Overblog Suivre ce blog
Editer l'article Administration Créer mon blog
11 août 2016 4 11 /08 /août /2016 22:55

Tāpati 7 o Âtete 2016

ÔROÀ

Parau tià, Faaroo.

Ruta èv.12, 32-48

Te mau taoà i nià i te raì

(Mät 6,19-21)

32 Eiaha e mataù, e taù nana iti e E mea hinaaro na to òutou Metua i te horoà mai i te Pätireia no òutou. 33 E hoo i ta òutou taoà, a horoà noa atu ai ei pütë marau òre ta òutou, ei taoà pau òre i te ao ra i te vähi e òre e taeà e te èiä, e òre hoì e pau i te huhu. 34 Te vähi hoì i vai ai ta òutou taoà, tei reira atoà ia to òutou âau.

Te mau tävini e vai ara nei

35 Ia tätuahia to òutou tauupu, e ia vai àma ä ta òutou rämepa. 36 E ia au òutou i te feiä i tiaì i to rätou fatu i te hoìraa mai, mai te faaipoiporaa mai ra ia haere mai rä o ia e pätötö mai ra, ia ìriti rätou i te ôpani ia na i reira ra. 37 E ao to te reira mau tävini, i te roohiaraa mai e to rätou fatu, te ara ra Oia mau ta ù e parau atu ia òutou na, e riro o ia i te tätua ia na iho, a tuu atu ai ia rätou i te àmuraa mäa ra, a raverave ai i te mäa na rätou. 38 E ia tae mai o ia i te piti o te äraraa, e te toru hoì, roohia mai te nä reira ra, e ao to te reira mau tävini 39 Ua ìte hoì òutou àhiri i ìte na te taata fare i te hora e tae mai ai te èiä, e ara ia o ia, e òre e vaiiho noa i to na fare ia vävähi-noa-hia na. 40 E teie nei, ia vai ineine ä òutou, no te mea ei te hora manaò-òre-hia e òutou na e tae mai ai te Tamaiti a te taata nei.

Te tävini haapaò maitaì e te tävini haapaò òre

(Mät 24,45-51)

41 Ua parau mai ra Pëtero ia na E te Fatu, i parau-tià mai änei òe i tënä na parapore ia mätou anaè nei, e i te taata atoà nei änei. 42 Ua parau atu ra te Fatu O vai hoì te tïàau haavare òre e te haapaò maitaì, i ta te fatu e tuu i nià iho i to na atoà ra mau tävini, ei tuu atu i ta rätou tufaa mäa i te tufaraa mau ra. 43 E ao to te reira tävini, to tei roohia mai e to na ra fatu te nä reira ra. 44 Oia mau ta ù e parau atu ia òutou nei, e faariro ia o ia ia na ei mau i te mau taoà atoà na na ra. 45 Âreà te tävini e parau noa i roto ia na iho e, E òre taù fatu e tae vave mai, papaì iho ra i te mau tävini täne, e te mau tävini vahine, àmu iho ra i te mäa, e ïnu faataèro iho ra i te àva 46 e tae mai ia te fatu o taua tävini ra i te mahana manaò-òre-hia e ana, e i te hora-ìteä-òre-hia e ana ra, e e täpüpü atu ia na, a tuu atu ai i ta na tufaa i roto i te feiä haapaò òre atoà ra. 47 E te tävini i ìte i te hinaaro o to na ra fatu, e aita i faaineine ia na iho, aore hoì i rave i ta te fatu i hinaaro ra, e papaìhia ia e rave rahi te täìriraa. 48 Âreà tei òre i ìte ra, rave atu ra rä i te parau e au ia na te päpaì, e täìriraa iti ia to na o tei tuuhia atu te mea rahi ra, e mea rahi atoà të tïtauhia atu; e ta te taata hoì i tuu atu i te mea rahi ra, e mea rahi atoà ia të anihia atu ia na ra.

Manaò

32 Eiaha e mataù, e taù nana iti e E mea hinaaro na to òutou Metua i te horoà mai i te Pätireia no òutou.

I teie reo no Ietu, e hinaaro faatupu i te faufaa i ta te Atua i tuu i roto i te taata te ora i te mau taime atoà, ma te ìte e, ua ineine te Metua i te horoà i te vahi poupou e te maitaì. No te mea ra ua àmaha to tätou âau i mua i te mau hinaaro o te Atua, vai ära-noa-iho ra te tahi pae ma te òaòa, e te tahi pae täparahi iho ra i te mau taeaè, te mau tuahine, ma te rave i te mau peu tià òre. I mua i teie mau parau te faaitoito nei o Ietu i te nünaa tiàturi i te Atua no te here e te aroha, Eiaha e mataù. Te vai nei ta tätou mau hara, e ta tätou nei mau parau ìno i nià ia tätou nei, e ua roohia tätou i te ìno i te reira, e aha iho ra hoì tätou e ora ai. I roto i te Ètetiera pene 33 i te ìrava 11 E parau atu ia rätou te nä ô mai ra te ATUA ra o te Fatu te ora nei au ra, aore roa o ù e mauruüruraa i te pohe o te taata ìno ra ia färiu mai ra te taata i ta na parau ìno ia ora e färiu mai òutou, e färiu mai òutou, i ta òutou mau parau ìno ra e aha hoì òutou i hinaaro ai i te pohe, e te ùtuafare o Ìteraèra e. i teie huru parauraa e òre te taata parau-tià e ora i ta na ra parau-tià e te parau ìno ia färiu ra e ora mau ia e ia tiàturi i te parau tià a te Fatu. Faaroo mai na tätou i te tiàturiraa o te päpaì Taramo i mua i teie parau Taramo 33 ìrava 1 E òaòa i te Fatu, e te feiä parau-tià e E au te haamaitaì i te feiä parau-tià.2 E haamaitaì i te Fatu i te tïnura, e himene ia na i te näpara aho àhuru ra.3 E himene ia na i te himene âpï, faaòto maitaì na mä te òaòa e te au mäite. 4 E parau-tià ta te Fatu, e te haavare òre hoì ta na atoà ra mau òhipa. 5 Hinaaro o ia i te parau-tià e te au, te î nei te fenua i te maitaì a te Fatu. 6 Na te parau a te Fatu i oti ai te mau raì, e to rätou atoà ra i te aho o to na vaha.7 Ua haaputu o ia i te moana ra o te tai ei puèà, e ua vaiiho o ia i te moana i roto i te fare vairaa. 8 Ia mataù te mau fenua atoà i te Fatu e ia höriri to te ao atoà nei ia na. 9 Ua parau hoì o ia, e oti aè ra; ua faaue o ia, e ua mau atu ra.10 Te faaòre nei te Fatu i te âpooraa a te mau êtene, te faariro nei i tei ôpuahia e te mau taata ra ei mea faufaa òre.11 Tei faaäuhia e te Fatu ra, e tià ia i te vai-mäite-raa, e tei manaòhia e ta na âau e tae noa atu i te mau uì atoà ra.12 E ao to te fenua, o te Fatu to rätou Atua e te mau taata i mäìtihia e ana ei tufaa na na.13 O te Fatu tei hiò mai nä nià mai i te raì, te hiò mai ra i te mau tamarii atoà a te taata nei.14 Te vähi i pärahihia e ana ra, ta na ia hiòraa mai i to te ao atoà nei. 15 O ia anaè rä tei haafäito i to rätou âau, e o ia tei hiòpoà mai i ta rätou mau räveà.16 Aore e arii i ora i te rahi o ta na nuu, aore e taata püai i ora i te rahi o te püai.17 E mea faufaa òre te puaahorofenua ei haapüraa, aore e taata e ora i to na püai rahi. 18 Inaha, tei nià to te Fatu mata i te feiä i mataù ia na, i nià i te feiä i tiàturi i to na ra aroha, 19 e faaora ia rätou i te pohe, e ia ora hoì rätou i te oè ra. 20 Te tiaì nei to mätou värua i te Fatu o to mätou ia tauturu, e to mätou ia päruru.21 Te òaòa nei to mätou âau ia na te tiàturi nei hoì mätou i to na ra iòa moà.22 Ia vai mäite mai ä to aroha, e te Fatu, i nià ia mätou, mai ia mätou nei e tiàturi atu ia òe ra.

Tano mau atu ra te parau i faahitihia e Pauro, Hēpera pene 11 i te ìrava 7 No te faaroo hoì to Noa, a faaìtehia mai ai o ia e te Atua i te mau mea aore ä i ìteä mai ra, e roohia iho ra e te mataù, i tarai ai i te pahï ia ora to na fëtii; faahapa iho ra i to te ao, e riro atu ra o ia ei fatu i te parau-tià e noaa i te faaroo ra.

Oia mau, ia parau O Ietu e, Eiaha e mataù, e taù nana iti e E mea hinaaro na to òutou Metua i te horoà mai i te Pätireia no òutou. E faanahoraa to roto i teie reo, e faaineineraa, e faatupuraa òhipa, no te mea e âpee te Atua i ta na horoà, tei nià teihea fenua te tupuraa, i Mäòhi Nui änei, e aore i te ära,

Te Pätireia o te Atua, e mau nünaa tiàma te ora ra i roto, o teie te Horoà a te Atua i te taata, ia faaòhipa te taata e ia haapäpü i to na tiàraa taata i mua i te Atua. Te tiàmaraa e räveà no te haafätata te taata i te Atua ra. Te auraa, e haamaitaìraa te reira i te oraraa o te taata. Te tiàmaraa o te taata no te faatupu ia i to te Atua hinaaro. Ia faatano te taata i to na oraraa, ia au i to te Atua hinaaro ia na. Teie reo to Ietu, Eiaha e mataù, e taù nana iti e, Ia färii e ia haapäpü te taata i to na tiàmaraa i mua i te Ora e te horoà a te Atua.

I te rururaa òrometua 29 tiurai 2008, te vai nei teie uiraa, Ua tiàma mau änei te EPM i mua i to tätou parau i teie mahana

Te pähono nei te pupu 1-E, ua tiàma no te mea

Te naô ra te reo o T. Raapoto i te 1963 i roto ia Tiroama Mauruüru i te horoàraa mai teie pahï na na ihoä o na e faatere e teie nei, e faaitoito ra mätou i te faatere teie nei pahï.

45 mätahiti i muri, te ui faahou nei tätou ua tiàma mau anei ra tätou

- Aita tätou i tiàma no te mea, Aore te taata tätaì tahi i mätara atu ra na mua roa, te auraa mea maitaì te taata tätaì tahi ia färii i to na Mäòhiraa. Te mataù noa ra tätou i te faaìte i to tätou Mäòhiraa. Aore i märamarama i to tätou parau, te auraa mea maitaì ia haapii e ia haapii-noa-hia to tätou nünaa, ia haamatahia na nià i te tamarii e tae atu ai i nià i te taata paari.Te vai noa ra te faanahoraa tei matauhia.

No reira, Eiaha e mataù, e taù nana iti e, E mea hinaaro na to òutou Metua i te horoà mai i te Pätireia no òutou.

Te auraa, eita e tano e faataa ê i te parau o te Atua i te parau o te hinaaro e te horoà. Mea nä hea atu ra te Tumu o te tiàmaraa i faarirohia ai ei tumu no te pöuri. Tei òre i färii i te tiàmaraa, no te mea ia te au ra i te pöuri, e tei pärahi i roto i te pöuri ra, e au ia i te matapö. Te mea ia tätou i parau ai e, te hinaaro, te horoà ia o te ìte, te mea te reira e tauturu i te taata i te ìteraa e te märamaramaraa i te auraa o te mau mea atoà e haaàti ra ia na, e tae noa atu i to na iho parau, to na mäòhiraa i roto i te ôpuaraa a te Atua. Te feiä atoà i färii hope roa i te tiàmaraa ua färii i te täpaò no te aroha e te here o te Atua i te taata, ei taoà horoà na te Atua ia na, eiaha no te faatupu noa i to na hinaaro, ei tauturu rä ia na i te ìteraa e te faatupuraa i te hinaaro o te Atua, e topa te poa i to na mata, e riro te tiàmaraa i reira ei hinaaro mau no na e òhie ai i te ìte e Te mau haereà o Te Tumu Nui, te aroha ia e te parau mau i te feiä i haapaò i ta na parau i faaäu e ta na i faaìte mai. Tei faariro i to na mäòhiraa ei mea ìno, ei mea faufaa òre, e tae noa atu i to na iòa, ua haafaufaa òre ia i te Atua, e tae noa atu i te horoà e amo ra ia na, te hinaaro i hii mai ia na e tei horoà mai i to na ora. Na vai i parau e, mea ìno te mäòhiraa. Tei maitaì i te Atua ra, ua maitaì ia. Mai te peu e hinaaro to te Atua ia tätou, te täutururaa ia tätou ia na i te faatupuraa i to na hinaaro i te fenua nei, oia hoì ia faateiteihia to na iòa moà, ia haapaòhia to na hinaaro, ia faatupuhia to na hau i te fenua nei, ia faaea te taata i te nanaò i to na mana, ia faaea i te haru i to na hanahana. Ia Atua te Atua, ia fenua te fenua, ia taata te taata, ua maitaì roa.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens