Overblog Suivre ce blog
Editer l'article Administration Créer mon blog
29 septembre 2016 4 29 /09 /septembre /2016 22:02

Tāpati 2 no Àtopa 2016.

Te Huero

ÔROÀ

Ruta èv. 17,5-10

Te faaroo

5 Ua parau mai ra te mau âpotetoro ra i te Fatu E faarahi mai i to mätou faaroo. 6 Ua parau atu ra te Fatu Ahiri e faaroo to òutou e mai te huero tïnapi noa iho ä te rahi, e parau noa atu ia òutou i teie nei tütämino Ia mahiti tumu òe, e ia tänuhia òe i raro i te tai, na na ia e faaroo mai.

Te täviniraa

7 O vai to òutou e tävini to na te ârote ra, e te faaàmu ra i te mämoe, e hoì mai ra mai roto mai i te âua, e parau vave atu a haere òe, a taòto i te àmuraa mäa 8 E òre änei e parau atu e a faanahonaho i te àmuraa mäa na ù, a tätua na ia òe, a rave mai i te mäa ia àmu vau e ia ïnu hoì e i muri aè, a àmu ai òe e a ïnu ai hoì 9 E parau änei o ia, e hämani maitaì hau to taua tävini ra ia na, o ia i rave i tei faauehia atu ia na ra te manaò nei au, e òre. 10 Oia atoà òutou, ia ravehia e òutou te mau mea atoà i faauehia atu ia òutou na, e nä ô òutou Aita a mätou faufaa, a to mau tävini nei i hopoi atu o tei au mau ia mätou ra, o ta mätou ia i rave iho nei, tirä ra.

Manaò.

Ei faahanahana i to tätou Fatu te Atua Nui Tumu tahi, tätou e himene i te Fatu, e himene hua tätou ia Mäòhi Nui e ora ai tätou. E haere tätou i mua i ta na aro mä te haamaitaì, mä te haehaa a himene ai i te ùnaùna o to tätou fenua. E Atua Nui Tahi i mau i te ruperupe o Mäòhi Nui atoà ra. Tei mau ra ta na rima te tumu o te fenua, e te teiteiraa o te mau mouà ra. Na na o Mona Nui o Hiva, Na na hoì i Rähu, e na ta na rima i hämani i te repo marô te Nünaa Mäòhi. Ua haere mai tätou, e haamori mä te piò i raro, e tuu i to tätou tiàturiraa i te aro o tei hämani ia tätou nei, te Atua Nui Tumu Tahi. O ia hoì to tätou Atua Nui Tumu Tahi, o tätou hoì tei herehia ia hanahana o Mäòhi Nui i ärataìhia e ta na rima. Ia tià ia tätou, i teie mahana i te faaroo i to na reo ia òre e faaètaèta i to tätou âau i te pii a te Fenua, i faaroo noa na tätou i teie reo mai roto mai ä i te püfenua o to tätou metua vahine.

No te mea ua pïtaa te tahi vahi i roto ia tätou te tïtauraa ia, ia vai te puai i roto ia tätou noa atu te mäoro to tätou tiàororaa, ma te òre e rohirohi i te faaroo i te mau hinaaro o te Atua Nui Tumu Tahi ma te pii-hua-raa ia ora Mäòhi Nui. Te faaìte-noa-hia nei tätou i te maitaì, e ia hiò hoì tätou i te òaòa e vai ra e haru i te aroha ia òre tätou ia faatupu i te märô e te tamaì.

E faaroo tätou i teie nei te tahi pähonoraa a te Atua i tei rave i te parau-tià e te ìno, i te faaìteraa a te perofeta Hapatuta i te pene 2 i te mau ìrava 2 e tae i te 4 ìrava 2 Ua parau mai ra te Fatu ia ù, nä ô mai ra, A päpaì na i te ôrama ia ìteä-noa-hia i nià i te mau päpaìraa ra, ia horo noa te taata ia taiò ra. 3 No te taime i haapaòhia ra taua ôrama nei, ia tae rä i te hopeà ra e faaìte päpü mai ai e òre e haavare e ia mäoro iti noa, e tiaì atu ä e tae mau mai ia, e òre e haamäoro hua. 4 Ìnaha, o te teòteò ra aore ia i tià to na âau i roto ia na ra; o tei tiàhia ra i te faaroo ra, e ora ia.

E teie nei, e parau ai ia Mäòhi Nui ia manaò e faaàraàra i te òrià mata i roto i te faufaa horoà-noa-hia mai e te Atua i te tuuraa rima i nià i te nünaa Mäòhi. Eere hoì i te âau taiä ta te Atua i horoà mai no tätou, i te âau itoito rä, e te aroha, e te haapaò maitaì. Eiaha e haamä i te parau o to tätou Fatu, e eiaha atoà e haamä i to na taata i täpeàhia. E färii atoà rä ia ûàna te Èvaneria a to tätou Fatu, i te itoito a te Atua ra, o tei faaora ia tätou nei, e ua parau ia tätou i te parauraa moà ra, eiaha no ta tätou òhipa, no to na iho rä hinaaro, e te aroha mau i horoàhia mai i te Metia ra ia Ietu no tätou, hou teie nei ao ra. Ua faaìte-hua-hia mai rä i teie nei i te färaa mai o to tätou ora o Ietu Metia, o tei faaòre i te pohe nei, e ua faaìte päpü mai i te ora mure òre i te Èvaneria nei ra, i haapaòhia ai au nei ei aò, e ei âpotetoro, e ei òrometua na te Ètene ra. I roohia mai ai tätou i taua mau mea ìino aita rä tätou i haamä ua ìte hoì tätou, tätou i faaroo e tià ia na ia tiaì ia tätou, e tae noa atu i taua mahana rahi ra. E täpeà maitaì i te hiroà parau mau ta tätou i ìte, mä te faaroo e te hinaaro i te Metia ra ia Ietu. Taua parau maitaì i tuuhia mai ra, i te Värua Maitaì e pärahi ra i roto ia tätou nei ra, te iho e te hiroà Mäòhi.

Ta te Fatu ia e parau nei ia tätou i teie mahana i te päpaìraa a Ruta èv i te pene 17 i te ìrava 6 Ua parau atu ra te Fatu Ahiri e faaroo to òutou e mai te huero tïnapi noa iho ä te rahi, e parau noa atu ia òutou i teie nei tütämino Ia mahiti tumu òe, e ia tänuhia òe i raro i te tai, na na ia e faaroo mai.

I te ôpaniraa i te Âpooraa Rahi Âmui i teie mätahiti ua tänu faahou tätou i te Huero, ia vai tupu noa te itoito o te nünaa Mäòhi, i Mäòhi Nui nei i te faaìteraa parau i päpä te fëruriraa pipiria a te ÂRÂ

FAATIÀMÄHIA NO TE PARAU TIÀ E TE TURA

Ia au i te faaìteraa a te puta

Òhipa 3, 6 E tià mai òe i nià e a haere i te iòa o Ietu i Nätareta.

I muri aè to te Tumu Nui hämaniraa i te taata nä roto i te ìpöpöraa i te repo fenua, ua haapüaì o ia i to na aho ora i riro mai ai o ia ei taata ora, no te haapäpü mai i To Na hoêraa e te taata. To na hinaaro tumu, ia vai noa mai te mä, te tià e te tura o te taata, a tau a hiti noa atu. I te taata hapepa tei ani täparu noa i te taoà i te mau mahana atoà i mua i te Fare Pure, teie te reo faaora o Pëtero : « A tià e i nià e a haere i te iòa o Ietu i Nätareta ». E piti tau püai e türaì nei i teie taata ia faaruè i te vähi i pärahihia e ana. A tahi, te iòa o Ietu, te parau a te Tumu Nui i riro mai ei taata. A piti, te iòa o Nätareta te parau ä ia a te Tumu Nui i riro mai ei fenua. Na te Atua e na te fenua e faatiàma nei i te taata tei topa na i raro aè i te mau faatîtîraa e rave rahi. No te faarooraa e te färiiraa a te taata i te parau a te Tumu Nui i òre roa ai o ia e pärahi faahou, e nee faahou, ani täparu noa ai i te taoà i te mau taata atoà i pahaere nä mua ia na. Ua tià o ia i nià, ua mä, ua òre te täparu, ua ôuàuà mä te òaòa. Te haamanaò noa mai nei te faatiàma, i to te taata taeraa i roto i to na tiàmäraa. Ua ìritihia te mau mea atoà e haafifi ra ia na, i te ìteraa i te Atua e ta na ôpuaraa faaora no na. Te taata tiàmä, eere ia i te taata faatupu i te parau ìno, te òhipa tano òre, e te faatîtî, no te faatupu rä i te òhipa tià, te tano e te âfaro. E taata o tei faariro i te parau-tià e te tura, ei taìara no to na oraraa. Te maitaì, te hau e te òaòa o te täuaro, te òhipa tumu ia a te taata tiàmä. Na te Here o te Tumu Nui e to te fenua i tähei i teie taata i te tura e te hanahana. Nä roto i te tura e te parau-tià, ua ôuàuà te taata hapepa mä te tiàmä i mua i te nahoà taata, no te haamaitaì i te Atua, te Tumu Nui o te tiàmäraa. Ua türama mau teie parau i te mau fëruriraa e te mau òhipa a te ÂRÂ i teie hepetoma, tei haamanaò noa mai ra ia täua nä mua roa, e te Ètärëtia Porotetani Mäòhi, i to täua tiàraa Tiaì mata ara i nià i te nünaa, i riro ai täua ei tävini no na. Ia ìte e ia färii faahou täua e te nünaa Mäòhi i te tiàmäraa ta te Atua i faatupu no täua, ia òre täua ia riro faahou, ei òvere e ei täparu i o täua iho. E to te huifaaroo Porotetani Mäòhi, na teie atoà tumu parau : « Faatiàmahia no te parau-tià e te tura », e arataì i ta tätou ôroà haamanaòraa i te pae-hänere-raa o te mätahiti to te mau tävini faahoìraa i te haereà o te nünaa, nä nià i te èà o te märamarama o te parau a te Atua, ia tupu te faatiàmaraa e te ora hope o te taata.

Terereatau

Hoê mätahiti i teie nei, i muri aè te tomoraahia te Âua Pipi âpï ia Terereatau i Hurepiti Tahaa. Fenua heeuri e te maitaì no te faaineine i te mau toa a te Atua. Mauruüru e te nünaa, tei tautoo itoito mai no te paturaa i ta tätou Âua pipi âpï. Te haamauruüru maitaì nei te Âpooraa Rahi Âmui, to te Tuhaa 4, tei färii metua mai i te roaraa no teie mätahiti mätamua, te oraraa o te mau ùtuafare, te haapiiraa i te âua e te faaòhiparaa i roto i te mau Paroita i te mau pipi Òrometua e to rätou mau ùtuafare e te mau ùtuafare òrometua haapii. E haamata te Faaineineraa i te mau pïahi e faaö atu i te Âua i teie âvaè Tetepa 2016. Te hinaaro nei te Âpooraa Rahi Âmui i te mau Òrometua, te mau Âpooraa Tiàtono, te mau Fenua e te mau Tuhaa, tei färii e tei tauturu i teie täpura òhipa.

Te fare pure Àmarotetoa i Hurepiti Tahaa

Àmarotetoa, e vähi pureraa, e vähi atoà rä no te faaineine e faatoa i te taata i roto i te ìte, te paari e te faaroo. Ua tae i te tau e faatuàti te haapiiraa no te faaroo e te ìte. Ia noaa te reira paari i ta tätou mau tamarii i mua i te huru tupuraa o te tau. Àmarotetoa, e vähi âpooraa atoà, i reira te Ètärëtia e feruri ai, e rave ai i te mau faaotiraa no te arataì i to na oraraa e te oraraa o te nünaa.

E òaòa tätou i te mea na tätou i tuu âmui teie Huero i roto i te ôpü o te fenua i Mäòhi Nui nei.

Ia ora o Mäòhi Nui.

Teraì òr Faatura.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens