Mätaio 11,2-11

Tāpati 11 no Titema 2016.

TIAÌRAA TORU

Turori

Mätaio 11,2-11

Te uiraa a Ioane e te faaìteraa manaò o Ietu

(Rut 7.18-35)

2 E faaroo aè ra Ioane i roto i te täpeàraa ra i te mau òhipa a te Metia, ua tono atu ra o ia na roto i ta na mau pipi e ui ia Ietu e 3 O òe änei të tae mai, e aore ia, e tiaì atu änei tätou i te tahi ê atu? 4 Ua parau atu ra Ietu ia rätou A haere, a faaìte atu ia Ioane i ta ôrua e faaroo nei e e ìte nei 5 te ìte faahou nei te matapö, te haere nei te piriòì, ua tämähia te rëpera, ua  faaroo te turi e te tiàfaahou nei te feiä pohe, e ua porohia te parau maitaì i te feiä veve. 6 E ao tö na, to të òre e turori ia ù 7 E ia reva atu rätou, ua parau atu ra Ietu i te parau o Ioane i te tiàa rahi. I haere òutou i te mëtëpara e hiò i te aha? I te âèho i ueuehia e te mataì? 8 I haere rä òutou e hiò i te aha? I te taata i te àhuraa i te àhu marü/nehenehe? Inaha, te feiä e àhu i te àhu marü/nehenehe ra, tei te mau fare ia o te mau arii. 9 I haere mau rä òutou e hiò i te aha? I te perofeta? Oia ia, e parau atu vau ia òutou: e rahi atu ia o ia i te perofeta. 10 No na hoì i päpaìhia ai teie parau e. Inaha, e tono vau i taù veà i mua ia òe e nä na e haamaitaì i to èà i mua ia òe na. 11 Òia mau ta ù e parau atu ia òutou nei i ta te vahine i fänau ra, aita hoê aè i hau ia Ioane päpetito. O tei iti roa rä i te Hau o te raì ra, e rahi aè ia ia na.

Manaò

I teie tiaìraa toru èi haamanaòraa na tätou i te fänauraa te Tämaïti a te Atua Nui Tumu Tahi, mea tià ia tätou i te haamaitaì i te Fatu, mä te puai o to tätou  faaroo. E haamaitaì tätou i te Fatu, no te ora i faanaòhia e tätou  e himene tätou i te  Atua Nui Tumu Tahi, òi vai aè tätou nei.  Eiaha tätou e  tiàturi i te mau mea rii faufaa òre, e ätea ai tätou i te ora höroà a te Atua. Te marere ra te faaroo mai te ota e pee ra i te mataì, te hoì nei i to na ra repo, mou roa atu ra tei ôpuahia i taua mahana ra.  E ao ra to tätou te Atua Nui Tumu Tahi  te tauturu ia tätou, e tei te Atua i te Fatu to tätou tiàturiraa.  O tei rähu ia Mäòhi Nui, te mau raì e te fenua, te tai e te mau mea atoà i roto ra o tei haapaò i te parau-mau e a muri noa atu. O tei faatià ia Mäòhi Nui i te mau hämani-ìno-raa, e rave rahi mau horoà i roto i te fenua ia vai heeuri e ia ruperupe te  mäa ia te Mäòhi ia poìa. Na te Fatu e tätara ia tätou ia tiàma ia òre tätou ia täpeàhia i roto i te pöuri, i te mea te faaàraàra nei te Fatu  i to tätou  mata o tei matapö te faatià nei i to tätou haèhaa ra, i te hinaaro o te parau-tià. E Fatu faaora to tätou i te mau taata.

I reira e tupu maitaì ai te ôpuaraa faaora i faahanahana ai tätou i te fänau pü fenuaraahia te  Metia. E reàreà ai te mau vähi päpämarô, e òaòa te fenua àihere e ruperupe mai te mau tiare Maurua, e ruperupe rahi ia, e ôuàuà noa mä te òaòa e himene, te ùnaùna o Mäòhi Nui mea höroàhia mai, te nehenehe o te mau motu e ìteraa te reira i te hanahana o te Fatu. E faaètaèta na tätou i te rima paruparu, e tauturu tätou i te turi turorirori. E parau tätou i te âau taiä, Ia itoito tätou eiaha e mataù inaha  to tätou Atua e Atua no te ora, O ia iho te haere  mai e faaora ia tätou. Ia vai àraàra ai to tätou mata, e àmaha ai to tätou tarià. I òre ai tätou e piriòì i himene ai tätou. Oia ia, ua hoo-faahou-hia mai tätou e te Fatu tei fänau pü fenuahia e noaa ia tätou te reàreà e te òaòa,  e te òto ra, e te mihi ra, e maùe ê atu ia.

Te auraa mau teie o te faaòromaì e te pure,  e teie nei, e faaòromaì, tätou mai te taata, faaàpu ra, te tiaì mäite ra o ia i te mäa maitaì o te fenua, te faaòromaì mäite ra hoì i te reira, e ia topa te ua mätamua, e te ua hopeà ra. E faaòromaì tätou, ia faaitoito to tätou âau no te mea te fätata ra tätou i te haamanaò i te mau òhipa faufaa i tupu i te töhuraa a te mau veà tono a te Atua Nui Tumu Tahi. Eiaha tätou e täiroiro e Mäòhi Nui, o te faahapahia mai tätou. Inaha, te tià noa mai ra te haavä i te ùputa. I parau mai ai te Atua Nui Tumu Tahi ia Mäòhi Nui i teie mahana i te päpaìraa a  Mätaio i te pene 11 i te mau ìrava 2 e tae i te 11

Tei roto o Ioane i te fare täpeàraa i te faarooraa i te roo o te Metia i te àtuturaa. E àti noa aè i te mau vahi ta na i haere e faaìte i te pätireia o te Atua. No te haapäpü ia Ioane e o Ietu mau teie, Eita anei rätou e tiaì faahou atu i te tahi. Te tono nei o ia i ta na na veà e hiò. Ua ìte teie na veà ia Ietu, e ua faaroo i te mau poroìraa tei horoàhia i roto ia raua. Te poroì nei o Ietu ia raua e, e o te òre e turori ia ù nei, e ao to na. Na teie parau i faaära i na veà e eiaha e tiaì faahou atu i te tahi atu Metia, o teie te Metia e tiaìhia nei. I reira o Ietu i te poroìraa i te òhipa a Ioane, ma te faaìte atoà i ta Ioane i rave i te mëtëpara. O ta Ietu i faarahi i te mau perofeta atoà, (ìr 9vh) Eiaha e tiaì faahou atu i te tahi Metia, teie te Metia ta te Atua i tono mai no te tämahanahana i te mau taata atoà i roto i te òto, e tei horoà i te òaòa i te feiä tei haapaò maite i ta rätou täreni.

Ua rave o Ioane i ta na tuhaa, ua poro i te parau, e ua ani i te taata ia tätarahapa, oia hoì  ia  ìte i te hapa ta rätou e rave noa ra. Te taata tei roaa ia na te faaìte i te vähi o ia i hapa ai, ua ätea atoà mai ia taata i taua hapa na na ra. Ia òre rä teie òhipa ia riro noa ei manaò âau, te ani atoà nei Ioane i te taata ia färii i te päpetito tei riro ei täpaò e ìte ra i te hinaaro mau o te taata e faaruè roa i taua mau hapa na na ra. Ia märamarama atoà rä tätou e, no te ìteraa e te färiiraa te tahi i te Parau a te Atua, e òhie atoà ai o ia i te ìte e te färii i ta na mau hape, te mea atoà rä te reira e faaòhie i to na faataa-ê-raa mai, aore ra to na faaätea-ê-raa atu i taua mau hapa ra. Te päpüraa mau rä o teie manaò ton Ioane e faariro atoà nei ei parau na na, tei roto ia i te parau no to te taata hämaniraahia ei repo fenua. Te auraa, e repo fenua te taata, oia hoì e fenua. Te èà e nä reira te Fatu i te haere, eere ia te èà i taraihia e te rima taata, te èà rä ta te taata i tarai i roto i to na âau ta na i faariro ei vähi haereraa no te Fatu, ia òre ia turori. Aita atu hoì e mea e maitaì ai te haereà o te Fatu maoti rä, ia faaätea te taata i te mau mea atoà e turori ai to na tere i te taupupü e te òre e tupu maitaì. Ua ìte ia tätou e, te taata, te tahi ia fenua e anihia nei ia faahoì-faahou-hia i roto i te rima o te Fatu, ia riro ei vähi haereraa no te Fatu, ei vähi hoì e hotu ùmu ai te aroha e te here tei riro ei täpaò e ìtehia ai te mau taata o te Atua i te mau taata eere i to te Atua, te mau taata i haerehia e te Fatu i te mau taata tei òre i haerehia e te Fatu, oia hoì te mau taata tei faataa i te èà o te Fatu i roto i to rätou âau, i te mau taata tei òre i faataa i te tahi haereraa no te Fatu.

E tano te märamaramaraa i teie parau ia faaäuhia i ta te taata märamaramaraa i te pure a te Fatu i te vähi e nä ô ra e : Ia tae mai to òe Hau. Ua rahi roa te taata e manaò noa nei e, na te Atua iho e haere mai e haamau i to na Hau i te fenua nei. I teie nei rä, ia òre te Atua ia hau, oia hoì ia òre o ia ia mana i roto i te âau o te taata, nä hea o ia e mana ai i nià i te fenua, nä hea to na Hau e mau mai ai. No te mea hoì aita to te Atua e pärahiraa i roto i te âau o te taata, i òhie ai te taata i te haere e haamau i te hau o te taata, mana atu ra te taata i nià i te fenua nei e i roto i te âau o te taata iho. Te tämau noa nei ihoä te taata i te parau i te Atua e Ia tae mai to òe Hau, te manaò rä, na te Atua iho ia te reira òhipa e rave, e aita roa atu ta na e tuhaa i reira.

Eiaha to tätou faaroo ia turori.

Ia ora o Mäòhi Nui i teie ôroà fänau.

Teraì òr Faatura.