Overblog Suivre ce blog
Editer l'article Administration Créer mon blog
16 mars 2016 3 16 /03 /mars /2016 01:46

Tāpati 20 Mati 2016.

NO TE MAU ÂMAA

ÔROÀ

Haamoriraa.

Haamaitaì tätou i te Atua i te reo himene, e tià mai tätou.

Himene.

Ta ù

Te faahanahana nei tätou i te Atua ma te haamaitaì ia au i te faahitiraa a te puta Taramo 22 ìrava 1 Na te Mënätehe, i nià i te Àireta Tahara. Taramo na Tävita. 2 E ta ù Atua, e ta ù Atua, e aha òe i faaruè mai ai ia ù. E aha òe i faaätea ê atu ai i te täuturu ia ù nei. E te haapaò òre mai i to ù nei ùuru.3 E ta ù Atua, te tiàoro nei au i te ao, aita rä òe i parau mai, e te ruì hoì, aita rä o ù e mäpuhiraa aho. 4 Òe rä Tei Moà ra, e tei pärahi i roto i te haamaitaìraa o Ìteraèra e o Mäòhi Nui. 5 I tiàturi na to mätou hui-metua ia òe, ua tiàturi rätou, e ua faaorahia rätou e òe. 6 ua tiàoro rätou ia òe, e ua faaorahia, i tiàturi na ia òe, e aore i maheahea. 7 E toë rä vau nei, eere i te taata, e faaìnoraa na te taata, e ta te taata ia tähitohitoraa. 8 Te feiä atoà e hiò mai ia ù nei, te àta tähitohito mai ra ia ù ua faïta i te ùtu, e ua ueue rätou i te upoo.

Pärahi tätou, haamaitaì tätou i te Atua i te himene.

Himene.

Te Ôpu

A faaroo mai na ra i te huru o te tähi faanahoraa no te faahanahana i teie nei mahana, teie ta te puta Taramo 22 i te ìrava 9 Te na ô mai ra rätou, Oia nei, te tiàturi nei ia i te Fatu, ia faaora o ia ia na tii mai o ia e haru ia na. Ìnaha, e here hoì o ia na na. 10 Na òe au i rave mai mai roto i te ôpu, o to ù ia tiàturiraa, a òte ai i te ü o ta ù metua vahine ra. 11 Ua tuuhia atu vau ia òe mai ta ù fänauraa mai ä, o ta ù Atua hoì òe mai te ôpu mai ä o ta ù metua vahine. 12 Eiaha e faaätea ê atu ia ù, ia fätata mai te àti ra e aita atu e täuturu ia täuturu mai 13 E rave rahi te puaatoro e haaàti mai ia ù nei, te mau puaatoro àito o Patana teie e haaàti mai ia ù nei.14 Te hämama mai ra to rätou mau vaha ia ù, mai te riona ùuru ra ia ìmi i te mäa. 15 Mai te päpe e niniihia ra vau, e ua paruparu ta ù mau ïvi, mai te täpau nei ta ù âau, ua tärapape i roto i ta ù ôpu nei. 16 Ua marô to ù püai mai te àraea a te pötera ra ua piri ta ù arero i ta ù taa e ua tuu òe ia ù i raro i te repo pohe ra. 17 Ua haaàtihia vau e te ùrï ra ua haapunihia vau i te âmuiraa taata ìno ra; ua puta o ù puè rima e o ù puè âvae ia rätou. 18 E täiò noa vau i o ù mau ïvi. Te hiò mai ra rätou, te tiàtonu mai ra ia ù, 19 ua tufa rätou i ta ù mau àhu ra no rätou, e te haamaìri tërero nei i ta ù pereue. 20 Eiaha òe, e te Fatu, e faaätea ê atu ia ù nei, e ta ù püai, ia peepee mai òe i te täuturu mai ia ù. 21 E faaora òe ia ù i te òè nei, eiaha vau ia riro i te püai o te ùrï. 22 Ia ora vau i te vaha o te riona, ua faaora hoì òe ia ù i te tara o te reema ra. Ua pähono mai òe ia ù. 23 E faaìte au i to iòa i to ù ra mau taeaè ei rotopü i te âmuiraa ra e haamaitaì atu ai au ia òe.

Haamaitaì i te Atua i te reo himene.

Himene

Òutou

No te faufaa o te mau parau e faahitihia nei, e faaroo tätou i te àanoraa no te mau hinaaro o te mau taata paieti i te parauraa i te pae hopeà no te puta Taramo 22 i te ìrava 24 O òutou o tei mataù i te Fatu ra, e haamaitaì òutou ia na. Òutou atoà te huaai o Iatöpa, o ia ta òutou e faahanahana. O òutou atoà te huaai o Ìteraèra e to Mäòhi Nui, e mataù òutou ia na. 25 aore hoì o ia i vahavaha, aore hoì i faaìno i te àti o te feiä i àti ra, e aore hoì i huna i to na mata ia na, ia tiàoro rä o ia ra, ua faaroo mai ra o ia ia na 26 O òe ta ù e haamaitaì i roto i te âmuiraa rahi ra. E rave au i ta ù i èuhe ra, i te aro o te feiä e mataù ia na ra. 27 E àmu te feiä haèhaa e ia paìa. O tei ìmi i te Fatu ra e haamaitaì rätou ia na, e vai ä te ànaànaea o to rätou âau. 28 To te fenua nei e tae noa atu i te hopeà ra, e riro ia i te manaò e ua färiu mai i te Fatu. E hope te mau fëtii a te ao nei i te haamori i mua ia òe. 29 No te Fatu hoì te Pätireia, e o ia te tavana i te mau fenua atoà. 30 E àmu te feiä taoà o te fenua nei, e e haamori, e te feiä atoà e tae i raro i te repo, e piò ia i mua ia na, e e òre e tià i te hoê ia faaora ia na iho ra. 31 Na te tahi pae huaai e faaroo ia na, e e parauhia ia ei taata no te Fatu, 32 e haere mai hoì rätou e faaìte i ta na ra parau-tià i te tahi mau taata èe ra ia fänau mai, na na hoì teie i rave.

Haamaitaì tätou i te Atua i te himene.

Himene

Arero

I mua i te parau i päpaìhia e te puta Ìtaia i te pene 50 i te mau ìrava 4 e te tae i te ìrava 7, ìrava 4 Ua horoà mai te Fatu ra o te Fatu ia ù i te arero o te feiä ìte, ia e haru mai i parau atu i te parau au i tei rohirohi ra. Te faaära nei o ia i tera poìpoì, i te poìpoì, te faaära nei o ia i ta ù tärià, ia haapaò vau mai te taata e haapii ra. 5 Ua haafätata te Fatu ra o te Fatu i ta ù tärià, e aore hoì au i pätoì atu, aore hoì au i ôraì tià i muri. 6 Ua tuu noa atu vau i ta ù tua i te feiä i täìri mai, e ta ù päpärià i te feiä i hühuti i te ùmiùmi, aore hoì au i huna ê atu i te vahavaha e te tufatufa haere. 7 E täuturu mai ä te Fatu ra o te Fatu ia ù, i òre ai au i haamä ai i haamau ai au i ta ù mata mai te ôfaì ra ua ìte hoì au, e òre au e haamä.

Haamaitaì tätou i te Atua i te himene.

Himene.

Huru

E tià mai tätou no te faaroo i ta Pauro e faaìteraa i te Ètärëtia i te haèhaa o te Metia i to Firipi e i Mäòhi Nui nei. Firipi i te pene 2, i te ìrava 6 e tae i te ìrava 11, ìrava 6 O te huru ia o ia no te Atua, e aore o ia i parau e haru töroà ia fäito atoà o ia i te Atua. 7 Haapae atu ra rä i to na iho, rave atu ra i to te tävini ra huru, i te fänauraa mai mä te huru o te taata nei. 8 E no te mea o ia i ìtea mai te taata nei i te huru, ua faahaèhaa o ia ia na iho, i te haapaò-mäite-raa e tae noa atu ra i te pohe, i te pohe tätauro ra. 9 I faateitei roa atu ai te Atua ia na, e ua horoà hoì i te iòa i hau ê roa i te mau iòa atoà nei no na. 10 ia tuu te mau turi atoà i raro, to te raì, to nià i te fenua e to raro aè i te fenua, i te iòa o Ietu ra. 11 e ia fäì te mau vaha atoà, e o Ietu Metia te Fatu, e hanahana atu te Atua Metua ra.

Pärahi tätou, haamaitaì tätou i te Atua i te himene.

Himene.

Faaroo mai na ra tätou i te parau o te Fatu ra o Ietu, i te päpaìraa a Ruta èvaneria i te pene Ruta èv. Pene 19, i te mau ìrava 28 e tae i te 40.

To Ietu tomoraa i roto ia Ierutarëma

(O tei päpaì-atoà-hia e Mät 21,1-11; e Mär 11,1-11; e o Ioane 12,12-19).

Ìrava 28 E oti aè ra taua parau nei, nä mua atu ra Ietu i te haereraa atu i Ierutarëma. 29 E fätata mai ra Petefäte e Pëtänia ia na, i te mouà i parauhia ra, Òriveta, ua tono aè ra o ia i e toopiti puè pipi a na ra, 30 nä ô atu ra E haere òrua i tera ra òire ïti e ia tomo òrua i roto ra, e ìte òrua i te hoê fänauà âtini i te fëtii-raa-hia, aore ä i pärahihia e te taata i nià iho e tätara e pütö mai. 31 E ia ui mai te hoê taata ia òrua, E aha òrua i tätara ai. E nä ô atu òrua ia na, No te mea e au teie i te Fatu. 32 Haere atu ra räua o tei tonohia ra, e roohia atu o ia mau atu ra ta na i parau atu ia räua ra. 33 E tei te tätararaa räua i taua fänauà âtini ra, ua parau mai ra te feiä fatu ia räua ra. E aha òrua i tätara ai i te fänauà âtini ra. 34 Ua parau atu ra räua, E au teie i te Fatu. 35 Ua pütö mai ra räua i taua âtini ra ia Ietu ra; ua tuu iho ra i to rätou àhu i nià iho i taua fänauà ra, haapärahi iho ra ia Ietu i nià iho. 36 Ua vauvau iho ra te taata i to rätou àhu i te äratià i taua haereà no na ra. 37 E fätata mai ra te òire ia na, i te tumu o te mouà ra Òriveta, ua pii noa iho ra taua tiàa rahi pipi atoà ra i te haamaitaìraa i te Atua, i te mau temeio atoà ta rätou i ìte ra, 38 nä ô aè ra, Ia ora na te Arii i te haereà mai mä te iòa o te Fatu ra. Ei hau to te raì, e te haamaitaì i te vähi teitei 39 Ua parau mai ra e toofanu puè Färitea no roto i taua tiàa rahi ra ia na. E te Òrometua, e aò aè na òe i to mau pipi nei.40 Ua parau atu ra o ia ia rätou, nä ô atu ra:

Teie ta ù parau ia òutou, ia mämü noa rätou nei, ua pii noa mai ia te mau ôfaì nei.

Manaò

I teie ao e orahia nei e tätou te ìtehia ra te haapaò òre i te ùuru o te mau taata tei topa i roto i te mau faanahoraa rau o te mau hinaaro ei faatupuraa i te ora i te iòa o te faahotu rau ia maitaì te oraraa vaamataèinaa o te nünaa o te ao nei. Noa atu ra, teie mau òhipa tei òre e au i te oraraa âmui no te mau nünaa o te ao nei. E te pure atoà nei te taata ma te tuutuu òre i te parauraa e, e to mätou Atua, te tiàoro nei mätou i te ao, aita rä òe i parau mai, e te ruì hoì, aita rä o mätou e mäpuhiraa aho. I roto i teie mau parauraa, te na ô mai ra rätou, Oia nei, te tiàturi nei ia i te Fatu, èi faaora i te ao nei ia tii mai e ärataì, i te nünaa o te ao nei, ia ìte i te tumu i ta te Atua faatupuraa i te ora. I teie faahitiraa a te Taramo 22 i te ìrava 11 Ua tuuhia atu vau ia òe mai ta ù fänauraa mai ä, o ta ù Atua hoì òe mai te ôpu mai ä o ta ù metua vahine. E te ìrava 12 Eiaha e faaätea ê atu ia ù, ia fätata mai te àti ra e aita atu e täuturu ia täuturu mai, e teie huru parauraa i te ìrava 13 E rave rahi te puaatoro e haaàti mai ia ù nei, te mau puaatoro àito o Patana teie e haaàti mai ia ù nei. Te ìte nei te päpaì Taramo i te mau faanahoraa e tupu i nià i te tävini o te parau tià e te parau mau, e türaì ä teie mau manaò i nià i te hoê vahi manaò-òre-hia ta te ìrava 14 e faahiti ra te hämama mai ra to rätou mau vaha ia ù, mai te riona ùuru ra ia ìmi i te mäa. Te hiò mai ra rätou, te tiàtonu mai ra ia ù, te ìrava19 ua tufa rätou i ta ù mau àhu ra no rätou, e te haamaìri tërero nei i ta ù pereue. E parau faatupu òhipa teie e faaroohia nei e tätou, tei papahia i nià i te tumu o te fänau, no te mea na te huaai e faaroo, e parauhia ia ei taata no te Fatu, e haere mai hoì rätou e faaìte i ta na ra parau-tià i te tahi mau taata èe ra ia fänau mai, na na hoì teie i rave. Ua horoà mai te Fatu ra o te Fatu i te huaai i te arero o te feiä ìte, ia haru mai ia parau atu i te parau au i tei rohirohi ra. Ia rohirohi te tahi ra, te puoì mai ra te reira ia tupu noa te mau parau i te faanahoraa a te Atua, ia tià i te parau e, E au teie i te Fatu. E tïtauraa teie ia tätou i te taata faaroo i teie täpati no te mau âmaa, èi âpeeraa i to ta Fatu te Metia te Ora o te Ètärëtia Porotetani Mäòhi ia hämama noa i te vaha i te faaìteraa i te maitaì o te Rähu, ia mämü ra e pii noa mai ia te mau ôfaì nei.

Ia mämü noa rätou nei, ua pii noa mai ia te mau ôfaì nei.

Tei te pene 19 i te päpaìraa a Ruta èvaneria teie parau i te ìrava 40 i te pae hopeà.

Naò ia tätou i te parauraa e, e tuu te Atua i te arero no te mau rähu arero òre, no te mea ua mämü ta te Atua i hämani te arero. O teie te tahi parau faufaa e vai nei i roto i te mau parau i faaroohia e tätou, èi àvariraa na tätou i te hepetoma moà.

Ia mämü tätou, e pii noa mai te mau ôfaì.

Ua ineine noa te mau ôfaì i te pii haamaitaì i te Atua, ia mämü te taata. O vai të tano e haapäpü mai ia tätou i teie parau ta Ietu e faahiti nei. Mäuti ra ia te Atua iho no te mea o te Atua te tumu o te reo. Mai te òhipa i tupu i te mahana o Ietu i tono mai ai i te Värua Moà i nià i ta na mau pipi e i parau ai rätou i te mau reo ìte-òre-hia e rätou, ia faaroo tätou i teie reo to Ietu mai te mea ra o tätou terä e parauhia ra, ia färii tätou teie parau. Te mea faufaa i roto i teie parauraa a Ietu, eere te huru e te hohoà mata o te taata tätaì tahi, te huru rä e te hohoà o te Atua tei hinaarohia i te taata i roto i to rätou rauraa ia faaìte. Ia rau hoì te taata, e rau atoà ia ta tätou hiòraa i te Atua, e rau hoì te iòa ta tätou e horoà no te Atua, aita rä te reira e haafifi ra i te parau o te ôfaì i ta te Atua i faatupu i roto i te rähu, ìnaha e tupuraa te reira no to na hinaaro. Te parau o te fenua teie ta Ietu e faahiti nei eere änei e, te parau atoà ia o te taata mä to na reo, to na hiroà, ta na peu, e ta na huru faanahoraa i te oraraa. E maere änei ia tätou ia taa ê ta te tahi hiòraa i te oraraa i ta te tahi, ia taa ê hoì ta na marämaramaraa i te auraa e täamu ra ia na i te Atua i ta te tahi atu nünaa. Te reira te auraa o te parau o ta Ietu e hinaaro i te faaìte te hoê i roto i te piiraa rau noa atu ai te reo eiaha ra ia mämü. Te tïtau nei o Ietu i te hoêraa o te mau reo ia pii, e faufaa te reira i höroàhia e te Atua i roto i te taata ia haamata i te faanaho i to na manaò, na roto i te parau, te faaìte, te poroì, te himene, ia ineine te täuturu i te ôpuaraa faaora a te Atua.

E tuhaa faufaa roa ta tätou e faanaho i teie hepetoma, no te mea e faahanahana tätou i te ora e to na mau faanahoraa ma te âpeehia e te Rähu a te Atua. Ia haamanaò tätou i te mau parau i roto i te mau taiòraa tei papa i te haamoriraa i teie mahana te faahitihia ra te parau no te mau ânimara, tei faaòhipa-atoà-hia e Ietu no te tomo i roto i te òire no te Hau, i reira te mau fëtii o te ao nei e faahanahana ai i te iòa o te Atua Tumu Nui.

Te hinaaro o te Atua i te taata aita i täôtiàhia i nià i te mea tei oti ia na i te rave, aore ra te mea tei noaa mai ia na, e tano ia parauhia e, e hinaaro tüatau to te Atua i te taata. Te faaitoito nei teie parau ma te faaara noa ia tätou, te vai ra hoì te taime e ara, te vai ra rä te taime, eita roa atu e ara aore ra, ua ara te värua, eita rä te tino e pähono, oia hoì eita te reira hinaaro e riro mai ei òhipa ìtehia to na tupuraa. Te manaò tumu o te pii ta Ietu e parau nei, te tahi ia mea ia vai tämau, te tahi mea mutu òre to na tupuraa i roto i te tau. E ravehia no te faaìte i te òaòa o te tahi taata i te hiòraa, te mätaìtaìraa, te faarooraa i te tahi mea, aore ra te àmuraa i te tahi mäa. Ua riro te piiraa, ei òaòaraa, e te mea atoà hoì te reira e faaòaòa i te Fatu ra ia Ietu. No reira, te taata tei ìte i te here e te aroha o te Atua èita o ia e mämü, èita atoà e vaiiho na te ôfaì e pii, e taata tei riro i te òaòaraa tämau e te faatupuraa i te aroha. Eere no te mea ua faauehia i rave ai o ia i te tahi òhipa, mai te taata rä të òre e tiaì ia parauhia atu e huti i te aho no te huti i te aho, mai te reira atoà te taata ia pii. E tano tätou e faaäu i teie taata i te tahi räau ta te fenua i horoà i te ora, te tupu, e te hotu, nä roto rä i to na rau e to na hotu, te haamaitaì atoà ra teie räau i te fenua e haamaitaì ra i to na tupu. Te manaò hau e te faufaa ta teie taò Pii i te parauraa a Ietu e faaö mai ra, teie ia manaò no te òaòa tei riro ei tumu, oia hoì ei haamataraa e ei faahopeàraa no te tupuraa o te parau o te here e te aroha. A pii anaè mai ta te ìrava 38 i te päpaìraa a Ruta èvaneria nä ô aè ra, Ia ora na te Arii i te haereà mai mä te iòa o te Fatu ra. Ei hau to te raì, e te haamaitaì i te vähi teitei. Oia atoà te parauraa a Ìtaia i te pene 50 i te ìrava 4 Ua horoà mai te Fatu ra o te Fatu ia ù i te arero o te feiä ìte, ia e haru mai i parau atu i te parau au i tei rohirohi ra. Te faaära nei o ia i tera poìpoì, i te poìpoì, te faaära nei o ia i ta ù tärià, ia haapaò vau mai te taata e haapii ra. Ia ora na.

Haamaitaì tätou i te Atua i te reo himene.

Himene.

Pure

Parau faaära

Pupuraa moni

Ôroà a te Fatu

Pure a te Fatu

Faaitoitoraa.

Haamaitaìraa

Partager cet article

Repost 0
Published by Mapuanga terai - dans Aòraa
commenter cet article

commentaires

Tinorua Raiarii 30/03/2016 02:19

il faudra te relire des fois, parce que il y a des mots ou des lettres qui manquent ou intervertis.
merci pour ton travail.

Mapuanga terai 08/04/2016 18:57

excuse pour le décalage des mots, merci pour le soutient

Mapuanga terai 08/04/2016 18:50

je viens de publier

Mapuanga terai 08/04/2016 18:50

Merci pour

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens