Overblog Suivre ce blog
Editer l'article Administration Créer mon blog
13 octobre 2016 4 13 /10 /octobre /2016 22:16

Tāpati 16 no Àtopa 2016.

Te taata

Taiòraa.

Ruta èv. 18,1-8

Te parapore o te vahine ìvi e te haavä

1 Ua parau atu ra Ietu i te parapore ia rätou, ia tämau mäite rätou i te pure eiaha e fiu, 2 nä ô atu ra e taata haavä tei te hoê ôire, aore o ia i mataù i te Atua, aore hoì i haapaò i te taata. 3 E vahine ìvi hoì tei taua ôire ra, e haere atu ra o ia ia na ra, nä ô atu ra e faatià mai òe ia ù i taù ènemi nei. 4 E aita aè ra o ia i faatià vave mai e muri aè ra, ua nä ô iho ra o ia i te feruri-noa-raa i roto ia na iho Òre noa ä vau i te mataù i te Atua, e te haapaò i te taata nei, 5 no te mea rä te märô mai nei teie nei vahine ìvi ia ù, e faatià atu vau i ta na parau, o te mäniania vau ia na i te haere-pinepine-raa mai. 6 Ua nä ô atu ra te Fatu A haapaò na i te parau a taua haavä parau-tià òre nei. 7 E e òre änei te Atua e faatià mai i to na ra taata mäìtihia, o tei tiàoro atu ia na i te ruì e te ao. E faaroaroa änei o ia i ta rätou parau. 8 E faaìte atu vau ia òutou, e faatià mai ia o ia ia rätou e òre roa e mähia. Ia tae mai rä te Tamaiti a te taata nei, te vai ra änei te faaroo i te fenua nei.

Manaò.

I  te mau fenua Ènata i Fatu Hiva, te vai nei teie manaò te parau no te vai e ànapara i nià i te âivi  tei faaìte te pïnaì ra te ora, te vai e ùputa no te ora, te âivi e ùputa no te àuhune te tumu räau e tupu i nià e parauhia e Nuna no  te faaìte e òre päùra te fenua, e ruperupe, e heeùri, e hotu, èi faaìteraa ua âmui te mau puai o te ora.  

Ia hiò to tätou mau mata i te mau âivi e àua haaàti ra ia Mäòhi Nui, e noaa te tauturu ia tätou i reira te tauturu a te Fatu ia tätou, o tei rähu i te mau raì e te fenua. E ärataì te Fatu i to tätou mau  âvae ia tiàmä i te mau vahi atoà ia tupu  te maitaì e te faatura ia ätea  ia tätou, i te vareà taòto. Te tiaì ia Mäòhi Nui ra, e òre ia e tiàruhi, e òre hoì e taòto, no  te mea te Fatu të ra e tiaì rä, e òre e riro i te mahana i te ao, e òre atoà i te märama i te ruì, te Fatu te ra e tiaì ra i te mau viivii atoà i faatupuhia, na te Fatu e tiaì ia tätou ia ora. Na te Fatu e tiaì i to tätou mau haereraa i te mau vahi atoà ia vai hanahana noa te Atua Nui Tumu Tahi e a muri noa atu.

Te vai nei ta tätou àroraa, e àroraa faatupu ora na roto i te mauhaa o te reo Mäòhi e reo mäìti-òre-hia teie e tätou na te Atua Nui Tumu Tahi i Höroà  mai i te täutururaa a te fenua. Ànanahi e tià mai te ohi âpï ta tätou e tämä ra i teie mahana  i nià i te mau mouà, e te mau tumu haari e tupu tuatau noa ra i te mau fenua Tuamotu mä na te Atua te reira. Ia nä reira tätou i te àro e maitaì te oraraa âmui o to tätou fenua, na te fenua tätou e faaìte i te àveià, no te mea te pïnaì noa ra te reo o te mau âivi ma te mämü òre. Na to tätou mau rima e faaìte te nià e te raro, ei rima faatupu òhipa, faatupu hau te rima teimaha ra ua î  ia i te mau mea faufaa òre. Ia rave tätou i te hoê ôfaì i raro no te hopoi ihoä i nià, e ia pärahi tätou i te vahi parahiraa òre,  e òaòa roa tätou, i te haamäha i te rohirohi i nià i te hoê ôfaì. I nià i te ôfaì ia ìte tätou te vai ra te rima àtau, e te rima àui ia tautau rä te paruparu ra ia te mau ìmiraa raveà ia hanahana te Atua Nui Tumu Tahi.  

Ia mau mäite rä tätou i ta tätou i haapii, tei tuuhia mai ia tätou ra, ua ìte hoì tätou i to tätou ìte i ìte ai tätou ra. E mai to tätou tamarii-rii-raa mai ä to tätou ìte i te mau parau o te fenua i päpaìhia ra, o te parau ia e paari ai tätou e tae noa atu i te ora i te faaroo i te Metia ra ia Ietu. Te mau parau o te fenua i päpaìhia ra, e mea faauruhia mai ia e te Atua, e e mea maitaì ei haapiiraa, ei aòraa, ei faaìteraa hapa, ei faaìte mai i te parau-tià ra,  ia au te taata no te Atua i te mau òhipa maitataì atoà ra. E teie nei, te parau  au ia ta tätou e tuu i mua i te aro o te Atua, e i to te Fatu ra i to Ietu Metia, o të haavä i tei ora ra e tei pohe ia fä mai o ia ia tae i to na ra Pätireia e faaìte hua tätou i te parau, ia onoöno mäite ä, i te hora au e te hora au òre e faaìte hua i te hapa, e aò atu, e faaitoito, mä te faaòromaì rahi, e te haapii-mäite-raa.

I to tätou faarooraa i te parapore o te vahine ìvi e te haavä i taiòhia, ia tämau mäite i te pure eiaha e fiu,  E taata haavä tei te hoê ôire, i te mataù òre i te Atua Nui Tumu Tahi, i haapaò i te taata.  E vahine ìvi to taua ôire ra, tei haere atu e farerei ia faatiàhia o ia i ta na mau ènemi, aita ra i tiàhia. Ua feruri rä teie haavä e faatià, ma te tiàma òre i roto i ta na faaotiraa ua mataù i te mäniania, i te haere-pinepine-raa mai. I te manaò o te Fatu e haavä parau-tià òre teie, ua faaäpiaäpi teie haavä ia na iho i mua i te tiàraa turäma i te taata i te parau tià. Teie haavä, e haavä  mäìtihia e te Atua Nui Tumu Tahi, ta te Atua Nui Tumu Tahi i mäìti ra, o tei tiàoro ia na i te ruì e te ao,  eita e  faaroaroa  i ta rätou parau. Teie te parau a Ietu i te ìrava 8 E faaìte atu vau ia òutou, e faatià mai ia o ia ia rätou e òre roa e mähia. Ia tae mai rä te Tamaiti a te taata nei, te vai ra änei te faaroo i te fenua nei.

E parau teie no te taata ta te Fatu e faaìte nei, te taata e te rähu e ta na tiàturiraa i te faufaa ora o ta na e faanaò ra mai roto mai i te fenua. Te ìte ra tätou e, ia hiòhia te parau o te taata i roto i teie ôpuaraa ta te Atua e te mau parau ta te Atua i parau i nià i ta na Tamaiti, ua hanahana ê na te taata i mua i te Atua, no te mea e taata faaroo ta te Atua i hämani. No te aha  te taata i taataahi noa ai i to na parau i teie mahana. No te aha te taata i manaò ai e, ia faaìno roa o na ia na, i reira o na e ìtehia mai ai ei taata. Ia tävirihia to na hohoà i roto i te âfata teata, no te mea ua täparahi i te taata, ua èiä, e taata o na, ua puta to na hohoà i roto i te âfata teata, tei roto i te veà. Aita. Tei roto ê na rä i te puta ta te Atua i päpaì no te taata, ua nahonaho te parau o te taata. Te reira paha te mea ta tätou e haamanaò i to tätou mau taata e, eiaha, ua hape terä manaò e na te rave-roa-raa i te òhipa e ìtehia ai e te vai ra. Pärahiraa rahi, pärahiraa teitei ta te Atua i faataa no te taata. E tävini no na, tei raro iti noa iho i te mau merahi. Faahei ê na te Atua ia na i te tura e te hanahana. Eie ä te taata e ìmi ra i te tura e te hanahana, ua horoà-ê-hia mai na. Te auraa ra, e ìmiraa faufaa òre ta te taata. E haamanaò rä  ia na, e parau ia na, ia òre e tämau noa i te ìmi i te tahi mea tei horoà-ê-hia mai na e te Atua te faaroo. No reira, eiaha o na e haamäuà i to na taime i te ìmi i te tahi mea tei roaa ê na ia na, e faatupu rä i terä ta te Atua e tiaì ra ia na ia rave, i teie parau a Ietu,  Ia tae mai rä te Tamaiti a te taata nei, te vai ra änei te faaroo i te fenua nei. E inaha, te faufaa a te Atua, ua horoàhia i roto i te rima o te taata. I mua i teie parau, nä ô  na tätou i te hiò, eere te tahi mau peu ta te taata e rave ra, mai te faaârearearaa i to na tino, eere te reira i te faahaparaa. E tano tätou e rave mai ei faahaparaa na te Atua i te taata, te moèraahia ia na to na iho parau, to na reo, to na fenua ia Mäòhi Nui, ta na maa. Ua moèhia i te taata i te hiò i te rahu a te Atua, te òhipa ta na i rave, eere rä te reira anaè. Ia hiò tätou i teie mahana, ua moèhia e te taata to na iho parau, ua haapae te taata i to na iho parau mai te mea eere terä i te faufaa ta te Atua i horoà mai. E tuhaa atoà ta te taata i ô nei, te parau no to na mäòhiraa, te parau no to na fenua, te parau no to na reo, to na hiroà, ta na peu. Te reira mau mea atoà, ua moèhia i te taata, hau roa atu te taata e ora nei i roto i te òhipa o te faaroo, ua moèhia ia na e, te faufaa atoà terä ta te Atua i vaiiho mai na i teie nünaa. Eita e òre, te ora atoà nei tätou i te manaòraa e, mea faufaa òre atoà terä. Aita änei te tahi mau mea e riro nei, mai te faaìnoraa ia na iho, e haamoè nei i to tätou hiroà faaroo, te ìteraa e e faufaa terä ta te Atua i horoà i roto i te rima o te taata. Ua ìno anaè, no te mea aita te taata i täuà. Te reira paha te mea e tano e haaferuri faahou ia tätou i teie mahana, ia òre  ia tütonu noa i nià i te mau mea faufaa òre.

Ia tae mai rä te Tamaiti a te taata nei, te vai ra änei te faaroo i te fenua nei.

 

Ia ora Mäòhi Nui.

 

Teraì òr faatura.

 

(Puta turu,  TE TAATA, TE FENUA E TE ATUA, Turo a RAAPOTO.)

 

 

 

Partager cet article

Repost 0
Published by Mapuanga terai
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens