Overblog Suivre ce blog
Editer l'article Administration Créer mon blog
4 janvier 2017 3 04 /01 /janvier /2017 23:08

TARAMO 12

1 Na te Mënätehe i nià i te teminita. Taramo na Tävita. 2 Ia ora, e te Fatu e Ua òre aè nei hoì te feiä paieti, e te feiä parau-mau ra, ua òre aè nei io te taata nei.3 E parau faufaa òre ta rätou e parau nei, i te tahi e te tahi; o te parau haapaìà, e te âau piti ta rätou e parau nei. 4 E faaòre te Fatu i te parau haapaìà, e te arero e parau i te parau teòteò ra. 5 To te feiä e parau ra e: «E tupu ta to tätou arero e parau nei, no tätou iho to tätou vaha, o vai tei hau i nià ia tätou nei. 6 «No te hämani ìno i te taata rii ra, no te mäuiui o te feiä haèhaa i tià ai au nei i teie nei, te parau mai ra te Fatu, e tuu vau ia rätou i te vähi e ora ai i te feiä e vahavaha mai ia rätou.7 E parau ânoì-òre-hia ta te Fatu, mai te ârio i tämähia i roto i te päni àraea ra, ia tätaìhituhia te tämäraa. 8 Na òe, e te Fatu, e faaora ia rätou, na òe e tiaì ia rätou i teie nei uì e a muri noa atu. 9 Ia faateiteihia te taata faufau ra, te ori haere noa ra te feiä paieti-òre i reira.

Manaò

Te himene e faaòtohia nei ma te âpeehia e te mauhaa ùpaùpa, no te faaìte i te tahi huru o te taata o ta te Atua i òre i tuu i roto i te âau, e parau teie tei faaätea i te hinaaro o te Atua Nui Tumu tahi. E mau parau teie tei haafaufaa òre i te hiroà o te taata, no te mea te hiroà e faatupu te reira i te maitaì i to na täuaro. E aha te mea e noaa, i te haavare, te faaìno, te teòteò, te pari haavare, te vaha piti, ia rave tätou i teie huru te manaò o te Taramo i te ìrava 9 Ia faateiteihia te taata faufau ra, te ori haere noa ra te feiä paieti-òre i reira.

Ia tae te taata i nià i teie huru faanahoraa, ua riro to na manaò e to na âau i te faaroo òre, ua haapaehia te tumu o te aroha e te here ta te Atua Nui Tumu Tahi i horoà i te taata. To na auraa ua faaòhipahia te reo no te faaàmahamaha te oraraa vaamataeinaa, e te mau ùtuafare o te nünaa Mäòhi.

Te fifi rahi i teie mahana, ua ätea roa tätou i te hiroà nehenehe mau ta te Atua Nui Tumu Tahi i Mäòhi ai te nünaa Mäòhi, i Mäòhi Nui nei. Eie tätou e rave ìno noa nei i teie hiroà, a haafefe te reira i ta na haafeferaa, a faatano te reira i ta na faatanoraa, e ua haamauroa-hia te tahi pupu taata tei horoàhia ia rätou te mana no te faaìnoraa i te hiroà Mäòhi. A ui na ra, e aha mau na te mea e hinaarohia nei. Hinaarohia änei ra ia hiò te Mäòhi i te ùputa o te pätireia ia täpirihia i mua i to na mata, aore ra ia täpirihia i muri i to na tua. Mea faufaa te ìteraa e, te vai ra te ùputa, mea faufaa te ìteraa i te vähi tei reira taua ùputa ra, ua hau atu rä te faufaa, ia tomohia, oia hoì ia tatarahia te ôpani. E ara o te riro tätou mai te mau päpaì parau e te mau färitea ta Ietu e faahapa ra, ìte noa ai i te ùputa o te pätireia, eita rä e hinaaro i te tomo, eita atoà hoì e hinaaro i te taata ia tomo. Ahiri rätou i faanuu rii noa aè i te hiti, òi paraumau-hia rätou i te feiä märamarama, i teie nei rä, aita atu mea e ìte-maitaì-hia atu ra maoti rä, to rätou ìno. Teie te hinaaro o te Atua ia tätou ia riro o ia ei Atua no tätou , e ia riro tätou ei nünaa no na Revitito 26, 12. E ia faahiti hoì tätou i teie parau, faaea tätou i te manaò i te tahi mea ê atu i ta te parau e heheu mai ra ia tätou, e tütonu rä to tätou manaò i nià i to tätou parau, tätou e te nünaa Mäòhi. Faaea tätou i te tïpee hänoa, faaea atoà i te taahi noa ia tätou iho. Te tämau noa nei ä te mau arataì o te Faaroo i te haaparemo i to tätou parau i roto i to Ìteraèra, e te tämau noa nei i te haavare i te nünaa faaroo e, ua matara te ùputa o te ora i te pohe o Ietu. Eere änei no te haavare, te nounou, e te ìno o te mau arataì o te Faaroo i pohe ai Ietu. Nä hea te mea i faatupu i te pohe, e faatupu mai ai i te ora. Teie ta te Fatu e parau ra Tei faaroo i te Tamaiti ra, e ora mure òre to n a tei òre i faaroo i te Tamaiti ra, e òre o ia e ìte i te ora, te vai ra rä te riri o te Atua i n ià iho ia na Ioane 3, 36. E aha teie ta tätou e onoöno nei i te ìmi i te ora i te tahi vähi ê atu i ta te Fatu iho i faaìte mai, e ua pohe roa o ia i te faaitoito-noa-raa i te òòmo i teie parau i roto i te âau o te taata. E aha iho ra te hopeàraa. Aita ihoä e taata i täuà, e tae roa mai ia tätou nei. Haamanaò na tätou i te reo o nä merahi i te parauraa atu i te mau vahine i haere e miri i te tino o Ietu E aha òutou i ìmi ai i tei ora i te vairaa o te pohe Ruta 24, 5. Te tano noa atoà ra te reira faahaparaa ta nä merahi ia tätou i teie mahana. A ui rii na tätou, e mauruüru änei te Atua i te feiä i ôpua i te ìno i pohe roa ai te Fatu, e aha ia ta tätou faahanahanaraa i te pohe tei haamanaò mai i te manuiaraa te ìno o te taata i nià i te ôpuaraa ora a te Atua. Ia parau mai hoì te Tamaiti, a ora ai o ia e, e tiàturi ia na e i ta na parau ia noaa te ora : Âmene , âmene , e parau atu vau ia òutou , tei faaroo i aù nei , e ora mure òre to na Ioane 6, 47, no te aha ia tätou i onoöno ai i te tiàturi i te faaìno, no te aha tätou i faarahi ai e i haafaufaa ai i te parau o te faaìno, riro noa ai ei pohe no te Fatu, e ere hoì te Atua i te Atua no te taata pohe , no te taata ora ra Mätaio 22, 32, e aita atoà te Fatu i parau mai e tiàturi i to na pohe ei räveà e noaa ai te ora. Te reira tiàturi to tätou i te pohe o te Fatu ei tatara ia tätou i te ùputa o te ora, eita änei e faahaere mai i nià ia tätou i te riri o te Atua Metua i hinaaro ia faaroo te taata i te parau ta na i faaue i te Tamaiti ia haere e faaìte i te taata E ere i ta ù iho te parau ta ù i parau atu na, na te Metua rä i tono mai ia ù nei ra i faaue mai ia ù i te parau ia parau vau e ia haapii. Ioane 12,49.

 

Teraì òr. Faatura.

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens