Overblog Suivre ce blog
Editer l'article Administration Créer mon blog
24 mars 2016 4 24 /03 /mars /2016 00:12

Tāpati 3 no Èperera 2016.

ÔROÀ

Haamoriraa

Te reo

Te ômuaraa o teie maräma no Èperera e faaroo mai tätou i te Taramo 29, teie faahitiraa a te ìrava 1 Taramo na Tävita. Te tumu o teie parau teie ia, E tuu atu ia te Fatu, e te feiä püai e, e tuu atu ia te Fatu i te hanahana e te mana. 2 E tuu atu ia te Fatu i te hanahana e au i to na ra iòa. E haamori ia te Fatu mä te tura moà ra. 3 Tei nià tei te moana te reo o te Fatu. Te haruru mai ra te pätiri o te Atua hanahana ra o te Fatu, tei nià i te moana rahi ra. 4 E püai rahi to te reo o te Fatu, e mana rahi to te reo o te Fatu. 5 Te reo o te Fatu tei haaparari i te mau âreti, Na te Fatu i haaparari i te mau âreti i Repanona, e i Mäòhi Nui atoà.

Haamaitaì tätou i te Atua i te reo himene, e tià mai tätou.

Himene.

Te ìrava 6 E faaôuà o ia ia rätou mai te täfa, e o Repanona e o Tiriona mai te reema âpï ra. 7 Na te reo o te Fatu i haapurara i te mau uira. 8 Na te reo o te Fatu i faaaueue i te mëtëpara, e te Moana Nui o Hiva, Na te Fatu i faaâueue i te mëtëpara ra o Tateta e o Mäòhi Nui. 9 No te reo o te Fatu i fänau ai te mau àiri, e ua ôfenefene roa i te mau räau o te vähi ururaau ra. E te mau mea atoà i roto i to na ra fare, tei faaìte i te hanahana.10 Te pärahi ra te Fatu i nià i te Moana Nui o Hiva, te pärahi ra te Fatu ei arii, e a muri noa atu. 11 E horoà maite Fatu i te püai no to na ra taata, e haamaitaì mai te Fatu i to na taata i te tuuraa mai i te hau ra.

Pärahi tätou, haamaitaì tätou i te Atua i te reo himene.

Himene.

Faaroo iho nei tätou i te puai o te reo i roto i te taata, te rähu tei faatupu i te hanahana e te mana e tià ia parauhia e faanahoraa òhipa teie ta te Atua i tuu i te mau vahi tei ère i to na mau hinaaro, e vai iho tätou te reira na te puta Òhipa e turäma ia tätou, Òhipa i te pene 5 i te mau ìrava 12 e tae i te ìrava16 teie te tumu o te parau, Te mau täpaò e rave rahi, ìrava12 E rave rahi te täpaò e te temeio i ravehia e te rima o te mau âpotetoro ra i röpü i te taata atoà, e taìruru aè ra rätou atoà i roto i te Poretito o Toromona ra. 13 Âreà te hoê pae ra, aore roa ia i te hoê i âmui tià mai ia rätou i te mataù, ua âruehia rä rätou e te taata. 14 Te feiä rä i faaroo i te Fatu ra, e rave rahi roa atu ra ia tei âmui mai ia rätou ra, te täne e te vahine atoà hoì. 15 E hopoi mai ra rätou i te feiä maì i räpae i te mau aroä ra, tuu iho ra i nià i te roì e te roì rii hopohopoi ra, peneiaè o te àèa vëtahi e te ata o Pëtero ia haere nä reira iho ra. 16 E rave rahi hoì to te mau òire ra i haere mai e àti noa aè, i te hopoiraa mai i te feiä maì e te feiä i peàpeà i te värua faufau i Ierutarëma, e faaora-anaè-hia iho ra rätou atoà.

Haamaitaì tätou i te Atua i te reo himene.

Himene.

E faaroo tätou i teie nei i te parau no te hoê o te mau tävini o te Metia tei òre toàruàru te tiàturi i mua i te mau haafifiraa rau o te oraraa ta te puta Àpotarupo e faaìte ma ia tätou i te pene 1 i te mau ìrava 9 e tae i te ìrava 19 te naò nei te tumu Te ôrama o te Metia ìrava 9 O vau nei, o Ioane, o to òutou taeaè, e te au hoì i te àti, i te Pätireia e te faaòromai o Ietu Metia ra, i te fenua vau i parauhia ra e, o Pätamo, no te parau a te Atua, e no ta ù ra faaìteraa ia Ietu Metia ra. 10 I riro vau i te Värua i te mahana o te Fatu ra, e faaroo aè ra vau i te hoê reo rahi i muri aè ia ù ra, mä te òto pü ra, 11 i te nä-ô-raa mai e, O vau te Ârefa e te Ômeta, te matamehaì e te faahopeà; e ta òe e ìte nei, e päpaì i roto i te hoê puta, a häpono atu ai i nä Ètärëtia e hitu i Àtia ra i tei Èfetia ra, e Temurina, e Peretamo, e Tuatira, e Tarati, e Firaterefia, e Raotitea ra.12 Ua färiu aè ra vau e hiò i taua reo i parau mai ia ù ra. E tei taua färiuraa no ù ra, ìte atu ra vau i e hitu rämepa àuro ra; 13 e te hoê mai te Tamaiti o te taata te huru, i rotopü i taua nä rämepa e hitu ra, te àhu ra i te àhu e raro roa i te âvae, e ua tätuahia te ôuma i te tätua àuro. 14 E te rouru i ta na upoo ra mai te vavai ra ia i te teatea, e mai te hiona, e mai te ura auahi ra o na mata. 15 e mai te veo maitaì ia àma i te tura ra o na âvae, e to na reo mai te haruru ia o te miti rahi ra. 16 Te täpeà ra ta na rima àtau i nä fetià e hitu ra, e te hoê òè òoi mata piti ra mai roto atu i to na vaha, e to na mata mai te mahana ra ia e ànaana mai i te avatea ra. 17 E ta ù hiòraa atu ia na ra, hià iho ra vau i raro i ta na pae âvae, mai te taata pohe roa ra. Ua tuu mai ra i ta na rima àtau i nià iho ia ù, e ua nä ô mai ra ia ù Eiaha e mataù O vau te matamehaì e te faahopeà. 18 O vau teie e ora nei. Pohe noa ai au, e ìnaha, e tià vau i te oraraa e a muri noa atu. Âmene. E tei ia ù te täviri o te pohe e to häte. 19 E tënä na, e päpaì òe i te mau mea ta òe i ìte iho nei, e te mau mea e vai nei, e te mau mea e tupu a muri nei.

Haamaitaì tätou i te Atua i te reo himene.

Himene.

Faaroo mai tätou i teie nei te mau parau no te Metia i te ahiahi no te hepetoma matamua i te päpaìraa a Ioane i te pene 20 i te mau ìrava 19 e tae i te ìrava 31.

Te färaa mai Ietu i ta na ra mau pipi, oia atoà na päpaì èvaneria hiò âmui te faahiti ra teie parau faufaa, (Mät 28,16-20; Mär 16,14-18; Ruta èv 24,36-49) ìrava 19 E i te ahiahi o taua mahana matamua o te hepetoma ra, ua putuputu mai ra te mau pipi, ua ôpanihia nä ôpani i te mataù i te âti-Iüta ra. Ua haere mai ra Ietu i reira ra, tià noa iho ra i röpü, ua parau mai ra ia rätou Ia ora na òutou. 20 I nä reira mai o ia, e ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra. 21 Ua parau faahou mai ra Ietu ia rätou, Ia ora na òutou, Mai ta ù Metua hoì i tono mai ia ù nei ra, e tono atoà hoì au ia òutou na. 22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra, A färii i te Värua Maitaì. 23 Ta òutou i faaòre i ta rätou hara ra, ua faaòrehia ia, e ta òutou hoì i vaiiho i ta rätou hara ra, ua vaiihohia ia.

To Toma ìte-roa-raa i te Fatu

24 E te hoê o te Àhuru mä piti ra, o Toma, o të parauhia ia, ia Titimo ra, aore rä ia ia rätou ra a tae mai ai Ietu ra. 25 Ua parau atu ra te mau pipi ra ia na, Ua ìte aè nei mätou i te Fatu ua parau mai ra o ia ia rätou i òre au i ìte i te puta âuri i ta na rima ra, e aore i tuu i ta ù rima i taua puta âuri ra, e aore hoì ta ù rima i tuu i ta na àoào ra, e òre roa ia vau e faaroo. 26 E ruì varu aè ra, tei roto faahou atu ra te mau pipi i te fare, e o Toma atoà hoì, ua haere mai ra Ietu, ua ôpanihia nä ôpani, ua tià mai ra o ia i röpü, ua parau mai ra, Ia ora na òutou. 27 Ua färiu mai ra ia Toma, ua parau mai ra, A faatoro mai na to rima, e a hiò mai na hoì i ta ù rima nei; e a faatoro mai na hoì i to rima e fäfä i taù àoào. Eiaha e faaroo taìàtä, e faaroo rä 28 Ua parau atu ra Toma ia na, nä ô atu ra E ta ù Fatu, e ta ù Atua 29 Ua parau mai ra Ietu ia na, No te mea te hiò mai nei òe ia ù, e Toma, i faaroo ai òe. E ao to te feiä aore i ìte ia ù a faaroo mai ai. Tei ia na te Tamaiti ra, tei ia na ia taua ora ra 30 E rave rahi atu ä te täpaò a Ietu i rave i mua i te aro o ta na mau pipi ra, aore i päpaìhia i roto i teie nei puta. 31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Manaò

Te tahi parau faufaa e vai nei i roto i te mau ìrava i faaroohia aè nei e tätou teie ia, E ua haapüaì mai ra i te aho i nià ia rätou ra, e ua parau mai ra, A färii i te Värua Maitaì. E parau faatupu òhipa teie mai te mea ra te hinaaro nei o te Metia e hämani faahou te taata, ia au i te tïtauraa a te Atua. Tämata na tätou i te faaroo mai te tahi mau ìrava i faahitihia aè nei i roto i te papa haamori i te faahitiraa a te Àpotarupo i te pene 1, ìrava • 10 I riro vau i te Värua i te mahana o te Fatu ra, e faaroo aè ra vau i te hoê reo rahi i muri aè ia ù ra, mä te òto pü ra, ìrava 11 i te nä-ô-raa mai e, O vau te Ârefa e te Ômeta, te matamehaì e te faahopeà; e ta òe e ìte nei, e päpaì i roto i te hoê puta, a häpono atu ai i nä Ètärëtia e hitu i Àtia ra i tei Èfetia ra, e Temurina, e Peretamo, e Tuatira, e Tarati, e Firaterefia, e Raotitea ra. Ìrava 12 Ua färiu aè ra vau e hiò i taua reo i parau mai ia ù ra. Te Ioane pene 20 i te ìrava • 21 Ua parau faahou mai ra Ietu ia rätou, Ia ora na òutou, Mai ta ù Metua hoì i tono mai ia ù nei ra, e tono atoà hoì au ia òutou na. Te ìrava 22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra, A färii i te Värua Maitaì. Ìrava • 25 Ua parau atu ra te mau pipi ra ia na, Ua ìte aè nei mätou i te Fatu ua parau mai ra o ia ia rätou i òre au i ìte i te puta âuri i ta na rima ra, e aore i tuu i ta ù rima i taua puta âuri ra, e aore hoì ta ù rima i tuu i ta na àoào ra, e òre roa ia vau e faaroo. Ìrava • 26 E ruì varu aè ra, tei roto faahou atu ra te mau pipi i te fare, e o Toma atoà hoì, ua haere mai ra Ietu, ua ôpanihia nä ôpani, ua tià mai ra o ia i röpü, ua parau mai ra, Ia ora na òutou. Ìrava • 27 Ua färiu mai ra ia Toma, ua parau mai ra, A faatoro mai na to rima, e a hiò mai na hoì i ta ù rima nei; e a faatoro mai na hoì i to rima e fäfä i ta ù àoào.

E tià ia parauhia e, te ìrava 22 i te päpaìraa a Ioane pene 20 maite hoê aho âpï e haapüaì i nià i te mau tävini o te Ètärëtia. E ua haapüaì mai ra i te aho i nià ia rätou ra, e ua parau mai ra, A färii i te Värua Maitaì. I haapüaì na te Atua i to na aho i roto i te fenua riro mai nei èi taata.

Ua horoàhia i te taata te ìte i te färii i te Värua Maitaì, ta te fenua e täuturu noa ra ia na i te mau taime atoà. Te vahi matamua roa ia i faaìtehia e te Atua no te mea, e mea hamanihia te taata. No roto te taata i te fenua, to na hiroà, i parauhia ai e, te hiroà tumu, eiaha ia moèhia i te taata i te haamanaò tei hea to na tumu. Te auraa e taui ta te taata huru hiòraa i te parau o te Värua Maitaì, ia taui anaè ò na i to na vahi mauraa, ta te fenua e haapii ia na, ta to na fenua e haapii ia na, mea ê i ta te tahi atu fenua haapiiraa i te tahi atu nünaa. Oia hoì, ta te reira hiòraa i te Värua Maitaì, eita e tuàti i ta te tahi atu nünaa hiòraa. Te mea rä e tahoê ia tätou, no te mea ia e, e haapii ihoä te fenua i te taata i te mea o ta te Atua e hinaaro ia ìte i te faatupuraa òhipa a te Värua Maitaì. E ère na te taata, e ère te maa na te taata, oia hoì, e ère i te òhipa na te taata, te faaotiraa e tera te färii i te Värua Maitaì. E ère o ta te taata faanahoraa, tera ia mea e parauhia ra, eiaha ia riro e, na òe aè e faanaho atu. Ia riro noa ra te taata ei taata no te fenua, ei taata ta te fenua e haapii, ei taata hoì tei ìte i ta te Atua haapiiraa o ta na i horoà i te fenua.

Eiaha ia moèhia ia tatou, te fenua, te tävini te reira no te Atua. E no te mea, e tävini no te Atua, aita atu o ta na e haapii, maoti ra, te mea o ta te Atua e hinaaro ra i te taata i te rave, tei reira te hope roaraa to na parau. Ia haapüaì o Ietu i to na aho i nià i te fenua, A färii i te Värua Maitaì. Te manaò matamua e matara mai, te òhipa ia ta te taata e rave ia ìtehia te maitaì tei òre e vai ra. Te vai ra te tahi mau fenua, e vai àihere, tupu-noa-hia e te raau, e ia hinaaro anaè te tahi taata e haamaitaì, to na ia haamataraa i te tämä. Oia hoì, to na ìritiraa i te mau mea atoà e haamoè ra i te maitaì o te fenua, e ia mä te reira mau mea, ua maitaì te fenua. Hau atu te maitaìraa, ua î anaè i te maa, parauhia ia, na te reira taata i haamaitaì i te fenua. Te auraa e òhipa tätou i rave, matara mai ai te maitaì. E ère rä te maitaì te tahi mea âpï, te tahi noa ra mea tei moè, tei haafifihia to na tupuraa. Te manaò matamua ia i roto i te parauraa e. A färii i te Värua Maitaì.

Te piti o te parauraa e te vahi atoà ia tätou e haamata ai i te fifi, ia parau tätou A färii i te Värua Maitaì.

Ua ìte maitaì tätou e, tätou tei ère nei i te maitaì, aita ia e òhipa e maraa ia tätou i te rave e huru maitaì rii aè ai te Atua. Te auraa ra, e vahi ê e ìmi ai te auraa o teie parau A färii i te Värua Maitaì. I tera ia manaò ta tätou e parau nei e haamaitaì, oia hoì, e faaìte i te maitaì. Te haamaitaìraa i te Atua, te faaìteraa ia i te maitaì o te Atua.

No te taata nei rä, nafeä te taata i te faaìte i te maitaì o te Atua, mai te peu, aita ò na i rave i te maitaì ta te Atua i horoà mai. Nafeä te taata i te haamaitaì i te Atua, mai te peu, aita ò na e au ra, e aita ò na e ìte ra i te maitaì i roto i te mau òhipa ta te Atua i faataa no na. Ei hiòraa ohie noa, Ia horoà mai te tahi taata i te maa, ia rave au, oia hoì, ia färii, e parau ia vau ia na, mauruüru. Ua färii au i te mea o ta na i horoà mai. Nafeä ra vau i te parau ia na mauruüru, mai te peu, aita vau i rave, mai te peu, te mea o ta na e horoà mai ra, aita vau e au ra, e ère tera o ta ù i hinaaro. I te reira taime, te riro ra ta ù mauruüru ei haavare, no te mea, aita vau i mauruüru, e ère o tera o ta ù e hinaaro ra.

No reira, ia parau tätou e haamaitaì tätou i te Atua, no te mea ia, ua färii tätou i teie parauraa e A färii i te Värua Maitaì. Ua ite anei ra hoì tätou e aha ta na horoà i parau ai ia na e, mauruüru, i haamaitaì ai tätou. No reira, mea tano tätou ia fëruri i teie mahana, mea rahi roa ta te Atua horoà ta tätou i òre i färii, ta tätou e faahapa nei, e te maraa atoà nei ä ia tätou i te parauraa e, ia haamaitaìhia te Atua, aita anei tätou i roto noa i tera parauraa i riro ei feiä haavare.

Te haamaitaì i roto i te òhipa ta te Atua i rave oia hoì, ua horoà mai te Atua i te maitaì, ua faaìte atoà mai ra i te vahi te reira te maitaì. Ta Ietu ia haapäpüraa mai ia tätou, E ua haapüaì mai ra i te aho i nià ia rätou ra, e ua parau mai ra, A färii i te Värua Maitaì.

Haamaitaì tätou i te Atua i te reo himene.

Himene

Parau faaära

Himene

Pupuraa Moni

Pure Ärai

Himene

Ôroà

Pure

Himene âmui

Pure a te Fatu

Faaitoitoraa

Haamaitaìraa.

Teraì òr.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens