Overblog Suivre ce blog
Editer l'article Administration Créer mon blog
19 février 2016 5 19 /02 /février /2016 23:04

Tāpati 21 no Fëpuare 2016

Haamoriraa

Haamaitaì tätou i te Atua i te hoê reo himene, e tià mai tätou.

Himene.

Fenua

Tenete 15,5-9.

Na te puta Tenete pene 15, i te mau ìrava 5 e moti i te ìrava 9, e ômua te haamoriraa i teie mahana, Ua ärataì aè ra o ia ia na i te vähi ätea, nä ô mai ra, A hiò na to mata i nià i te raì, a täiò na i te mau fetià, i te tiàraa ia òe ia täiò. E ua nä ô mai ra o ia ia na, Oia atoà to òe na huaai. 6 Ua faaroo atu ra Âperäma i te Fatu e ua faariro atu ra o ia i te reira ei parau-tià na na. 7 E ua parau mai ra o ia ia na, O vau o te Fatu, o tei ärataì mai ia òe mai Ùra mai, mai io te Tarataio ra, e höroà i teie nei fenua ei pärahiraa no òe. 8 Ua parau atu ra rä o ia, E te Fatu, e te Fatu, e aha te mea e ìte ai au e, e noaa ia ù 9 Ua parau mai ra o ia ia na, A pütö mai i te hoê puaatoro ufa mätähiti toru ra, e te hoê puaaniho ufa mätähiti toru, e te hoê mämoe paè mätähiti toru ra e te hoê ûupa, e te tahi ûuàiraò.

Pärahi tätou, haamaitaì tätou i te Atua i te himene.

Himene.

Fäfau.

Te parau Fäfau a te Atua, tätou e faaroo i teie nei i roto i teie mau puè ìrava te naò ra ìrava 10 e moti i te ìrava 18, Ua hopoi mai ra o ia i taua mau mea atoà ra ia na ra, ua vähi iho ra na röpü e piti vehea, tuu iho ra i te tahi vehea i te tahi pae, e te tahi vehea i te tahi pae, e fäito aè ra ärea na manu ra, aita o ia i vähi i te reira. 11 E ia tau mai te mau manu taehae i nià i taua mau puaa ra, ua tïahi atu ra Âperäma. 12 E te maìri atu ra te mahana i raro, roohia iho ra Âperäma i te täòto rahi e ìnaha i roohia atoà iho ra o ia i te höriri, e te pöuri rahi. 13 Ua parau mai ra o ia ia Âperäma, E riro mau to òe huaai ei purutia i te fenua no vëtahi ê, e haafao mai taua fenua ra e e hämani ìno mai, e e maha atoà hänere i te mätähiti, ia ìte mai hoì òe. 14 Âreà taua fenua e haafao ia rätou ra, na ù ia faautuà atu e muri aè ra, e haere ê mai ia rätou ma te taoà rahi. 15 E reva rä òe io to mau metua ra ma te hau ia ruhiruhiä roa òe e tänuhia ai. 16 E ia tae i te maha o te uì e hoì mai ai rätou i ô nei aita hoì i navaì roa te hara a te âti-Àmori ra. 17 E maìri atu ra te mahana, e pöuri atu ra, ìnaha, e au auahi mai to te umu ra, e te rama ura tei na röpü i taua na àpaapa puaa ra. 18 Ua fäfau iho ra te Fatu i te faufaa ia Âperäma i taua mahana ra, nä ô mai ra, E höroà vau i teie nei fenua no to òe ra huaai, e moti i te pape i Àifiti e tae noa atu i te pape rahi ra o Eufaräte.

Haamaitaì tätou i te Atua i te reo himene, e tià mai tätou.

Himene.

Fare

Teie te parau e tià e täuturu i to tätou faaroo i mua i te Atua, ta tätou e faaroo mai i teie nei, e aore ra e täiò âmui tätou i teie Taramo, Taramo 27 ìrava1 e tae i te ìrava 14, ìrava 1 Taramo na Tävita. O te Fatu to ù maramärama e to ù ora o vai hoì ta ù e mataù atu. O te Fatu të tiaì ia ù e mataù hoì au ia vai. 2I te haereà mai o te mau taata ìino ra, to ù ra mau ènemi e tei riri mai ia ù, i te tiiraa mai ia ù ra e rave e àmu, ua turori iho ra rätou iho, hià iho ra. 3 Pätia noa mai ä te nuu atoà ra i te pühapa ia ù nei, e òre ta ù âau e mataù. E ia tupu noa mai ä te tämaì ia ù nei, e tiàturiraa ia to ù i reira. 4 Hoê a ù mea hinaaro i te Fatu ra, e o ta ù ia e tïtau hua nei ia pärahi ä vau i roto i te fare o te Fatu e hope roa aè o ù puè mahana, ia ìte vau i te maitaì o te Fatu, e ia ui mäite au i roto i to na nao. 5 Ia roohia hoì e te àti ra e huna ai o ia ia ù i roto i to na tiàhapa e faatäpuni o ia ia ù i roto i te vähi moè i to na ra fare, a tuu ai ia ù i te vähi teitei ra. 6 Ei teie nei o ia e faateitei ai i ta ù upoo, i to ù atoà nei mau ènemi e àti noa aè, ia hopoi au, i to na ra tëtene, i te tütia òaòa, e himene hoì au e e himene haamaitaì hoì i te Fatu. 7 E haapaò mai, e te Fatu, i ta ù reo, ia tiàoro atu vau ra, e aroha mai, e faaroo mai ia ù. 8 Ia parau mai òe e E ìmi mai òutou i ta ù mata, E ìmi ia vau i to mata, e te Fatu. 9 Eiaha òe e huna ê atu i to mata ia ù nei, eiaha to tävini e haapae-riri-noa-hia. Ua täuturu mai hoì òe ia ù, eiaha vau e faaruè-ê-hia, eiaha òe e täiva ia ù, et a ù Atua, et a ù Ora. 10 Faaruè noa ä ta ù metua täne e ta ù metua vahine ia ù, ei reira te Fatu e rave mai ai ia ù. 11 E haapii mai òe, e te Fatu, i to òe ra èà, e ärataì ia ù nä te èà manina, no to ù nei mau ènemi. 12 Eiaha òe e höroà ia ù i te hinaaro o ta ù mau ènemi ìte haavare anaè tei tià mai e märô ia ù, e te ûàna mai ra to rätou riri ia ù. 13 Te manaò nei rä vau, e noaa ia ù te maitaì o te Fatu i te fenua o te taata nei. 14 Tiaì i te Fatu e faaitoito e na na e faaitoito mai i to âau ra, e tënä na, e tiaì ä òe i te Fatu.

Pärahi tätou, haamaitaì tätou i te Atua i te himene.

Himene

Ora

E faaroo mai tätou i te parau no te Fatu ra te Metia i te päpaìraa a Pauro i to Firipi e teie mahana ia tätou, Firipi i te pene 3, i te mau ìrava 17 e tae i te pene 4, i te ìrava 1.

Ìrava 17 E a ù mau taeaè ra, ei pee atoà òutou atoà na ia ù, e hiò mäite hoì i te feiä e nä reira atoà ra, o mätou hoì to òutou hiòraa. 18 Ta te tahi paeàu haereà, e mea ê ia, o ta ù i faaìte pinepine atu ia òutou, e te faaìte atu nei hoì au ia òutou i teie nei mä te roimata, e e ènemi rätou no te tätauro a te Metia ra. 19 O te pohe roa to rätou hopeà, te ôpu hoì to rätou atua, e ta rätou parau haamä ra, o to rätou ia teòteòraa e to teie nei ao anaè ra ta rätou e haapaò. 20 Âreà mätou e ta mätou parau no te ao ia, e te tiaì atoà nei mätou i te Ora no reira mai, i te Fatu ra ia Ietu Metia. 21 E na na e faahuru ê i to tätou tino haèhaa, ia hoê atoà huru i to na iho tino maitaì rahi ra, i te räveà mana na na e tià ai ia na ia rave i te mau mea atoà nei, e vï atoà ai i raro aè ia na iho ra.

4,1 E òaòa i te Fatu eiaha e faaea, te ìrava1 no te pene 4 E teie nei, e a ù mau taeaè here-rahi-hia, e te haapöpouhia, ta ù òaòaraa e ta ù toröna, ia itoito ä òutou i te Fatu nei, e a ù mau here e.

Haamaitaì tätou i te Atua i te himene e tià ai.

Himene.

Parau i haapaòhia no tätou i teie mahana paieti tei roto ia i te Parau Maitaì a te Fatu ra o Ietu te Metia i te päpaìraa a Ruta èv i te pene 9 i te ìrava 28 e tae i te ìrava 36 To Ietu faahuru-ê-raa-hia o ia atoà ia te päpaìraa Mät 17,1-8 ; Mär 9,2-8 ìrava 28 E fätata aè ra te ruì varu i muri aè i tei nei parauraa, ua ärataì atu ra o ia ia Pëtero, e ia Ioane, e ia Iatöpo, haere atu ra i nià i te hoê mouà e pure. 29 Te pure ra o ia, huru ê atu ra to na mata, teatea atu ra to na àhu mai te uira ra. 30 E ìnaha, te paraparau mai ra ia na e toopiti puè taata, o Möte e o Èria 31 i fä mai räua i roto i te ànaana, e ua parau iho ra i te poheraa no na, o ia i fätata i te pohe i Ierutarëma ra. 32 Âreà Pëtero mä, ua vareà ia i te täòto e ära aè ra rätou, ìte atu ra rätou i to na hanahana, e nä taata toopiti i tià atoà i pihaì iho ra ia na. 33 E tei te reva-ê-raa räua ia vaiiho ia Ietu ra, ua parau atu ra Pëtero ia na E te Òrometua, e mea maitaì ia pärahi tätou i ô nei. E faatià mätou i te fare autä e toru aè, no òe e tahi, no Möte e tahi, e no Èria e tahi. Aita rä o ia i ìte i ta na i parau ra. 34 Tei te nä-reira-raa atu o ia, te äta mai ra i te täpoìraa mai ia rätou, mataù aè ra rätou i to rätou öraa atu i roto i taua äta ra. 35 E te hoê reo mai ra no roto i taua äta ra, i te nä-ô-raa mai O ta ù Tämaïti here teie, a faaroo ia na 36 E mure aè ra taua reo ra, o Ietu anaè iho ra të toe. Huna iho ra rätou, aore roa i faaìte noa atu i te taata i te reira ànotau i te hoê i taua mau mea ta rätou i ìte ra.

Täuturu mai te Atua ia tätou i te marämaramaraa i teie mau i faaroohia aè nei e tätou.

Haamaitaì tätou i te Atua i te himene.

Himene.

Faaitoitoraa

Mau parau i faaroohia e tätou i te ômuaraa o te haamoriraa, te ärataì nei ia i nià i te mau faanahoraa e au i te tiàturiraa i te ôpuaraa faaora a te Atua. Ma te faahiò i te taata faaroo i nià i te nehenehe o te rähu mai ta te puta Tenete e faaìte ra i te pene 15 i te ìrava 4 e te 5, A hiò na to mata i nià i te raì, a täiò na i te mau fetià, i te tiàraa ia òe ia täiò. E ua nä ô mai ra o ia ia na, Oia atoà to òe na huaai. Te haapäpü noa mai ra te reira, te hinaaro rahi o te Atua i te taata no te faatupu i te ora, e ia ìte te taata i ta na hopoià, e ta na parauraa i roto i te tïtauraa a te Atua, no te mea o te Atua te tumu o te reo o te nünaa no te faatupu i te àparauraa e maitaì ai te ora, te ora ra to te taata ia maramärama, ta te puta Taramo ia e faaìte ra Taramo 27, i te ìrava 1, O te Fatu to ù maramärama e to ù ora o vai hoì ta ù e mataù atu. O te Fatu të tiaì ia ù e mataù hoì au ia vai. I reira te taata faaroo e faateitei ai i to na upoo, i mua ta na mau ènemi e àti noa aè, i te tütia òaòa, e himene hoì o ia e himene haamaitaì hoì i te Fatu. E haapaò mai ai te Fatu, i ta na reo ia tiàoro o ia ra. Te täuturu te reira e noaa i te taata faaroo ia òre ia faaruè, ia täiva i te Atua ora. E ia haapii noa mai ä te Fatu, i te èà, e ärataì i te èà manina. Te faaitoito a Fatu, e faaitoitoraa ia vai ära noa to tätou âau i te mau hinaaro o te Aroha e te here, e tïtauraa ia pärahi tämau noa ma te turori òre i mua i te mau faanahoraa tei òre e au i te Atua. E au ia i teie manaò to Pauro i to Firipi i te pene 3 i te ìrava 17 E a ù mau taeaè ra, ei pee atoà òutou atoà na ia ù, e hiò mäite hoì i te feiä e nä reira atoà ra, o mätou hoì to òutou hiòraa. E hiòraa nehenehe mau ä teie no te mea noa atu te mau faaäpiäpiraa, te mau faataupupuraa a te mau ènemi i te tätauro o te Metia, ua pärahi fätata noa te mau âpotetoro i te mau haapiiraa a te Metia, te haèhaa, te vï òre i te teòteò, i mua i teie mau faanahoraa te parau nei o Pauro i te pene 4 i te ìrava 1 E òaòa i te Fatu eiaha e faaea, E teie nei, e a ù mau taeaè here-rahi-hia, e te haapöpouhia, ta ù òaòaraa e ta ù toröna, ia itoito ä òutou i te Fatu nei, e a ù mau here e.

To tätou haamoriraa i teie mahana e ärataìhia e maha parau papa, te tià e höroà ia tätou i te manaò èi faaitoitoraa i to tätou faaroo ia àparau, ia färii, ia tïtau ä i te mau vahi e rupehu noa ra, e aore ia òre ia färii, e tiàmaraa tei reira no te taata. Teie taua mau tumu ra.

  • A hiò te raì a täiò te mau fetià, to òe huaai

  • O te Fatu to ù maramärama e to ù ora

  • E òaòa i te Fatu eiaha e faaea

  • Te Pure.

    Teie mau tumu e maha e mau parau faatupu òhipa, no te mea e tià ia tätou ia höroà ä i te hoê faanahoraa no te vahi i reira te haamataraa te parau naò ia tätou e. Te fenua, te raì, Te taata, Te Atua. Teie mau parau e maha ua tupu ia i roto i ta tätou taiòraa èvaneria i te pene 9 i te ìrava 29 Te pure ra o ia, huru ê atu ra to na mata, teatea atu ra to na àhu mai te uira ra. I teie pure ua maramärama te vahi i reira o Ietu i te pärahiraa e na pipi, maite hoê mori faaìte ra te huru i reira te tupuraa teie òhipa faahiahia no te ôpuaraa a te Atua, i roto i te ànaana o te taata no te faaäuraa mätamua i te färaa, o Mote e tähi no te parau o te Ture, o Èria e tähi te tià o te mau perofeta, ta räua parau e pohe o Ietu i Ierutarëma, e i roto i te hanahana na pipi te ìteraa ia Ietu, ta räua parau, e faatià i te fare e toru. Te reo o te Atua O ta ù Tämaïti here teie, a faaroo ia na.

    Teie mau faanahoraa i tupu no roto mai ia i na parau e maha tei ärataìhia e te Pure, te uiraa e vai nei e aha te parau ta Ietu i Pure i huru ê ai to na mata i teatea ai to na àhu mai te uira rä. E aore ra e ui ia tätou e aha te Pure. Noa atu ä ia te reo o Ietu àita i faaroohia, àita i päpaìhia, e tià ia parauhia e ua faaroo te faaäuraa mätamua, ua faaroo te maramärama, ua ìte te fenua i te hanahana o Ietu, e parau ia tätou e te reo o Ietu i roto i ta na pure e reo no te raì, e reo no te fenua. Te reo no te pure a Ietu, e reo ia no te raì, e reo no te fenua ia âmui to räua puai no te ora o te ao. Te pure ia ta Ietu i haapii na i ta na mau pipi e ia tätou i teie mahana teie ta Ruta èv päpaìraa i te pene 11, i te ìrava 2 E nä ô òutou ia pure E to mätou Metua i te ao ra, ia raa to òe iòa. Ia tae to òe ra Pätireia. Ia haapaòhia to òe hinaaro i te fenua nei mai tei te raì atoà na. Ta Mataio päpaìraa i te pene 6 i te ìrava 9 E to mätou Metua i te raì ra, ia moà to òe iòa. Ìrava 10 Ia tae mai to òe Hau. Ia tupu to òe hinaaro i te fenua nei, mai to te raì atoà na. Te vai atoà nei ra teie päpaìraa a Turo a Raapoto i roto i te puta Te Pure a te Fatu no te mätähiti 2012, Mätaio 6, 9-13 (Faanahoraa âpï) : E nä ô òutou ia pure : E to mätou Metua i te raì tua tinitini Ia faateiteihia to òe iòa moà, Ia tae mai to òe Hau Ia haapaòhia to òe hinaaro i te fenua nei mai tei te raì atoà na. Tua tinitini tei tuuhia mai èi haafaufaa te hiroà mäòhi èi faaìteraa e, e au atoà teie pure i te nünaa Mäòhi, i Mäòhi Nui nei, no te mea ua täpoì atoà hia o Mäòhi Nui i te raì ta Ietu i haapii i roto i ta na pure, e te fenua.

    Hoa here mä, e a faaroo faahou mai na ta tätou ìrava no teie mahana i te ìrava 29[MN1] Te pure ra o ia, huru ê atu ra to na mata, teatea atu ra to na àhu mai te uira ra. I mua i teie huru no Ietu ua parauhia e te taata, te hanahana o te Ietu, e te uiui noa nei te manaò te puai e vai ra i roto i teie pure i huru ê ai te mata, i teatea ai te àhu mai te uira ra. Te pähonoraa a te Atua O ta ù Tämaïti here teie, a faaroo ia na. Te òhipa e tupu nei i roto i teie färereiraa te haèhaa e te faatura o Ietu i to na Metua i teatea ai te àhu mai te uira ra, te uira ra te maramärama ia, e te maramärama ra o te ora ia o te taata.

    Te mea ra e tïtauhia ra ia tätou te taata mäuti ra ia te haapaò, te huru ia o te taata të òre to na manaò e faaruè i ta na òhipa i haamata i te rave e tae noa atu i te hopeà, e tei hinaaro ia tupu te reira i roto i te maitaì. Ua riro atoà te reira òhipa ei matamua i roto i to na manaò. No te reira huru to na i riro ai o ia ei taata tiàturihia. Ia parau tätou e, e tupuraa atoà te haapaò no te faatura, te märamarama noa ra tätou e, te taata tei horoàhia te tahi òhipa i roto i to na rima, aita atu ta na e tïtauraa maoti rä, te maitaì o te òhipa i horoàhia na na e rave, e te tupuraa te hinaaro o te taata na na te òhipa, a riro atu ai ei mauruüruraa no na.

    A ui atu ai tätou i te tumu i rahi noa ai te fifi i roto i to tätou oraraa i teie mahana, te tumu i haere noa ai te fäito o te mau ùtuafare i te àmahamaharaa, no te mea ia ua paeinu to tätou tiàturiraa i roto i te täiva te òre-raa e ìte faahou te fenua te ora, te raì i nià aè i to tätou upoo te hanahana ia o te Atua, ua huri tua te nünaa i te pure i haapiihia e Ietu.

    Te hinaaro nei au e faaoti i te manaò na roto i teie parau a Pauro i to Firipi i te pene 3 te ìrava 20 Âreà mätou e ta mätou parau no te ao ia, e te tiaì atoà nei mätou i te Ora no reira mai, i te Fatu ra ia Ietu Metia. Te ìrava 21 E na na e faahuru ê i to tätou tino haèhaa, ia hoê atoà huru i to na iho tino maitaì rahi ra, i te räveà mana na na e tià ai ia na ia rave i te mau mea atoà nei, e vï atoà ai i raro aè ia na iho ra.

    Haamaitaì tätou i te Atua i te himene.

    Himene.

    Pure Ärai

    Parau faaära

    Pupuraa moni

    Himene

    Pure a te Fatu

    Faaitoitora e te Haamaitaìraa.

    Teraì òr.

[MN1]

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens