Overblog Suivre ce blog
Editer l'article Administration Créer mon blog
2 août 2016 2 02 /08 /août /2016 10:12

Tāpati 24 no Tiurai 2016.

Torota 2,11-14

11 O ia hoì i peritomehia ai òutou i te peritome rave-òre-hia e te rima ra, i te tino o te ìno o te taata nei i haapaehia i te peritome a te Metia ra 12 i tänu- atoà-hia òutou e o ia atoà i te päpetitoraa ra, e i faatià-atoà-hia hoì i reira i te faaroo i te räveà püai rahi a te Atua, o tei faatià mai ia na mai te pohe mai ra. 13 E o òutou hoì, o tei pohe i ta òutou hara, e te peritome òre o to òutou tino, tei faaòre-atoà-hia e ana e o ia atoà, ua oti hoì i te faaòrehia ta òutou mau hara atoà. 14 Ua päraihia hoì te ture i päpaìhia no tätou ra, e to na atoà ra mau ôroà au òre ia tätou, e ua hopoi-ê-hia ia, o ia i pätiti i te reira i nià i ta na tätauro ra.

Taiòraa.

Ruta èv.11, 1-13

Te pure a te Fatu

(Mät 6,9-13; 7,7-11)

1 E te pure ra o ia i te hoê vähi, e oti aè ra, ua parau mai ra ia na te hoê pipi na na E te Fatu, a haapii mai ia mätou i te pure, mai ia Ioane i haapii atoà i ta na ra mau pipi. 2 Ua parau atu ra o ia ia rätou, E nä ô òutou ia pure E to mätou Metua i te ao ra, ia raa to òe iòa. Ia tae to òe ra Pätireia. Ia haapaòhia to òe hinaaro i te fenua nei mai tei te raì atoà na. 3 Hö mai i te mäa e au ia mätou i te mau mahana atoà nei. 4 E faaòre mai i ta mätou hara, te faaòre nei hoì mätou i tei hara atoà ia mätou nei. Eiaha e faaruè ia mätou e ia roohia-noa-hia mai e te àti; e faaora rä ia mätou i te ìno. 5 Ua parau atu ra o ia ia rätou E tauà to te hoê taata io òutou na, a haere atu ia o ia ia na ra i te tuìraa pö, a parau atu ai ia na e E hoa ìno, hö mai na i e toru päne. 6 Ua täpae mai nei te tahi hoa o ù ia ù nei, i to na haereà, e aita a ù ia tuu atu i mua i te aro. 7 E ia parau mai o ia i roto ra, ia nä ô mai ä Eiaha e haapeàpeà mai ia ù, ua mau te ôpani, tei nià vau i te roì e taù mau tamarii atoà, eita vau e tià i nià e hopoi atu i te päne na òe. 8 E faaìte atu vau ia òutou ia märô rä taua taata ra, òre noa ä o ia i te tià i nià e horoà atu i te mäa i te mea e tauà o ia no na, e tià rä o ia i te märô, a horoà atu ai i ta na i hinaaro ra. 9 E parau atu hoì au ia òutou: e ani, e noaa ia ia òutou e ìmi, e ìte ia òutou; e pätötö, e ìritihia ia te ôpani ia òutou. 10 O te feiä atoà hoì i ani ra, te noaa ra ia; e o tei ìmi ra, te ìte ra ia; e o tei pätötö ra, te ìritihia ra ia te ôpani ia na. 11 O vai ia metua io òutou nei e hopoi atu i te ôfaì na te tamaiti ia ani mai i te päne ra, E ia ani mai i te ià, e hopoi atu änei i te ôfï eiaha te ià, ia na 12 E ia ani mai hoì i te huero moa, e hopoi atu änei i te pata 13 E tënä na, te ìte na òutou i te horoà i te mea maitaì na ta òutou tamarii, ìno noa ai òutou na. E rahi atu ia to òutou Metua i te ao ra i te horoà i te Värua Maitaì i te feiä i ani atu ia na ra.

Manaò.

Èi ômuaraa, i to tätou parau i teie mahana, e faaroo mai òutou i te Taramo 138

1 Na Tävita. E haamaitaì au ia òe, e te Fatu, mä taù âau atoà nei, e himene au ei haamaitaì ia òe, i mua i te aro o te mau atua. 2 E haamori tià atu vau i to nao moà ra, a haamaitaì atu ai i to òe iòa, e te Fatu no to òe aroha e ta òe ra parau-mau ua faarahi hoì òe i ta òe parau ia hau atu i to iòa atoà ra. 3 I te mahana i tiàoro atu ai au ra, ua parau mai òe ia ù e ua horoà mai i te itoito i taù värua. 4 E hope te mau arii atoà o te fenua nei i te haamaitaì ia òe, e te Fatu, ia ìte rätou i te parau a to vaha 5 E himene rätou i te mau parau a te Fatu E hanahana rahi hoì to te Fatu. 6 Teitei noa ä te Fatu, e haapaò mai ä o ia i tei haèhaa, âreà tei teòteò, ei te ätea ê o ia e hiò mai ai. 7Ia haere noa vau nä roto i te àti ra, e faaanaanaeahia mai au e òe ra, e na to rima e täpeà i te riri o tei märô mai ia ù ra, e na to rima àtau iho e faaora ia ù. 8 Na te Fatu e nä reira mai ia ù, e tià to òe aroha, e te Fatu, i te vai-mäite-raa; eiaha na òe e faaruè i te òhipa a to rima.

Te tähi pene parau no na taiòraa e maha i faataahia no teie täpati Tenete pene18, i te mau ìrava 20 e tae i te 32, ua pou roa mai te Fatu no te mea, e âuë rahi to Tötoma e to Tömora, e no te mea, ua rahi roa ta rätou hara i haere mai ai o ia i raro, e hiò, ia ìte i te mea ua tae te reo i te tarià o te Fatu. Ua färiu ê atu ra te mata e toopiti o taua nä taata ra, haere tià atu ra i Tötoma te tià noa ra rä Âperahäma i mua i te Fatu. I te haafätata atu Âperahäma, nä ô atu ra, E haamou atoà änei òe i te feiä parau-tià, e te paieti-òre. Te faaäu nei Âperahäma i te parau, Peneiaè e pae àhuru puè taata parau-tià tei taua ôire ra; e haamou ä òe, E pae àhuru taata parau-tià ìteä ia ù i roto i Tötoma ra, e ora ia ù taua ôire atoà ra ia rätou. Peneiaè o te òre o te tae i te pae i te àhuru i te taata parau-tià, o te toe noa iho e pae, e täparahi ä òe i taua ôire atoà ra i taua pae i toe ra. Ua parau mai ra o ia, E maha àhuru ma pae te ìteä ia ù i reira, e òre ia e pohe ia ù. Peneiaè maha nei àhururaa te ìteä atu i reira. Ua nä ô mai ra o ia, E òre ia vau e nä reira, i taua maha àhuru ra. Peneiaè e toru roa nei àhuru e ìteä atu i taua ôire ra. Ua parau mai ra o ia, E toru àhuru te ìteä ia ù i reira, eita vau e nä reira. Peneiaè e piti àhuru te ìteä atu. Ua parau mai ra o ia, Eita ia vau e täparahi, i taua piti àhuru ra. Peneiaè hoê roa àhuru te ìteä atu. Ua parau mai ra o ia, hoê noa iho a àhuru, e òre a vau e täparahi.

Ia faaroo tätou i teie rahiraa peneiaè, e uiui ia tätou te manaò i teie huru âparauraa na te Fatu e te taata i nià i te päpü òre te manaò, e ia faaroo tätou i teie reo no te hoê o te mau pipi i nià i te Fatu, E te Fatu, a haapii mai ia mätou i te pure, mai ia Ioane i haapii atoà i ta na ra mau pipi. E aore rä haapii mai ia mätou i te paraparau i te Atua.

E aniraa teie i nä roto mai i te tahi pipi tei ìte pinepine ia Ietu i te haere e pure, e tei ìte atoà e, ua haapii o Ioane i ta na iho mau pipi i te pure, âreà rätou, aita ä ia. Te mea ia o ia i ani ai ia Ietu ia haapii atoà ia rätou i te pure. No Ruta, e au ra e, te pärahi noa ra te mau pipi i roto i te manaònaò e te peàpeà, no te tahi mea ta rätou i manaò e, te ère ra rätou, oia te ìteraa i te pure.

Ia haapii te tahi taata i te tahi i te òhipa tei òre o ia i ìte i te rave, aore ra ia haapii te metua i te tamarii, terä ihoä te haamataraa o te parau nä ô. Te taata na na e faanaho ra, na na e arataì ra i te tahi òhipa, te taata ia e faaòhipa i teie huru parauraa. Te taata i parauhia e, nä ô, ia ìte atoà o ia e, e tauturu teie e horoàhia nei ia na, te tahi faaòhieraa ia na i roto i to na mau tuuraa âvae mätamua, eiaha rä mai te mea e, i te mau taime atoà o ia e hinaaro ai i te rave i teie òhipa, ia rave ihoä o ia mai tei haapiihia mai.

E parau mau roa te reira. Aita rä te pipi, mai te tävini atoà, i ôpanihia ia faahohonu i te mea i haapiihia ia na. Ia haapaò hoì te pipi i te mea i haapiihia ia na, ia òre ia faaea noa i nià i te mea i horoàhia mai, ia ìmi rä i te räveà haamaitaì, faahohonu, ia tämata i te tahi raveraa e te tahi, ia faatito i te tahi manaò i te tahi, eiaha no te haafaufaa òre i te mea i haapiihia mai, no te hiò rä i te paari o te mea ta na i täpeà mai, e riro o ia i te haere i mua, e peneiaè te hau atu i te òrometua, no te mea aita e ôtià to te ìte. Aita Ietu e ôpani ra i te reira manaò. Te taata e färii i te tahi parau mai te uiui òre te manaò, mai te haapeàpeà òre to na âau i te auraa o te mea i parauhia, mai te hinaaro òre i te tïtau i te märamarama, eita ia taata e haere i mua, na na iho rä e täpiri ra ia na i te ùputa o te ìte. E mau ihoä ia ia na te mea i parauhia mai, aita rä o ia i taa i te auraa o te mea ta na i tämau, inaha aita o ia i hinaaro i te tomo i roto i te parau, eita atoà o ia e tano e türama i te taata e tïtau noa mai i te märamarama ta na iho i òre i färii. E nä ô ia tätou : e mörï ta na, eita rä e àma, eita hoì e horoà i te märamarama.

I mua i teie pure ta te Fatu, ia parau mai Ietu e, e nä ô òutou ia pure, aita o ia e nä ô mai ra e, e nä ô ihoä, aore ra, e nä ô noa. Te vai täatoà noa ra te tiàmäraa o te taata. E hiò tätou i teie nä ô, mai te mea te horoà mai ra te Fatu i te tahi hiòraa. Ia päpü to na tuuraa âvae, aita e mea e ôpani i te taata i te pure mai ta to na âau e parau ra ia na, eere änei. Ia au i te hiòraa a Ruta, i òre i haapii ai i ta na mau pipi i te pure. Eere no te faaère ia rätou i te tahi mea tei ìte rätou i te faufaa, eere atoà no te taime òre i te haapaò mai ia rätou, no to na rä hinaaro ia ìte te mau pipi e, aita e taata e tano e mono i te tahi i mua i te Atua, inaha ei Metua o ia no rätou. To tätou fifi, te fifi atoà ia o te mau pipi, te mea ia e, aita tätou e manaò ra i te pure, oia te faaìteraa i te Atua i to tätou hinaaro, te manaò ra rä tätou i te tahi huru parauraa, aore ra to tätou huru i te taime parauraa. Te auraa, aita ä tätou i haamata i te pure, ua fifi to tätou manaò i roto i te peu.

I roto i ta Ietu mau haapiiraa, teie ta na poroì, ia pure, eiaha e rave i te peu a te feiä haavare tei hinaaro ia rahi te taata mätaìtaì ia rätou, te auraa, te ìmi ra rätou i te mata o te taata, aita rä to rätou âau e ìmi ra i te Atua, e haere rä i te vähi moèmoè, i roto i te piha, aore ra i roto i te uru räau, eiaha hoì e tähana i te parau, eiaha e faaroa faufaa òre noa i te pure no te mea ua ìte ê na te Atua i te mea ta te taata e ani atu ia na. Te tiaì mai ra te Atua ia tätou, te moemoe ra tätou i te mata o te taata, e aha ia tätou e färerei ai i te Atua. Ia haapotohia, te pure, e òhipa te reira i roto ia òe e te Atua, o òe e to òe tiàturiraa i te Atua.

Ia hiòhia to na hämaniraa, e 4 tuhaa to teie pure : 1- te taùraa ; 2- te tuhaa a te taata i te Atua ra ; 3- te hinaaro o te taata i te Atua ; 4- te faahanahanaraa i te Atua. I mua i ta tätou mau pure, eita tätou e hape rahi roa i te parauraa e, ua ìte tätou i te ani, ua ìte i te räveà e noaa ai te mea ta tätou i ani, te haapaò maitaì nei tätou i te reira, aita rä paha tätou i ìte i te haamaitaì. Ua ìte tätou i te haamauruüru, no te mea noa rä i rävehia no tätou, no te mea ua pähonohia to tätou hinaaro. Te uiraa e tano ia uihia, teie ia te manaònaò atoà ra änei tätou i te rave i te mea e mauruüru ai te Atua, te mea e hanahana ai to na iòa. Aita änei hoì e moèhia nei ia tätou e, i muri mai i te e nä ô òutou ia pure, te vai atoà ra ta te taata tuhaa, i te pähonoraa i te horoà a te Atua.

I mua i teie pure, mea maitaì tätou ia haamanaò e, e tiàraa taata pure noa to tätou, eere te tiàraa fatu no te pure, i te faahaparaa i te taata i hinaaro e tïtau i te märamarama, nä roto noa atu ai i te tauiraa, aore ra te monoraa i te tahi mau taò. E faaea atoà tätou i te manaò e, mea moà teie pure. Ahiri mau e, o te reira, eita Ietu e horoà. A ui rii na tätou e tano änei te tahi mea moà i roto i te vaha viivii o te taata. Eie hoì te Atua e ani noa nei i te taata ia òre ia faahiti faufaa òre noa i to na iòa moà, ia faaea i te haaviivii i to na hanahana, ia òre to na iòa ia faarirohia ei tähoro haavare, aore ra ei faatupu i te ìno e te pohe ; te haapaò ra änei tätou. No te âti Iuta, tei nä roto atoà tätou i ta na märamaramaraa i te parau o te Atua i te hiò e te ìte i te huru o te Atua, aita e vaha taata e tano e parau i te iòa o te Atua, ia tae hoì i te vähi i päpaìhia ai to na iòa, te parau ra rätou i te tahi taò ê atu, no te faatura i to na moà. I mua i te reira manaò, e tano ia parauhia e, o tätou te mea haafaufaa òre roa aè, e te mea faatura òre roa aè i te moà o te Atua.

Te auraa, aita to tätou e ora i räpae aè i te Atua, e i räpae aè i te fenua. E te parau nei hoì tätou i te tahi e te tahi e, metua, mai ia Ietu atoà i parau ia na e Tamaiti na te taata, oia hoì e Tamaiti na te fenua. No reira, inaha ua haapii atoà Ietu ia tätou i teie pure, ua faaìte ia o ia ia tätou i te vähi e noaa ai ia tätou taua ora ra. Te auraa, aita ä tätou i haamata i te pure, nä roto noa i teie ìrava ta tätou i püòi mai e ia tätou atoà i teie mahana, ua faaìte ê na tätou i to tätou tiàturiraa i te vähi tei reira to tätou ora. No reira, eere teie i te parau vavï noa, aita ihoä paha te taata e feruri nei i te mea ta na e parau ra i te taime parauraa, e fäìraa faaroo mau rä teie. Areà te haapäpüraa e i teie mahana, no te haamanaò noa mai ia i te òhuraa o te tau, te vai ra te tau i mahemo i nanahi ra, te vai ra tei òre ä i tae mai a nanahi, e te vai ra teie mahana. E pure teie no teie mahana, e pure e faaâpï noa, e fäìraa no te mahana tätaì tahi. Eere te paraparauraa noa teie e anihia nei e faaâpï, te faaroo rä, te tiàturiraa hoì e amo ra i teie pure. Eere no te mea ua mau âau ia tätou, no te mea ua mutamutahia e to tätou vaha i maitaì ai teie pure, no te mea rä ua faaâpï-noa-hia teie pure e to tätou faaroo, mai te mahana e hiti ra i te mau mahana atoà, ia riro e, mai te reira atoà teie pure i te türamaraa i to tätou oraraa, mai te peu e färii tätou i te haere i te vähi ta te parau e türama.

Maitaì i teie mahana.

Puta turu

Pure a te Fatu, Turo a Raapoto 2012.

Te vai nei teie puta i te fare hooraa puta

Te Tiàrama i te foyer Paofaì.

Teraì òr.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens