Overblog Suivre ce blog
Editer l'article Administration Créer mon blog
24 août 2016 3 24 /08 /août /2016 22:12

Tāpati 28 no Âtete 2016.

Te tiàfaahouraa o te feiä parau-tià ra.

Taiòraa.

Ruta èv.14, 1-14

Te faaora-raa-hia te hoê taata i pohehia i te höpue (maì faaî)

1 E tae aè ra i te hoê täpati, haere atu ra o ia i roto i te fare o te hoê Färitea taata mana e àmu i te mäa, te hiòpoà mäite mai ra rätou ia na. 2 E inaha, tei mua i ta na aro te hoê taata i pohe i te höpue. 3 Ua parau atu ra Ietu i te mau haapii-ture e te mau Färitea, nä ô atu ra. E faaorahia änei te maì i te täpati. 4 Aita rä rätou i parau mai, ua rave atu ra o ia i te rima o taua taata ra, faaora atu ra, e tuu noa atu ra ia haere na. 5 Ua parau faahou atu ra o ia ia rätou, nä ô atu ra, O vai to òutou e òre e ùme mai i nià i ta na âtini e ta na puaatoro ia maìri i roto i te âpoo i te mahana täpati. 6 Aita atu ra e tià ia rätou ia mötoì mai i taua parau ra.

Te mäìtiraa i te pärahiraa

7 E ia hiò atu o ia i taua mau manihini ra i te rü ia noaa te vähi teitei i te àmuraa mäa ra, ua parau atu ra o ia i teie nei parapore, nä ô atu ra 8 Ia parauhia mai òe e haere i te ôroà faaipoiporaa, eiaha e haere i te vähi teitei i te àmuraa mäa ra, o te parau-atoà-hia te hoê taata teitei atu 9 o te haere atu hoì taua taata i parau ia òrua ra, o te parau atu ia òe e, A tuu mai i tënä na vähi i teie nei taata, o te haere haamä noa atu hoì òe i te vähi haèhaa. 10 Ia parauhia rä òe ra, e haere noa atu i te vähi haèhaa, e ia tae mai tei parau ia òe ra, ia nä ô mai o ia ia òe e E hoa ìno, a haere atu òe i nià atu. Tura atu ra òe i reira i mua i te aro o taua feiä atoà i te àmuraa mäa ra. 11 O tei faateitei hoì ia na iho ra, e faahaèhaahia ia; e o tei faahaèhaa ia na iho ra, e faateiteihia ia. 12 Ua parau atu ra o ia i taua taata i parau mai ia na ra. Ia faatupu òe i te àmuraa mäa avatea e te àmuraa ahiahi, eiaha e parau atu i to mau hoa, e to mau taeaè, e to fëtii e te feiä mana taata-tupu ra; o te parau atoà mai hoì rätou ia òe, o te tähoo mai rätou ia òe. 13 Ia faatupu rä òe i te ôroà àmuraa mäa, o te taata rii të tii atu, te anapero, te piriòì, e te matapö. 14 E e ao ia to òe i reira aita hoì a rätou ia faautuà mai ia òe, e utuàhia mai hoì òe ia tae i te tiàfaahouraa o te feiä parau-tià ra.

Manaò

Te faaìte nei te Taramo 68 Ia tià mai te Atua, e ia haapurara i to na mau ènemi i te feiä i riri ia na ra, e maùe ê atu ia i mua i to na mata. E pee rätou mai te auauahi ra, mai te täpau e tahe i te auahi ra, ia nä reira to te paieti-òre pohe i te aro o te Atua. Ia òaòa rä te feiä parau-tià e ia ôuàuà noa i te aro o te Atua, e ia rahi to rätou òaòa, ia himene i te Atua, i te himene haamaitaì i to na iòa, e faateitei te mau rähau i te Fatu i to na iòa. Te Atua te metua o te mau ôtare, e te haavä o te mau ìvi, o te Atua i to na ra pärahiraa moà. Na te Atua e tuu i te taata ia pärahi i to na ra ùtuafare, e tei täpeàhia i te fifi âuri ra, na na ia e tätara. Te Atua tei haere nä mua i te mau taata, ei reira te oraraa e maitaì ai. E âueue te fenua, e tärapape hoì te mau raì i te puai o te Atua, te Atua o te mau nünaa atoà. E manii mai te ua rahi, e te mau tufaa rohirohi ra, e turuhia e te Atua. E pärahi te pupu taata i reira, no te hämani maitaì i faanahonahohia e te Atua, i te mau taata rii rä. E tuu mai ra te Fatu i te parau, e pupu rahi te feiä i faaìtehia. Te mau arii te mau nuu, e maùe, te mau fëtii i te ùtuafare ra, te tufa ra i te taoà pau. To rätou vahi taòtoraa i te pae auahi. E riro rätou mai te pererau ûupa i täpoìhia i te ârio, e tei faaìravarava-haere-hia i te àuro ra. E purara ra taua mau arii ra i te Püaihope i reira ra, e riro ia i te ùoùo mai te mau äta. E au te mouà o te Atua i te mouà tei tuu te taata paieti i roto te tiàma. Te feìihia nei, te Atua i hinaaro e haapärahi i to nünaa i te vahi teitei e a muri noa atu. Ia haamaitaìhia te Fatu, o tei tauturu mai ia tätou i tërä mahana, i tërä mahana o taua Atua nei to tätou ora. To tätou nei Atua, e Atua ia e ora ai tätou i te mau pohe nei. E täìri te Atua i te upoo o to na mau ènemi, e te tupuaì upoo o te feiä e mau märô i ta rätou hara. E arataì mai te Atua ia tätou mai te vahi ano mai i roto i te ora. Te mau haereà o te Atua, te hiòhia nei e te taata te haereà o tätou e te Atua, to tätou arii i te vähi moà ra. I mua te mau himene, muri iho te feiä i faaòto i te mau mauhaa ùpaùpa ra. E haamaitaì i te Atua i roto i te âmuiraa taata âpï ra, e haapäpü te Atua, i ta na i rave ra. Ia aòhia e te Atua te mau taata, ia auraro mäite rätou mä te ârio i te rima e haapurara i te feiä i hinaaro i te tamaì. Te mau pätireia o te ao nei, e himene rätou i te Atua, e himene ei haamaitaì i te Fatu. Te Atua i horo nä nià i te raì teitei tahito ra. Inaha, haruru iho ra ta na reo rahi mai te pätiri ra. E tuu atu i te püai i te Atua ra, tei nià i te nünaa to na mana, e tei te mau raì ra to na püai. Mataùtaù-rahi-hia to òe e te Atua, i to òe vähi moà ra, o te Atua te Fatu O ia tei horoà mai i te itoito e te püai i to na ra mau taata. Ia haamaitaìhia te Atua.

I to tätou faarooraa i teie mau parau te tuu ra te taata i te Atua i te hoê vahi e òre e au i to na tiàraa Metua, i te mea e turäma te Atua i te mau taata na roto i te Aroha e te Here. Te paari o te Atua to na ia tiàraa Metua, ia aò i ta na mau tamarii ia ahi te èà, ia haapaò to na nünaa e noaa te ìte e te ora, o te parau maitaì, i te faaìteraa a te puta Mäteri i te pene 4 i te ìrava3, E tamaiti pöpouhia hoì au e to ù ra metua täne, e te here ôtahi mäite i te mata o to ù ra metua vahine. Te haapii nei te Atua, ia tomo to na hinaaro i roto i te âau e ia haapaòhia ta na parau ia tupu te ora. E tïtau te paari ia noaa, te haapaò maitaì ia noaa atoà eiaha e àramöina, eiaha e färiu-ê i te parau i te vaha. Eiaha e faaruè i te Atua, e tiaì oia, ia hinaaro mäite te taata ia na, nä na òe e faaora. Te paari e tïtau i te maitaì te mau mea atoà e noaa i te taata e tïtau ä te haapaò maitaì. E faateitei te taata i te Atua, e na te Atua e faateitei i te taata, e täuahi te taata i te Atua, e na te Atua e faatura i te taata. I reira te Atua e höroà mai i te täupoo nehenehe no te upoo, e te toröna hanahana ta na e tuu mai i nià i te taata. E faufaa rahi teie ia noaa i te taata te taoà maitaì o te paari. Aore roa e faufaa e tià e faaäpiaäpi i te hinaaro o te Atua ia tupu, Eere hoì na te mouà i tiàiàhia, na te auahi i ura ra, eere hoì i te ata èreere, e te pöuri, e te vero. E te òto pü ra, e te haruru o te parau i ta te feiä i faaroo ra, eiaha roa ia parau e parau-faahou-hia mai ia rätou ra. Aita atu ra hoì i tià ia haamahu i tei faaìtehia e ia faatiàià te hoê puaa i taua mouà ra, e tüìhia ia i te ôfaì, e pätia-pupu-roa-hia ia i te hoto ra. No te mea e mataù rahi tei faaìtehia, e mau parau mataù e te rürütaina. Èita ra na teie mau òhipa riàrià e faaòtohe i te faaoraraa a te Atua ora. I reira e tupu ai te taìrururaa a te Ètärëtia feiä mätahiapo, tei päpaìhia te iòa i te ao ra, e te Atua hoì te haavä i te taata atoà ra, e te mau värua o te feiä parau-tià i haamaitaì-roa-hia ra, e o Ietu hoì i te ärai i te faufaa âpï ra.

Te reo o Ietu i roto i te taiòraa o teie mahana Ruta èv. Pene 14 i te ìrava 14 E e ao ia to òe i reira aita hoì a rätou ia faautuà mai ia òe, e utuàhia mai hoì òe ia tae i te tiàfaahouraa o te feiä parau-tià ra. Ia au i teie reo to Ietu te vai nei ä te tiaìtururaa i nià i te taata faaroo o ta na Ètärëtia, te Ètärëtia a te feiä parau tià. Te horoà nei o Ietu ia tätou i te haapiiraa nehenehe no te taata haehaa e te taata teitei, ma te rü òre i te pärahi i te mau vahi atoà ia tiaì ra i te faanahoraa a te fatu ôroà. E ia faatura i te vahi i reira e pärahi ai, ma te tïtau òre i te vahi teitei, i reira e tiàfaahou ai te feiä parau tià.

Te tiàfaahouraa o te feiä parau-tià ra. E parau teie e horoà nei ia tätou te puai i te tuu i te parau tià i nià i te fäito, ia raa te mau hinaaro o te Atua Nui Tumu Tahi, i te mea te Ètärëtia e pupu taata ia tei piihia no te faatupu i te hau e te faatura.

Te manaò tumu rä i roto i teie parau no te parau tià, te tahi ia mau arataìraa manaò e faanaho ra i te oraraa âmui o te taata, tei ìtehia e tei färiihia e te täatoà, te mea atoà te reira e horoà i to na püai e to na mana. Te auraa, te maitaì o Te tiàfaahouraa o te feiä parau-tià ra, aita to roto i te mau faanahoraa ta na e faataa ra, tei roto rä i te mea ta na e tïtau ra, oia te oraraa maitaì, te òaòa, e te hau no te täatoà. Ta na räveà, te faautuàraa ia i te feiä tei òre i auraro i te mau faanahoraa ta na i haamau, no te mea te taòto rii noa ra i roto i te taata atoà te manaò tävini i te parau tià. Te tanoraa mau, no te tävini parau tià, e eita te mäìtiraa i te huru o te taata. Mai te peu rä te ìmi noa nei te taata i te räveà ruriraa i te parau tià, te ìte-atoà-hia nei te feiä i tiàturihia e, na rätou e ara i te haapaò-mäite-raahia te parau tià, i te täpöraa i te mata i mua i te hara a te feiä taoà, te feiä teitei, âreà te taata rii ra, aita ia e hapa rii iho tei òre i huaìhia i mua i te mata o te taata atoà, ia riro ei hiòraa. Te mea ia te Atua i faaära ai e : Eiaha òe e rave i te taoà täparu, e pö te mata o te feiä mata àra i te taoà täparu, e e piò ê te parau a te feiä parau tià i te reira (Etoto 23, 8). Te auraa, eiaha òe e ìmi i to òe maitaì i nià i te tua o te taata.

Te tiàfaahouraa o te feiä parau-tià ra, ta tätou e parau nei, aita e faanahoraa, aita e faaheporaa e tïtau ra i te taata ia haapaò i te tahi mea, aita hoì e faautuàraa e tiaì ra i te taime e hapa ai te taata, tei nià aè o na i te mau parau atoà i päpaìhia, e eere hoì no te mea i päpaìhia i mana ai. E roaa ia na te ìte i te reira, ia hiòpoà mäite o ia i te mau mea e haaàti ra ia na. Rave na tätou i te parau o te aru, e parau tumu na tätou te fäìraa e, nä roto i te fenua, te haapii noa nei te Atua i te taata i te ora, oia hoì te mea maitaì no to na oraraa. Teie te tahi hiòraa no te tupuraa o te reira parau, ua tanu te tahi taata i te meià, e ua hiòpoà o ia e, i te tahi taime, aita ä ta na mäa i paari, te marua iho nei te tari i nià i te repo. Ua täui o ia i te pö tänuraa, i te pae hopeà, ua päpü to na manaò e, ia tanu o ia i ta na mäa i terä aore ra terä pö, terä te òhipa e tupu. E faariro o ia i te mea ta na i ìte ei parau tià, aore ra ei haapiiraa tumu na na, ei arataì ia na i roto i ta na òhipa. Te tahi atu taata, nä roto atoà i te hiòpoà-mäite-raa i te oraraa, ua noaa ia na te faatüàti i te toparaa te tötara e te maröraa te vavai. E faariro atoà te reira taata i te reira täpaò ei mea tià tei tauturu ia na i roto i te oraraa, e ta na e haapaò mäite atu. No te mea ua ìte te taata i te maitaì o teie mau arataìraa tei noaa ia na nä roto i te hiòpoàraa e te faaau-haere-raa i te tupuraa o te òhipa, e faatupu hoì te reira i te òaòa, te maitaì, e te hau i roto i to na oraraa, i haapaò mäite ai o ia i te reira.

Ia ìte mai tätou, eere teie parau no te taata hoê noa. I roto i te hoê pupu taata, te hoê nünaa, aita e maitaì tei ìtehia i te tahi, të òre e ìte-atoà-hia atu i te tahi pae, no reira, ia òre te mea e faatupu i te maitaì o te täatoà ia fifi, e ara te täatoà ia òre te tahi ia riro ei tumu e fifi ai rätou, te auraa ra, te vai ra ia te tahi huru e hinaarohia ra i te taata atoà ia faaìte mai. To te taata tätaì tahi te reira ìteraa e, e tuhaa ta na i roto i te maitaì o te täuaro, e tae noa atu i te täatoà, eiaha no te mea no na rätou i maitaì ai, no to na rä òreraa e rave i te òhipa e fifi ai rätou, ua vai mai te maitaì ei tuhaa na te täatoà. Te vähi âpï ta tätou e täpeà mai i roto i teie manaò, to te taata tätaì tahi ia ìteraa i te faufaa ia maitaì te tahi pae, aore ra ia òre te tahi òhipa ta na e rave atu ia riro ei fifi no rätou, ei faaère hoì ia rätou i te maitaì, te auraa ra, e tuhaa atoà ia ta te taata tätaì tahi i roto i te maitaì o te tahi pae. Eiaha mai te mea e, ta na ia òhipa, te ìmiraa i to rätou maitaì, te ìteraa rä i te hinaaro tià o te taata i te maitaì. Aita faahou tätou i roto i te arataìraa manaò e ìmi ai au i to ù noa maitaì, mai te ara ia òre au ia topa i roto i te faahaparaa. E ia rave noa atu hoì au i te maitaì, eere ia no te hinaaro i te maitaì, no te mataù rä i te faahaparaa, aore ra no te mea aita atu ihoä ta ù e räveà, a tiaì noa atu ai i te taime e tano ai au e haapaò noa ia ù anaè. No te taata i märamarama e i färii, te ìte ra tätou i ô nei i te maitaì o te haapiiraa a te fenua i te taata, i te arataìraa ia na i roto i te ìteraa i te mea maitaì. Aita tätou e haafaufaa òre nei i te itoito e te püai o te taata, ia tae rä te taata i te ìteraa e te färiiraa i te tauturu a te fenua ei tumu rahi no te mau maitaì ta na e fänaò noa nei, e ia faariro hoì i te reira ei taìara no na, aita atu mea e tupu mai i roto i to na âau maoti rä, te mauruüru e te mehara. E hinaaro no te Atua ia ìte te taata i te òaòa, te maitaì, e te hau, aita o reira hapa. Mea maitaì te taata ia ìte e, e tuhaa ta na i roto i te noaaraa ia na, aore ra te èreraa o ia i te mau maitaì ta na e hinaaro ra. Haamanaò noa atoà rä tätou e, te maitaì, eere ia i te parau no te taata hoê noa, e aita hoì te reira i täôtiàhia i nià i te rahi, aore ra te iti te taoà i noaa i te tahi taata i te haaputu, ia na reira anaè te taata faaroo i te haere e tupu, Te tiàfaahouraa o te feiä parau-tià ra,

Ia ora na

Teraì òr faatura.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens