Overblog Suivre ce blog
Editer l'article Administration Créer mon blog
6 octobre 2016 4 06 /10 /octobre /2016 22:13

Tāpati 9 no Tetepa 2016.

Te Vai

Ruta èv.17, 11-19

Te tämä-raa-hia nä rëpera tino àhuru

11 E taua haereà no na i Ierutarëma ra, i nä Tämäria o ia i te haere, e i nä Tarirea. 12 E tei te tomoraa atu o ia i roto i te hoê ôire ïti, ua färerei mai ra ia na nä rëpera tino àhuru, tià noa mai ra i te ätea ê 13 pii noa mai ra te reo, nä ô mai ra, E te Òrometua, e Ietu e, e aroha mai ia mätou 14 E ia hiò atu ra o ia ia rätou, ua parau atu ra A haere, a faaìte i te mau tahuà ia òutou. E tei to rätou haereà nä te èà tià, faaorahia iho ra rätou. 15 E ia hiò iho ra te hoê o rätou ia na iho, e ua ora, ua hoì mai ra mä te pii hua i te haamaitaìraa i te Atua. 16 Ua tïpapa iho ra i raro i te âvae iho o Ietu, haamaitaì mai ra ia na; no Tämäria taua taata ra. 17 Ua parau atu ra Ietu, nä ô atu ra Eere änei tino àhuru atoà i tämähia nei. Tei hea iho nei rä e tooiva 18 Aore roa te hoê i hoì mai e haamaitaì i te Atua maori rä o teie nei taata ê.19 Ua parau atu ra o ia ia na A tià, a haere i to tere; ua ora òe i to faaroo.

Manaò

Ia faaroo tätou i te mau himene e faaòtohia nei i mau i te Atua Nui Tumu Tahi e mau àrueraa âpï, no te faaìte i te mau mea taa ê tei ravehia e te Atua Nui Tumu Tahi, to na rima àtau e to na rima moà, i ùnaùna ai Mäòhi Nui. I faaìte mai ai te Fatu i te ora, i mua i te mata o te mau Mäòhi, te faaìte-raa-hia te parau-tià no teie faufaa. E aroha teie no te parau tià, te parau mau, e te tura i manaòhia mai ai te mau ùtuafare i Mäòhi Nui nei. I ìtehia ai te ora i te mau hopeà atoà o te mau fenua i Mäòhi Nui nei. Te pïnaì nei teie mau reo i te haamaitaì i te Atua Nui Tumu Tahi e àti noa aè te mau motu, ia hoì mai ma te puroro te reo òaòa, ia ûmere mä te haamaitaì i te himene. A himene i te Fatu mä te tïnura, mä te ùkurere e te reo haamaitaì. Mä te mau mauhaa ùpaùpa, te harururaa i te haamaitaì, i te Fatu. Te haruru nei te tai e to na îraa, te paìpaì nei te mau ànavai i to rätou rima, te ûmere tahi nei te mau mouà. I te aro o te Fatu, te haere mai ra hoì o ia e haavä i te fenua. E haavä o ia, ia Mäòhi Nui ma te parau-tià, e te mau taata mä te piò-òre. Mai teie reo i roto i ta tätou taiòraa no teie mahana i te ìrava 19 Ua parau atu ra o ia ia na A tià, a haere i to tere; ua ora òe i to faaroo.

Te haamanaò mai nei teie mau parau i te mau haapiiraa a Ietu Metia, o tei faatiàhia mai te pohe mai ra, mai ta te Parau Maitaì e faaìte ra. I pohe ai to tätou Fatu te Metia, mai te mea ra e taata rave parau ìno ra aita rä te parau a te Atua i täpeàhia, ua tae roa i te mau vahi atoà. I mau mäite ai tätou i te mau mea atoà no te feiä i mäìtihia ra, ia noaa atoà ia rätou te ora i te Metia ra ia Ietu, mä te ao mure òre ra. Te vai nei teie parau i papaìhia e Pauro i ta na tämaïti i te faaroo ia Timoteo, Timoteo 2 pene 2, i te mau ìrava 11 e tae i te 13, ìrava 11 E parau mau hoì te maa parau nei e Ia pohe tätou e o ia atoà ra, e ora atoà tätou e o ia atoà hoì.12 Ia faaòromaì atoà tätou i te ìno ra, e pätireia atoà to tätou io na ra, ia huna hoì tätou ia na ra, e huna atoà o ia ia tätou 13 òre noa ä tätou i te haapaò i te parau mau, e parau mau ä ta na e òre o ia e tähuna i ta na iho. No te mea e hoì mai ihoä te parau mau mai teie e faahitihia nei i roto i te taiòraa i faaroohia e tätou i te ìrava 16 e te 17 teie taua na parau ra, 16 Ua tïpapa iho ra i raro i te âvae iho o Ietu, haamaitaì mai ra ia na; no Tämäria taua taata ra. 17 Ua parau atu ra Ietu, nä ô atu ra Eere änei tino àhuru atoà i tämähia nei. Tei hea iho nei rä e tooiva.

E au mau teie parau i te tahi òhipa i tupu na i roto i te faaäuraa mätamua te parau no Näamana i te faaìteraa a Te mau Arii 2 i te pene 5, i te mau ìrava 14 e tae i te 17 ìrava 14 Ua haere atu ra o ia e ua hopu atu ra i Iörïtäna e a hitu aè ra hopuraa, ta te taata no te Atua hoì i parau mai ra; riro atu ra to na ìò mai to te tamarii âpï ra mä atu ra o ia.. 15 Ua hoì mai ra o ia e to na atoà ra mau taata i taua taata no te Atua ra, e ua haere iho ra, ua tià mai ra i mua i ta na aro ua nä ô mai ra, Inaha, ua ìte atu ra vau e aore roa e Atua i te ao atoà nei, mäori rä i Ìteraèra nei e teie nei, teie tä ù parau ïti ia òe na, e rave mai òe i te tahi taoà ïti i to tävini nei. 16 Ua parau atu ra rä o ia, Te ora nei te Fatu, tä ù e tià noa i mua i ta na aro, e òre au e rave. Ua märô mai ra o ia e rave aita aè ra rä i tià ia na. 17 Ua parau mai ra Näamana, Eita änei e tià ia òe ia hö-mai-hia mai i to tävini nei te tahi mäa repo, e teiaha ai nä âtini e piti nei, e òre hoì to tävini e hopoi faahou i te tütia-täauahi e te tütia atoà i te mau atua èê mäori rä i te Fatu anaè.

E täipe teie parau no ta tätou parau i teie mahana, te mä o te taata Tämäria i mä i te parau a Ietu, te mä o Näamana, i faaroo i te parau a te tävini o te Atua Nui Tumu Tahi. Raua nei ua faaruè i te mau faaäpiäpiraa no te haafatata e ia tiàturi i te Atua Nui Tumu Tahi. Ua òhipa te tävini o te Atua Nui Tumu Tahi i te vai no te täutururaa ia na ia tupu te ôpuaraa faaora a te Atua Nui Tumu Tahi, te Fatu o te vai o Ietu te Metia o te parau noa ia ua tupu te ora, e te hanahana o te Atua.

Òia mau atu ra teie reo to Ietu i te ìrava 17 Ua parau atu ra Ietu, nä ô atu ra Eere änei tino àhuru atoà i tämähia nei. E mä te parau ta Ietu e faahiti nei no to na faufaa i roto i to tätou oraraa, te parau o te mä ra e päpe ia aore ra e vai, i Mäòhi Nui nei te pape, aore ra te vai, e ö atoà to na parau i roto i te ao o te mau atua. Te vai nei te tahi ânaìraa fetià i nià i te raì tei parauhia e, Te vai ora o Täne, oia te vai àpu vaha a te Atua i te faaìteraa te puta a Teuira Henry i te àpi 365. I roto i te Pïpïria, te iòa mätamua o te Atua ta na i faaìte ia Möte e ia Ìteraèra hoì, teie ia, Te Vai nei au o vau e Vai nei Etoto 3, 14. No te reira faufaa hoê roa ta te vai e mau ra, i haamau ai te Atua i ta na ôpuaraa faaora i nià i te vai. Te märamarama ra ia tätou e, ia parau te Atua e, Te Vai nei au o vau e Vai nei, te faaìte noa atoà ra te vai e, oia mau, te vai mau ra, inaha te faahoì noa ra o ia i te hanahana i te tumu o te hanahana ra. O vai hoì të tano e parau i te parau o te Atua mai te faaroo-òre-hia te hoê reo, o vai të tano e faaìte e, te vai ra te Atua, mai te òre ta na parau e faaroohia mai maori rä, te vai.

E ia òre hoì te taata ia ìte i te faatura e te haapaò i te ôpuaraa a te Atua tei riro te fenua ei tupuraa hanahana, e riro te pape i te täpiri faahou i te ùputa o te ora ta te parau i ìriti. Parau mau, ìno noa ai te fenua i te rave a te taata, te fenua terä e ìno ra ia na, eita rä te Atua na na te parau i horoà i te ora o te fenua e naeàhia i te òhipa a te taata. Eiaha rä ia moèhia ia tätou e, te ârue ra, te haamaitaì ra, e te faahanahana ra te mau mea atoà i rahuhia, i te rahi o te Atua, e ia òre te taata ia färii i te haapiiraa e te tïtauraa ta te fenua e faaìte noa ra ia na, e riro te mau mea atoà i rahuhia i te täpeà i te ora ta rätou e horoà tuutuu òre noa ra, e ta te taata e fänaò ra, inaha ei tävini anaè hoì rätou no te Atua ora. Te vähi rä ta tätou e tütonu maitaì, teie ia i te rahuraa te Atua i te raì e te fenua, aita te parau o te pape i faataa-ê-hia i to te raì e te fenua, e no te noaaraa te pape i te faataa, i parauhia ai to te nià e te raro, te tai e te uta. E tano ai tätou e parau e, te raì aore ra te fenua, te vähi ia ta te pape i vaiiho ei pähonoraa i te hinaaro o te Atua. Te auraa, no roto mai ia te raì e te fenua i te pape i te noaaraa mai. Eere änei tino àhuru atoà i tämähia nei.

Èi faaotiraa, a faaroo mai na i teie reo no te taata i tiàturi i te ora a te Atua Nui Tumu Tahi, teie taua reo rä, Ua parau mai ra Näamana, Eita änei e tià ia òe ia hö-mai-hia mai i to tävini nei te tahi mäa repo, e teiaha ai nä âtini e piti nei, e òre hoì to tävini e hopoi faahou i te tütia-täauahi e te tütia atoà i te mau atua èê mäori rä i te Fatu anaè.

Ia ora Mäòhi Nui.

Teraì òr. Faatura.

(Puta turu, TE VAI, ÙPUTA O TE ORA, päpaìhia e Turo à Raapoto Arutai 2011, puta hoohia i te fare puta TE TIÀRAMA a te Ètärëtia Porotetani Mäòhi i Paòfaì.)

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens