Overblog Suivre ce blog
Editer l'article Administration Créer mon blog
1 juillet 2015 3 01 /07 /juillet /2015 10:24

Mau taiòraa.

Itaia 35 : 3-7 Te ora a te Atua.

Taramo 146 Ta Iehova i tatara.

Iatopo 2 : 1-6 vm Eiaha e vahavaha.

Mareto 7 : 31-37 Te faaoraraa.

Ei parau tumu Mareto 7 : 31-37 Te faaoraraa.

Ei ìrava tumu Mareto 7 : 34 Ua hiò atu ra i nià i te raì, òto iho ra, e ua na o atu ra ia na ,Efata ,o te faaauraa ra ,ia àmaha.

Teie ta tätou parau no teie hora paieti, te ìrava 34,Ua hiò atu ra i nià i te raì, òto iho ra, e ua na o atu ra ia na, Efata, o te faaäuraa ra, ia àmaha..

No roto mai i teie taiòraa Mareto i te pene 7 mai te ìrava 31 e tae i te i te ìrava 37. Te faatupu ra o Ietu i te hoê òhipa maere, te faaoraraa O ia te hoê taata tei turi to na tarià e tei vavahia hoì. Aita ra ta tätou taiòraa e haapäpu mai nei, te tiàturiraa o teie taata turi vava, e te mau taata i arataì mai ia na ia Ietu ra, te vahi faufaa ra ua ìte rätou e o Ietu teie. O ta rätou paha i ìte na i roto i ta na mau òhipa faaoraraa maì, e te mau òhipa temeio, te mea ra ta tätou e hiò maitaì i roto i te huru o teie mau taata, to rätou ia manaò papu e, e, ora to rätou taeaè ia Ietu na roto i te tuuraa rima.

Aita atoà ta tätou taiòraa e faaìte nei, te maororaa te tupuraa teie maì i nià i teie taata, mai to na ra nei fanauraahia mai e àore ra, ua tupu na te tahi fifi i nià ia na. Te mea papu ra ta te taiòraa e faaìte nei, e turi vava teie. Tei faaea noa i roto i to na ao, te ao no faaroo òre i te mau maniania, e te ao no te parau òre.

Ietu i mua i teie maì, e teie mau taata, aita O ia e pahono nei te färii nei i te aniraa.

Haere atu ra O ia e te taata maì i te hoê vahi raua anaè, i te hoê vahi atea no te rahiraa taata, mai te taote ra O ia i te raveraa i ta na òhipa. Tuu atu ra te rima i roto i ta na tarià, tuha iho ra te huare, e faatiàià atu ra, hiò atu ra i nià i te raì, òto iho ra, na o atu ra ia na, Efata e reo Aramea teie, oia ia ia àmaha, e aore ra ia matara oe, ora aè ra taua maì ra. Te ùputa o te tarià ua matara, e ua faaroo, e te arero e tià ia paraparau, no te àpapa te mau reta no te haapaaìna te reo, ua ora o ia i to Ietu hiòraa i nià i te raì te vahi teitei, te terono hanahana o te Atua, e ua òto no te faaìte i to na faatura i to na Metua, te FAAORA NUI.I poroì ai o Ietu i te mau taata tei ìte i teie òhipa eiaha ia faaìtehia, no te mea ai - ti - ä ta na òhipa i tae atu ra i te hopeà tei te òmua – noa - raa Ò ia i te òhiparaa, aita ra, i tiàhia i teie poroì ta Ietu, parare atu ra taua òhipa maere nei i te mau vahi atoà.

E aha tei ìtehia i roto i teie òhipa faaora ?

Òia ia, te maitaì o te Metia tei horoà i te ora i roto i te tarià tei vai turi noa i te mau varovaro mataì o te ao nei. E tei horoà atoà i roto i te arero te ora ia riro o ia mai te mau taata tei parau, no te pahono i te hoê manaò. Te riro nei ia teie taata mai te mau taata atoà, tei faaroo, e tei parau. Aita atu ra O ia i faaea noa i roto i te rupehu no to na ao, e te àmui atoà nei ra o ia, i roto i hoê oraraa matau – òre - hia a ana. Te òtamu tei òroi i te tarià, ua ìritihia e te mana faaora o te Atua, te taura tei natinati i te arero ua tatarahia e te mana faaora o te Atua. Te faatiàma nei o Ietu i teie turi vava i mua i te Atua, e i mua i to na mau taeaè, e ia itoito i te ora a te Atua. Ua ineine roa ia te vahi tomoraa no te parau, ia faaroo i te titauraa, e ia tià atoà ia pahono i ta te Atua e hinaaro mai, i parauhia ai te tarià o te vahi ueueraa no te huero o te mau parau, e repo maitaì ra ua färii ia, ia òteo i roto i te ààu, tei òteo ra, o ta te arero ia e faahotu. Areà ra te repo ìno ra e òre ia e òteo, e òre atoà ia e hotu e vai noa ia mai te hoê fenua tei òre i faararirarihia i te haumaru. No reira hoì te Atua i tapari ai te tarià i pihaiiho i te vaha, ia roaa vave i te taata ia titià, te tià ia pahono no te faatupu i te hoê oraraa hau, i roto i te hinaaro o te Atua.

Ei reira e faaorahia ai te mata o te matapo, e àmaha ai te tarià o te turi, ei reira te pirioì e òuàòuà ai mai te airi, e te vava i reira e himene ai ,i reira atoà te pape e tahe ai i roto i te mau ànavai no te mau vahi metepara. Te reo ia o Itaia i te nunaa o te Atua.

E hoa here ma e,

Ua hiò atu ra Ietu i nià i te raì, te òhipa matamua ia tei ravehia, te haamanaòraa O ia i to na Metua, aita O ia e hinaaro nei e haamoè i te Tumu no te ora, i ù nei te faaìte päpu nei O ia to na tuàti i to na Metua. Òto iho ra, i ta te Atua e faatupu na roto Ia na, o te mauiui teie o Ietu ei faaìteraa i to na here i te taata, E ua naò atu ra ia na Efata, oia hoì, a ìriti ia oe no te parau a te Atua, ia tuàti i te Atua, ia tuàti i te mau taeaè, e ia tuàti i to te ao nei. E reo teie no Ietu tei faafanau faahou i teie turi vava, ia tià atoà ia na ia faaroo te huru no teie ao tei òpanihia ia na eihea maororaa, e teie nei te faaroo nei, e te parau nei i te ora a te Atua.

Teie te hoê vahi faufaa, no teie taiòraa ta tätou i teie mahana, te òhiparaa o Ietu i te ora a te Atua, i nià i teie taata no Tetapori, mai Turia i Titona o Ietu i te haereraa mai, e mau tuhaa fenua teie, aita to rätou e tiàturiraa, oia hoì te haamori nei rätou i te tahi atu mau atua, aita atoà rätou i ìte o vai o Ietu i roto i to na hohonuraa, ta rätou noa i ìte ua ora te turi vava na roto i te tuuraa rima. Oia hoì, ua faaora o Ietu i teie turi vava i nià i te hoê fenua tiàturi òre i ta na Metua. E tapaò faaìte teie ia tätou e, aita te ora a te Atua e maìti nei i te taata, e aita atoà O ia e horoà nei te òtià no ta na faaìteraa parau. Te reo matamua i faaroohia i teie taata, teie ia e, Efata, a ìriti ia oe.

Ua tapeàhia te tarià e te arero, o te taata turi vava, mea tià atoà i te Metia ia tapeà i to tätou eiaha no te hutihuti, no te mirimiri noa ra.

Teraì òr.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens