Mätaio 3,1-12

Tāpati 4 no Titema 2016.

TIAÌRAA PITI

ÔROÀ

Autaeaè

Taiòraa

Mätaio 3,1-12

Ioane päpetito

(Mär 1.2-6; Rut 3.1-6; Ioa 1.19-23)

1 I taua mau mahana ra, ua tià mai ra Ioane päpetito, mä te poro haere i te mëtëpara no Iütea: 2 A tätarahapa, te fätata mai nei hoì te Hau o te raì 3 O ia teie ta te perofeta Ìtaia i parau na e, E reo no te hoê tei tiàoro i te mëtëpara A faaineine i te èà o te Fatu, e faatïtïàifaro i to na mau haereà/ara/taìara. 4 Huruhuru tämera to Ioane àhu, i tätuahia to na tauupu i te hätua ìri puaa, àtarite/vïvï e te meri o te fenua àihere/meri ôviri ta na mäa. 5 Haere atu ra to Ierutarëma ia na ra, to Iütea atoà e to te tuhaa fenua täatoà o Iörïtäna; 6 e päpetito atu ra o ia ia rätou i roto i te pape i Iörïtäna, mä te fäì i ta rätou hara.

Te tïtauraa a Ioane ia tätarahapa

(Rut 3.7-9)

7 Ia ìte atu rä Ioane päpetito i te rahi o te mau Färitea e te mau Tätutea i te haereraa mai ia päpetitohia rätou, ua parau atu ra o ia ia rätou, E te mau fanauà ôfï e Nä vai i faaära ia òutou e horo ê i te riri e fätata mai nei. 8 A faahotu na i te mäa e au i te tätarahapa; 9 eiaha òutou iho e manaò e O Âperahäma to mätou." E parau atu hoì au ia òutou, e tià i te Atua ia faatupu no roto mai i teie mau ôfaì i te mau tamarii na Âperahäma. 10 Ua ineine ê na te ôpahi no te täpü i te mau tumu räau i nià i te aa: te mau tumu räau atoà aore i hotu mai i te mäa maitaì, e täpuhia ia e e hurihia i roto i te auahi.

Te päpetitoraa pape e te päpetitoraa auahi

(Mär 1.7-8; Rut 3.15-18; hiò Ioa 1.24-28)

11 O vau nei, te päpetito nei au ia òutou i te pape ia tupu te tätarahapa; o ia rä, o të haere mai i muri iho ia ù nei, e mana rahi aè tö na i tö ù, e òre e tano ia ù ia tätara i to na tämaa/tïaa; e päpetito o ia ia òutou i te Värua Maitaì e i te auahi. 12 Tei to na rima ta na tähiri/pätia, e tämä mäite o ia i ta na vähi papaìraa tïtona, e haaputu o ia i ta na tïtona i roto i te vairaa tïtona, âreà te ota e tütuì o ia i te reira i te auahi pohe-òre.

Manaò

Te âmaa no roto i te tumu o te Atua Nui Tumu Tahi. E tupu te  ohi no te tumu ra o Mäòhi Nui, to na aveave to na aa e hotu rahi. Nä te värua o te nünaa, te värua o te paari e no te ìte, värua faaaò e no te püai, te värua no te ìte, e no te mataù i te Atua Nui Tumu Tahi. Te ìte i te mataù i te Atua Nui Tumu Tahi, e òre hoì ta na parau e faaäuhia i tei ìteä e ta na mata, e òre hoì o ia e aò i ta to na tarià i faaroo ra. E haavä o ia i te taata  mä te parau-tià ra,  e tuu i te parau au i te feiä mämahu o te fenua ma te täìri  i te fenua i te papaì o ta na ra vaha e pohe te paieti-òre i te mataì o to na ra vaha. Te parau-tià  te tätua ia o ta na tauupu e te parau, o te ruuruu ia o ta na ôpü. Ei reira te mau puaa taehae  e âmui ai i te mau puaa faaàmu ma te ärataìhia i te àuhune o te fenua   e î te fenua i te ìte i te Atua Nui Tumu Tahi.

 E tià te ora e horoàhia no te faaea tämau i roto  i te pure ma te haamaitaì, eita e mahana e tuua. E riro hoì te maa o te fenua i roto i te mau faaàpu, i nià i te tupuaì o te mau mouà ra, e tei tupu ra, e àhehe ia mai te mau tumu haari e tupu i Mäòhi Nui i te ruperupe i roto i te mau ôire mai te räau o te fenua. E vai ä tei iòa o te Atua Nui Tumu Tahi e a muri noa atu e vai ä to na iòa mai te mahana, e maitaì te taata atoà ia na, e e hope te mau fëtii atoà o te fenua nei i te haamaitaì ia na. Ia haamaitaìhia te Atua Nui Tumu Tahi, Ia haamaitaìhia hoì to na iòa hanahana e a muri noa atu Ia faaîhia hoì te mau fenua o Mäòhi Nui i to na hanahana.

Te mau parau i päpaìhia i mütaa iho ra, i päpaìhia ia  ìte tätou, ia noaa to tätou tiaìraa, i te faaòromaì e te mähanahana o te parau i päpaìhia ra. Ia haafäito te Atua  te faaòromaì e te mähanahana i to tätou âau, ia au i te hinaaro o te Metia ra o Ietu. Ia haamaitaì tätou i te Atua, i te Metua o to tätou Fatu ra o Ietu Metia, mä te âau hoê, e te vaha hoê. E färii tätou ia tätou iho mai te Metia i färii mai ia tätou, ia maitaì te Atua. E  haamaitaì  Mäòhi Nui i te Atua i to na ra aroha, oia hoì tei päpaìhia ra. No reira tätou i haamaitaì ai i Mäòhi Nui, e himene ai i to òe ra iòa.

Ia faaineine tätou i te parau tätarahapa, no te mea te  fätata mai nei te Hau o te raì tei faaìtehia e Ìtaia perofeta i parau na e, E reo no te hoê tei tiàoro i te mëtëpara A faaineine i te èà o te Fatu, e faatïtïàifaro i to na mau taìara. Faanehenehehia i te Huruhuru tämera tätuahia to na tauupu i te hätua ìri puaa, vïvï e te meri o te fenua àihere te mäa. Mau ôire täpiri tei päpetitohia, mä te fäì i ta rätou hara.

Teie te parau e te mau fanauà ôfï e Nä vai i faaära ia òutou e horo ê i te riri e fätata mai nei. E faahotu te mäa e au i te tätarahapa, e tià i te Atua Nui Tumu Tahi ia faatupu no roto mai i te mau ôfaì i te mau tamarii na mau Metua o te Faaroo. Ua ineine ê na te ôpahi no te täpü i te mau tumu räau i nià i te aa: te mau tumu räau atoà aore i hotu mai i te mäa maitaì, e täpuhia ia e e hurihia i roto i te auahi.

I faaära  ai o Ioane Päpetito O vau nei, te päpetito nei au ia òutou i te pape ia tupu te tätarahapa, o ia rä, o të haere mai i muri iho ia ù nei, e mana rahi aè tö na i tö ù, e òre e tano ia ù ia tätara i to na tämaa; e päpetito o ia ia òutou i te Värua Maitaì e i te auahi. Tei to na rima ta na tähiri, e tämä mäite o ia i ta na vähi papaìraa tïtona, e haaputu o ia i ta na tïtona i roto i te vairaa tïtona, âreà te ota e tütuì o ia i te reira i te auahi pohe-òre.

Te faaìte nei ia te heheuraa, to te Atua tïtau faahouraa i te taata ia färiu  i nià i to na aroha. O Ioane Päpetito tei faaòhipahia e te Atua, ei faaìteraa i ta na òpuaraa. E faaineineraa atea tei  faanahohia e te Atua, o ta Ìtaia  i tohu, e reo te faaroohia i te tiàororaa i te mëtëpara, e haamaitaì te èà, e faatïtïàifaro i to na haereraa. Teie piiraa e täpaò no to te Atua, pärahi tämauraa i pïhaìiho i to na nünaa. Te ànotau i tupu ai teie òhipa i te mëtëpara, e tià ia parauhia, e rave rahi tei faaroo i teie tiàororaa. Teie pupu taata, te feiä ia tei pärahi fatata noa i te mau hinaaro o te Atua. Tei faatupuhia na roto i te mau parau tohu, no rätou e òaòaraa teie, i te ìteraa teie òhipa tei tiaì maorohia.

Te noaa nei ia Ioane Päpetito te puai, i te òhipa ta na e rave nei, to na faanehenehe e au iho- a ia te faanahoraa o te mëtëpara. To na àhu e huruhuru tämera, to na täamu ôpü e ìri puaa, ta na maa, e vïvï, te meri, e te àihere.

E tano ia parauhia e, e parahiraa mäoro to Ioane i te pape ra no Iörïtäna. I to na pii- noa- raa i te mau taata atoà i te tätarahapa. E manuiaraa rahi tei ìtehia, ua manii mai te mau taata e rave rahi.

To Ierutarëma : E faaìteraa ia te pärahi noa nei rätou i roto i te ineineraa. No te haereraa mai te Tamaiti a te Atua, te tumu no te päpetitoraa auahi, e te Värua Maitaì.

To Iutea : Tei faaea mata ara noa, i nià i te mau parau fäfau a te Atua. E haere mai hoê, e mana rahi to na e òre roa e tià i te mau taata mana o te fenua e tià e tatara i te tämaa i to na âvae.

Te pae Iörïtäna : E täpaò faaìte ia, aita teie parau i vai noa i roto i te hoê tuhaa no te nünaa, ua parare ra i te mau vahi atoà, mai ta tätou e faaroo nei i teie mahana ua naeà- atoà – hia tätou i teie piiraa.

Te Mau Färitea : Ua tae teie reo to Ioane ia rätou ra e, e tätarahapa. Mau faatere teie no te faaroo Àti Iuta, Tei tiàturi e o rätou anaè teie e mau nei i te parau tià a te Atua. E te ìte nei rätou i roto i te òhipa ta Ioane e rave ra te ora a te Atua.

Te Mau Tätutea : E âmaa faaroo  Àti Iuta  teie, tei òre i tuàti i te mau faanahoraa a te mau Färitea. O rätou atoà tei faaroo i teie reo to Ioane e tätarahapa te fatata mai ra te patireia o te Atua. O rätou atoà teie e ìte nei te mana o te Atua i roto i te òhipa ta Ioane e rave nei.

Te faaìteraa manaò a Ioane.

I  mua i teie mau pupu taata, e faaìte o Ioane i to na manaò ei hiòraa i to rätou huru. Te mau parau ta Ioane e faahiti, eita ia no te haaparuparuraa ia rätou, no te faaìte ra ia rätou e, e pohe mau a rätou ia òre ia färiu i nià i te Atua. Oia hoì, eita te tino anaè te pohe, te faaroo atoà ra. I te mea, eita te tino e ora noa aita e faaroo, e òre atoà te faaroo e ora noa aita e tino. Ia faaroo anaè tätou i te mau manaò o Ioane, mea teimaha mau.

E te Mau fanaù ehitena e, Te auraa o teie parau e te mau fanaù òfi taèro e ua tià roa ia Ioane i te faaìte i teie hohoà parau. Aita ra ta tätou parau e faaìte nei te ôtoheraa teie mau taata i muri. Aita atoà ra e faaìtehia nei ua färii teie mau taata. Te mea ra e hinaarohia ra ia tätarahapa.

E tià i te Atua ia faatupu i te mau tamarii a Âperahäma mai roto mai i te ôfaì, To rätou manaòraa ra, o Âperahäma to rätou metua ra, ua tiàma ia rätou i mua i te Atua. No rätou atoà teie parau no te tätarahapa. Eita no te hoê pae noa taata. No te mau taata atoà ra tei ìte i te mana o te Atua i roto ia na.

Te vai nei hoì te ôpahi i nià i te tumu, e hohoà teie no te haaväraa a te Atua. Tei òre i tätarahapa ra e tapu- roa- hia, eita e tïtau faahouhia. Teie ra huru eita e horoà mai i te huero maitaì.. E hurihia ia, i roto i te auahi tei haapohe, âreà tei tätarahapa no te auahi ia tei tama e tei faaora.

Teie mau manaò ta Ioane e faahiti nei, e mau parau ia tei faaära i te feiä e tïtau nei i te ora a te Atua. Te horoà faahou nei o Ioane ia rätou i te hoo- faahou- raa mai ia rätou iho na roto i te tätarahapa. E teie òhipa e farerei rätou te reira i roto i te Päpetitoraa. Te Päpetitoraa tei tama, ei faahoìraa i pïhaìiho i te Atua, tei aroha. Eiaha ra tätou ia manaò e, te tiàvaru nei o Ioane teie mau taata, te färii nei ra o ia ma te faaìte i ta na òhipa.

Te òhipa a Ioane.

O vau nei te Päpetito, i te pape ia tätarahapa.

Te haapäpü nei o Ioane ta na òhipa i mua i te taata, e te tumu o ia i haere ai i te mëtëpara. Te hinaaro nei o Ioane na roto i teie raveà ta na e faanaho nei, ia ìtehia  te pupu taata tei tätarahapa, e pupu taata tei ora. Ua manuia  o Ioane i teie faanahoraa, ua tià ia na i te päpetito tei tätarahapa. E tià ia parauhia e, ua fänau te färereiraa a te Atua i te taata na roto i te päpetitoraa. Te haapäpü atoà ra o Ioane ta na tuhaa,  te vai ra te haere mai ra, e te vai atoà ra, aita e färii nei i teie huru òhipa.

E mana rahi to na i to ù, e òre au, e au ia hopoi i to na tämaa, e päpetito o ia i te taata i te Värua e te auahi.

Te ìte nei o Ioane i ù nei i to na faufaa òre, i mua i te mana no tei haere mai e faatiàma i te mau taata atoà tei ìte i to rätou tïtauraahia. Ma te faaìte i ta na òhipa e, e Päpetito i te Värua Maitaì, e te auahi. Oia hoì, te faahoì faahouraa i te Värua ta te Atua i tuu na i roto i te taata te taime o ia a hämani ai i te taata. E Värua Maitaì ta te Atua i tuu na i roto i te taata, i te taime ra a hara ai te taata i reira to na ätearaa i te Atua. Te horoà faahou nei ra te Atua i te taata i te hoê raveà no te hoo faahou mai ia na, na roto i te fäîraa hara. O teie ia päpetitoraa ta Ietu e haere mai nei e faatià. Te auahi no te faaàma ia te parau no te hau o te Atua, tei tama i te viivii, àreà ra te pape ra no te horoi i te hara a tei tätarahapa. Ua  färii anaè tätou mai teie te huru, te ìte ra ia tätou i te tiàraa Metua o te Atua tei faaòre i ta tätou mau hara.

Tei ta na rima te tahirihiri no te tama, e haaputu o ia i te tïtona i to na vairaa e te ota e tutuìhia i te auahi pohe òre.

Teie hohoà ei faaìteraa ia, i te haaväraa a te Atua, e o te Atua anaè te tià i roto i teie haaväraa. E i teie vahi e faataahia ai tei tätarahapa e tei òre i tätarahapa. Tei tätarahapa ra e riro ia ei mau tamarii na te Atua, tei òre ra e riro ia te auahi, eiaha ei tämaraa, ei tinairaa ra i te taata tei faatea i te Atua.

Ei manaò hiò âmui.

Te färereiraa i roto i te Päpetitoraa, te faatupu nei ia te parau, no te tätarahapa, te fäîraa hara, te haaväraa, e te Varua Maitaì. To na auraa ra ua farerei anaè tätou i teie mau parau, farerei atoà ia tätou i te Atua, tei òre a i ìte atu ra te tïtauhia nei ia rätou, ia faatupu i te auraroraa i te Atua.

Terai or. Faatura.