Overblog Suivre ce blog
Editer l'article Administration Créer mon blog
1 juillet 2015 3 01 /07 /juillet /2015 11:09

Märeto 12/28-34

« Aore òe i ätea ê atu i te Pätireia o te Atua ra ». (Mär 12/34)

Kaoha nui i te kaoha o te Etua i te àveia i teie À no to na tikafaahouraa. Kura ora e ia ora na i te Aroha o te Atua o Ietu Metia.

Mai te òrometua e to na ùtuafare, te âpooraa tiàtono e te mau ùtuafare, te mau âmaa òhipa atoà, te tino ètärëtia a Ietu Metia, te fëtii tamarii, te feiä ruhiruhiä, ia ora na i te Aroha o te Atua. Nä päroita e âmuiraa no Taaoa, Hanaiapa, Puamaù, ia ora na i te Aroha o te Atua.

Nä ùtufare òrometua no Ua Pou, Tüarae mä, no te Taiohaè, Manuùra mä, ta òrua mau päroita. Te ùtuafare òrometua no Tanavae mä, te mau päroita atoà no Tuamotu mä. Te mau ùtuafare tiàtono Nuu-Hiva e Tuamotu, ia ora na i e Atua. Ia ora na i te Aroha o te Atua. Òutou, te mau òrometua e te mau tiàtono, ta òutou mau vahine e te mau tamarii, mootua, tei täpapa mai i ta tätou Faaineineraa Tämau, ia ora na i te aroha o te Atua, e ia haamaitaì te Atua tei haafärerei ia tätou. To te Tuhaa VI, te peretetini e arataì nei ia òutou, mauruuru i te Fatu i to tätou färereiraa.

Te huimana e faatere nei i to Tuamotu mä e Nuuhiva mä, te huifaaroo e te huiraatira no terä e terä motu e fenua, a färii mai i to mätou täpaò aroha, to te Tomite Faaineineraa Tämau, tei tae mai e tei maìri.

Ua matara mai teie parau nä roto i te färereiraa o Ietu e te hoê taata no te pupu päpaìparau. Oia mau e ö mai te uiraa e : No te aha teie huru parauraa a Ietu i te päpaìparau : « Aore òe i ätea ê atu i te Pätireia o te Atua ra » ? E aha te tahi auraa èvaneria e au no tätou, no te tauturu i to tätou oraraa faaroo ?

1. Ei haamanaòraa, ua faaara faahou Ietu i te ômuaraa o te Märeto 12, e haruhia o ia e e täparahi-pohe-roa-hia e te mau faatere o te haapaòraa Âti-Iuta (12/1-12).

I muri noa mai i teie faaara-parapore-raa, ua tono te mau Färtiea i te mau taata no Herota no te rämä ia Ietu : « E te Òrometua e, ua ìte mätou e, e taata parautià òe, e aore o òe mataù i te taata ; e òre hoì òe e haapaò noa atu i te huru o te taata ; te haapii nei rä òe i te parau a te Atua mä te haavare òre. E au änei i te ture ia hopoi i te taoà àufau na Taitara, e e òre änei ? » (12/14) Ua haapii Ietu ia rätou : « E tuu atu i ta Taitara ra ia Taitara, e ta te Atua ra, e tuu atu ia i te Atua » (12/17). Maere aè ra teie mau taata ia Ietu.

I muri noa mai ia rätou, ua haafätata mai te mau Tätütea e ta rätou uiraa : ia au i te ture a Möte tei faatià ia faaipoipo i te vahine tei pohe te täne, i te täne âpï : tuu atu ra rätou i te parau no te hoê vahine tei faaipoipo e hitu täne, e ta rätou uiraa : ia tae i te tiàfaahouraa, e vahine ia teie nä vai ? Ua faaitoito atu ra Ietu i te mau Tätütea i te taiò i te Pïpïria no te ìte e o vai te Atua no rätou, e faaitoio atoà hoì i te oraraa i te reira mau haapiiraa i roto i te oraraa faaroo. Ia òre anaè te Pïpïria ia taiòhia, e vai noa ia teie mau taata, na Ietu e, i roto i te « hape rahi » (12/13-27).

2. I muri noa mai i te mau Tätütea, o teie ia päpaìparau e ta na uiraa : « Tei hea na te parau rahi o te ture ra ? » (12/28) I faaroo aè nei tätou i te pähonoraa a Ietu, e te pähonoraa hoì a te päpaìparau. E te uiui atoà ra tätou e : Ua ìte, ua märamarama mau änei te päpaìparau i ta Ietu i parau atu ia na ? Ia heheu mäite tätou i ta Ietu parauraa i te päpaìparau, e ta te päpaìparau parauraa ia Ietu, i reira e noaa mai ai te tahi maa türamaraa no ta tätou nei ìrava : « Aore òe i ätea ê atu i te Pätireia o te Atua ra ».

Te parauraa a Ietu : « Teie te parau tahi o te ture ra : “E faaroo mai, e Ìteraèra e ! O Iehova to tätou Atua, hoê hoì Iehova. E e hinaaro òe i to Atua ia Iehova mä to âau atoà, e mä to värua atoà, e mä to manaò atoà, e mä to püai atoà”. O te parau teie i hau i mua. E mai te reira atoà hoì te piti : “E aroha atu òe i to taata-tupu mai to aroha ia òe iho na”. Aita atu ä parau e hau i te reira ». (12/29-31).

Te parauraa a te päpaìparau : « Oia mau, e te Òrometua ! E parautià ta òe i parau mai nei : hoê roa hoì Atua e aita atu o ia anaè ra. E të hinaaro atu ia na mä te âau atoà, e mä te ìte atoà, (e mä te värua atoà), e mä te püai atoà, e te aroha i te taata-tupu mai to na aroha ia na iho ra, e rahi ia i tei hopoihia ia pau täatoà i te auahi, e te mau tütia atoà ra » (12/32-33).

Ua ìte mau änei te päpaìparau i ta Ietu i parau atu ia na ? Ia au i ta na parauraa, ua huru taa te päpaìparau, aita rä i taa roa. Aita te päpaìparau i ìte e ua rave mai e Ietu i te fäìraa faaroo a te tamarii Ìteraèra ia au i te päpaìraa a te Teuteronomi 6/-4-5. E aita atoà hoì o ia i ìte e te faaâpï ra Ietu i teie fäìraa faaroo a Ìteraèra.

Te fäìraa faaroo a te tamarii Ìteraèra : « E faaroo mai, e Ìteraèra e : O Iehova to tätou Atua, hoê hoì Iehova. E teie nei, e hinaaro atu òe i to Atua mä to àau atoà, e mä to värua atoà, e mä to püai atoà » (Teut 6/4).

Te faaâpïraa a Ietu i teie fäìraa faaroo : « E e hinaaro òe i to Atua ia Iehova mä to âau atoà, e mä to värua atoà, e mä to manaò atoà, e mä to püai atoà ». Ua faaö mai Ietu i te parau no te « manaò » i roto i teie fäìraa faaroo. Ia faaroohia atu te parauraa a te päpaìparau, te faaòhipa nei o ia i te parauraa a Ietu mai ta na e hinaaro ra. Inaha, mai te mea e te tïtauhia mai ra e Ietu te « manaò », te parau nei ia te päpaìparau, te « ìte ». Oia hoì, e tià roa i te päpaìparau i te höroà i te Atua « to na àau, to na ìte e to na püai », eita rä e tià ia na i te höroà atoà i to na « manaò ».

Oia mau, aita Ietu i faahapa i te parau a te päpaìparau, aita o ia i parau atu ia na e ua hape òe, ua färii rä Ietu e ua parau mai teie taata i te parau e vai ra i roto ia na, oia hoì, « hoê anaè Atua, e e hinaaro i te Atua mä te àau atoà, e mä te ìte atoà, e mä te püai atoà ». No reira, i mua i te parau a te hoê taata mai teie te huru, te hoê taata, eita e tià ia na ia fäì i te Atua o Ìteraèra, e eita e tià ia na i te höroà atoà i to na « manaò », teie ia te parauraa a Ietu : « Aore òe i ätea ê atu i te Pätireia o te Atua ra ».

3. Te huru päpü noa mai ra, eere teie taata i te Âti-Iuta, e Herëni rä. Ia au i te tahi arataìraa herëni, e täpae te taata i roto i te « ao atua » nä roto i te « manaò », no te mea na te « manaò » e höroà mai i te paari e te ìte no te haere e no te tomo i roto i te « ao atua ». « Aore òe i ätea ê atu i te Pätireia o te Atua ra », te auraa ra, te höroà nei Ietu i teie päpaìparau i te hoê parau âpï roa, oia te parau no te « Pätireira o te Atua » ; parau tei òre roa i tiaìhia e teie taata. E te haapäpü nei Ietu e te vai nei te hoê ärea i rotopü i teie taata e te Pätireira o te Atua : « aore ia i ätea ê atu » : « Aore òe i ätea ê atu i te Pätireia o te Atua ra ».

Nä te aha i faatupu i teie ärea i rotopü i te päpaìparau e te Pätireira o te Atua ?

Te tahi âmaa pähonoraa : na te « manaò » o teie taata. Ia au i te hiroà o te Herëni, te « manaò » o te parau rahi roa aè ia o te firotöfo, no te mea no roto mai te « manaò » i to rätou atua ; ua tuuhia te « manaò » e to rätou atua i roto ia rätou ; e na te « manaò » e vai ra i roto i te taata e arataì i te taata i to na ra atua. Te ìte ra tätou e mea faufaa te « manaò » no teie taata herëni. Te « manaò » ia au i te hiroà herëni, e auraa piri roa to na e te « värua » i roto i te hiroà âti-iuta. E tüàti te manaò herëni e te värua âti-iuta i nià i te parau no te « ora ». E te vai ra teie parau, te parau no te « ora », i roto i te tïtauraa a Ietu i te mau taata atoà e hinaaro i te pee ia na : « Te taata i hinaaro i te pee mai ia ù, e faaruè o ia ia na iho, e rave i tana tatauro, a pee mai ai ia ù. O tei hinaaro hoì i te täpeà i to na ora, e ère ia i te ora ; e o tei tià ia na i te tuu i to na ora ia ù e te Èvaneria nei, e ora ia to na » (8/32).

Te parau o teie taata herëni, te huru matatara noa mai ra, aita o ia e hinaaro nei e höroà i to na « ora » i te Atua o Ietu Metia. Nä hea ia e tià ai ia i te färii i te « Pätireia o te Atua e fätata mai ra ia na » (1/15) ? E au atoà ia na te parau a Ietu : « E faaö ôhie aè te tämera nä roto i te âpoo au i te taata taoà ia faaö i te Pätireia o te Atua ra » (10/25). Te auraa ra, e vaiiho i te Pätireia o te Atua ia tomo mai i roto i to òe àau, nä mua roa ; e vaiiho i te Värua o te Atua ia haafänau faahou ia òe i roto i te Metia tei pohe i nià i te tatauro e tei tiàfaahou mai, mai ta Ietu i parau ia Nïtotemo : « Âmene, âmene, e parau atu vau ia òe : ia òre te taata ia fänau i te pape e te Värua, e òre o ia e ö i te Pätireia o te Atua ra » (Ioane 3/5). E i roto i te Märeto : « Oia mau ta ù e parau atu ia òutou nei : o të òre e färii i te Pätireia o te Atua mai te tamaiti àruàru ra, e òre roa atu o ia e ö i reira » (10/15).

4. I muri aè i teie färereiraa, te haapii nei Ietu e mea rave àtä no teie mau taata herëni i te färii i te Atua o Ìteraèra, e mea rave àtä ia rätou i te färii ia Ietu ei Metia ei faaora, e e mea rave àtä ia rätou i te färii i te türamaraa a te Värua o te Atua (12/35-40). E no te tauturu i te feiä e faaroo mai ra i ta na haapiiraa, te haaferuri ra Ietu ia rätou mä te faahiò ia rätou i te höroà a te vahine taoà òre e te ìvi (12/41-44). E aha ta teie vahine taoà òre ìvi i höroà ? To na ia « ère ».

« Aore òe i ätea ê atu i te Pätireia o te Atua ra ». No tätou nei, na te papetitöraa e tauturu ia tätou i te ìte e « e mau tamarii tätou no te Pätireia o te Atua » (Ruta Èv. 18/29). Ua hiti anaè te parau o te papetitöraa, te vai atoà ra ia te parau no te faaroo e te peeraa ia Ietu ei pipi na na no te poro i te Pätireia o te Atua, te Èvaneria, oia te Parau âpï òaòa no te faaoraraa a te Atua nä roto i te Metia e te Värua.

No tätou nei, te tahi haapiiraa e höroàhia mai ra mai roto mai i teie taiòraa pïpïria : e faatano i te pororaa i te Pätireia o te Atua, te Èvaneria ia au i te huru e te hiroà o te mau taata o ta tätou e poro atu nei. Eere i te tuhaa ôhie, no te mea te tïtauhia mai ra tätou ia ìte i te huru, te hiroà o te mau taata i reira tätou i te tïtau-raa-hia e poro i te Pätieria o te Atua, te Èvaneria. E täpura òhipa rahi teie tei hiò-âmui-atoà-hia mai e tätou i roto i ta tätou mau haapiiraa no te iòa « Ètärëtia porotetani mäòhi ». E faufaa to te ìteraa i te huru e te hiroà o te reira e te reira taata, âti, nünaa no te poro i te Èvaneria e no te ora i te Èvaneria i roto i te reira hiroà taata. Ia au i te pae hopeà no te Märeto 12, e faaitoito i te ìmi e te ìtea i te « ère » e vai ra i roto i te taata, te ùtuafare, etv.

O te òhipa ia ia ravehia e Ietu no te päpaìparau, te ère ra teie päpaìparau no te parau no te Pätireia o te Atua. O te òhipa atoà ia e orahia e Pauro ia na i tae i te òre no Ateno (fenua herëni), ua ìmi o ia te täpaò e faaìte mai ra i te « ère », e ua ìtea mai ia na i te hoê fata tei päpaìhia i nià iho : « Na te Atua ìtea òre » (« Ia ù hoì i hahaere noa iho nei e te hiò-noa-raa atu i ta òutou e haamori nei, ìte atu ra vau i te hoê fata e te parau päpaìhia i nià iho : “NA TE ATUA ÌTEA ÒRE”. O ta òutou hoì e haamori noa nei mä te ìte òre ia na, o ia ta ù e parau atu ia òutou nei » Òhipa 17/23).

Te òhipa atoà ia ravehia e te mau mitionare peretäne, mäòhi e faräni, te « ère » i ìtehia e rätou : te parau ia no te Aroha, i poro ai rätou e « e Aroha te Atua o te Èvaneria ».

Te tao ra « aroha », e taò mäòhi, âreà te auraa i tuuhia atu e te mau veà tono, eere ia i te auraa hëpera, eere i te auraa herëni, eere atoà hoì i te auraa mäòhi, e auraa èvaneria rä.

Hou rä tätou i te heheu i te « ère » i roto i te tahi, mata na i te vaiiho ia vëtahi i te parau mai i te « ère » e vai ra i roto ia òe, e pure atu ai i te Fatu e haere mai e parau ia òe i roto i te vähi i haavatahia e te « ère ». A taa noa atu ai te « ère » o te taata tätaìtahi, te vaitahaa noa mai ra te mau « ère » e « fakakerekere » nei i to tätou hiroà, to tätou oraraa faaroo, to tätou oraraa vaamataèinaa.

Ìrava faaitoito : E parau ia na Ietu : « Ua horoàhia mai te ìte ia òutou i te parau àroàro i te Pätireia o te Atua ra, âreà to räpaeàu ra, e parau-parapore-hia te mau mea atoà nei ia rätou » (4/11). Âmene.

Terai òr

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens