Mareto 8, 27-35

Mau taiòraa.

Ìtaia 50, 14 – 9. Te tavini tei mauiui.

Taramo 130, 1 – 8 Te tiàturiraa o te tavini.

Iatopo 2, 14 – 26 Aita e faaroo, e aita e òhipa.

Mareto 8, 27 – 35 Ietu i mua i te manaò taata.

*** Teie mau taiòraa e tià e turu ia tätou i roto i ta tätou mau tuatapaparaa parau.***

Tumu parau, O vai o Ietu.

Taiòraa tumu Mareto 8, 27 – 35

Ìrava tumu Mareto 8, 35 O TEI HINAARO I TE TAPEÀ I TO NA ORA E ERE IA I TE ORA, E O TEI TIÀ IA NA I TE TUU I TO NA ORA IA U E TE EVANERIA NEI E ORA TO NA.

Uiraa

Ta tätou uiraa tei roto ia i teie na manaò e piti o Ietu .

1. I mua i te taata, o vai au nei i ta te taata nei parauraa ?
2. I mua i te mau pipi, o vai ra vau nei i ta òutou parauraa ?

Te vai nei te pahonoraa no teie na uiraa i te ìrava 28 e te ìrava 29.

Teie ia ta tätou uiraa, hoê noa

O VAI O IETU I TA TÄTOU NEI FAAÌTERAA, TAVINIRAA I TEIE MAHANA ?

Ìtaia 50, 4 – 9.

Te arero tià.

Te faaararaa

Te tarià faaroo Te tavini tei mauiui.

Te tauturu a te Fatu

E uruaì i nià i te Atua.

Heheuraa taò.

Irava 10, Uruaì : e piti tatararaa to teie parau,

1. paruru i te fifi rau.
2. Haapaari i te tiàraa i te hoê vahi päpu òre, eiaha ia maruä.

Ei haapaparaa.

O te toru teie, o te himene o ta te tavini o te Atua e faaìte nei i to na tiàturiraa i te òhipa i ravehia no rätou a vai tîtî ai rätou i Papuronia. Te himene matamua tei te Ìtaia pene 42, i te mau ìrava 1 e tae i te 9, te faaìte nei ia to te Atua maìtiraa i to na tavini. Te piti o te himene tei te pene 49 ia i te ìrava 1 e faaea i te 13, tei ù nei to te taviniraa ìteraa i ta te Atua faaâpïraa i ta na parau fafau i to na nunaa. Teie na himene e piti, te matamua e te piti tei roto ia te nunaa o te Atua i te vai tîtîraa i Papuronia. E tià ia parauhia e, aita te nunaa o te Atua e haamoè nei i to rätou faaora, oia atoà ia te Atua, aita atoà O ia e vaiiho noa nei i ta na mau tamarii i roto i te hepohepo. Àreà ra te maha o te himene tei te pene 52, i te ìrava 13 e tae i te 15, te pene 53, ìrava 1 e tae i te 12. Tei roto ia teie tuhaa te taime a hoì ai te nunaa o te Atua i Ierutarema. Te himene nei te nunaa o te Atua i to na òaòa i te òhipa rahi i ravehia no rätou. Teie na himene e piti te toru e te maha, tei nià ia te nunaa o te Atua i te èà no te hoìraa i Ierutarema. To rätou mauiui, to rätou poia e poiha e tae noa atu te mau teimaharaa o te oraraa i farereihia e rätou i Papuronia aita ia i riro e faatîtîraa ia rätou, ua riro ra te reira ei faaitoitoraa. No te mea, aita rätou i faaruè i te Atua ta rätou i tiàturi na. I tià ai i te tavini o te Atua ia himene i teie na himene e maha ei faaìteraa i to na tiàturi päpu i te Atua. I te mea ua horoà te Atua ia na i te arero ìte no te faaìte i te mau hinaaro o te Atua na roto i te himene. o teie te raveà i ravehia e te tavini o te Atua, ei haamoèraa i te mau mauiui no te faatîtîraa a te mau enemi o te Atua. Na roto i te toru o te himene, te haapäpu nei ia e, te faaara nei, te tauturu nei, e uruaì nei te Atua i to na tavini. Ia òre to na tavini ia paruparu i te arataìraa i ta na mau tamarii i te vahi no te ora. O vai teie tavini ? i roto i na himene e maha nei aita te iòa e faaìtehia ra. Te òhipa e tupu ra no te faaìte ia i te huru o te Atua tei òre i faaruè ia rätou. Te ìte nei te tavini i te maitaì o te Atua tei òre i faaruè ia rätou. Te ìte nei te tavini i te maitaì o te Atua, tei riro ei haapuraa no na, tei faaìte i te hanahana o te Atua, na roto i te märo òre, te maru, te faaòromaì, ia tià i te Atua i te horoà mai i te tatarahapa i to na nunaa, Timoteo piti pene 2, ìrava 24 e tae i te 26.

Taramo 130

Te pure a te taata faaroo

Te faaòreraa hara Te tiàturiraa o te tavini

Te tiàturiraa ia Iehova

Te tiaì a te tavini.

E Taramo teie na te hoê taata faaroo i nià i te èà perenina, i te mahana faaòreraa hara. Te faaòto nei O ia i to na reo i te tiàororaa i te Atua. Mai te hoê tamarii ra o ia i te aniraa i te Atua ia fariu mai to na tarià i te hinaaro o te tavini. Te hinaaro o te tavini ia faaorahia o ia i te vahi hohonu o ta na e faaea ra. Teie vahi mauti ra ia to na peàpeà i ta na hara, i te mea te ìte nei o ia i to na atearaa i te Atua. Ta na ia e hinaaro nei e haafatata i te Atua ia tià ia na, ia ani te faaòreraa hara a te Atua. Na teie tumu parau e faaìte e, e taata tiàturi päpu teie i te Atua. O te huru teie no te taata faaroo te ìteraa e, o te Atua anaè te tià e turu ia na i roto i to na hepohepo. Te faaòreraa hara ta na e ani nei ei faaìteraa ia e, e tavini o ia no te Atua, tei parahi noa i te mau faaueraa e i te mau hinaaro o te Atua. Na roto i teie òhipa e tupu nei te faateiteihia nei te Atua, i te mea aita te Atua e tapaò nei te rahiraa hara i ravehia e to na tavini. Ta na ra e faaìte nei ta na ia aniraa ia faaòrehia mai ta na hara e te Atua. O te hoê teie tiaìtururaa e tupu nei i roto i teie tavini, i te tiaìraa ma te tiàturi i teie òhipa. Ta na hiòraa i te Atua mea na roto ia i te faaòreraa hara, te aroha e te ora te hau ê atu i te tahi mau atua.

Te tavini i mua i teie mau manaò, e tià ia parauhia e, te Atua ta na e tiàturi nei, e Atua ia e tià ia paraparau ia na , e Atua e faaroo mai i to na reo, e Atua e tià e pahono mai i to na mau hinaaro e tià ia faatanohia, e Atua atoà te tià e faaora i to na nunaa i te hara. Te auraa ra e Atua te parahi noa i pihaiiho i te taata ei arataìraa i to na nunaa.

Te ìte nei tätou i te puai o te faaroo o teie tavini, i te mea aita o ia e tiaì nei ia faaòre mai te Atua i ta na hara. Ta na ra e tiaì ra ia faaroo noa te Atua i to na reo ua öti atu ai. Ia faaòre mai te Atua i ta na hara ra, tei reira atoà ia, ia òre a – ti – ra ia. To na ra tiàturiraa i te Atua eita ia e taui, e vai noa ia. O ta te ìrava 6 ia e faaìte ra. Te tiaì nei ta ù varua ia Iehova, e ïti to te mau faèhau tiaì i te poìpoì ra, oia a ia, e ïti to te mau faèhau tiaì i te poìpoì. E tapaò faaìte teie e, aita te fiu e vai ra i roto i teie tavini, o te Atua te Fatu no te faaòreraa hara, e teie tavini e taata hara. Oia hoì, e Atua hara òre te Atua, e taata hara te taata. Na teie parau e faaìte ia tätou e, e Atua faaòre hara teie ta tätou e tiàturi nei, e Atua tei aroha i te mau taata tei fäì i ta na iho hara i mua ia na. E Atua ia teie, tei òre i vaiiho noa i te taata o ia anaè, ua hinaaro ra o ia e faatiàma i te taata, ma te maìti òre i te huru o te taata, a taaê noa atu ai te maìti nei te taata i te huru o te Atua, te Atua ra aita roa ia. E Atua ra te Atua tei ìte i te faaòre i te hara a te taata, ia fäì te taata i ta na hara e tià ai.

Iatopo 2, 14 – 18.

Te òhipa e te faaroo

Te horoà maitaì

Ei faaroo ora Aita e òhipa, aita e faaroo.

Te veve o te tino.

Te tumu parau rahi e vai nei i roto i teie epitetore a Iatopo mauti ra ia, aita e faaroo mau, e aita e òhipa mau. Te papaì nei o Iatopo i teie parau i na òpu hoê àhuru mä piti i purara na i muri aè i to Ietu tiàfaahouraa. Na roto i teie parau te ìte nei o Iatopo te paruparu o teie mau tamarii, aita te faaroo e faaitoito faahou ra ia rätou, ua haapaò noa te rahiraa ia maitaì te tino, e ua puai aè te rave – noa – raa i te òhipa ma te haapae i te faaroo. Aita e ìte faahouhia ra te tauturu te tahi e te tahi ua haapaò noa te taata ia na iho. Parau noa ai, ia ora na to ù tuahine, to ù taeaè, ia mahanahana òrua, e ia poia hoì. E aita i horoà atu i te mau maitaì e ora ai. Ua faufaa òre ia teie parau e ia ora na. I te mea aita te parau e tuàti ra i te òhipa. To na auraa ra, tei poia ra, poia noa ia, tei veve ra, e veve noa ia, tei toètoè ra, e toètoè noa ia.

O ta Iatopo ia e hinaaro nei e faaìte na roto i teie rata. Eiaha te aroha arero noa, e aroha òhipa ra i te faatupuraa i te horoà, i reira e ìtehia ai te faaroo i roto i te òhipa. Mea faufaa òre hoì te faaroo aita e òhipa, i reira ra aita – aè ia te reira taata e tino noa to na aita e upoo ori haere noa ai. Oia atoà te òhipa aita e faaroo, aita – aè ia te reira aita to na e tino ori haere noa ai. Nahea ia e àfaro ai ia taaê te upoo i te tino, ia tuàti maite ra e àfaro ai te òhipa eiaha ei haereraa ê te tahi i te tahi. Oia atoà ia te taata faaroo e ta na òhipa, eita o ia e tano ia faataaê ia na i te Atua, ia parahi fatata noa o ia i pihaiiho i ta na mau faaueraa te reira to na ora. Nahea ? na roto ia i te taviniraa i to na taata tupu, i reira e ,ìtehia ai te faaroo tumu e te òhipa tumu mau.

Te faaroo o te taata e haapäpuraa ia te reira i te òhipa a te taata tei horoà i to na tiàturiraa i roto i te Atua. Ma te horoà o te tià ia na ia tauturu, ia òre o ia e horoà ra, te pohe ra ia to na faaroo e ia òre o ia e tauturu ra te pohe ra ia ta na òhipa. O ta Iatopo ia e hinaaro nei i te taata faaroo atoà, ia òre ia pohe to rätou faaroo, i te mea ua pohe anaè, e pohe atoà te òhipa a te Atua. Aita o Iatopo e hinaaro te reira òhipa, ia tupu ra te hoê faaroo ora no te hoê òhipa ora. Te faaroo e te òhipa e faaìte nei ia i te hanahana o te Atua, eita hoì e tano ia faataaêhia te tahi i te tahi, ia vai hoê ra raua. O ta Iatopo ia e parau nei e, ei faaroo e maitaì ai te òhipa, oia atoà ia te Atua i here ai O ia i te taata, ei faaìteraa i to na tiàraa Metua i te òhipa ta na i hamani.

I òre ai e tià ia na ia faataaê ia na i te taata no ta na òhipa e te faaroo o te taata i haamaitaì ai o ia i te ao nei. Te òhipa noa nei a te Atua i to na here i roto i te taata, aita ra te taata e òhipa nei. Ua hau aè to te taata òhiparaa i teie here to te Atua i nià i te mau òhipa pohe, i nià i te mau òhipa ora. Te Atua ta Iatopo e faaìte nei e Atua ia tei haapaò mai i te taata aita o ia e hinaaro i te pohe o te taata, te maitaì ra e te ora. O ta te taata faaroo ia e pee i te Atua o te òhipa ora.

Mareto 8, 27 – 35.

O vai o Ietu

Ietu te Metia

Te fäìraa a Petero Ietu i mua i te manaò taata.

Te pohe o te Metia

Te ora ia au i te Evaneria.

Ua tupu teie parau ta tätou i Taitarea i Firipi, e tuhaa òire teie no te fenua ra no Paratetina. O Ietu teie e ta na mau pîpî, i te vahi atea i te mau taata i te uiraa o Ietu i ta na mau pîpî.

O vai au nei i ta te taata parauraa ?

Tei maramaramahia e te mau taata, o Ietu, o Ioane Päpetito, o Ietu, o Eria, o Ietu o te hoê o te mau perofeta. Teie te mau manaò i mau i roto i te nunaa tei haapiihia, tei ìte ia Ietu e tei faaroo i te mau òhipa i ravehia e Ietu. Ua vai noa te tiàturiraa o te nunaa i nià i te mau òhipa i tupu e aore ra i maìri. Aita ra rätou e ìte nei i roto ia Ietu i te hoê òhipa âpï te tià e ìriti i te mau òhipa tei hau atu i te ìte taata nei. Aita o Ietu i mauruuru maitaì i teie mau pahonoraa e ua hinaaro atoà o ia i te ui i ta na mau pîpî .

O vai ra vau nei i ta òutou parauraa ?

I roto i teie uiraa, aita roa te hoê taò e tià e haafifi te feruriraa, te vahi noa ra e tià ia haafifi te manaò ia, no te pahono. E faaìte te mau pîpî i te hoê pahonoraa tià, i te mea o rätou teie e parahi fatata nei ia Ietu. O Petero tei pahono ia Ietu, o te Metia ia òe. Ua ìte – a – hia te tumu o Ietu mauti ra ia ta te Atua i faatahinu. E faaìte a o Ietu i te tahi òhipa tei hau i te puai taata, to na ia mauiui e to na pohe, eita ia mai ta te tahi pae, e, tupu te faaruèraa mai roto atu i te fëia paari e te faatere o te nunaa. E taparahi pohe – roa – hia O ia ia tae ra i te ruì toru e tià mai O ia no te faaìte i te mana o te Atua. Aita o Petero i mauruuru i teie parau, ua hau aè to Petero haapaòraa ia Ietu taata i te tiàturi ia Ietu faatahinuhia e te Atua. Àvau atu ra o Ietu ia Petero no teie feruriraa tià òre e vai ra i roto ia na, ua au hoì teie manaò i to Tatani.

I mua teie ma parau e ìriti o Ietu i te hoê ùputa âpï i mua i te mau pîpî na roto i te manaò tiàma o te àau o te taata ta taìtahi. Te taata e hinaaro e pee ia Ietu, e faaruè ia o ia ia na iho, e rave i to na tatauro a pee ai ia Ietu. Oia hoì te taata atoà ua ìte e hopoià ta rätou i roto i te òhipa a te Atua ia au i te titauraa a Ietu. Ua ìte ia e, e taime to na no te òhipa i ta na tareni i roto i te nunaa o te Atua. Te reira taata te ìte ra ia o ia e te ora ra o ia i te ora fanaò ta te Atua i faataa no na. E taua ora ra te Èvaneria ia. Te tapeà ra i to na ora, aita ia i ìte e hopoià ta na i roto i te òhipa a te Atua. Aita atoà o ia i ìte i te pahono i te uiraa a Ietu. O vai ra vau nei i ta òutou parauraa ?

Ia òre anaè tätou e ìte i te pahono i teie uiraa, eita atoà e tià ia tätou ia pee ia Ietu, i te mea aita tätou e ìte i te maitaì i roto i te Atua. Tei ìte ra i te pahono i teie uiraa, e hopoià ia ta na i roto i te òhipa a te Atua.

Ei hiòraa àmui.

Ia au i na taiòraa e maha, e tià ia parauhia te vai ra te tuàtiraa i roto i teie tumu e O vai teie tavini ? O teie te uiraa tei riro ei taamuraa i te mau manaò atoà e vai nei i roto i te,

• Ìtaia 50, 4 – 9 Tavini tei mauiui
• Taramo 130, 1 – 8 Te tiàturiraa o te tavini.
• Iatopo 2, 14 – 15 Aita e òhipa, e aita e faaroo.
• Mareto 8, 27 – 35 Ietu i mua i te manaò taata.

Te faaìte nei teie mau tumu parau i te hoê ìritiraa manaò àano ei faanavaìraa i te mau tuatapaparaa.

1. Te tavini tei mauiui, o vai teie tavini ? te òhipa matamua ta tätou e ìte nei aita o Ìtaia e faaìte nei te iòa o teie tavini. Ta tätou nei ra e ìte nei mauti ra ia, e arero tià to na i te faaararaa i te tarià faaroo, ia noaa ia na te tauturu i roto i te Fatu. E ia uruaì o ia i nià i te Atua. Te ìte nei ia tätou e tavini teie tei horoà i to na oraraa i roto i te Atua. Tei färii i te mauiui e farereihia e ana no te faatupuraa te hau o te Atua.

1. Te tiàturiraa o te tavini, te ìtehia nei i roto i teie tumu parau te huru o te tavini tei parahi fatata noa i te mau hinaaro o te Atua. Tei faaìte i to na faaroo na roto i te pure. I te aniraa i te faaòreraa hara i te Atua. Ei faaìteraa i to na tiàturiraa, e te tiaìraa i te mau faaueraa a te Atua.
2. Aita e òhipa, aita e faaroo, e haapäpuraa teie i te mau tavini o te Atua. Eita e tano noa e rave i te òhipa, na roto noa i te puai, e aita e faaroo to roto. E aha te òhipa e ìtehia i roto i teie faanahoraa, e paruparu ia. Ia òre te faaroo i roto i te òhipa e mea faufaa òre ia te òpuaraa. Ia ìte – a – hia ra te òhipa e te faaroo i te ora àmuiraa e tià ai. Na te reira hoì ia e faaìte i te puai, ua tupu anaè mai teie te huru e tià te mau mea atoà, i te àrue i te Atua na roto i te òhipa faaroo.

1. Ietu i mua i te manaò taata, na Ietu iho O ia e tuu nei i mua i te mau manaò o te taata. Te hinaaro nei o Ietu i te mau manaò e parauhia nei no na, eiaha ei faaìteraa o vai tei rahi aè ia na e te mau taata paari, mau tahuà, mau papaì parau eita roa ia. Ei hiòraa ra na na iho teihea te maramaramaraa o te taata i te òhipa ta na e rave ra. Te ìte nei o Ietu te taaêraa o te mau manaò e vai ra i roto i te mau taata no te tahi pae o Ioane Päpetito, o Eria, e aore te tahi atu mau perofeta. Aita e manaò to Ietu i nià i teie mau manaò i te mea e mau tavini anaè teie no te Atua, ta na ia e òaòa ra. Àreà ta te mau pîpî ra, na Petero ia e pahono e, o te Metia òe. O te òhipa ia i faaineinehia e te mau perofeta na roto i te mauiui e te faaroo i te Atua. I te faaineineraa i te haereraa mai te Metia a te Atua ora. O vai teie tavini ? o ta te Èvaneria ia e pahono nei Mareto 8, 27 – 35.

Te faanahoraa o te parau.

E tià ia tätou ia parau e, e òmua teie pene 8 mai te ìrava 1 e tae i te pene 9, i te ìrava 1.

Te ìrava 1 – 10 te faaamu temeioraa na taata e 4 000.

11 – 13 Te aniraa a te mau Faritea.

14 – 21 Te parau no te pape.

22 – 26 Te matapo no Petetaita.

27 – 30 Te fäìraa faaroo a Petero.

31 – 33 To Ietu faaìteraa i to na mau tavini.

34 – 38 ; 9, 1 Te òhipa a te mau pîpî.

Te tuhaa ra, ta tätou e haapapa tei te ìrava 27 ia e tae i te ìrava 35. O te hoê tuhaa faufaa

roa teie, i te mea e tupu te tahi mau faaotiraa manaò päpu i nià i to te taata manaòraa ia Ietu, e tae noa atu i to te mau pîpî. No reira i tià roa ai, ia tüatapapahia teie tuhaa no te ìteraa i te poroìraa e vai nei i roto ia Ietu e to na hinaaro, e i te mau pîpî e ta rätou maramaramaraa e o tätou, i ta tätou faaìteraa. E tià atoà ia parauhia e, tei roto roa ta tätou parau i te hoê vahi faahiahia no te hiòraa a Mareto. E rave rahi mau manaò päpu òre i nià i te tiàraa mau o Ietu.

• Mareto 1, 27 E aha ra teie ? e aha teie nei parau âpï ?
• Mareto 2, 12 Aita teie peu i ìte – a i o tätou nei.
• Mareto 3, 21 I naò hoì rätou, ua aoaoahia o ia nei.
• Mareto 4, 41 O vai hoì teie o tei faaroo te mataì e te moana atoà ia na.
• Mareto 5, 20 Maere anaè iho ra te taata ia na.
• Mareto 6, 2 Nohea te mau raveà a teie taata ?
• Mareto 6, 49 Manaò aè ra e varua, e ua aue iho ra.
• Mareto 7, 37 Maere roa atu ra rätou e aita e faito.

Ua rau te mau manaò ta te taata e parau nei no Ietu. Te haapaò noa nei rätou i nià i te òhipa e tupu ra, aita ra rätou e haapaò nei te ora o te òhipa. To na auraa ra aita te taata e ìte nei te Atua oia te tumu te òhipa ta Ietu e rave nei. Ua rahi aè to te taata haapaòraa, te faahiahia te òhipa te ìte i te titauraa a te Atua i roto i te òhipa a Ietu. Aita te taata e ìte i te Atua i roto òhipa ta Ietu e rave nei. O Ietu no rätou e taata noa ia mai te mau taata atoà, tei faanaho i te hoê tapura òhipa. Ia au teie mau manaò i hiòhia aè nei. E tià anei ia hiòhia mai teie te huru ? Ua tupu teie mau hiòraa i te tau no Ietu, ua ui, ua parau te mau taata ia au to rätou ìte e to rätou maramarama. E o tätou ?

E toru tuhaa e vai nei i roto i ta tätou taiòraa.

1. ìrava 27 – 30 Te fäìraa faaroo a Petero
2. ìrava 31 – 33 To Ietu faaìteraa i to na mau mauiui
3. ìrava 34 – 35 Te òhipa a te mau pîpî.

1) ìrava 27 – 30. TE FÀÌRAA FAAROO A PETERO.

Tei Taitarea i Firipi te tupuraa teie parau, i te tumu o te mouà ra no Heremona, i te hoê vahi heeuri maitaì. I reira to Ietu arataìraa ta na mau pîpî i te vahi atea i te mau taata atoà, o rätou anaè to reira. Te ìte nei o Ietu e, e taime au teie ia faito O ia i te faaroo o ta na mau pîpî. E tapaò faaìte ia na ua tae o Ietu i te hoê taime faufaa rahi no to na oraraa i te tuatapaparaa i te mau manaò e parauhia nei no na. Ia au te faaìteraa a te nunaa, e ta na mau pîpî.

Te ui nei o Ietu i ta na mau pîpî, na mua roa, te hiòraa a te nunaa. O VAI AU NEI I TA TE TAATA PARAURAA ?

Te hiòraa a te nunaa, o Ioane Päpetito, ua tiàfaahou mai, o Eria, oia te faaìte ia na no o mai te Metia i te Atua ra, e o te mau perofeta. Te ìte nei ia te nunaa i roto ia Ietu te hoê tapaò faahiahia, o Ietu e àuaha parau ia na te Atua. E manaò tano roa teie te ìteraa e o Ietu e parau atoà to na no o mai i te Atua ra. Te päpu nei ia, ia Ietu te nuu nei ta na òhipa i mua. Na roto i teie manaò e horoàhia e te nunaa. Na teie atoà mau manaò e faaìte e aita te parau a te Atua i pohe i roto i te nunaa. Te vai noa ra ia, i tià ai ia rätou i te faahiti mai teie te huru. To na auraa ra, ua faaroohia te mau piiraa a Ioane Päpetito e te nunaa. E ua tiàturihia te tiàororaa a Eria, no te Metia a te Atua ora. E te tohu a te mau perofeta ua haapaòhia.

O VAI RA VAU NEI TA ÒUTOU PARAU ?

E uiraa teie tei riro mai te hoê àuri tei patia i te hohonuraa o te mau àau o te mau pîpî, ma te maere rahi. E uiraa atoà teie, tei ìriti i te ùputa no te hoê faaroo âpï, tei parauhia te ETARETIA TERETETIANO. Te pahonoraa ia ta Petero e horoà nei e, O TE METIA IA ÒE. Ua parau o Petero i te hoê parau tei òre roa i manaòhia e te tahi pae i te parau. Teie fäìraa faaroo na Petero te faatupu ra ia i te mau parau tohu a te mau perofeta no te Metia. O Ietu taua Metia ra i tohu – atoà – hia. E fäìraa parau tià teie, ta Petero e faaìte nei teie ra aita O ia e ìte nei te rahi o te hopoià ta teie parau e faatupu. O te Metia ia Òe. Oia hoì ta te Atua i faatahinu to na auraa ra e faatupu ia i te òhipa a te Atua i te fenua nei. Te vahi aita e parauhia ra te Iòa o te Atua, eiaha ia e huna e faaìte ia. Ia ora te òhipa a te Atua ei ia maitaì. O te reira o te tià e rave, eita ra e tupu noa na roto i te hau e tupu ra na roto i te mauiui e te peàpeà, e ùàna ai te òhipa a te Atua.

2) Ìrava 31 – 33. TO IETU FAAÌTERAA I TO NA MAU MAUIUI.

Teie o Ietu e faaìte nei no te taime matamua roa i roto i ta Mareto papaìraa i to na pohe. E faaìte ra o Mareto e toru taime teie òhipa riàrià mau, Mareto pene 3 ìrava 3, pene 9 ìrava 31, pene 10 ìrava 33. Teie te pahonoraa hohonu i te fäìraa faaroo a Petero. Eita te Metia a te Atua ora e färiihia e te fëia mana faatere ra i te nunaa, te fëia paari, te mau tahuà, e te mau papaì parau. te òhipa e tupu e faaruêhia, e, e taparahi pohe – roa – hia O ia. O teie noa te raveà e tià no te tapeà ia Ietu, ia òre ia haere atu i mua. Ma te manaò e, e mou te òhipa i òmuahia, e riro ra teie raveà ei faaùna faahouraa i te òpuaraa a te Atua. Te ìte òroma nei o Ietu te paruparu e te èreraa te fëia faatere i to na tau to rätou faaroo. No te aha ? no te mea ua tae roa te fëia faatere i te parahiraa i nià i te parahiraa o te Atua, e aore ra i te faatearaa i te Atua i tihiti a riro atu ai rätou ei Atua. A parau noa ai i te iòa o te Atua, te òhipa ra e tupu ra tei te atea roa ia i te ture a te Atua. E tià i teie na pupu taata e toru i te faaoti i te parau o Ietu, e tupu to rätou hinaaro, eita ra no te haafifi i te òpuaraa a te Atua no te turaì faahou ra i mua, ia ìte – a – hia te mana faaora o te Atua. Te ìriti nei o Ietu na roto i teie mau parau te tahi faanahoraa tei òre roa e naeàhia e te feruriraa o te taata. E tià ia tätou ia parau e te vahi i mau to tätou feruriraa, teie o Ietu e turaì faahou nei ia tätou i mua. Te turaì nei o ia ia tätou i ò mai i to tätou mau òtià no te maramarama. Aita o ia e hinaaro nei ia parahi noa tätou i nià i te parau no to na pohe. E i te tuatapaparaa o vai tei hape, e aore o vai tei hau atu i te mana, i roto ia Ietu e te mau faatere o te nunaa. Aita roa ia.

Te hinaaro nei ra o Ietu ia tätou ia haere atu i mua i roto i te puai o te faaroo. Oia hoì e faariro te mauiui e te pohe o Ietu eiaha ei òtoraa, e faariro ra ei òhipa tei faaâpï i te mau mea atoà, tei tama i te mau mea tahito, mai te pape tiruvi tei tama na i te fenua, eita atu ra e rahiraa taata te pohe, hoê noa ra te pohe te Metia a te Atua ora. Tei ù nei te vahi e titauhia ai tätou ia turaì a to tätou faaroo i te vahi naeà – òre – hia e to tätou maramarama. O Petero ua haapaò noa o ia i te parau no te pohe o Ietu, aita ra o ia i haapaò e o ia atoà te tahi e toe mai, mai roto mai i teie òhipa riàrià. To na manaò eiaha o Ietu e haere i Ierutarema e faaea noa ra o ia i Tarirea. Ua mau te manaò o Petero i nià i te pohe eiaha i nià i to na ora. Te parau nei o Ietu ia Petero e, e haere ê atu òe e Tatani e, aore hoì òe i au i ta te Atua ra, o ta te taata nei ra ta òe i au. Te vahi ra e titauhia nei ia tätou ia ìte mauti ra ia, e E UA RUÌ TORU ANAÈ E TIÀFAAHOU AI I NIÀ. Teie te tuhaa tei òre i naeàhia e to tätou ìte taata nei, o ta Ietu ia e hinaaro nei e faaìte ia tätou. Te pohe mea faufaa òre ia i mua i te òpuaraa a te Atua. Te tiàfaahouraa o te Metia, o te tiàraa atoà ia o te mau taata atoà tei ìte ia Ietu e o te Metia O ia na te Atua ora. O vai o Ietu i ta tätou nei faaìteraa, taviniraa i teie mahana ? Ua mau anaè to tätou manaò i te pohe, e òhipa pohe atoà ta tätou e faatupu. Ua naeàhia anaè ra i nià i te tiàfaahouraa, e òhipa ora ta tätou e faatupu nei.

Ìrava 34 – 35 TE ÒHIPA A TE MAU PIPI.

Teie o Ietu e titau nei i te nunaa e te mau pîpî i pihaiiho ia na, ma te faaìte ia rätou i te hoê parau faufaa mau, no te tatauro. I faaìte aè nei O ia i to na pohe e te faufaa no te tiàfaahouraa. Te manaò o te taata no te tatauro, o te hopeà ia no oraraa, ua pohe e aita e òhipa faahou e ua faaòre – roa – hia to na parau. E, eita roa ia, no te Atua e no Ietu, o te hoê ia raveà no te faaùnaraa i to na mau hinaaro i roto i te taata te tumu ia teie titauraa na Ietu i te nunaa.

Te tatauro o te ìritiraa ia i te taata faaroo i roto i te hoê òhipa âpï. E taua òhipa ra te raveraa ia te taata ta tataì tahi i to na tatauro. Ei faaìteraa i te puai o te faaroo i roto i te òhipa. Tei haapaò i teie parau ra, ua au ia O ia i te hinaaro o Ietu, e te pee nei o ia ia Ietu. Eiaha ia patiti – atoà – hia o ia i nià i te tatauro, te reira tuhaa ra ua oti ia i te ravehia e Ietu. Ta Ietu ra e parau nei ia tätou, te tahi ia tuhaa òhipa tei òre i oti i te ravehia. Tei reira ta tätou tuha, tei reira e faufaahia ai to tätou tatauro, teie taua òhipa ra, te päpetitoraa, e te haapäpuraa. Eihea mau taata tei haapaòhia no teie òhipa, na roto i ta tätou taviniraa ? na te òhipa e tupu nei e tià e pahono teie uiraa. Oia hoì tei tapeà i to na ora ra, ua ère ia i te haamaitaìraa a te Atua. Ua faaea noa ia oia i roto i te ora faaâpï – òre – hia, ma te tauà òre i te mau titauraa a te Atua. Te haapaò noa nei o ia i to na puai to na ìte, to na maramarama no na anaè, ua moèhia e ana te Atua. Àreà ra tei tuu i to na ora i roto i te Èvaneria ma te tavini i te Atua, e haamaitaì ia o ia e, e ora to na. Ua faaruè ia o ia i te mau òhipa atoà e tià e faaäpiäpi, i te tere maitaìraa te òhipa a te Atua. Mai teie parau e pihaa noa nei i roto i te taata e, O vau, mauti aè vau, ua tià anaè te taata ia tinai teie huru manaò, ua faaruè o ia ia na iho na te Èvaneria e arataì ia na. E to na tatauro, mämä rahi to na mai te mataì e pihauhau nei ei faahaumaruraa i te fenua. Te faaòromaì nei ia tei horoà i to na ora no te aroha o te ora mure òre. Teie te vahi ta Ietu e hinaaro nei ia naeàhia e te taata. Te auraa ia o teie parau e horoà i te ora e noaa ai te ora mure òre, a rave i to tatauro a pee ai ia Ietu, no te haere i nià i te èà no te Aroha mure òre. Tei faataa ia na iho no te Èvaneria e tià ia parauhia e ua pohe te mau enemi o te Atua, o te Atua ra teie e ora nei i roto ia na. O te òhipa matamua ia ta te mau pîpî e rave, te tinairaa i te mau enemi o te Atua e vai ra i roto ia rätou. Ua tià anaè i te mau pîpî i te na reira, e marua ia te mau patu tei àua i te taata i roto i te tiàturi òre, te horoà òre e te here òre. E pee ra ia Ietu ia tupu te horoà e te here i te mau taata atoà tei titauhia no te tahi tuhaa òhipa i roto i te Metia ra ia Ietu.

Mai te mau pîpî i titauhia e Ietu no teie òhipa oia atoà tätou tei faaroo i teie parau, e tuhaa òhipa atoà ta tätou i roto i teie parau e horoà, i te ora, e, e pee ia Ietu. E horoà i te ora i roto i te òhipa a te Atua, o to tätou ia tiàraa. Ma te pee ia Ietu, ia òre tätou ia haere noa i nià i te mau èà aita to na e faanahoraa. Ua horoà atoà o Ietu ia tätou i te auraa no ta na tapura òhipa. E pohe O ia no te vavahi i te mau òhipa tià òre, e tiàfaahou O ia i te ruì toru, no te faatià ia te hoê faanahoraa âpï, ia tià te mau taata ia haamori i te Atua tei horoà, e tei here. Ei ia ìte te mau taata atoà e O vai o Ietu ?

*****Hoê teie haapaparaa parau i roto i te rauraa o te manaò*****

Teraì or.