Overblog Suivre ce blog
Editer l'article Administration Créer mon blog
9 juin 2016 4 09 /06 /juin /2016 23:35

Tāpati 12 no Tiunu 2016.

Ruta èv. 7,36-50

Ietu e te vahine hara

36 Ua parau mai ra te hoê o te mau Färitea ra ia Ietu e àmu i te mäa io na ra. Haere atu ra o ia i roto i te fare o taua Färitea ra, taòto atu ra i te àmuraa mäa ra. 37 E ìnaha, te hoê vahine hara i taua ôire ra, ìte aè ra e te àmu ra Ietu i te mäa i te fare o taua Färitea ra, ua hopoi mai ra i te hoê piha àrapata mura ra, 38 tià noa iho ra i muri i ta na pae âvae mä te òto, e rarirari aè ra ta na âvae i te roimata, horoi iho ra i ta na ìo rouru, hoì iho ra i ta na âvae, e faatävai iho ra i te mura. 39 Ìte aè ra rä te Färitea i parau atu ia na ra i taua mea ra, ua nä ô aè ra i roto ia na iho. Ahiri teie nei taata e perofeta, e ìte ia o ia i teie nei vahine e rave mai ia na nei, e to na roo, e rave hara hoì o ia. 40 Ua parau atu ra Ietu ia na, nä ô atu ra. E Timona, e mäa parau ïti ta ù ia òe na. Ua nä ô mai ra o ia, E parau noa mai òe, e te Òrometua. 41Toopiti a te hoê taata tau àmutärahu, e pae hänere moni veo i ta te hoê aore i hoo na, e pae hoì àhuru i ta te tahi. 42 No te mea rä aita roa a räua faufaa e hoo na ai, faaòre noa atu ra o ia i ta räua atoà tärahu. E tënä na, e faaìte mai òe, o tei hea të rahi i te mauruüru ia na i taua na taata ra. 43 Ua parau mai ra Timona, nä ô mai ra, Te manaò nei au, o tei faaòrehia e ana te tärahu rahi ra. Ua parau atu ra Ietu ia na, E manaò tià to òe. 44 Ua färiu aè ra o ia i taua vahine ra, e ua parau atu ra ia Timon. Te hiò nei òe i teie nei vahine. I tomo mai nei au i roto i to fare nei, e aore òe i hopoi mai i te pape ei horoi i ta ù âvae, ua faarari rä o ia i ta ù âvae i te roimata, e ua horoi i to na iho ìo rouru. 45 Aore òe i hoì mai ia ù, âreà teie nei vahine, aita aè nei i faaea i te hoìhoì i ta ù âvae mai to na tomoraa mai ä. 46 Aore òe i faatahinu mai i ta ù upoo i te monoì, âreà o ia ua faatävai ia i ta ù âvae i te mura. 47 E teie nei, e faaìte atu vau ia òe o ta na nei hara rahi, ua faaòrehia ia i rahi ai to na mauruüru. Âreà te taata hara ïti i faaòrehia ra, e ïti ia to na mauruüru. 48 Ua parau aè ra o ia i taua vahine ra, ua faaòrehia ta òe hara. 49 Ua nä ô aè ra taua feiä i te àmuraa mäa ra i roto ia rätou iho O vai teie e faaòre atoà i te hara nei. 50 Ua parau atu ra o ia i taua vahine ra, Ua ora òe i to òe faaroo: ia ora na i te haereà.

8,1-3.

Te mau vahine âpee ia Ietu

1 E muri aè ra, haere atu ra o ia nä roto i te mau ôire e te mau ôire rii atoà, i te poro haereà i te Parau Maitaì ra i te Pätireia o te Atua, o ia e te tino àhuru mä piti atoà; 2 e mau vahine hoì i faaorahia i te värua ìno e te maì, o Märia i parauhia no Matatara, no roto ia na nä tëmoni toohitu ra 3 e o Ioane te vahine a Huta e tïàau no Herota, e o Tutana, e o vëtoofanu mau vahine èê hoì, o tei turu mai ia ia na i ta rätou ra taoà.

Te taiòraa

E tià ia parauhia te parau ta tätou e farerei nei i teie taime haamoriraa i te Atua, te Vai nei au e vai nei, te faaìte nei ia te färiiraa a Timona Färitea ia Ietu, to Ietu faaòreraa i te hara a te vahine o ta te mau färitea e manaò ra e taata hara, te mau pipi a Ietu, e te mau vahine i te haereraa na te mau ôire i te faaìteraa i te parau maitaì no te pätireia o te Atua.

Te faufaa o te parau

Te ìtehia nei te faufaa e te rahi no te hanahana o te mau parau maitaì e faatupuhia nei e te Metia, èi faatiàraa i te mau taata atoà tei ìte i to rätou ère i mua i te mau faanahoraa rau o te oraraa. Ma te ìte atoà ra i ta rätou tuhaa i roto i te aroha tumu o te Atua, i te haafatata i pïhaì iho i te faaòreraa hara, i te mea te faaitoito nei te èvaneria i to rätou faaroo. Te òhipa ia i rävehia e teie nei vahine, to na haaparariraa te patu no te haama, to na haafatataraa i pïhaì iho ia Ietu, ma te haapaòre i te mau manaò taata, ma te rave i ta na vairaa monoì mura, e monoì moni roa teie e tae roa mai i teie nei mahana. Tià noa ai ò ia i muri i te âvae o Ietu, ua Rari roa te âvae o Ietu i to na roimata, rave iho ra i to na ìo rouru faatävai atu ra i te mura. Òia hoì, ua ruru i to na rouru i roto i to na rima no te faatävai i te âvae o Ietu. Te ìteraa te mau Färitea i teie òhipa i te tupuraa, ua riro no rätou teie òhipa i tupu i nià ia Ietu mai te hoê òhipa te òre e tià i teie vahine i te rave. Ua haere mai teie vahine ia Ietu ra ia noaa ia na te haamaitaìraa, no te faaâpï i to na oraraa, ia òre ò ia, ia faaea faahou i roto i te ao no te hara. Ia tià ra ia na i te tomo i roto i te ao, no te faatiàmaraa e horoà nei i te mau taata atoà tei ìte i te aroha haamaitaì a te Atua.

I te mau manaò o te mau Färitea, àhiri o Ietu e Perofeta, e ìte o Ietu e taata rave hara teie. I faatià ai o Ietu i te parau no te parapore no te àmutärahu, e piti taata àmutärahu, hoê 500 moni veo ta te hoê aita i hoo nä, 50 moni veo ta te tahi, aita i hoo na, faaòrehia ta raua tärahu o vai tei rahi te mauruüru ? Te pähonoraa a Timona te taata àmutärahu rahi. Na roto i teie parapore, te hinaaro nei o Ietu e faaìte ia Timona e te mau Färitea te faufaa no te òhipa i rävehia e teie vahine. No te mea te mau Färitea, mai te mau taata atoà e feiä àmutärahu anaè i mua i te mau faanahoraa a te Atua. Âreà teie vahine te ìte nei ò ia i te pau o te Atua i roto i ta na tärahu, oia hoì ta na mau hara, e te mau Färitea te manaò noa ra ia e, èita rätou i te àmutärahu na te Atua. Te manaò o te mau Färitea, O vai teie e faaòre atoà nei i te hara. To Ietu ra teie ia, Ua ora òe i to òe faaroo ia ora na I te haereà. Ìrava 50.

Ua tiàhia teie i te faaroo a te Metia, o tätou rä e ìte nei, e aore tätou i tiàhia i te òhipa o ta tätou e manaò i te tiàraa, i te faaroo a Ietu Metia ra, i faaroo atoà ai tätou ia Ietu Metia, ia tiàhia tätou i te faaroo o te Metia ra, eiaha i te òhipa i rävehia. Aore roa hoì e taata e tiàhia i te òhipa e tïtauhia ra. Te Taratia pene 2 i te ìrava 17 Te tïtau nei tätou ia tiàhia mai e te Metia, te vai taata hara noa nei ä tätou, e òre änei te Metia i riro ei täuturu i te ìno i reira. Eiaha roa ia parau. Ia patu faahou hoì ra tätou i te haamaìri i te mau òhipa faufaa òre e faatea nei i te aroha o te Atua, ia òre tätou ia riro ei rave hapa. Ia pohe te parau e faataaê nei ia tätou, ia ora tätou i te Atua. Ua faatataurohia te Metia, te ora noa nei rä tätou eere hua rä tätou, te ora nei rä te Metia i roto ia tätou nei. E to tätou nei oraraa i roto i te tino nei, te ora nei tätou i te faaroo o te Tamaiti a te Atua, o tei aroha mai ia tätou, e ua horoà ia na iho no tätou. Aore tätou i faaèrehia i te aroha mau a te Atua, no te tiàturiraa i te parau-tià i tiàhia mai ai ra, e poheraa faufaa to te Metia i reira.

No te mea e maitaì to te taata, to tei faaòrehia ta na hara, e tei faaòrehia to na ìno. E òaòa to te taata, aore i pärihia e te Fatu i te hara, e aore e haavare o roto i to na âau. Ia faaroo tätou i te pure a Tävita i te faaìteraa a te Taramo 32 i te ìrava 3 Ia ù i mämü noa ai, ua ìno roa o ù mau ivi, i te ûuru no ù e ruì noa atu te mahana. Te ìrava 4 Te teiaha mai ra hoì to rima i nià ia ù, i te ruì e te ao ua marô atu ra vau mai te marô o te tau pöai ra. Tera. E te ìrava 5 E mäoro aè ra ua fäì atu ra vau i ta ù hara ia òe e aore au i huna i to ù nei piò. I nä ô aè ra hoì au e, E fäì au i ta ù hara i te Fatu ra, e ua faaòre mai òe i te ìno o taua hara na ù ra. No reira te pure a te taata paieti, e taime e ìtehia mai ai, to na täpuniraa i te faaora tei faaòre i te ahoaho, ia haaàtihia mai oia i te himene ora. E haapii mai ä te Atua, no te faaìte i te èà ia haere, te aò a te Atua, tei haapäpü tei nià to na mata i te taata tei fäì i ta na hara ma te haavare òre vai ai. Te vai nei ä te tähi manaò e faahiti nei e Tävita i roto i te Täramo32 i te ìrava 9 Eiaha ia fäitohia i te puaahorofenua e te fërati, aore o rätou e ìte ra, o tei haamauhia te taa i te tävaha e òre hoì e haafätata mai ai ia òe. Te ìrava 10 E rave rahi to te paieti-òre ra òtoraa, âreà tei tiàturi i te Fatu ra, e haaàtihia o ia e te aroha. E te ìrava 11 Ia reàreà e ia òaòa i te Fatu, òutou, e te feiä parau-tià e ûmere i te òaòa, òutou, o te feiä i tià te âau ra. E parau teie e tià e faafatata faahou ia tätou i te tumu no te faaòre hara.

Te parau ra Ietu i te ìrava 48, Ua parau aè ra o ia i taua vahine ra, ua faaòrehia ta òe hara. Ia faaroo tätou i teie reo, mea tià roa ia tätou ia parau mai teie te huru.

Te Atua Metua e, ho mai ia mätou i te haèhaa o te âau e òhie ai mätou i te färii e, te ora, oia to òe aroha e to òe here, te mauhia ra ia e te fenua, e e roaa te reira ia mätou ia haere mätou i reira, e parau mau roa hoì te reira i te faaìteraa a te Taramo 85, i te mau ìrava 11O te aroha e te parau-mau, ua färerei ia räua o te parau-tià e te hau, ua hohoì räua. Te ìrava 12 E tupu mai te parau-mau no roto i te fenua, e hiò mai hoì te parau-tià mai te raì mai.

E Ietu Metia e to mätou Fatu e, òe i tae roa i te parauraa i te horoà a te fenua e, o taù tino tenä, o taù toto tenä, ìriti i te mataù e te tähitohito i to mätou âau, ia färii mätou mai ta òe i faaìte mai e, te mea e au no òe, e au atoà ia no mätou.

E te Värua Moà e, mai ia òe i faaàrepurepu i te moana i te matahurahura o teie nei ao no te faaineine i te haereà mai o te Parau e faaìte mai i te Atua e ta na ôpuaraa faaora, a faaàrepurepu atoà i to mätou âau ia ineine mätou i te färiiraa i te märamarama o te Parau a te Tumu Nui, te Parau e färii ai mätou i ta na ôpuaraa faaora no mätou e te nünaa mäòhi.

Ia haamaitaìhia òe e te Atua Metua, te Tumu o te ora, ia haamaitaìhia òe e Ietu Metia no ta òe parau i haamanaò mai i te ôpuaraa ora a te Atua Metua, ia haamaitaìhia òe e te Värua Moà, no te märamarama tei ineine òe i te horoà ia mätou e òhie ai mätou i te färii i te hoì i te Atua Metua ra. Amene.(Turo a Raapoto, Te Atua e te fenua.)

Maitaì tätou i teie mahana.

Teraì òr.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens