aore au i parau atu ia òe e, i faaroo òe ra e ìte òe i te mana o te Atua 41Ua huri ê atu ra rätou i te ôfaì i taua vähi i vaiihohia ai tei pohe ra, hiò atu ra te mata o Ietu i nià, e ua parau atu ra:

E taù Metua, e haamaitaì au ia òe, o òe i faaroo mai ia ù nei. 42Âreà vau, ua ìte au e e faaroo mai ä òe ia ù, no teie nei rä mau taata e haaàti mai ia ù nei i parau atu ai au, ia faaroo rätou e na òe au i tono mai. 43 E oti aè ra taua parau ra, ua faateitei aè ra i ta na reo, ua pii atu ra E Rätaro, a haere mai i räpae. 44 Ua haere mai ra taua taata i pohe ra i räpae, ua täamuhia nä rima e nä âvae, i vehihia hoì te mata i te àhu. Ua parau atu ra Ietu ia rätou A tätara, e tuu atu ia na ia haere na. 45 E te âti-Iüta i haere mai ia Märia ra, o tei ìte i ta Ietu i rave ra, e rave rahi ia tei faaroo ia na.

Manaò

Te Atua Nui Tumu Tahi, tei roto mätou i te märama no Mäòhi Nui i te tiàororaa atu e te Fatu, e faaroo mai i to mätou mau reo haamaitaì, e färiu mai i to tarià i ta mätou mau aniraa. Ta mätou mau hara ia marau i te mau àrueraa e faaòtohia nei e to mätou mau àau. Tei ia òe rä te faaòre i te hara ia mataùhia hoì òe ra. Te tiaì nei mätou i te Fatu, to mätou värua teie e tiaì e te tiàturi nei mätou i ta òe parau, mai te àru ra te huru e färii noa nei i te mau taime atoà. Te tiàturi nei mätou i to aroha, te here e ora ai mätou nei i roto i te hau. E riro òe i te faaora ia mätou i ta mätou mau hara.

Të nä ô mai ra te Atua Nui Tumu Tahi ra Inaha, e au mau taata e, e hüaì au i to òutou mau tänuraa, e ua arataì mai ia òutou mai raro mai i to òutou mau âpoo ra, e ua arataì au ia òutou i te fenua o Mäòhi Nui. E ìte hoì òutou e, o te Fatu vau, ia heheu vau i to òutou mau menema, e au mau taata, e ia arataì mai ia òutou mai raro mai i to òutou mau âpoo. E nä ù e tuu i taù aho i roto ia òutou, e ora ia òutou e nä ù e haamau ia òutou i to òutou iho fenua ei reira òutou e ìte ai e, nä ù na te Fatu i parau, e nä ù hoì i rave te parau mai ra te Fatu. Ia au i ta te Atua Nui Tumu Tahi parauraa ia Ètetiera i te 37 i te mau ìrava 12 e tae i te 14, E teie nei e tohu òe, e nä ô atu ia rätou.

E teie nei, te feiä i au i ta te tino ra, e òre roa te Atua e mauruüru ia rätou. Aore rä òutou i au i ta te tino ra, te au nei rä i ta te Värua ra, no te mea te pärahi ra te Värua o te Atua i roto ia òutou. Te ère ra rä te hoê taata i te Värua o te Metia ra, eere ia o ia i te taata no na. E tei roto te Metia ia òutou ra, te ora nei ia te Värua i te parau-tià, ua pohe mau rä te tino i te hara. Te pärahi ra to na Värua i roto ia òutou to tei faatià ia Ietu i te poheraa ra, o tei faatià i te Metia i te poheraa ra, na na atoà ia e faaora i to òutou mau tino pohe ra i to na Värua i pärahi i roto ia òutou na. Röma 8,8-11

Taiòraa i färereihia e tätou i teie mahana, o te tahi ia parau e tuuhia o Ietu i mua i te parau no te tähuti

Ioane pene 11, i te mau ìrava 1 e tae i te 45. Te pohe ra te hoê taata i te maì o Rätaro te iòa, no Pëtänia no te ôire o Märia e ta na tuaana o Märeta ra. O Märia i faatähinu i te Fatu i te räau noànoà ra, e tei horoi i ta na âvae i to na iho ra rouru, no na te tuaane i pohe i te maì ra o Rätaro. Ua tono atu ra nä tuahine i te veà e faaìte ia Ietu, nä ô atu ra e te Fatu, inaha, te taata here na òe ra, ua pohe i te maì. E ìte aè ra Ietu i taua parau ra, ua nä ô aè ra E òre te reira maì e riro ei maì pohe ia haamaitaìhia rä te Atua, e ia haamaitaìhia hoì te Tamaiti a te Atua i te reira. E aroha Ietu ia Märeta e ta na taeaè, e ia Rätaro hoì. Ua parau mai ra te mau pipi e Rapi, i tïtau iho nei hoì te âti-Iüta ia òe e pëhi i te ôfaì, e te haere faahou nei ä hoì òe i reira. Ua parau atu ra Ietu Eere änei hoê àhuru mä piti hora i te ao hoê nei, e ia haere hoì te taata i te ao ra e òre ia e turori, no te mea ua ìte o ia i te märamarama o teie nei ao. I nä reira atu ra o ia, e oti aè ra, ua parau atu ra o ia ia rätou Ua taòto to tätou hoa o Rätaro, te haere nei rä vau e faaära ia na. Ua parau mai ra Ietu ia na Tei ia ù te tiàfaahouraa e te ora, o të faaroo mai ia ù ra, pohe noa ä o ia e ora ä ia. E tae atu ra Märia i taua vähi tei reira Ietu ra, ìte atu ra ia na, haamaìri iho ra o ia i raro i ta na pae âvae, nä ô atu ra ia na E te Fatu, àhiri òe i ô nei, e òre taù tuaane e pohe. Ua ora faahou mai o Rätaro Ua ûuru faahou iho ra Ietu i roto ia na iho, e tae atu ra i te menema ra e ana, e ôpanihia te ùputa i te hoê ôfaì. E oti aè ra taua parau ra, ua faateitei aè ra i ta na reo, ua pii atu ra E Rätaro, a haere mai i räpae.

Te faufaa e vai ra i roto i teie mau parau, te taata e faaroo i te Atua Nui Tumu Tahi, e òre e tähuti e or a rä. Te ora ia e mauhia ra e Ietu, no te mea noo te ora i te Atua ra te vai ra to na maitaì i nià ia rätou. Te paari o teie manaò to Ietu, te mea ia i òre märö i te Atua, i te tïtauraa i te tahi pähonoraa, te tahi tatararaa, ei tämarü i te peàpeà, te mea atoà rä i òre i faahapa i te Atua i te faaruèraa i roto i te àti. Eere änei e, e teitei rahi to te raì i to fenua, e ärea rahi të faataa ê nei i te manaò taata i te mea tei au i te ôpuaraa faaora a te Atua. No te mea paha e ìte òre i te reira parau, te mea mau rä te reira mau te ora tei ia Ietu ra, i te färiiraa e, te vai ra te mea të òre e roaa i to tätou manaò i te haamahorahora. Mai te mea atu ra e, te faaruè nei tätou i to tätou oraraa i roto i te rima o te Atua. Ia ìte atoà rä tätou, i te faanaìnaì i mua i te rahi o te Atua, i te manaòraa e, eita ta tätou parau e tiàhia i mua i te rahi o te Atua no reira, mea maitaì aè no tätou ia mämü noa.

Nä ô paì ia tätou e, te ora, eere terä i hope atu ra nä roto i te pohe o te mau taata i herehia , eere atoà terä e vai ra i roto i terä rä e tiaì ra i to na tupuraa, tei riro te parau o te taata tätaì tahi, mai te tuuraa âvae e faaineine rii mäite noa ra i te tupuraa o te reira parau no te ora ia òre ia tähuti. E tano tätou e parau e, te mau àti tei haaparuparu ia tätou, ua riro mai ia ei püai no tätou, tei horoà hoì ia tätou i te itoito no te haereraa i mua, e te òreraa e pärahi i roto i te peàpeà e te òto. I parau noa ia tätou e, mai te peu e ôpuaraa ta te Atua, e tuhaa atoà ta tätou i roto i te tupuraa o te reira ôpuaraa. Ore noa ai tätou i märamarama i te auraa e te tumu te àti i täìri noa ai ia tätou, nä roto i to tätou färiiraa i te haere i mua, aore ra to tätou òreraa e faatautau, ua faaòhie tätou i te tupuraa o te ôpuaraa a te Atua. Mai te paruparu o te pape tei ü i nià i te tahi ôfaì, te tahi patu, e tei tere i te vähi ta te patu i türaì ia na mai te mea e, to na ihoä ia tereraa mau, mai te reira atoà tätou ia tano i nià i te patu o te pohe tei faahuru ê i te tereraa o to tätou oraraa. Aita te pape i pahü, aita e haruru i faaroohia, e inaha, èrä e àhehe atu ra, mai te neva òre mai. Te huru mau ia o teie nä vahine tei täpeàhia i roto i to räua tere, tei ìritihia te mea tei riro ei òaòaraa no räua, tei òre rä i faaea.

Teraì òr. Faatura.