Overblog Suivre ce blog
Editer l'article Administration Créer mon blog
12 janvier 2017 4 12 /01 /janvier /2017 23:07

Täpati 15 no Tënuare 2017.

Ao

Taiòraa

Ioane 1,29-34

Te ârënio a te Atua

29 I te mahana i muri mai, ìte atu ra Ioane ia Ietu i te haereà mai ia na ra, e ua nä ô aè ra o ia «Ìnaha te Ârënio a te Atua, o tei hopoi ê atu i te hara a to te ao. 30 O ia teie ta ù i parau ra e: «Te haere mai nei te hoê taata i muri iho ia ù nei, e riro o ia i mua ia ù, o mua hoì o ia ia ù. « 31 Âreà vau, aita vau i ìte ia na, ua haere mai rä vau e päpetito i te pape no te faaìte ia na i to Ìteraèra. 32 Ua faaìte atu ra hoì Ioane, nä ô atu ra: «Hiò atu ra vau i te Värua i te pouraa mai, mai te raì mai, mai te ûupa ra, e ua faaea iho ra i nià iho ia na. 33 Aore ä vau i ìte atu ra ia na, mäoti tei tono mai ia ù e päpetito i te pape nei, o ia tei parau mai ia ù e:»Oia o ta te Värua i pou e i noho ia na ra, e na na e päpetito i roto i te Värua Moà.» 34 Ìte atu ra hoì au, e teie ta ù parau: o te Tamaiti ia o ia na te Atua.

Manaò

Te tumu mau o te oraraa, e orahia nei e tätou te tiaì mäiteraa tätou i to tätou Fatu, ia färiu mai o ia ia tätou, e ia faaroo mai i ta tätou pure. Ia ùme o ia ia tätou i räpae i te mau âpoo riàrià, no te vari hohonu e te piripiri, e te mau haapiòraa o to tätou âvae i nià i te papa no te mau hinaaro o te Atua Nui Tumu Tahi e ua faaau mäite hoì tätou i te mau haereà. Te tuu mai nei te Atua nui Tumu Tahi i te himene âpï i roto i to tätou nei vaha, e himene haamaitaì i to na Hanahana. Te ìrava 5 i te faaìteraa a te Taramo 40, E ao to te taata e tiàturi i te Fatu, e aore i haapaò i te teòteò, e tei färiu i te parau haavare ra. E rave rahi te mau òhipa taa ê i ravehia e te Atua, e to na manaòraa ia tätou. E òre e tià ia taiò e faaìte hoì tätou, e parau tätou i te reira eita rä e tià ia taiò atu i te rahi. Ua haafatafata te Atua i to tätou puè tarià no te mea aore O ia i hinaaro i te tütia e te tütia àmu, te tütia-täauahi e te tütia no te hara, e aita O ia i tïtau mai. Ia tià ia tätou i te parauraa ìnaha, te haere nei tätou i te mea e au i te hinaaro o to tätou Atua, te vai nei te ture tei roto i to tätou nei âau. Ia parau tätou i te parau-tià i roto i te âmuiraa o te taata ia òre roa to tätou vaha ia mämü, ia faaìte tätou i te parau mau e te ora a te Atua Nui Tumu Tahi. Ia òre tätou i huna i to hämani maitaì e te parau mau i te mau taata atoà i Mäòhi Nui nei. Ia vai mai ä te aroha hämani maitaì no te hämani maitaì e te parau mau e tiaì ai. Haaàtihia tätou e te ìno e rave rahi, ua roohia tätou i te hara, E rahi te reira i te ìo rouru i to tätou upoo e teie nei, ua taiä to tätou âau i roto ia tätou nei. Te feiä atoà rä i ìmi i te Atua ra, e òaòa rätou, ia reàreà ia te feiä i hinaaro i te ora a te Atua ra, e parau ia tätou ia faarahihia te Fatu e a muri noa atu.

Te manaò e vai ra ia òre to tätou rohirohi ia faufaa òre ia faahope ra tätou i to tätou püai, te ìrava 5 i te faaìteraa a Ìtaia i te pene 49 E teie nei, te nä ô mai ra te Fatu, o tei faatupu mai ia ù mai te ôpü mai ei tävini nö na; e faahoì mai ia Iatöpa ia na ra, e ia putuputu mai Ìteraèra ia na ra, i maitaì ai au i te aro o te Fatu, e ua riro mai ta ù Atua ra ei itoito nö ù. Oia mau, e mea ïti teie no tätou, tätou i riro ei tävini no te Atua Nui Tumu Tahi, ei faatià i nià i te mau ôpü no Mäòhi Nui nei, e ia faahoì mai i te tura, te tiàma o te Mäòhi e ia faaorahia, i te mea e höroàhia mai te tiàrama no tätou e ei ora no tätou e tae noa atu i te hopeà o te mau fenua no te Moana Nui a Hiva. Ei mea faufaa tei Fatu rä tätou parau, e te utuà o ta tätou òhipa, tei to tätou Atua ia. E parau mai te Atua Nui Tumu Tahi ia tätou, e tävini tätou, no Mäòhi Nui, i te haamaitaìraa a te Atua Nui Tumu Tahi. E parau ia tätou e, ua haapaòhia tätou i Mäòhi Nui nei i te hinaaro o te Atua ei veà faaìte na Ietu Metia, e to tätou mau taeaè, mau tuahine tei pärahi moèmoè noa e tei haamoè, i te Ètärëtia a te Atua i Mäòhi Nui nei, tei haapaòhia i roto i te Metia ra ia Ietu, ei ia haapaòhia te feiä atoà, e te feiä e taù ra i te iòa o to tätou Fatu ra o Ietu Metia i te mau vähi atoà.

Te parau no teie mahana, e faaâpïraa teie e faaìtehia nei i teie parauraa a Ioane Ìnaha te Ârënio a te Atua Nui Tumu Tahi, o tei hopoi ê atu i te hara a to te ao. Ma te horoà i te faanahoraa Te haere mai nei te hoê taata i muri iho ia ù nei, e riro o ia i mua ia ù, o mua hoì o ia ia ù. Âreà vau, aita vau i ìte ia na, ua haere mai rä vau e päpetito i te pape no te faaìte ia na i to Ìteraèra. Hiò atu ra vau i te Värua i te pouraa mai, mai te raì mai, mai te ûupa ra, e ua faaea iho ra i nià iho ia na. Aore ä vau i ìte atu ra ia na, mäoti tei tono mai ia ù e päpetito i te pape nei, o ia tei parau mai ia ù e. Oia o ta te Värua i pou e i noho ia na ra, e na na e päpetito i roto i te Värua Moà o te Tamaiti ia o ia na te Atua.

O teie te Ao âpï tei faaineinehia e Ioane i roto i ta na tiàturiraa i te ôpuaraa faaora a te Atua Nui Tumu Tahi, ta na tuhaa te päpetitoraa päpe, ta te Metia ra te auahi e te Värua Maitaì. Ia faaroo tätou i teie huru parau, te hinaarohia ra i te turäma ia tätou i na parau e toru, Päpe, Auahi, Värua Maitaì. Teie na parau e toru o te täumiraa, te tämaraa, i te taata i roto i te märamarama o te Parau, no te mea, e höroà mai te reira i te ora. Te auahi e täpaò ia no te tämä e te Värua Maitaì ei arataì te taata i te märamarama. Na te märamarama ta Ietu e àfaì mai e faaora i te taata, i parau ai o ia e O vau te märamarama e te ora. Te pape e te auahi, e täpaò faaìte ia i te tahi òhipa hapa òre e te mä. Areà te Värua Maitaì, te mana òhipa te reira o te Atua i roto i teie nei ao. Te türama noa ra teie faahitiraa ta Ioane i nià ia Ietu, te faufaa e te auraa o te päpetitoraa. Ia hiò-anaè-hia, ta Ietu òhipa tumu i roto i to na oraraa, te täumiraa ia te taata i roto i te märamarama o te parau, ia mä i ta na parau, òia hoì, te haapii tämauraa i te taata i te parau maitaì a te Atua Metua. Te nä ô ra ta Ioane päpaìraa ite pene 8 i te ìrava 31 Ua parau atu ra Ietu i te âti-Iüta i faaroo mai ia na ra I mau mäite òutou i ta ù parau, e pipi mau ia òutou na ù i reira. Te ìrava 32 E ìte ia òutou i te parau mau, e na te parau mau òutou e faatiàmä.

Te ìrava 36 Na te Tamaiti òutou i faatiàmä ra, ua tiàmä mau ia òutou.

Te päpetitoraahia o Ietu Mätaio 3, 13-17 I roto i teie parau ta Mätaio, aita Ietu i haafaufaa-òre i te päpetitoraa a Ioane, e ìnaha, ua tià roa ia na i te ani onoöno ia Ioane ia päpetitohia o ia. I mua i tera huru pätoì to Ioane, ua pähono Ietu ia na e tuu noa mai é ia tupu te parau tiàˆ. E aha hoì e òre ai e noaa terä manaò pätoì i te mea hoì o Ioane iho tei fäì e haere mai te hoê e mana rahi to na i to ù. E rahi aè Ietu ia Ioane, terä rä, ua faahaèhaa Ietu ia na no te färii i te päpetito tätarahapa a Ioane. To na tanoraa mau, na Ietu e päpetito ia Ioane. E aha ra ia Ietu i hinaaro ai ia päpetitohia o ia e Ioane. No te faaìte änei i te faufaa o te päpetitoraa a Ioane e aore ra no te tahi tumu päpü maitaì. Ia faaroohia te pähonoraa a Ietu, òia hoì, no te faatupu hope roa ia i te parau-tià. E aha ra te auraa o teie parau. Mai te peu, ua tupu hope roa te parau tià na roto i to Ietu färiiraa i te päpetitoraa a Ioane, te ö atoà nei ia te feiä atoà tei tätarahapa e tei päpetitohia i roto i teie tupuraa no te parau-tià. Te tahi taata hapa òre, mai ia Ietu, aita O ia i fifi i te färiiraa i te päpetitoraa a Ioane.

Teie te Ao âpï o ta Ioane e hinaaro nei i te faanaho, Ao Parau Mau, Parau Tià, Märamarama e te Tiàma.

 

Ia ora Mäòhi Nui.

 

Teraì òr. faatura.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens