Overblog Suivre ce blog
Editer l'article Administration Créer mon blog
23 décembre 2015 3 23 /12 /décembre /2015 05:48

Vaù o te Mahana

Tāpati 10 no Tēnuare 2016

Te Tumu Parau. Tītauhia ia tupu te Hoêraa.

Te mau Taiòraa.

Ìtaia 52. 7-10. Te peepee te âvae o te veà i nià i te mouà no

te hopoi mai i te parau maitaì a te Tumu Nui.

Taramo 30. Ua faaàhu te Atua te taata i te àhu òaòa.

Torota 1. 27-29. Ua faaìte te Atua i te maitaì i te êtene, tei

roto atoà te Metia ia rātou.

Ruta èv 24. 13-36. Ua heheuhia mai ia rāua te auraa o te

mau parau i pāpaihia.

Faaitoitoraa.

I roto i teie hepetoma pure no te Hoêraa o te mau maru

metia ta tātou i ora mai, te haamanaò noa mai ra ia e, e tuhaa

ta tātou i te Atua ra. Mai te peu e, e hinaaro no te Atua te

parau o te Hoêraa o to na nūnaa, te haapāpū noa ra ia e, e

Atua teie tē faaìte noa i to na here e to na aroha i te taata ta

na i hāmani ia au i to na huru e to na hohoà.

E tano rā ia tātou i teie nei ia uiui e, tei hea atu ra teie parau

i teie mahana. Ua haamatahia te rave, e aore ra, tei roto noa

ā i te ôpuaraa. Aita ānei hoì tātou e tiaì noa ra i te feiā faaoti

ia rave i ta rātou faaotiraa, a nuu atu ai teie òhipa i mua.

Te ìte noa ra rā tātou e, eita te Atua e tiaì mai i to tātou tau-

pupū e to tātou paruparu. Eiaha ia moèhia ia tātou e, no te

Atua te hinaaro ia Hoê to tātou nūnaa i Māohi Nui nei. E e

tītauraa na na ia tupu te Hoêraa, ia au i ta tātou tumu parau

no teie mahana.

E ia parau hoì tātou te parau o te taata, te nūnaa, e parau te

reira tei papahia i nià i te fenua, e te faufaa ora ta na e mau

ra. No reira, i to na tau, ua parau Ietu e : « I parau atu na vau

i te parau o te fenua, e aore òutou i faaroo. E aha òutou e

faaroo ai ia parau atu vau ia òutou i te parau o te raì (Ioane

3. 2). Te auraa, te fifi ta te taata e faatupu nei i nià i te fenua

nei, te rahu atoà a te Tumu Nui terā e ìno ra. I tano ai terā

maa parau ra e : « Te taata e te fenua, hoê ā ia. E te taata e

te Atua, hoê ā ia ».

E no to te Atua tiàturi pāpū i te taata, i hinaaro ai o ia e âmui

te taata Ia na no ta na ôpuaraa. Mai ta Ìtaia e parau e : « Te

peepee te âvae o te veà a te Atua tei hopoi i te parau maitaì...

». I peepee ai to na âvae, no te mea ia o te Atua tei

amoamo i to na âvae, e ua tūramahia hoì to na èà te māramarama

o ta na parau. Te auraa, te Hoêraa e tītauhia ra ia

tupu i teie veà, te Hoêraa ia e hanahana ai te Atua Metua. Ua

ìte atoà rā tātou e, aita te Atua e faatina nei te taata i nià i te

òhipa, ia tupu noa ta na ôpuaraa. Te nā ô ra to na reo : « Ta

ù mau i ìmi ra, te reira tē tupu ; e ta ù i ôpua ra, te reira tē

mau ». (Ìtaia 14. 24).

I mua i te parau no te Hoêraa o to tātou nūnaa Māohi, e rave

mai tātou i teie haùti no te pehaa rau. Te mea e hinaarohia,

te faatūatiatiraa ia i te mau pehaa atoà, e eiaha te tahi pehaa

ia moèhia. Na te tiàraa o te mau pehaa atoà e Hoê ai te

hohoà ia oti mai. Teie haùti ta tātou e parau nei, na te Atua

ia na na te ôpuaraa. Haamanaò rā e, eere tātou i te pehaa

pohe e te vārua òre. Ia faatura tātou ia tātou iho e hanahana

ai te Atua.

Te Hoêraa, e tuhaa ta tātou i roto i teie parau. Eere rā e, na

tātou te Hoêraa, na te Atua rā. E i roto i te haèhaa o te âau e

ìtea ai te hinaaro o te Tumu Nui. Haamanaò na i te reo o

Ioane : « E tupu o ia i te rahiraa, âreà vau nei, e hoì ia i te

itiraa ». (Ioane 3. 30). E haamaitaì tātou i te Atua no ta na

ôpuaraa no tātou nei.

Pure. Ia haamaitaìhia te Atua Metua, te Fatu o te raì e te

fenua no teie parau o te Hoêraa ta òe i tuu i roto i to mātou

âau, ia tupu roa ta òe i ôpua no te Hoêraa o to mātou nūnaa

i Māohi Nui nei. Mauruuru i te faaìteraa mai ia mātou i te

rahi o to òe here nā roto i ta òe rahu. Ua riro hoì te reira ei

ora no mātou. Te haamanaò noa ra te reira i to òe huru e to

òe hohoà. E i mua hoì i te haèhaa o to mātou fenua, ua faatoro

òe i te èà ia òhie mātou i te hoìraa atu i te Fare Metua

na, e ia tupu te Hoêraa tei au i to òe hanahana.

Mauruuru e Ietu to mātou Fatu, tei haapii mai ia mātou e i

roto i te mau parau atoà e faaârepurepu nei i to mātou âau,

tei roto ê na ta te Atua Metua tītauraa ia tupu te Hoêraa, te

Hau, te Maitaì e te Òaòa. Ua ìte rā mātou i to mātou taupupū

te haereraa nā nià i te taìara o te oraraa nei. Te toe noa ia

mātou, tei te ineineraa ia i te hiò e te faaroo, te mea noa ia

e āteatea ai te pāhonoraa ta mātou e tiaì noa nei ia horoà mai

òe. Oia ia, o mātou noa ihoā teie e tārehu noa nei i to mātou

mata, e to mātou âau.

Mauruuru ia òe te Vārua Moà, o òe e òre e faaea nei i te tauturu

e te tūrama ia mātou ei rāvea e faaea ai mātou i te vāvāhi

àpaàpa noa i te Atua. O mātou e horo pūpara noa nei i terā

vāhi e terā vāhi, manaò atu ai e, tei ô te Atua, tei ô e tei ô.

E inaha, te parau o te taata, e parau ia no te Atua Metua. Te

parau hoì o te fenua, e parau ia no te Atua Metua. Te parau

hoì o te nūnaa, e te mau mea atoà e parauhia to te hoê nūnaa,

e parau atoà te reira no te Atua Metua.

Tauturu ia mātou ia òre to mātou âau ia rauère-àpe-hia, ia

fārii e ia puru mātou i teie hinaaro o te Tumu Nui, ia tupu te

Hoêraa o te Nūnaa Māohi. No òe te Hau, te Mana e te

Hanahana e te Atua Nui Tumu Tahi e. Ei ia òe ta mātou faateniteniraa

no te rahi o to òe here e to òe haèhaa ta to mātou

fenua e haapii mai nei ia mātou. Ia Atua te Atua. Ia Fenua

te fenua. Ia Taata te taata e maitaì roa ai. Âmene.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens