Overblog Suivre ce blog
Editer l'article Administration Créer mon blog
1 juillet 2015 3 01 /07 /juillet /2015 11:11

Taiòraa : Mareto 12, 38-44

Aroharaa…

I roto i teie nei taiòraa na tätou no teie täpati Mareto 12, 35-44, e piti tuhaa e ìtehia. Te vai nei te tuhaa matamua, oia hoì mai te ìrava 35 – 40, te piti o te tuhaa mai te ìrava 41 tae roa i te 44.

Te tuhaa matamua, te haamanaò mai ra ia i te uiraa a te mau päpaì parau e riro te Metia ei tamaiti na Tävita? Te piti o te tuhaa, te parau ia no teie nei vahine ìvi e ta na horoà.

Te piti o te tuhaa ta tätou e haamau i to tätou manaò. Teie ia vahine ìvi. O vai teie vahine. Mea päpü aita i faahitihia to na iòa, eita e òre eere ihoä i te mea faufaa ia ìtehia to na iòa. To na rä tiàraa, e vahine ìvi ia. Oia hoì e vahine aita ta na e täne faahou ua pohe. Eere ua faaruèhia i te täne. Ua pohe rä te täne. Eita e òre e vahine paari atoà teie. Te mea päpü rä, e vähine ìvi, e vahine taoà òre o ta tätou ia parau(ìrava 42).

Teie o Ietu i roto i te fare pure, e to na maere rahi i to na hiòraa i teie vahine ìvi e te taoà òre i te raveraa i te tahi òhipa, noa atu to na huru veve, ua tià ia na i te horoà i ta na moni. Teie horoà tei hau i te horoà a te tahi mau taata moni roa atu tei horoà i te tahi noa tuhaa.

Ua ìte tätou no te horoà, te horoà nei tätou i te täpati no te tütia, no te Më, no te tuhaa 200, te tumu pure, no te ìmiìmiraa, taùrua, no te hamani i te fare pure. E te ôpua nei tätou e patu i te tahi fare no te òrometua e te vai atu ra ta tätou mau horoà.

Eita e òre e taime püpüraa tütia atoà i roto i te fare pure. Ua horoà te mau taata moni. Ua horoà atoà teie vahine ìvi. E hiòhia, te mauruuru nei Ietu i teie òhipa i ravehia e teie vahine. E piti moni ta na i tuu i roto i tötö. E ìtehia mai änei ta na horoà. No te tahi pae, eita paha. E piti noa paì moni.

Teie nei rä no Ietu, ua tuu, ua hau aè te horoà a teie vahine ìvi i ta te feiä moni atoà i haere mai na reira. Mea hau aè ta na horoà. O ia te hoê vahine veve, tei haaveve roa atu ia na, na roto i teie noa na moni e piti e toe ra. E horoà pau roa faahou.

Ia hiò anaè tätou, e aha atu ra ia ta na òhipa i teie nei. Aita e moni faahou, aita e oraraa faahou. E aha ia te mea e toe ra ia na. Te tiaì-noa-raa paha ia i to na pohe. Aita hoì i ìte. Aita i faahitihia e tamarii ta na i fänau. Te vähi päpü rä, aita e moni rüàu ta na. Aita hoê tuhaa moni tauturu ia na i roto i to na oraraa.

Eita e òre ua horoà teie vahine ìvi, ma to na âau atoà, ma to na püai atoà, ma to na manaò atoà, ma to na värua atoà. Teie te tahi hohoà no te hoê taata tei hinaaro i to na Atua. Mai ta tätou i faaroo i te täpati maìri nei. Eere änei teie te mea e tïtauhia mai ra ia tätou te taata ia rave.

Ahiri paì tätou terä e ìte atu ra i teie vahine i te tuuraa i roto i te färii. E parau paha ia tätou ia na, mämä eiaha täpeà noa ä teie moni na òe no te tauturu ä ia òe. Vai iho noa na ù e àufau ta òe tuhaa. E paha. Aita paha.

Mai te peu te horoà a teie vahine ìvi ta tätou e täpeà mai, eita e òre e haapiiraa atoà to reira. No nià i te Fatu ia Ietu e no nià atoà ia tätou te taata.

Na mua no nià ia tätou te taata. Teie horoà a teie vahine, e horoà päpü mau. Ua ìte teie vahine tei ô i te Fatu ra to na tiàturiraa. Ua ìte teie vahine to na ora teie ia Ietu ra.

No nià ia Ietu. E haamanaò mai teie vahine i te òhipa e tupu atu. No te mea, e toru noa mahana i muri i teie òhipa na tätou, e faatataurohia Ietu. Eita e òre ua täpeà mai Ietu i te hohoà no teie vahine ìvi no ta na horoà. Ieut, o ia atoà, ua horoà o ia ia na no tätou, haere roa i to na poheraa, ua haaveve, ua faaère roa Ietu i to na ora. Ua horoà. Ua ìte tätou te reira.

A hiò na tätou te nehenehe o te haapiiraa a teie vahine ìvi i vai iho mai na tätou i teie mahana. Na reira atoà paha tätou, e horoà tätou no te fatu, no na anaè mai teie nei e a muri noa atu. Amene.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens