Mareto 10,46-52

Mau taiòraa

Ieremia 31, 7 – 9

Taramo 126

Hepera 5, 1 - 10

Mareto 10, 46 – 52

E haamaitaì i te faaora a te Atua.

Te tîtîraa i faaòrehia

Te tahuà, tei hau i te mau tahuà.

Te matapo no Ierito.

Ta te Atua arataìraa

Te òhipa a te Atua

Te tutia no te taraehara.

Te pii aroha

Tei òto ma te pure

Tei ueue ma te roimata

E òoti ma te òaòa.

Ta te Atua i faafanau èi tahuà.

Ietu, e tamaiti na te Tavita.

E ueue ma te òto e te òaòa.

Te ora o te taata matapo i to na faaroo

Ei manaò matamua.

Te tahuà tei hau i te mau tahuà atoà, ta te Atua ia i faafanau no te ora o te ao nei. Tei haamaitaìhia i roto i te hanahana mau, no te tutia tafetafeta òre. I faaroo ai O ia i te reo pii aroha o te taata matapo i roto i te rahiraa no te mau reo atoà e pii nei, tei puta roa te varovaro i ta na tarià, teie reo e, Ietu tamaiti a Tavita e aroha mai òe ia ù, e piiraa aroha mau teie e te òto rahi i te titauraa i te faaora a te Atua. I riro ai o Ietu ei tahuà eiaha ei pupu tutia noa, ei horoà atoà ra i te ora.

Ia hiò tätou i te mau taiòraa e horoàhia nei, o ta tätou i taiò e ìtehia te tahi fatataraa te mau òhipa e tupu nei, i roto i te tahi taiòraa e te tahi. Taa ê noa atu ai te taime i faahitihia ai te parau no tera e tera òhipa ia au te faanahoraa no te àamu. Te vahi ra e faatuàti nei teie mau taiòraa, mau ti ra ia te òpuaraa a te Atua e vai ra i roto i tera tau e i tera tau, no te maitaì o te taata. Tamata na tätou i te hiò te faaìteraa o Ieremia i te pene 31 i te mau ìrava 7 e faaea i te 9.

• Te faaora nei te Atua i to na nunaa
• E arataì te Atua ia rätou.
• Te àti o te nunaa o te Atua.
• Te òto e te pure a te nunaa.
• Te fëia maì, e faaorahia.

Teie pene 31, te faaìte nei ia Ieremia te hoê faaâpïraahia te nunaa o te Atua. Te parau atoà nei ra o Ieremia no na tuhaa e piti, no Iteraèra e o Ieropoama. E riro hoì ia raua èi hoê i roto i te fenua no Tanaana âpï. Teie faaâpïraa ia tupu atoà i roto i te mau tau atoà.

• Te hoê faaâpïraa ia Tanaana.
• Te hoê faaâpïraa ia Eferaima.
• Te hoê faaâpïraa ia Iuta.
• Te hoê faaâpïraa te nunaa atoà.

Ia tupu te parau no te Faufaa Apï i roto ia Ierutarema âpï. Te mea tei roto te nunaa o te Atua i te àmaharaa, e te tîtîraa i te fenua Papuronia.

Te mau òpu fetii o Iteraèra ia au te òpereraa a Iotua, i te pene 13 e tae i te 19.

1. Reupena
2. Tata
3. Manate
4. Iuta
5. Eferaima
6. Peniamina Teie te huru te òpereraa fenua, i roto i te faatiàraa a
7. Timeona Iotua, te vai nei ia e ono faatiàraa taa ê i roto i te pipiria.
8. Tepuruna Tenete 29, 30..... ; Tenete 49...... ; Numera 1..... ;
9. Itahara Teuteronomi 33..... ; Etetiera 48..... ; Àpotarupo 7......
10. Atera
11. Nafatari
12. Tana.

Ir. 7 Te parau âpï òaòa ia e faaora o Iehova i to na nunaa, e ia himene hoì rätou .

Ir. 8- 9 E arataì o Iehova i to na nunaa i roto i te hoê vahi âpï, te fëia maì na te Atua ia e faaora, no teie haereraa âpï.

Te parau no Eferaima, e ara mai te tätou i te mea e piti faahitiraa teie e faaìtehia nei i roto i te pipiria.

1. Eferaima, te piti ia te tamaiti a Iotefa e o Atenata Potifera.
2. Eferaima, òpu fetii ia no Itemaèra te taime i òperehia ai te mau tuhaa fenua.

Teie mau haapaparaa parau te faahoì nei ia tätou i roto i te tumu mai reira to te Atua hinaaroraa ia ìtehia ta na òpuaraa no te faaora i te taata. Ua haaputuputuhia te tahi mau òpu fetii, ia tià i te Atua ia faaaano i ta na mau faanahoraa. Ia tupu noa te faaâpïraa i roto i te tau, e ia òre hoì to na nunaa ia atea i ta na mau titauraa. Oia hoì, ia tià i te nunaa ia faaâpï noa ia rätou i te mau taime atoà. E teie faaâpïraa, eita ia na te mau fifi e vai ra i nià i te tino o te taata e haafifi i te reira, i te mea o te Atua iho teie e arataì nei i to na nunaa. E arataì te Atua i to na nunaa i te vahi i reira e ìtehia ai te parau òaòa no te tiàmaraa, o teie ia ta te Taramo 126 e faaìte nei, i to te Atua faaòreraa i te tîtî o Tiona. Te òhipa ia i ravehia e te Atua ia tiàma te òire Moà, o Ierutarema i te mea o te pito teie no te haapuraa no te nunaa Àti – Iuta. Te tupuraa teie òhipa taime – ê – roa e tau matahiti i maìri, i faahitihia ai te mau òhipa i tupu i roto i te taime a faatîtîhia ai te nunaa o te Atua. O teie ia e parauhia nei e òhipa rahi ta te Atua i rave i mua i te mau ètene, te ìtehia nei te òaòa e vai ra i roto i te nunaa. I te ueueraa i te mau maitaì tei faanaòhia e rätou i roto i te mau òire e farereihia e rätou. Te ueue nei rätou ma te roimata, e òoti ra rätou ma te òaòa. No te mea te matara – noa – nei i mua rätou te mau ùputa no te hau, i te mau vahi e topahia e te huero o te òto, ia tià ia fanau te òaòa parau tià.

Te tupu nei i roto i na taiòraa e piti nei to te Atua ia haaputuputuraa i to na nunaa i roto i te òire Moà, tei parauhia o Ierutarema. Ia tià i to na iho nunaa ia horoà ia rätou no te haamoriraa, i te mau maitaì i noaa ia rätou.

Ia hiò ra tätou i te òhipa e tupu nei i roto i te Hepera i te pene 5, ìrava 1 e faaea i te 10, te ìtehia nei ia te manaònaò o te mau àti – Hepera i to rätou i purara i roto i te mau tuhaa fenua no Paretetina, e i Atia ma. Te faaìte nei te taata papaì mai te aha ra te huru te maìtiraa te Atua i te mau tahuà, no te pupu i te tutia.

Ir. 1 – 3 Te haamauraahia te mau tahuà, ei pupu te tutia taraèhara, ma te ìte te vai nei to na paruparu.

Ir. 4 – 10 Te haamauraa te Atua i te tahuà moà, ua pii O ia i ta na iho Tamaiti, ia Ietu. Ia au i te ìrava 5 vh. o ta ù Tamaiti òe i naua nei òe i fanauhia ai e au. E parau teie i ìritihia mai, i roto i te Taramo 2, 7. Teie parau ta te Taramo e faaìte nei, te haapäpuraa ia, o Ietu te Metia, e tamaiti na te Atua. Te tahuà tei mauiui, tei pohe, e tei tiàfaahou mai te pohe mai. Aita te Metia i faahanahana ia na iho, na te Atua ra i faahanahana. Te haapäpu nei ia teie mau ìrava, i te tiàraa tahuà faaora o Ietu.

Te faaìtehia nei i roto i te Mareto pene 10, i te ìrava 46 e tae roa i te 52, o Ietu e ta na mau pîpî haereraa na roto i te òire no Ierito, e òire teie tei patu faahouhia e Herota – Nui. Tei te pae i Ioritana teie òire. E tuàti teie òire ia Ierutarema na te Metepara o Iuta e 37 km. E piihia o Ietu i reira e te hoê matapo, e Tamaiti a Tavita, e tiàraa iòa teie o ta te Àti – Iuta e horoà i te Metia ei faaìte i te paparaa tupuna o Tavita.

Te òhipa ta Ietu e rave i nià i teie matapo, e òhipa ia tei hau i te mau tahuà atoà, ta te Atua i faafanau no te ora o te ao nei. Tei haamaitaìhia, i roto i te hanahana mau no te tutia tafetafeta òre. I faaroo ai O ia i te reo pii aroha o te taata matapo, i roto i te rahiraa no te mau reo e pii nei tei puta roa te varovaro i ta na tarià, teie reo e Ietu te Tamaiti a Tavita e Aroha mai òe ia ù. e piiraa aroha mau teie e te òto rahi i te titauraa i te faaora a te Atua. I riro ai o Ietu ei tahuà eiaha ei pupu tutia noa, ei horoà atoà ra i te ora.

Te faanahoraa o te pene parau Mareto 10, 46 – 52.

Ir. 46 – 47 - Te taata matapo no Ierito, tei pii ia Ietu te Tamaiti a Tavita aroha mai.

Ir. 48 - Te mau taata e rave rahi tei hinaaro e haamamu, ùàna roa aè ra ta na piiraa.

Ir. 49 – 51 – Ietu tei haru i taua piiraa faaea – iho – ra, tiihia atu ra te matapo ma te faaitoito, e aha atu vau ia ò e ?

Ir. 52 – Ua ora òe i to faaroo.

Te piiraa a Paretimaio, e te Tamaiti na Tavita o te taime matamua roa ia teie, e matapo tei ìte i teie tiàraa no Ietu, tei faaìte i to na paparaa tupuna. E piti taime to te faahitiraahia e te matapo teie iòa, tamaiti a Tavita, ma te àpeehia i te tumu no te hinaaro, e aroha mai òe ia ù. Te aniraa ra a Paretimaio, ia ora to na mata te färii nei o Ietu i te faaora, eiaha ra te mata anaè, te faaroo atoà ra, e piti ora to teie matapo te ora hiò e te ora faaroo. E tapaò faaìte teie te puai no te faaroo ia päpü te tiàturiraa, e ia òre ia faaäpiäpihia.

Èi Heheuraa

Ir 46 I te pae arataì te matapo i te faaearaa o Paretimaio to na iòa.

Ir 47 faaroo atu ra o Ietu i Natareta,

pii – iho – ra e te tamaiti a Tavita aroha mai. Te piiraa

Ir 48 E rave rahi tei äò ia mamu rahi roa aè ra i te piiraa òto a Ietu tei

e tamaiti a Tavita. Paretimaio. Haapaò

Ir 49 Tià – iho ra Ietu ma te faaue, ia arataìhia mai o ia. I te

A faaitoito te parauhia mai ra òe. hinaaro

Ir 50 Haapae atu ra i ta na àhu. Ietu tei faaroo o te

Ir 51 Ietu, te hinaaro na òe ia aha atu vau ia òe. nohea mai teie taata.

E Raponi, ia ora ta ù mata. Reo.

Ir 52 Ietu, ua ora òe i to faaroo.

Pee mai ra o ia ia Ietu i te aratià. Te ora i te Faaroo.

Te hinaaro o te taata matapo ia ora to na mata, e ia ìte o ia i te mau ùnaùna o tei rahuhia e te Atua. Te faaoraraa a Ietu, eita ia te mata noa tei ìte, te tiàturiraa atoà ra. Ua titau o Ietu i te taata matapo no te haapäpu te hinaaro mau nei ra o ia i te Ora. No te òtoraa reo o te taata matapo i ìte ai Ietu te manaò o teie taata. Ua horoà o Ietu e piti tapaò i teie taata, te puai faaora a te Atua. 1) Te mata tei àraara. 2) Te faaroo tei ora. No te faaroo hoì i àraara ai te matapo.

Ei parau faaitoitoraa.

Ìrava tumu : ìrava 52, ua ora òe i to faaroo.

Tumu parau : NO TE FAAROO I ARAARA AI TE MATAPO.

Tei Ierito te tupuraa ta tätou parau no teie mahana. Te òire i haaàtihia e te nunaa Iteraèra i te tau no Iotua, e tei purehu i te hitu o te taime, na roto i te ùmereraahia. (Iotua 6, 16). Na Herota nui i faatià faahou teie nei òire.

Te na roto nei o Ietu i teie òire, no te haere i Ierutarema, te vahi i reira O ia e haamuiuihia ai. I nià i te èà tià no teie òire e rave rahi mau taata tei pee ia Ietu. No to na roo, tei parare i roto i te mau òire atoà tei tapäehia e a na. E no te mau temeio, faaoraraa maì, i ravehia e a na i roto i ta na mau òhipa. Te mau taata e pee nei ia na, te huro nei ia, hoê ra taata matapo o Paretimaio, tei òre e ìte i te Fatu, te faaroo nei o ia te maniania a te taata, no teie tere to Ietu.

Tei te pae èà hoì o ia i te parahiraa, tei òre roa e ô atu no te parau ia Ietu i to na hinaaro.

Te raveà ra e vai ra i roto ia na to na ia reo, e ìmi o ia i te mau raveà atoà ia puai aè to na reo i te mau maniania a teie mau taata. Aita roa te hoê taata e haapaò nei i teie matapo, o ia anaè i roto i to na ao pouri. Te pii nei o ia i te piiraa mätamua e te Tamaiti a Tavita, e Ietu aroha mai òe ia ù. Aita teie piiraa mätamua i tae i te vahi i reira e ô atu ai. I te mea ua puai aè te huro a te taata, i te pii a te matapo. Te ta piti nei o Paretimaio te pii, ma te faaùàna i to na reo. Tei teitei aè i nià i te mau maniania a te taata tei hinaaro e tapoì ia na ia òre o Ietu e faaroo. Noa atu te tapoìpoì a te fëia te hinaaro e haamamu ia na. Ua tià o Ietu i te tahi taime, te faaroo nei i taua reo ra i te varovaroraa, mai te hoê oë taì navenave i roto i to na tarià. Na teie varovaro i faaara ia Ietu te hinaaro nei te hoê taata i te ora. Ua faaue o Ietu i te mau taata, ia arataìhia mai o ia. A tahi roa ra taata i haapaò i teie taata, ua matau noa te taata i teie matapo i te mau mahana atoà i te aniraa i te moni, ia Ietu ra aita o ia i ani i te moni ua ani ra o ia i te ora. Òaòa roa aè ra o Paretimaio, i te mea ua faaroohia ta na piiraa ùàna. Te tià nei o ia ma te haapae i to na àhu, haere atu ra ia Ietu ra, te ui nei o Ietu i te matapo,

E aha atu vau ia òe ?

Te pahonoraa mea päpu, te hinaaro nei au ia ora to ù mata, te tiàturiraa o te matapo eita ia i te mea tuataperepere, mea päpu e o Ietu te Tamaiti a Tavita te tahuà faaora. Ia au atoà i ta na pahonoraa, aita o ia i parau atu e nehenehe änei ta òe e faaora i to ù mata. Te na ò nei o Paretimaio ia ora to ù mata, mea päpu te hinaaro. Aita o ia i faaàti na mua, a äni atu ai, e ua ani i te ora to na ia hinaaro. Te fä no ta na äniraa ia àraara to na mata. Te parau nei o Ietu ia Paretimaio a haere ua ora òe i to òe faaroo, ora iho ra ta na mata.

Te mau taeaè, te mau tuahine, ua ora te taata matapo i to na faaroo e ua àraara te mata. E tapaò ia teie no te hoê fanauraa âpï no te taata i roto i te Metia. Te faaroo nei e te ìte nei i te mau ùnaùna ta te Atua i rahu. Te huru atoà ia teie no te Etaretia i roto i teie nei ao. E taata atoà ia tei fanau faahouhia i roto i te Metia, ma te maìti òre te huru o te taata, i te mea tei roto atoà o ia i te oraraa àmui. Na te Metia ra o Ietu, e faaàraara tämau i te mata o te Etaretia, ia tià ia na ia faaàraara i te mata o te nunaa o te Atua i roto i teie nei ao.

Te horoà nei o Ietu i teie fanauraa âpï ia tätou, ia tiàturi atoà tätou ia na. Mai te taata matapo tei pii ùàna ia Ietu, e te ìteraa aè i te ànaana o te ao ua pee o ia ia Ietu. E parau teie no te taatoà, no te mea hoê änaè vaa to tätou, i teie ao ta tätou e ora nei. E tano atoà o Ietu ia ui ia tätou i teie mahana, E aha atu vau ia òe e te nunaa mäòhi ? E aha ia ta tätou pahonoraa, e faaàti änei tätou na mua roa i to tätou oraraa hou e pahono ai, e aore ra e pahono àfaro tätou, mai te hoê taata tei faafanau faahouhia e te Atua. Mea tano ia tätou ia pahono e,

O te Atua, to ù pâpâ, to ù niu.

O te Atua, to ù pare, to ù haaponiraa.

O te Atua, to ù ora, to ù arataì.

O te Atua, to ù mato, to ù ia puai.

O te Atua, to ù paruru, to ù ia tiàturiraa.

O te Atua, to ù tara faaora, ta ù ia moihaa

O te Atua, to ù fare, to ù ia haamaharaa rohirohi.

E turuìraa päpu teie, no te fanauraa âpï i roto i te Metia. I te mea ua hoê te mau puai no te turu, i to tätou mau paruparu. Ietu Metia tei faahau ia tätou e te Metua te faafanau faahou nei O ia ia tätou, i teie mahana na roto i to na tiàfaahouraa. E taata âpï tätou, e mata âpï no te hiò i te mau òhipa e tupu ra. E tarià âpï, no te faaroo ia i te mau parau âpï, e vaha âpï, no te faaìte i te parau âpï.

Te hohoà ia ta Paretimaio e faaìte nei ia tätou i teie mahana, e ia faaâpï tätou i tätou mau hiòraa i to tätou mau taeaè, e mau tuahine e tià ai.

Ia ora na.

Teraì or.