Overblog Suivre ce blog
Editer l'article Administration Créer mon blog
4 novembre 2016 5 04 /11 /novembre /2016 22:09

TE FENUA, TE TÏTEÀMATA O TE ÎTE

(Ìtaia 5,12)

Te tïteàmata, te mea ia e tauturu i te taata i hiòraa e te ìteraa ; te àva, te mea ia e haamohimohi i te mata e te feruriraa o te taata ; mai te vai, e tämä atoà te fenua i te taata, e faaâpï hoì i ta na hiòraa ia na iho, e to na parau i roto i te ôpuaraa faaora a te Atua.

 Mai te tïteàmata e tauturu i te taata i te hiòraa e te ìteraa, e tauturu atoà te fenua i te taata i te ìteraa e te färiiraa ia na iho nä mua roa, e tauturu ta na mäa ia na i te ìteraa o vai rä o ia, no te mea e tämä te fenua i te taata, e faaâpï hoì i ta na hiòraa, e ta na märamaramaraa i te oraraa, i te vähi ta te Atua i haapärahi ia na. Te mea ia ta tätou e parau nei e, te hiroà tumu, te hiroà mäòhi. Te varovaro noa ra te reo o Ietu e parau ra ia Nitotemo : Ia òre te taata ia fänau faahou, e òre o ia e ìte i te pätireia o te Atua (Ioane 3, 3). Te mea tei riro ei parau àro no Nitotemo, ua orahia mai e to tätou mau tupuna i roto i te parau no te tanuraa i te püfenua, ia òre ia tupu faahou ia tätou teie fänau-faahou-raa ta te fenua e faaìte noa mai ra, e piri te ùputa o te pätireia, èie ä ia tätou e perehahu noa nei. I nià i teie èà hoìraa to tätou i te Atua ra, e mata na i te rave i te tïteàmata ta tätou i haapae roa, mai te hiroà òre e te färii òre e, o te tumu ia i fifi noa ai to tätou mau haereà atoà, e òre ai hoì tätou e matara i roto i te oraraa.

(Ômuaraa)

1.         E aha te tüàtiraa ta òutou e ìte ra i roto i te reo o te Atua : Ei märamarama, ua märamarama iho ra (Tenete 1, 3) e ta Ietu fäìraa i te tumu o to na tere i te ao nei : I haere mai nei au i te ao nei ia tupu te parau tià ... (Ioane 9, 39).

I to Ietu faaìteraa i te tumu o to na tere i te ao nei, teie to na reo : I haere mai nei au i te ao nei ia tupu te parau tià, ia ìte te feiä ìte òre, e ia riro te feiä ìte ei matapö (Ioane 9, 39). E tano te faufaa o teie parau ia faaäuhia i te faufaa o te òhipa i tupu i te matahurahura o teie nei ao hou to te Atua haamataraa i ta na òhipa. Te haapäpüraa mätamua e horoàhia mai ra e te päpaì tenete, no te faaìte mai ia i te huru o te fenua : Te vai ano noa ra te fenua aore e faufaa, e te pöuri hoì i nià iho i te ìriatai (Tenete 1, 2). E i muri iti noa mai, te reo mai ra o te Atua : Ei märamarama. Ua märamarama iho ra (Tenete 1, 3). I muri aè i te tau o te pö mutu òre, te matara nei te ùputa o te märamarama e te ora. Nä roto ia Ietu, ua riro mai te reira märamarama ei taata, ua hiti mai i roto i te oraraa o te taata e ua faatupu atoà i te mau tauiraa rarahi. E tano tätou e faaäu i te reira i te òhuraa o te âvaè i nià i te mahana, te vähi e tanohia i nià i te ànaànaraa o te mahana, tei roto ia i te märamarama, e te vähi të òre e tano i nià i te ànaànaraa o te mahana, ua moè ia i roto i te pöiri. Te vähi taa ê rä, te mea ia e, e parau nahonaho to te òhuraa o te âvaè i nià i te mahana. Eita te âvaè e tano e faaoti e, i teie hepetoma e faaea o ia i te òhu ; âreà te taata, tei roto to na parau i to na rima, e tiàmäraa to na no te färii e no te òreraa e färii i te märamarama o te parau, e tiàmäraa to na no te hinaaro i te märamarama, aore ra te pöuri. Nä roto rä i teie öraa mai te märamarama i roto i te oraraa o te taata, teie te mau tauiraa e ìtehia atu : te feiä i faaèrehia na i te ìte (Ioane 9, 39), o rätou të ìte i teie nei ; e te feiä i faariro na i te ìte ei faufaa e hau ai rätou i nià i te taata, o rätou të haapöirihia, a riro atu ai mai te matapö ra te huru.

Rururaa   òrometua 2011

Partager cet article

Repost 0
Published by Mapuanga terai - dans Aòraa
commenter cet article

commentaires

pare 05/11/2016 15:53

Mauruuru maitaì Òrometua. J'aime beaucoup te lire. Haaferuriraa atoà

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens