Overblog Suivre ce blog
Editer l'article Administration Créer mon blog
20 décembre 2015 7 20 /12 /décembre /2015 10:16

Te Maha o te Mahana

Mahana Toru 06 no Tēnuare 2016

Te Tumu Parau. Te Nūnaa Autahuà tei piihia

no te haere e faaìte i te parau a te Atua.

Te mau Taiòraa.

Tenete 17. 1-8. E piihia to òe iòa Àperahama, no te mea e

faariro vau ia òe ei Metua no te mau nūnaa atoà.

Taramo 145. 8-12. E hāmani maitaì e te aroha te Tumu

Nui, e òre e riri vave e te faaherehere rahi.

Rōma 10. 14-15. Nā hea rātou e tiàturi ai ia na, aita ā

rātou i faaroo ia na.

Mātaio 13. 3-9. Ua topa te tahi mau huero i roto i te repo

maitaì, e ua horoà mai i te māa, hānere te tahi, ono àhuru

te tahi, toru àhuru te tahi.

Faaitoitoraa.

Nā roto i te ìteraa i te mau Etārētia atoà ei taeaè, e ei tuahine

no tātou, e tià ai ia tātou ia faaìte i te parau a te Atua na

te mau vāhi atoà.

I roto i te nūnaa no teie mahana, te î nei te oraraa o te taata

i te parau e rave rahi. Aita i faaea noa i roto i te tāuaparauraa,

te vai atoà ra te âfata teata, te rātio, e teie nei, te mau

pupu e rave rahi i nià i te faanahoraa « Internet ». Te riro nei

te reira mau parau i te faatupu i te mea maitaì, e i te vāvāhi

i te oraraa o te taata. No reira, te paremo nei te nūnaa i mua

i terā mau faaòhiparaa tei riro ei tūmā i to na parau.

Ua paremo tātou i roto i te taa òre, te ânoì e te vai atu ra. I

mua i te reira, ua faaroo tātou i te tahi parau e faaora i te

taata, tei riro mai te hoê rāvea e òre ai te taata e paremo

« Bouée de Sauvetage ». Te pii nei o ia i te taata atoà e âmui

i roto i te faaroo, e haapāpū i to na faaroo, e tāvini i te Atua

i te mau vāhi atoà.

I mūtaa ra, eere hoê nūnaa, ua rau te nūnaa. I teie nei rā, te

riro nei tātou ei nūnaa no te Atua. I roto i to tātou rauraa e

tupu ai te Hoêraa ta te Tumu Nui e tiaì ra i to na nūnaa. Hau

roa atu rā, e nūnaa Autahuà tātou. Ia âmuihia te parau a terā

e terā taata, tei fārii i te parau a te Atua i roto i to na tāatoaraa.

Te auraa, tē fārii e, e tupuraa o na no te hinaaro o te

Atua. E ôpuaraa faaora o ia no te tupuraa o te Hau o te Atua

i terā e i terā vāhi. E riro te maitaì o te parau o te Here e te

Aroha o te Atua mai te tōpata, a riro mai ai ei pape puè.

No reira, ua tuu mai te Atua i te huero no te maitaì i roto i

te repo fenua. Taua repo fenua ra o te taata ia. Ua tuu mai te

Atua i to na tāatoaraa, ia hoê te taata e te Atua. Ia hoê te

taata e te fenua. Ia hoê te taata e to na reo, ua maitaì roa ia.

Pure. E to mātou Metua i te Raì tuatinitini. Ua parau mai òe

e, te aroha e te here ta mātou e faaìte, o te haapāpūraa ia e,

e mau pipi mātou na te Metia ta òe Tamaiti ôtahi. A faariro

ia mātou ei tià pāpū no te tāvini ia òe i roto i terā e terā uì

taata no òe. Ia tupu ùmu te Here e te Aroha i roto i te âau o

te taata, i te vāhi ta òe i faariro ei pārahiraa no òe, vāhi âparau

ai òe ia mātou. A faaitoito ia mātou, ia tupu nā roto ia

mātou te Hoêraa o to òe Nūnaa, te Hoêraa o ta òe Etārētia.

Ia tupu te reira nā roto i te parauraa, e nā roto i te faaòhiparaa

mai teie nei e a tau a hiti noa atu.

Ia haamaitaìhia te Atua o te mau nūnaa atoà, te Atua io tātou

nei. Ia tauturu mai òe i te nūnaa Māohi, ia ìte o ia e, e òre

òe e riri vave, e faaherehere rahi rā to òe ia mātou. Ua horoà

mai òe te fenua e to na î, te tai e to na î tē riro ei māa, ei rāau

no te aupuru i te nūnaa. Ua topa te huero no te here e te

aroha i nià i te fenua māohi. Ua tuu mai te Tumu Nui i te

mea maitaì no tāua te nūnaa māohi. A rohi anaè, ia riro te

māohi ei tupuraa no te ôpuaraa faaora a te Tumu Nui. Ia

Atua te Atua. Ia Fenua te Fenua. Ia Māohi te Māohi, ua

Maitaì roa ia. Mauruuru. Âmene.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens