Overblog Suivre ce blog
Editer l'article Administration Créer mon blog
18 août 2016 4 18 /08 /août /2016 20:19

Tāpati 21 no Âtete 2016.

Taiòraa, Ruta èv. 13,22-30

(Mät 7,13-14; 21-23)

Te ùputa

22 Haere atu ra o ia i Ierutarëma nä roto i te mau ôire e te mau ôire rii i te haapii-haere-raa atu. 23 Ua parau mai ra te hoê taata ia na E te Fatu, e ïti änei te ora. 24 Ua parau atu ra o ia ia rätou, E faaitoito hua i te tomo nä te ùputa pirihaò e faaìte atu hoì au ia òutou, e rave rahi te tämata noa i te tomo i reira, e e òre roa e ö.

Fare

25 Ua tià anaè hoì te taata ùtuafare i nià, e ua haamau i te ùputa, e ua tià mai òutou i räpaeàu mai, pätötö mai ai i te ùputa, a nä ô mai ai ra e, E te Fatu, e te Fatu, ìriti aè na ia mätou. E riro o ia i te nä ô mai ia òutou, Aore au i ìte ia òutou e to òutou ra vähi.

26 Ei reira òutou e parau mai ai e, I àmu na hoì mätou e ïnu na hoì i mua i to aro, e i haapii na hoì òe i te mau aroä io mätou ra. 27 E parau atu ä o ia Te parau atu nei au ia òutou, aore au i ìte ia òutou e to òutou na vähi, ia ätea ê atu òutou, e te mau rave parau ìno.

Hiòraa

28 O te òto iho ra e te àuàuraa niho i reira ra, ia hiò òutou ia Âperahäma, e ia Ìtaata, e ia Iatöpa, e te mau perofeta atoà tei roto i te Pätireia o te Atua, e höparahia òutou iho i räpaeàu 29 e tae mai ä to te hitià-o-te-rä, e to te tooà-o-te-rä; to àpatoèrau, e to àpatoà, e e riro ia ei manihini i te Pätireia o te Atua. 30 E inaha, e riro to muri ra no mua, e to mua ra no muri.

Manaò

Te Taramo 117 no teie mahana te parau nei ia e, 1 E haamaitaì i te Fatu, e te mau nünaa e, e faateitei ia na, e te mau taata atoà na. 2 Hämani maitaì rahi to na ia tätou nei, e te parau-mau a te Fatu, e tià ia i te vai-mäite-raa. Hareruia.

I mua i te faufaa o teie na ìrava, e tià ia parauhia e itoito mau to te taata faaroo tiàturi Atua i te faaìte i te rahi no te maitaì o ta na i fänaò mai roto mai i te parau mau a te Fatu. I te ìrava 28 no ta tätou taiòraa te faahiti e toru iòa, Âperahäma, no to na faaroo e to na auraro i te hinaaro o te Atua. I muri mai, te àai ia no ta na tamaiti o Itaata, e ta na mootua tamaroa ia Iatöpa tei pii-atoà-hia ia Ìteraèra, e nä tamarii tamaroa 12 a Iatöpa tei haamau i nä ôpü 12 o Ìteraèra. Ia haafaufaa-atoà-hia rä te parau no te hoê o ta na mau tamarii tamaroa, òia hoì, o Iotëfa, e te mau òhipa tei arataì ia Iatöpa e ta na mau tamarii tamaroa e to rätou mau ùtuafare no te ora i Àifiti ia au te faaìteraa a te Tenete pene 12 ìrava 50.

Oia atoà te mau perofeta tei roto i te Pätireia o te Atua, e höparahia te nünaa tei òre i haapaò i te hinaaro o te Atua i räpaeàu. E ìritihia te ùputa e te fatu fare no teie mau pupu taata, tei riro e nünaa âpï e riro èi manihi i te Patireia o te Atua i te ìrava 29 e tae mai ä to te hitià-o-te-rä, e to te tooà-o-te-rä; to àpatoèrau, e to àpatoà, e riro ia ei manihini i te Pätireia o te Atua. I mua i teie parau ua faaàanohia e Ietu te parau no te nünaa o te Atua, i teie faahitiraa parau o te ao teie e parauhia nei, e te mau nünaa atoà èi faatupuraa i te reo o te Atua Nui Tumu Tahi ia Âperahäma e riro to huaai mai te fetià o te raì, e mai te one tähatai.

Te parau ia i manaòhia mai no teie mahana i te ìrava 29 e tae mai ä to te hitià-o-te-rä, e to te tooà-o-te-rä; to àpatoèrau, e to àpatoà, e riro ia ei manihini i te Pätireia o te Atua.

Teie te haapäpüraa a te Ìtaia pene 66 i te mau ìrava 18 e tae 21 te naò nei teie reo Ua ìte hoì au i ta rätou mau parau e rave, e ta rätou i ôpua ra e riro hoì au i te haaputuputu atoà mai i te mau fenua atoà e te mau reo atoà e haere mai hoì rätou, e ìte rätou i to ù ra hanahana. E tuu atu vau i te täpaò ia rätou e te feiä i ora mai ra, tä ù ia e tono i te mau fenua ra, na fenua roa ra i te feiä aore roa i faaroo i taù iòa, e aore roa i ìte i to ù ra hanahana e nä rätou e faaìte i to ù ra hanahana i roto i te mau êtene. E nä rätou e hopoi i to òutou mau taeaè atoà, no te mau fenua atoà, ei tütia nä te Fatu; nä nià i te mau puaahorofenua, te mau pereoo ra, i taù mouà moà ra ia Ierutarëma, te parau mai ra te Fatu, mai te tamarii a Ìteraèra i hopoi mai i te tütia, i roto i te färii viivii òre, i te fare o te Fatu ra. O to rätou tä ù e rave, ei tahuà, ei âti-Revi, te parau mai ra te Fatu.

Te manaò e faaìtehia ra to te Atua ia aòraa i teie ao, o ta te Fatu e here ra, o ta na ia e aò mai, e papaì ä o ia i te mau tamarii atoà ta na e ìte mai ra. Te aòhia mai ra te ao nei, mai te metua i te tamarii ra ta te Atua e rave. O vai hoì ia tamaiti aore i aòhia e te metua ra, tei òre i aòhia i te aò i te tamarii ra, na te haapaò òre ia, e ère ra i te tamarii mau. E metua hoì to tätou to te tino nei, o tei aò mai ia tätou, e ua faaïti hoì tätou, eiaha ia rahi to tätou auraro i te Metua o te värua nei, e ia ora. I aòhia mai tätou i te reira ra puè mahana aore reà ra, i te hinaaro o te Atua, ia faufaahia tätou, ia noaa ia tätou to na ra maitaì. E òre te aò ra e riro ei mea òaòa i reira ra, e mea òto rä, âreà i muri aè, o te maitaì ia o te parau-tià te tupu i taua aò ra, i te feiä i haamätarohia e i färii. Te faaitoitohia nei tätou e àfaì i to tätou rima i nià, te rima i faatautauhia i raro ra, e faaètaèta i te turi paruparu ra no te haamanina hoì i te mau èà no te mau âvae, ia òre te piriòì ra ia maòì, ia faaorahia rä. Te faaìteraa a Pauro i te Hepera pene 12 i te ìrava 5 E ua moè änei ia òutou te aò i aòhia mai ai òutou mai te mea e, e tamarii ra E taù tamaiti, eiaha òe e haafaufaa òre i te aò a te Fatu nei, eiaha hoì ia pau te aho ia faahapahia mai òe e ana.

29 e tae mai ä to te hitià-o-te-rä, e to te tooà-o-te-rä; to àpatoèrau, e to àpatoà, e riro ia ei manihini i te Pätireia o te Atua.

Teie te huru no te ao i aòhia e te Atua, ia riro ei manihini i to na ra Pätireia. Tei òre i färii ra, te vai nei teie reo to te Fatu fare i roto i ta tätou taiòraa no teie mahana i te ìrava 25 e te 27 Aore au i ìte ia òutou e to òutou ra vähi oia hoì e fenua teie e parauhia ra e te nohoraa, o tätou to Mäòhi Nui ua färii änei tätou i te aò a te Atua, te reo o te fenua, ia riro tätou ei manihi i te Pätireia o te Atua, e aore ia riro o Mäòhi Nui ei Pätireia no te Atua Nui Tumu Tahi.

I roto i te parau faaära a te Âpooraa Rahi Âmui tei tupu i teie mätahiti 2016 i te ôpaniraa i te Täpati 07 no Âtete i Papenoo, te faaärahia ra i te àpi 10 te piti o te tumu parau no te mau faaotiraa.

2-TE TIÀRAA TIAÌ MATAARA

Teie te reo o te Atua i to na tävini ia Ètetiera, « e te Tamaiti a te taata na, a tià hua mai to âvae … » (Ètetiera 2/1), no te tïtau ia na ei tiaì mataara no to na nünaa. No te päpü to na tiàraa i nià i to na fenua, i òre ai o ia e mataù i te amo i ta te Atua faaäraraa i to na nünaa. No te î o to na mata i te ìteraa i te fifi i te ätea ê e te òre i täpö i to na mata i te hapahapa a to na nünaa. No tätou atoà teie parau e te Âpooraa Rahi Âmui, i nià i to òe tiàraa tiaì mataara. Ia î to òe mata i te ìteraa i te mau ôpuaraa a te mau àifenua, i te faaìnoraa i te rahu a te Atua, tei riro ei puna no to òe ora. Ia au i to na tiàraa tiaì mataara, te haapäpü nei te Âpooraa Rahi Âmui i to na manaò pätoì i teie ôpuaraa hötera e ìmiraa moni i roto i te faa no Haapaianoo, te faaitoito nei i te hui faaroo e te nünaa täatoà, ia tià, ia parau mä te tiàmä i to na here, i to na metua vahine, tei haafänau ia na i te here Atua. Te haamanaò nei te Âpooraa Rahi Âmui i te hui faaroo, ia amo itoito i teie tiàraa « tiaì mataara » ta te Atua e ta te fenua i höroà ia tätou. Aita atu e òhipa e tià i te tiaì mataara ia rave, te faaäraraa ia ìte e ia faaroo te nünaa i te hinaaro o te Atua. Ia faatiàmähia no te parau-tià e te tura, ta te Atua ia ôpuaraa i to na hämaniraa i te taata, i raro ïti aè i te mau merahi to na tuuraahia e ua faahei ia na i te hinuhinu e te tura.

O te mea mau ia e tupu ra i roto i ta tätou parau i teie mahana i te faaìteraa a te ìrava, 29 e tae mai ä to te hitià-o-te-rä, e to te tooà-o-te-rä; to àpatoèrau, e to àpatoà, e riro ia ei manihini i te Pätireia o te Atua.

Ia ora Mäòhi Nui

Maitaì te Atua.

Teraì òr. Faatura.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens