Overblog Suivre ce blog
Editer l'article Administration Créer mon blog
28 septembre 2016 3 28 /09 /septembre /2016 23:25

TE TURE A TE ATUA. ( 2 )

Ei tatararaa.

O vau to Atua ra o Iehova, o tei arataì mai ia òe mai te fenua mai ra mai Àifiti mai te ùtuafare i tavini ai ra. Etoto 20, 2.

E aha te auraa no teie parau ?

Teie òmuaraa parau ua riro ia ei haapäpuraa na te Atua i teie nunaa Iteraèra i te òhipa ta na i rave no na. Mai roto mai o Iteraèra i te tîtîraa i Àifiti, mai roto mai i te ìno, te àti e te pohe, e na te Atua rätou i faaora mai .... e i ìriti mai ia na i te vahi i reira rätou i te öraa i roto i te tahi mau faanahoraa tià òre, no te oraraa o te taata. Teie nei faaoraraa e ère ia na te tahi atu Atua ê, e ère na te taata, na te Tumu Nui ra. E no te mea ua ora mai taua nunaa ra, te titau nei te Atua i te hoê òhipa ia Iteraèra o teie e riro ei pahonoraa na na i te Atua no te òhipa i ravehia e te Atua i nià iho ia na maori ra, ia haapaò rätou i ta na mau Ture, e ia haamori hoì ia na e tià ai. Ia òre taua òhipa ra ia moèhia e rätou i to na oraraa. Ua rave te Atua teie faanahoraa ia nunaahia O ia e ia ìtehia to na taa – ê – raa i te tahi atu mau atua. I te mea ia faaea noa o Iteraèra i Àifiti, e riro roa teie nunaa ei taata no teie aià, e aita atu ra e nunaa to te Atua. I faataa ai te Atua i teie nunaa i rapae i te tîtîraa, ia riro ia rätou ei nunaa no na.

I parau ai te Atua e, O VAU, teie parau te faaara nei ia i te teiteiraa no te iòa o te Atua i te mea eita O ia i te Atua, te faafanauhia, ua faafanau ra O ia i te mau ora atoà. Eita ia O ia e tano ia faaauhia i te mau natura, eita O ia e tano ia faaauhia i te mau hamaniraa manaò e vai i roto i te tiàturiraa o te taata. Eita atoà e tano ia faaauhia i te tahi atu mau puna ora e vai nei i roto i teie ao, e puna ra O ia tei horoà i roto i te taata i te puai no te maramarama te tià e arataì i te vahi no te maitaì e te hau. Ia faahiti te Atua i teie parau O VAU, e haafaufaaraa ia i to na tauaro tei parauhia ÒE. Aita anaè te VAU, eita e tupu te ÒE to na auraa ra no te taata te Atua i horoà mai ai teie TURE, ia noaa i te taata ia parahi fatata noa i pihaiiho i te Atua, e to na reo. E i roto i te mau TURE A TE ATUA, te ìte nei tätou i te hoì – noa - raa mai teie taò te ÒE, o te haapäpuraa teie to tätou tiàraa e te Atua, i roto i tera manaò e aita te Atua e hinaaro nei e faatea ia na ia tätou. Eita teie i te hoê parau faaau, e parau ra teie tei horoà i te taata i to na taa – ê – raa i te tahi atu mau rahu a te Atua. Oia hoì to na taa – ê – raa, i te mau tumu raau, te fenua, te miti e te pape, te mau puaa, te mau ià, te mahana, te àvaè, te mau fetià, e te vai atu ra.

To Atua ra o Iehova.

Teie na parau e piti e haapäpuraa teie no te aueue òre o te Atua e haamorihia nei e te taata. I rahu ai O ia i te vahi e tano i te taata ei faaìte noa – raa i to na here e to na aroha i te taata ta na i miri i to na rima. E Atua O ia, tei faaìte i teie parau e TE VAI NEI AU, O VAU E VAI NEI, e ìrava parau teie e faahiti nei i te ORA tei òre te tahi atu atua ê, e tià e horoà i te taata, mau ti ra teie anaè i te mea aita O IA e faataa – ê nei i te taata ia na, na roto i teie parau e O VAU, tei pihaiiho noa ai te ÒE i te faarooraa. E reo Metua teie no te Atua i nià i ta na mau tamarii, tei parahi noa na i roto i te tiaìraa i te tamahanahana no te hoê ora àpi i roto i te tiàturiraa. Na teie faanahoraa e tuu i te reni i te mau òhipa e tupu ra i nià i te vahi i reira e ìtehia ai te hanahana o te Atua, o ta na i rahu. No reira e Atua teie tei hinaaro noa i te maitaì o te taata, eita ra O ia e vaiiho noa i te taata ia faatîtîhia e te tahi atu mau taata. O ta na ia i parau e,

O tei arataì mai ia òe mai te fenua mai ra mai Àifiti.

No te faariro ia ia Iteraèra ei tavini, e ei nunaa no na i roto i teie nei ao. I rave ai te Atua i teie huru òhipa no te oraraa ia i orahia e teie nunaa i Àifiti, te puai i te pae totiare, te pae no te faaroo, e tae noa atu i te pae no te tapihooraa. O teie te tahi mau tumu i tià ai i te Atua ia rave i teie mau faanahoraa ia ö to na nunaa i roto i te fafauraa àpi i òpuahia no na. Te titauhia ra i te nunaa o te Atua oia hoì, te faatura ma te haapaò i te mau faaueraa ta TURE e haapii nei ia rätou. Ia noaa te paari o te faaroo ia rätou, ei ia noaa i te Atua i te hoê nunaa tei tiàturi i ta na mau titauraa. Oia tei faataa i te nunaa o te Atua, i te haapäpuraa i to rätou ora tamauraa i te faanahoraa e horoàhia nei e te Atua. O ta te Atua e haamanaò nei na roto i teie parau, O tei arataì mai ia òe mai te fenua mai ra mai Àifiti.

Mai te ùtuafare i tavini ai ra.

Teie haapäpuraa te faaìte noa ra ia i te mau hinaaro o te Atua, i ta na faatiàmaraa i te mau tamarii Iteraèra i roto i te faanahoraa no te hoê nunaa tei na roto mai i te faatîtîraa. E tae noa atu i roto i te oraraa faaroo, no te tuuraa i to na nunaa ia faaterehia i te parau mau no te TURE. I te mea te parau mau mai roto mai ia i te Atua, o te Varua te reira o te TURE, tei horoà i te taata i te hohonuraa no te aroha e te here tei horoàhia i te feia tei tuu i to rätou tiàturi i reira. Te òhipa e tupu nei o te mau fafauraa parau ia, i ravehia e te Atua i nia, ia Aperahama, ia Itaata, e ia Iatopa, i to te nunaa o te Atua oraraa i te fenua tei òre tapuhia no rätou. Teie ra ua hau atu ia te òhipa i ravehia e te Atua i to na nunaa, i te tamaraa ia rätou i te viivii o Àifiti e te arataìraa ia rätou i te vahi o te tapu. Ia färii te nunaa o te Atua i teie mau faaueraa àpi o to na e haapaò, mai te hoê àveià ra te huru tei arataì ia na i te fäìraa i te faaroo i mua i te Atua, e te mau taata atoà. O teie te huru taviniraa àpi o ta te Atua e horoà nei i to na nunaa, ia ìtehia to na taa – ê – raa i te tahi atu mau atua.

Terai ora.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens