Overblog Suivre ce blog
Editer l'article Administration Créer mon blog
5 mai 2016 4 05 /05 /mai /2016 23:39

Tāpati 8 no Më 2016

Haamoriraa.

Ômuaraa.

Pärahi tätou i roto i te haamoriraa i teie taime faufaa mau no to tätou tiàturiraa i te Atua Tumu Tahi, tei haaputuputu i ta na mau tamarii i roto i te âmuiraa taata. Na te puta Taramo 97 e ärataì ia tätou i roto i te haamoriraa o ta te mau ìrava 1 e tae i te ìrava 12,

E tià mai tätou, teie taua mau parau ra ìrava 1 O te Fatu te arii, ia ôuàuà te fenua, e te mau fenua rii e rave rahi ra, ia òaòa ia 2 Te haaàtihia ra o ia i te mau ata e te pöuri. O te parau-tià rä e te au, o te tumu ia o to na teröno. 3 Te haere ra te auahi nä mua ia na, e te àma ra to na mau ènemi e àti noa aè. 4 Te märamarama ra te fenua i to na ra uira, te hiò ra te fenua mä te rürütaina. 5 Te tärapape ra te mau mouà mai te täpau i te aro o te Fatu, i te aro o te Fatu o te fenua atoà ra. 6 Te faaìte mai ra te mau raì i te parau-tià na na, e te ìte ra te taata atoà i to na hanahana. 7 Ia haamä te feiä atoà i haamori i te mau atua òtiòtihia ra, o tei teòteò i to rätou iho mau îtoro. E haamori ia na, e te mau atua ra. 8 Ua ìte Tiona e ua òaòa, e te fänaò nei te mau tamahine o Iüta i te parau au na òe, e te Fatu. 9 E teitei rahi to òe, e te Fatu, i te mau fenua atoà nei, tei nià ê ä òe i te mau atua atoà ra. 10 O òutou o tei hinaaro i te Fatu ra, ia riàrià òutou i te ìno, te tiaì ra o ia i te värua o to na feiä moà ra, e te faaora ra o ia ia rätou i te rima o te paieti-òre ra. 11 Ua ueuehia te märamarama na te feiä parau-tià ra, e te òaòa na te feiä i tià te âau ra. 12 E òaòa òutou, e te feiä parau-tià, i te Fatu, e haamaitaì atu mä te haamanaò i to na ra maitaì.

Haamaitaì tätou i te Atua i te himene.

Himene.

Pärahi tätou

Faaroo mai tätou i teie nei i te faaòreraa hara a te hoê tävini tei äratohia i mua i te pehiraa ôfaì ta te puta Òhipa i te pene 7 e faaìte mai nei ia tätou i te mau ìrava 55 e tae i te ìrava 60 a faaroo mai na e te mau tamarii a te Atua ìrava 55 Î aè ra rä o ia i te Värua Maitaì, e hiò tämau mäite atu ra i nià i te raì, e ìte atu ra i te hanahana o te Atua, e ia Ietu i te tià-mäite-raa i te rima àtau o te Atua ra. 56 Ua nä ô aè ra o ia Ìnaha, te ìte atu ra vau i te raì, ua vëvetehia, e te Tämaïti a te taata i te tiàraa i te rima àtau o te Atua ra. 57 Ua pörutu mai ra to rätou reo, ôpanipani iho ra i to rätou mau tarià, horo püpara noa mai ra rätou atoà i nià ia na. 58 Äratö atu ra ia na i räpae i taua ôire ra, pëhi iho ra ia na i te ôfaì e nä taata i ìte ra, tuu atu ra i to räua àhu i te pae âvae o te hoê taata âpï ra, o Tauro te iòa. 59 Ua pëhi iho ra rätou ia Tetefano i te ôfaì, te pure noa ra o ia, te nä ô ra E ta ù Fatu, e Ietu e, a rave mai òe i ta ù värua 60 Topa turi iho ra o ia, ua pii hua atu ra te reo E te Fatu, eiaha teie nei hara e häio tià ia rätou nei. E teie te nä-reira-raa ra, maìri atu ra ta na taòto.

Haamaitaì tätou i te Atua i te reo himene.

Himene

Teie te hoê parau no te tävini o te Atua tei ìte ôrama, te mau faaäpiäpiraa a te mau ènemi te tupu maitaìraa te hau o te Atua i te fenua nei. Ta te puta Àpotarupo i te pene 22 i te mau ìrava 12 e tae i te ìrava 20 teie taua mau parauraa ìrava 12 Ìnaha, te haere vave atu nei au tei ia ù nei ta ù utuà, ia hopoi atu na te taata atoà i tei au i ta na ra òhipa. 13 O vau te Ârefa e te Ômeta, te mätamua e te faahopeà, o to mua e o to muri.14 E ao to te feiä e haapaò i ta na ra parau, ia au ia rätou ia àmu i to nià i te räau ora ra, e ia nä te mau ùputa rätou i te tomo i roto i te ôire ra. 15 Âreà to räpaeàu ra, e ùrï ia, e te tahutahu, e te faaturi, e te täparahi taata, e te haamori îtoro, e te feiä atoà e hinaaro e ua parau i te parau haavare ra 16 O vau o Ietu, e ua tono atu vau i ta ù merahi e faaìte ia òutou i roto i te mau Ètärëtia i teie nei mau parau. O vau te tumu e te huaai o Tävita, e te fetià poìpoì ànaana ra.17 E te parau nei te Värua e te Vahine faaipoipo âpï e haere mai e o tei faaroo ra, a parau atoà o ia e haere mai e o tei poìhä ra, a haere mai. E tei hinaaro ra, a rave noa mai o ia i te pape ora.18 Te faaìte päpü nei hoì au i te taata atoà e ìte i te parau tohu i roto i teie nei puta, ia täàti noa mai te tahi taata i te tahi parau ê i teie nei mau parau, na te Atua e täàti mai ia na i te mau pohe i päpaìhia i roto i teie nei puta. 19 E ia ìriti noa atu te hoê taata i te hoê parau i te mau parau tohu i roto i teie nei puta, na te Atua e ìriti ê atu i ta na tufaa i roto i te puta ora, e i roto i te ôire moà ra, e i tei päpaìhia i roto i teie nei puta. 20 Te nä ô mai ra tei faaìte mai i teie nei mau parau E tae vave mau atu ä vau Âmene. Oia ia A haere mai, e te Fatu, e Ietu e 21 Ei ia òutou atoà na te aroha mau o to tätou Fatu ra o Ietu Metia. Âmene.

Haamaitaì tätou i te Atua i te reo himene.

Himene.

Teie ta tätou taiòraa èvaneria.

Ioane17, 20-26

20 Aore hoì au i pure ia rätou anaè nei, i te feiä atoà rä e faaroo mai ia ù i ta rätou ra haapiiraa. 21 Ia riro rätou atoà ei hoê, mai ia òe, e ta ù Metua, i roto ia ù nei ra, e mai ia ù hoì i roto ia òe na. Ia hoê atoà rätou i roto ia täua, ia faaroo to te ao e na òe au i tono mai. 22 E ua horoà vau i te hinuhinu no rätou i ta òe i hö mai no ù ra, ia riro rätou ei hoê mai ia täua e hoê nei. 23 E i roto vau ia rätou, e ei roto òe ia ù, ia tià to rätou âmuiraa, e ia ìte to te ao e na òe au i tono mai, e ua here mai òe ia rätou mai ia òe e here mai ia ù nei ra. 24 E ta ù Metua e, ua hinaaro vau i te feiä ta òe i hö mai no ù ra, ei pïhaì-atoà-iho ia ù i te vähi e pärahi ai au ra, ia hiò mai rätou i to ù hinuhinu i ta òe i hö mai no ù ra ua here mai na hoì òe ia ù hou te fenua i hämanihia ai ra. 25 E ta ù Metua Parau tià e, aore ä hoì to te ao i ìte ia òe, ua ìte rä vau ia òe e ua ìte hoì rätou nei e na òe au i tono mai. 26 E ua faaìte atu hoì au ia rätou, e faaìte atu ä vau i to òe iòa, ia herehia mai rätou i to hereraa mai ia ù nei ra, e o vau hoì e pärahi i roto ia rätou.

Manaò

I roto i teie tuhaa no te pure tahuà, e aore e parau tütuu na Ietu i ta na mau pipi e tae noa atu i te mau taata atoà e faaroo i ta rätou ra mau haapiiraa. I te faaìteraa a te ìrava 20 Aore hoì au i pure ia rätou anaè nei, i te feiä atoà rä e faaroo mai ia ù i ta rätou ra haapiiraa. Teie reo to Ietu te faaìte nei te àanoraa te òhipa e tupu na roto i teie pure, e pure tei haamau te papa o te Ètärëtia ia ìtehia te hinuhinu o te Atua i te fenua nei. E tamata tätou e haafatata i pïhaì iho i teie reo no Ietu, mai te mea te parau mai nei ò ia ia tätou i roto i te hoê taime faufaa no to tätou oraraa. E piti pupu taata teie o ta Ietu e tuu nei i mua i te Metua i te parauraa e rätou anaè nei, e teie reo e i te feiä atoà rä na teie na manaò e faaìte ra te mau taata atoà e faaroo e taiò i teie pure te vai nei te hopoià i roto. Mai teie e faaìtehia nei i to tätou faarooraa i te mau parau tei faaìtehia i roto i te papa haamori, te vai nei te mau parau e täuturu nei i te ìteraa te mau tïtauraa e au no te oraraa faaroo o te tävini, e ta na mau haapiiraa.

  • Taramo 97, 11 Ua ueuehia te märamarama na te feiä parau-tià ra, e te òaòa na te feiä i tià te âau ra.
  • Òhipa 7, 59 te pure noa ra o ia, te nä ô ra E ta ù Fatu, e Ietu e, a rave mai òe i ta ù värua 60 Topa turi iho ra o ia, ua pii hua atu ra te reo E te Fatu, eiaha teie nei hara e häio tià ia rätou nei. E teie te nä-reira-raa ra, maìri atu ra ta na taòto.
  • Àpotarupo 22, 15 Âreà to räpaeàu ra, e ùrï ia, e te tahutahu, e te faaturi, e te täparahi taata, e te haamori îtoro, e te feiä atoà e hinaaro e ua parau i te parau haavare ra.

E tano ia, ia parau e te pure ta Ietu e pure nei no te mau tävini atoà o te faaäuraa mätamua, e no te mau tävini i teie mahana e no te tau e a muri atu. E mau parau puai teie e faaìtehia nei ia tätou nahea i te türamaraa i te nünaa o te Atua i nià i te èà tià no te parau mau ia tià te parau i nià i te fäito e hinuhinu ai te Atua Metua. I teie täpura òhipa e faaìtehia nei e te Àpotarupo,

  • to räpaeàu ra, e ùrï ia,
  • te tahutahu,
  • te faaturi,
  • te täparahi taata,
  • te haamori îtoro,
  • te feiä atoà e hinaaro e parau
  • te parau haavare ra.

Teie te täpura òhipa e tuuhia nei i mua i te mau tävini, e nahea, e aha te raveà, i roto i te pure a Ietu te raveà e vai ra ia faaroo i te haapiiraa. E parau tià roa teie, e rave rahi haapiiraa e faanaòhia nei e tätou te tïtau noa ra i te taata ia ìte, ia faaroo, e ia färii. Ia faaroo tätou teie reo to Ietu, i te feiä atoà i faaroo ta rätou haapiiraa, te turäma nei teie reo i te ôtià òre i te haapiiraa i te taata, to räpaeàu e to roto. I te mea ua ìritihia te ùputa òhiparaa, e tià anei te haapiiraa ia vai hoène noa ia täpoìpoìhia i te mau peu e òre ai te hinuhinu o te Atua. No te aha te faahoì pinepine nei Ietu i te taò Rätou, i roto i teie tuhuà no ta na pure e faaìteraa teie, te vai noa ra te rähiraa òhipa i te mau vahi atoà e orahia ra e te taata.

Àita te Atua i rahu i te pöuri, te märamarama te ùputa ia o te ora ta te mana o te Parau a te Atua i ìriti. Ia hiòhia anaè tätou i te òhipa i tupu ua parau iho ä te Atua èi ia märamarama, ua märamarama iho ra i muri iho teie märamarama te türama ra, i te mau òhipa atoà ta te Atua i rave, ua parau te Atua ua tupu, ua hiò te Atua ua mauruüru te Atua te mea ta na i faatupu, e ua parau mea maitaì roa, ua parau, ua tupu, e te Atua iho tera e haapäpü ra e mea maitaì roa, aita hoê taime te Atua i parau e, te vai ra te tahi mea aita i àfaro maitaì, te auraa ra te mau òhipa ta te Atua i rave, no te faaìte ia i te taata te täpaò no to na aroha e to na here ia na. No te mea ia parau anaè tätou te ùputa, e aha te ùputa te tahi vahi e na reira tätou i te ìte i te mea e vai ra i ò mai, i roto i teie ìritiraa te Atua i te ùputa o te märamarama e aha te mea ta tätou e ìte atu ra te vai ra iho ä te rahu tei faaìte mai te maitaì ta te Atua i faaineine no te taata mea täno tätou ia tütonu maitaì i nià i tera vahi te faaìte mai ra te reira te maitaì ta te Atua i faaineine no te taata e te reira mau maitaì no te faaìte ä ia i te taata to na aroha e to na here, ia haapoto-anaè-hia te mau mea atoà ta tätou e ìte nei i teie mahana te mea faaî nei i te fenua, te tai e te reva e tae noa atu to raro i te fenua tei òre tätou e ìte, no te faaìte ia i te taata i te aroha e te here o te Atua.

Te faaitoito noa ra te reo o te Taramo 97 i te mau tävini i te ìrava 11 Ua ueuehia te märamarama na te feiä parau-tià ra, e te òaòa na te feiä i tià te âau ra.

Ia ora na.

Haamaitaì tätou i te Atua i te himene.

Himene.

Parau faaära

Pupuraa moni

Pure Ärai

Himene

Pure a te Fatu

Faaitoitoraa

Haamaitaìraa.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens