Overblog Suivre ce blog
Editer l'article Administration Créer mon blog
1 juillet 2015 3 01 /07 /juillet /2015 10:42

Mareto 10 : 1 - 16 Te taatiraa.

Ei manaò i nià i te taiòraa.

Te faaite nei teie taiòraa,i te puai no te òhipa a Ietu e faatupu nei i roto i te mau taata e faaroo nei i ta na mau haapiiraa.E tae roa te mau parau a Ietu ei haapeàpeàraa i te feia tiàraa,tei matau,i te tuatapapa i te ture a te Atua.Noa atu ra teie mau òhipa e farereihia nei e Ietu,aita o ia e paruparu nei i te faahoiraa i te taata i te Atua ra.E ùna atu ä To na faaiteraa i te here o te Atua i te mau taata atoà e faaroo nei i ta na mau haapiiraa.Teie ia reo Ta na e faahiti nei i te irava 9 e teie nei,ta te Atua i taati ra, eiaha te taata e faataa ê atu.

Teie te tahi huru ta tuhaaraa i te taiòraa no te hiò àmuiraa i te haapapuraa i te manaò e faaitehia ra,no te tupuraa te òhipa e vai nei i ta Ietu haapiiraa.Te faufaa e itehia nei to te mau Faritea ia faahoiraa ia Ietu i roto i te ture ta Mote i papaì no te oraraa o te nunaa o te Atua.I nià i te parau no te haapaeraa i te vahine.Na teie parau i faatupu teie taiòraa ta tätou,i tià ai ia Ietu i te titau i te mau Faritea,no te maru òre hoi to outou i papaì ai o Mote i teie parau.No te färii òre hoi te ààu o te mau Faritea i tià ai ia Ietu i te parau i te Faritea,te tane haaipoipo tei haapae i ta na vahine,a haaipoipo atu i te tahi,ua faaturi ia i reira,oia atoà ia vahine mai te reira atoà ia to na faanahoraa.

Te mau pîpî a Ietu hoê ä to rätou manaò,e to te mau Faritea i te mea e ui fahou rätou teie parau ia Ietu ia taë rätou i roto i te fare.Na te heheuraa ra te reira e haapapu mai ia tätou.

E hope teie parau ta tätou i te irava 17 i te mea e haere o Ietu i te aratià.

Ei tuatapaparaa.

Te itehia nei i roto i teie heheuraa aita te mau Faritea e faahiti nei i te parau no te Atua,ua päpära rätou i to rätou mau manaò i nià i te ture i papaìhia e Mote.Areà ra te parau no te Atua,aita roa ia rätou i faahiti rii aè hoê taime.Te òhipa ta rätou e rave nei mauti ra ia te faaapiapi nei rätou i te tereraa haapiiraa a Ietu.Ia topa o Ietu i roto ta rätou herepata,no te parau haapaeraa i te vahine.Ia au i te faaiteraa a te irava 1,e rave rahi ä mau taata tei tairuru no te faaroo faahou i te mau haapiiraa a Ietu,o ta na ia peu.Te tumu haapiiraa ra na te mau Faritea ia te reira e horoà i mua ia Ietu,te parau ia no te tane e te vahine.Ia tià ia Ietu i te horoà i to na manaò i nià i teie parau.

E horoà o Ietu i to na manaò i nià i teie parau,eiaha ra mai ta rätou e manaò ra,mai ta te Atua ra i faanaho, i hamani iho ra te Atua i te taata i te tane hoê,e te vahine hoê.E faaruè ai te tane i ta na metua tane e ta na metua vahine,à àti ai i ta na vahine e riro hoi raua ei hoê e ere atu ra raua i te toopiti hoê ra. E teie nei,ta te Atua i taati ra,eiaha te taata e faataa ê atu.ir.6vh e tae i te ir.9.......

E aha to tätou manaò i nià i te parau no te haaipoiporaa i teie mahana ?

Mau taiòraa.

Tenete 2 : 18 - 25 Te tauturu au

Taramo 128 Te mataù

Hepera 2 : 9 - 11 Faaòromai

Mareto 10 : 1 - 16 Te faaipoiporaa.

Ei taiòraa tumu Mareto 10 : 1 - 16 Te faaipoiporaa.

Ei irava tumu Mareto 10 : 9 E teie nei,ta te Atua i taati ra, eiaha te taata e faataa ê atu.

Ei tatararaa.

Te hinaaro nei au ei òmuaraa i teie parau ta tätou e faatae atu i to ù manaò faatura ia outou e te mau mama, no teie parau ta tätou e hiò nei .I te mea ua haamauhia te manaò tumu i nià i te vahine.Ia au te ramaraa a te mau Faritea ia Ietu . No reira teie manaò i tupu ai te aniraa atu ia outou e,a färii mai i to ù tapaò faaatura ia outou, ia vai outou i roto i to outou tiàra vahine.

Mai ta te Atua i hamani,to na hohoà no te Atua,to na huru no te Atua,to na aho no te Atua,to na ivi e te iò no te tane ia,i parauhia ai ei hoê.Eita atu ra e tià ia parau-noa-hia no te vahine anaè no te tane atoà ra.

Te òhipa ra e itehia nei i roto i ta tätou taiòraa te tane ia teie e ui nei ia Ietu.Ei ramaraa atu i nià i te parau no te ture haapaeraa vahine.O Ietu i mua i teie ramaraa e horoà O ia i te hoê parau tei riro ei faaiteraa i te faufaa o te vahine i roto i te faanahoraa a te Atua.I hamani ai O ia i te vahine,no to na ite òre ia i te hoê tauturu au i roto i te mau òhipa ora atoà ta na i hamani eita te tane e tano i pihaiiho i te tumu raau, e tuhaa òhipa ta na,e faatupu i te maitai e noaa i te taata.Eita atoà te tane e tano i pihaiiho i te animara,te animara,e tuhaa òhipa ê atoà ta na,ua haapaòhia te animara,ei faaruperupe te mau vahi heeuri,e te vahi metepara o te fenua

I hea e papu ai teie mau manaò,te taime ia a topa ai o Atamu te iòa o te mau òhipa ora atoà i rahuhia e te Atua.Ua ite te Atua i roto i ta na rahuraa te toe ra te tahi tuhaa e vai ra,mauti ra ia te vahine.I ù nei tätou e papu maitai ai e,na te vahine i faaoti nehenehe roa te òhipa a te Atua.Ua iritihia te tahi tuhaa e vai ra i roto i te tane ei hamaniraa i te vahine.No te mea te vai ra iho ä te tahituhaa i roto i te tane no te vahine,oia atoà ia te vahine.

Te ite nei te Atua te tahi mau peu rii eita e tano i te tane ia rave,e tuhaa ia te reira na te vahine.I hinaaro ai te Atua ia riro te tane ei tane,e te vahine ei vahine.

E aha atu ra ia te faufaa no te ture haapaeraa vahine ? Teie ture no roto ia i te Teutero nomi i te pene 4 i te irava 1 oia hoi ua faataahia te tane no te vahine e te vahine no te tane ,oia atoà te mau tumu raau ò tane,e te ò vahine,te animara te ufa e te oni, ua naho maitai te òhipa a te Atua.

No te ètaèta ra te ààu o te taata i hamanihia ai teie ture e i tupu atoà ai te faaipoiporaa, ia tià i te tane e te vahine ia faatura i ta te Atua i faanaho.I te mea e hopoià ta raua i roto i te òpuaraa a te Atua ei faatupuraa i te ora i te mau vahi atoà e nohohia ra e te mau taata.Ia haafaufaahia teie parau no te tauturu au.Teie parau ei faaiteraa ia e,te tane,te vahine ua aifaito ia raua i mua i te aro o te Atua.

A taa ê noa atu ai te manaò o Pauro,i nià i te vahine te tane to na upoo,mai te mea oia ia paruru ia o ia i ta na vahine.Ia òre ra eita ia e riro ei upoo.Hoê vahi papu maitai aita te tane i hau atu i te vahine hoê a i mua i te aro o te Atua,te haapapu nei o Ietu i te reira,ma te tuu i teie parau i roto i te faaipoiporaa,ua tupu anaè te haapaeraa te tahi i te tahi,aita ia raua i tià i to raua iho manaò,ua paruparu ia te here.

Ta te Atua e hinaaro nei eiaha ia ravehia teie huru òhipa.Ia tià ra i te tane ia teoteo i ta na vahine,e te vahine ia faaòru i ta na tane.O te tahi ia auraa no teie parau, ta te Atua i taati ra,eiahah te taata e faataa ê atu.Ia noaa i te tane e te vahine i roto i teie parau te itoito o te here,tei horoàhia na roto i te tamarii o ta Ietu ia e tuu nei i to na rima i nià iho ma te faaau i te Patireia o te Atua .

E hoa here ma e,

Te parau e tià ia parau i teie nei,te tane e haamaitairaa na te Atua,te vahine e faafanauraa na te Atua,e te tamarii ra e òaòaraa ia no te here o te Atua.No te mea i roto i te mau ora atoà i hamanihia e te Atua,o te taata anaè tei hamanihia e to na rima,no reira o Ietu i parau ai mai teie te huru,ta te Atua i taati ra eiaha roa te taata e faataa ê,i ta te Atua i miri i to na rima.

Teie te tahi pehepehe no te faaiteraa te tane i te here i ta na vahine,e te vahine i ta na tane.

Te naò nei te tane ,

Inaha,e nehenehe to oe,e au here e,

Inaha,e nehenehe to oe,

e mata ùùairao hoi to oe ra.

Teie ia te pahonoraa a te vahine. Tire a Toromona 1 : 15

Inaha ,te nehenehe ra oe,

e ta ù here e

te maitai ra ;

E tiare hoi au no Tarona;

e riri anaè no te mau peho ra.

Tire a Toromona 1 : 16 ,2 : 1

ia ora na.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens