PAPA HAAMORI NO TE ÔROÀ pureraa tau 2017

PAPA HAAMORI NO TE ÔROÀ

I teie taime, e färiu anaè to tätou manaò, to tätou püai e to tätou âau i nià i te Ôroà ta te Tamaiti o te âià i haamau : E te tämaa ra rätou i taua ahiahi ra, ua rave iho ra O ia i te färaoa, e oti aè ra i te haamaitaì i te Atua, vävähi iho ra, tuu atu ra i ta Na mau pipi, nä ô atu ra « A rave, a àmu, o ta ù tino tenä ».

Ua rave iho ra O ia i te âuà, haamauruüru aè ra i te Atua, tuu atu ra ia rätou ra nä ô atu ra : « A rave a inu, o ta ù toto tenä, te toto no te faaäuraa âpï, i haamaniihia no te taata e rave rahi, ia matara te hara ».

Haamanaò tätou e, te Ôroà, to te taata ia haamaitaìraa e to na hoì faahanahanaraa i te Tumu nui, no te mau maitaì atoà ta te fenua e faaìte noa ra. E te heheu mai ra te Parau Maitaì ia tätou, o Ietu Metia, o te Parau ia a te Atua i riro mai ei taata.

Mai te färaoa, te ùru, te taro, te ufi, te mau mäa rau atoà o te fenua, o te Parau ia a te Atua, ta Ietu iho i parau e, A rave a àmu. Oia hoì a àmu hua i te Here, a àmu hua i te Parau a te Atua, to tätou ia Ora.

Mai te uaina, te vai haari, te vai täporo, te mau vai atoà tei nä roto mai i te mau mäa rau atoà o te fenua, o te Parau ia a te Atua, ta Ietu iho i parau e, A rave a inu. Oia hoì, a inu Hua i te here, a ïnu hua i te Parau a te Atua, ia mä tätou i mua i to Na Moà.

Ia Haamaitaìhia te Atua Tumu tahi nui. Amene.

E tià paatoà tätou.

(No te mäa)

Te haamaitaì nei mätou ia  òe e te Atua Metua, no to òe here e to  òe aroha ta te mäa : färaoa, ùru, etv... e heheu mai nei ia mätou.

(No te vai)

Te haamaitaì nei mätou ia  òe e te Atua Metua no to  òe here e to  òe aroha ta te vai : uaina, te vai haari, etv... e heheu mai nei ia mätou.

A rave a àmu, a rave a inu, ia hanahana te Tumu tahi nui. 

TÄMÄA

IA OTI TE TÄMÄARAA

Ia haamaitaìhia te Fatu o te raì e te fenua, tei ìriti ia tätou, te ùputa o te ora.

E faaìte tätou i to tätou Metua täne i te raì tuatinitini i to tätou  òaòa, e ârue tätou ia na mai ta te Fenua e ta te Tamaiti e haapii mai nei ia tätou. Nä roto i to tätou färiiraa i te tomo i roto i te faaäuraa a te Tumu tahi, te riro nei tätou, ei mau taata no To na ra Hau.

A faafäite anaè tätou i te Fenua e i te Tumu nui. Amene.