Overblog Suivre ce blog
Editer l'article Administration Créer mon blog
27 avril 2016 3 27 /04 /avril /2016 11:23

Tāpati 24 no Èperera 2016

Haamoriraa.

E tià mai tätou, na te Taramo 145 e ômua i to tätou haamoriraa i teie mahana te ìrava 1 Taramo haamaitaì na Tävita. E faateitei ä vau ia òe, e ta ù Atua, e te Arii, e haamaitaì ä vau i to òe ra iòa e a muri noa atu.2 E haamaitaì ä vau ia òe i te mau mahana atoà nei, e ârue au i to iòa e a muri noa atu. 3 E rahi te Fatu, e ia haamaitaì-rahi-hia, oia ä ia, e òre to na rahi e ìteä ia ìmi.4 Te mau uì atoà të faarahi i ta òe òhipa, e e faaìte hoì i ta òe ra òhipa mana. 5 E parau vau i te tura e te hanahana o to òe ra mana, e te mau räveà taa ê na òe ra.6 E parau rätou i te mana o ta òe ra mau räveà mataù, e faaìte hoì au i to òe ra mana.7 E parau ä rätou i te manaòraa o to òe ra maitaì rahi, e himene hua hoì i ta òe ra parau-tià.

Haamaitaì tätou i te Atua i te reo himene.

Himene

Pärahi tätou

8 E hämani maitaì e te aroha to te Fatu, e òre e riri vave, e te faaherehere rahi. 9 Hämani maitaì to te Fatu i te taata atoà, e te vai ra to na aroha faaherehere rahi i nià i to na atoà ra mau òhipa. 10 E ârue anaè ta òe atoà ra mau òhipa ia òe, e te Fatu, e na to mau tävini moà e haamaitaì ia òe. 11 E parau rätou i te hanahana o to òe ra pätireia, e faatià noa hoì i ta òe ra mau räveà püai.12 I te faaìteraa i te tamarii a te taata nei i to na ra mana, e te hanahana e te manaò to na ra pätireia.13 O to òe ra pätireia, e pätireia mure òre ia, e to òe ra mana, e tae ia i te mau uì atoà ra. E Atua mau te Atua e te haavare òre i roto i ta na mau òhipa.14 Te mau ra te Fatu i te feiä e hià ra, e ua faatià i te feiä e piò i raro ra. 15 Te hiò nei te mata o te mau mea atoà nei ia òe, e te horoà mai ra òe i te mäa na rätou i te tau mau. 16 Te heheu nei òe i to rima, e te haamäha nei i te hiaai o te mau mea ora atoà nei.17 E parau-tià ta te Fatu i ta na atoà ra mau haereà, e te hämani maitaì i ta na atoà ra mau òhipa.18 Te fätata mai ra te Fatu i te feiä e tiàoro atu ia na, i te feiä atoà i tiàoro atu ia na mä te haavare òre. 19 E faatià o ia i te hinaaro o te feiä i mataù ia na, e faaroo mai o ia i ta rätou tiàoro, e faaora hoì ia rätou. 20 Te tiaì nei te Fatu i te feiä i hinaaro ia na, âreà te feiä paieti-òre ra, e haamouhia ia e ana. 21 E parau ta ù vaha mä te ârue i te Fatu, e ia haamaitaì te taata atoà i to na ra iòa moà e a muri noa atu.

Haamaitaì tätou i te Atua i te reo himene.

Himene

No te faufaa te mau òhipa i tupu i mua i e aro o e Atua, e faaroo mai tätou i teie nei ia au te faaìteraa a te puta Òhipa i te pene 14 te itoito te tävini o te Atua tei ìte i te i te òhipa mai te ìrava 21 e tae i te ìrava 27 Te hoìraa i Ànetiohia i Turia ìrava 21 E ia parau räua i te Èvaneria i te reira ôire, e rave rahi hoì i tei faarirohia ei pipi, hohoì faahou mai ra räua i Rutetera, e Ìtonio e i Ànetiohia. 22 i te faaitoitoraa i te âau o te mau pipi, e te aòraa atu ia rätou ia mau päpü mäite ä rätou i te parau, e te nä-ô-raa atu e, E nä roto tätou i te pohe rahi e ö atu ai i te Pätireia o te Atua ra. 23 E ia haapaòhia e räua te peretiputero no rätou i te mau Ètärëtia atoà mä te pure e te haapaeraa mäa, ua püpü atu ra räua ia rätou i te Fatu, i ta rätou i faaroo ra. 24 E maìri mai ra Pititia ia räua, tae atu ra räua i Pamefuria. 25 E ia parau räua i te parau i Perete, haere atu ra räua i Àtaria. 26 E mai reira hoì, fano mai ra räua i Ànetiohia, i te vähi i püpühia atu ai räua i te ìte o te Atua, i te òhipa i oti ia räua ra. 27 E tae mai ra räua i reira, ua haaputuputu mai ra räua i te Ètärëtia, e ua faaìte atu ra i ta te Atua i rave ia räua ra, e ua ìriti o ia i te ùputa faarooraa no te Ètene. 28 E parahiraa mäoro to räua i reira e te mau pipi atoà ra.

Haamaitaì tätou i te Atua i te reo himene.

Himene.

O teie ta te puta Àpotarupo faaìteraa no te tupuraa te ôpuaraa faaora a te Atua i te pene 21 i te mau ìrava 1 e tae i te ìrava5 Te raì âpï e te fenua âpï ìrava 1 E ìte atu ra vau i te raì âpï e te fenua âpï. Ua mou hoì tei mütaa iho raì, e tei mütaa iho ra fenua e aore aè ra e miti. 2 E ìte atu ra hoì au, o Ioane i te ôire moà ra, ia Ierutarëma âpï i te pouraa mai, mai ô mai i te Atua i nià i te raì ra ua faanehenehehia mai te vahine i faanehenehehia no te täatiraa i ta na täne ra. 3 Ua faaroo atu ra vau i te hoê reo rahi no te raì mai ra, i te nä-ô-raa mai e Ìnaha tei ô te taata ra te tëtene o te Atua E pärahi o ia i roto ia rätou ra, e ei taata rätou no na, e ei pïhaì-atoà-iho te Atua ia rätou, ei Atua no rätou. 4 E na te Atua e horoi i to rätou roimata atoà, e òre roa te pohe, e te òto, e te mihi, e te mäuiui. E òre atoà ia, no te mea ua mou te mau mea tahito ra.5 E ua parau mai ra tei pärahi i nià iho i te teröno ra Ìnaha, te faaâpï nei au i te mau mea atoà nei. E ua parau mai ra o ia ia ù A päpaì, e parau mau hoì teie nei mau parau, e te haavare òre.

Haamaitaì tätou i te Atua i te reo himene

Himene.

Ta tätou taiòraa èvaneria tei roto i te Ioane pene 13 i te mau ìrava 31 e tae i te ìrava 35, Te faaueraa âpï ìrava 31 E reva atu ra o ia, ua parau atu ra Ietu Ua maitaì te Tamaiti a te taata i teie nei, e ua maitaì hoì te Atua ia na. 32 Ua maitaì te Atua ia na ra, i haamaitaìhia mai o ia i te Atua ia na iho, i teie nei ä hoì te haamaitaìraa ia na. 33 E a ù mau tamarii nei, no pärahirahi aè au io òutou nei. E ìmi òutou ia ù, e ta ù i parau atu i te âti-Iüta ra e Te vähi ta ù e haere nei e òre òutou e tae aè i reira, ta ù ia parau ia òutou i teie nei. 34 E tuu atu vau i te parau âpï na òutou e aroha òutou ia òutou iho, mai ia ù e aroha atu ia òutou na, e aroha atoà hoì òutou ia òutou iho. 35 O te mea teie e ìte ai te taata atoà e, e pipi òutou na ù, ia aroha òutou ia òutou iho.

Manaò

Te parau i faatupu te manaò, tei te ìrava 33 te piti o te tuhaa o te ìrava, e ta ù i parau atu i te âti-Iüta ra e Te vähi ta ù e haere nei e òre òutou e tae aè i reira, ta ù ia parau ia òutou i teie nei. Ia faaroo vau, ia ù iho ia taiò i teie reo to Ietu mai te huru ra e faaotiraa teie na Ietu i nià i te âti-Iüta i to rätou faataupupuraa i te ôpuaraa faaora a te Aua to na Metua. Te horoà atoà nei ra o Ietu na roto i to na reo te òhipa e rave i eie parau âpï e, e aroha òutou ia òutou iho, mai ia ù e aroha atu ia òutou na, e aroha atoà hoì òutou ia òutou iho. Te faaue taata hoê nei o Ietu ia Aroha, ia ìte te taata hoê i te taiòraa i to na reo, te taata hoê i faaroo i to na reo i te òhipa te Aroha e vai ra i roto i to na âau, to na värua e tuhaa te reira noo mai i te Atua ra, tei tupu i roto i te tiàfaahouraa o te Metia, o teie te huru o te pipi âpï o ta Ietu e tïtau nei, ia riro te hoê ei òutou tei täamu i nià i te aa o te tumu hoê, te tumu ra no te Aroha.

Iho

Tamata na ra tätou e haafätata i te reo o Ietu i teie parauraa òutou iho te ìtehia nei te parau o te iho, te iho ra te parau ia o te taata, te ora, faahaere na nià i raro, parau o te nünaa. Ia faaroo tätou i teie huru parauraa, e tano ia parau te haamanaò nei o Ietu i ta na mau pipi e ia tätou, ia vai ära noa i te mau taime atoà te faufaa e vai nei i roto ia tätou ei faatupuraa i te ora o te Aroha e te here. Te hinaaro nei te manaò e faahiti te parau i päpaìhia e Turo a Raapoto i roto i te puta Pinaìnaì o te âau i te àpi 12 e te 13 teie taua parau ra

MÄÒHI

Te iho, te iho, tei hea te iho.

Uri noa ai to ìri i to na uriraa,

E uriraa ia no te ìri. Tei hea rä te iho.

E pee te mähu i te ahu o te mahana,

E teatea te ìri o te pori i te marumaru,

Eita änei te iho e pee, eita änei e marau.

E tau huritau tei taù fenua.

Aue, ua haamä te ohi i te ìteraa i te tumu.

Ua tïpee te ùru i te iho o te hutu päinu,

Ua àriàri te aa o te ohi, ua tata i te hià.

Ua haamere te Mä hi i te iho o te Mä hi,

Ore atu ai e riro ei ohi, ei mea päinu rä.

Te to nei te törea : e iho törea ia.

E töihoiho rä e ia taahi i to iho.

I to reo hoì Taaroa i rahu ai i to fenua.

Mai te reva e pihaa, ia fäì to reo i to iho.

E aha atu ra hoì te faufaa o te âpoo reva ia î,

E aha te faufaa o te Mä hi reo re.

Ia tià mä òe ia òe ; eiaha e tümä ia òe.

A mau tütüaau i te iho i noaa i to fenua,

Te fenua i amo i te marae o to tupuna,

Te iho o te nünaa i parau-atoà-hia ai e e Mä hi.

Eere i te ravarava o to ìri e i to fänauraa òe i Mä hi ai,

E ùru rä, e ùru ia, a tau e a hiti noa atu.

E aha ta teie parau e tïtau mai nei ia tätou, e teie parauraa ta Ietu, e aroha òutou ia òutou iho, mai ia ù e aroha atu ia òutou na, e aroha atoà hoì òutou ia òutou iho.

Ia faaroo tätou i teie na parau, mai te mea ra i te taata e hià ra i te räau ia noaa mai te pura auahi, mai te reira atoà te òhipa ta rätou e rave ra. Eere rä i te hiàraa mätamua e noaa mai ai te pura auahi. Te hiroà atoà ra ia tätou e, no te rahi o to tätou manaò faahapahapa e te tähitohito, e faahoì noa ai te Atua ia tätou i te haamataraa o to tätou parau, mai te tahi taata tei ihu, e tei hoì faahou, aore ra tei faahoì-faahou-hia i te vähi i hahi ai o ia, no te faatïtïàifaro mai i to na èà. Ua ìte maitaì tätou e, i teie mahana, ua ätea roa tätou i te fenua, ua ätea roa i te mau haapiiraa i ärataì mai i te mau metua, e aita tätou e òhie nei i te färiiraa i te parau no te hoìraa e te färii ia tätou iho, e ua tae atoà i te òre-raa e ìte faahou i te aa e mau ra i roto i te fenua. No reira, haamanaò noa tätou e, aita e fifi to te hape, te òreraa rä e färii i te haamata âpï faahou, te reira te mea peàpeà. Te tamarii nei, ia paapaa te rima i te auahi, e faaea o ia i te faatoro i te rima i te vähi i mauiui ai o ia, âreà i teie ta tätou e ìte nei i teie mahana, rahi noa atu te taata i te mauiuiraa, rahi noa atoà atu to na onoöno i te haere i te reira vähi. Te moè-roa-hia nei i te taata, i teie reo to Ietu i te päpaìraa a Mätaio i te pene 22 i te ìrava 32Eere te Atua i te Atua no te taata pohe, no te taata ora rä. Te auraa, eere te pohe o te taata ta te Atua i hinaaro, to na rä ora. No reira e òre ai e tià ia tätou ia färii i te manaò e, te pohe ta tätou e faaruru nei, e färii noa, e tupuraa no te hinaaro o te Atua. Eiaha atoà rä e tiaì noa ia haere roa mai te Atua e haru i to tätou rima no te huti mai ia tätou i räpae i te pohe tei reira tätou i te heiraa.

Parau âpï i roto i te reo o Ietu, e aroha atoà hoì òutou ia òutou iho, te hinaaro o Ietu ia püpühia teie huru taata, i te hohoà o te Atua. I teie mahana ua püpühia tätou. Ia ora na.

Haamaitaì tätou i te Atua i te himene.

Himene.

Parau faaära

Pupuraa moni

Pure Ärai

E tià mai tätou.

Haamaitaì tätou i te Atua i te reo himene.

Himene.

Pure a te Fatu

Faaitoitoraa

Haamaitaìraa.

Teraì òr.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens