Overblog Suivre ce blog
Editer l'article Administration Créer mon blog
1 juillet 2015 3 01 /07 /juillet /2015 11:32

Ruta 3/ 10- 18

Irava 16 vr. Te haere mai na ra te tahi e mana rahi to na i to ù. e òre ia vau e au ia tatara i te tapeà i ta na tamaa.

I mua i te pororaa a Ioane Papetito i te hiti i Ioritana, ua horo mai te nahoà rahi no te faaroo ia na e no te mea, tei roto atoà rätou i te tiaìraa i te hoê e haere mai no te faaora i te nunaa i te rima o te hau Roma e no te ani hoì i te mea e tano ia rätou ia rave no te färii poupouraa i teie veà i ta te Atua E ta rätou e faaroo nei, o te tïtauraa ia a Ioane ia tatarahapa te taata i mua i te aro o te Atua, ia faatitiàifaro i te mau vahi puupuu e te mau vahi poopoo o to rätou oraraa Oia hoì, ia hiò tutonu te taata ta tataì tahi i to na parau i mua i te hinaaro o te Atua.

E ère teie i te färiiraa manihini i matarohia. O te Atua iho ra teie e haere mai nei na roto i ta na Tamaiti no te parau mai i te taata. E faaineineraa ia teie e tïtauhia mai nei i te taata ia rave hou te farereiraa.

Ta tätou faaineineraa te färiiraa i to tätou Fatu. E tano atoà paha ia, ia hiò tätou i te huru no te òhipa e tupu ra e horoàhia anei hoì ia tätou te PARAU e au no te parahiraa i roto i te tiaìraa a ìte atoà ai tätou ta taìtahi i te mea e tano ia ù ia rave no te haereà mai o te Fatu. Inaha, tei roto tätou i te hoê ao i reira tätou i te haamätauraahia no te tiaì i te tupuraa no te mau òhipa, te mau ôroà matahiti. I reira, aita atu e manaònaòraa maoti te òaòaraa e noaa mai ia tae mai taua mahana ra. Eiaha rä no te mahana i tae mai, eiaha atoà hoì no te òhipa e hinaarohia ra i te haamanaò, no te ôroà ra i faaineinehia no te taata e ora atu i roto i taua ôroà ra. Oia hoì, te mea faufaa i toe mai e ère ia te tumu o te òhipa te huru tupuraa ra o te òhipa òre noa atu ai te auraa e haapaòhia e aore ia, òre noa atu ai te taata e märamarama faahou i te auraa no taua ôroà ra no te mea ua moè te auraa i te huru tupuraa no te peu e püòhu ra i taua ôroà ra.

Te auraa, aita te haereà mai o te Fatu i faufaa - faahouhia i mua i te rahi o te peu i faanahohia no te faahanahana i teie ôroà. Ia märamarama atoà ia tätou e, e ère na te purapura o te mau faaùnaùna i faatautauhia i nià i te raau Noera e aore ia na te rahi e te au o te maa i âpapahia i nià i te iri àiraa e vaiiho mai i te auraa mau no te hinaaro o te Atua, no te mea ra, te vai ra te hinaaro tatarahapa i roto i te àau taata.

Ia au i te faatiàraa a Ruta, ua rau te huru o te taata i täpapa mai, ua tae mai to te Vahi atea no te haere mai e faaroo i te mau haapiiraa e horoàhia ra e Ioane, no te mea te vai ra te hinaaro e ìte i te arii i faaìtehia mai e te mau perofeta. Ua haere atoà mai to te nuu e te mau rave òhipa a te hau no te ìmi i te raveà e huru tano ai to rätou oraraa i mua i te haereà mai o te arii o Iteraèra o ta rätou a e faaroo nei na roto i te vaha o Ioane. Te auraa, aita te piiraa a Ioane i faaea noa i roto i te âpoo tarià o te feiä i mataro - noa i te faaroo i teie huru parau. Ua tae roa atoà a i roto i te tarià o te feiä i mataro - noa i te parahi i te hiti i te mau faanahoraa o te oraraa faaroo.

Te ìte atoà ra tätou e, aita Ioane e pipiri nei i te parau. Te pahono nei a i te mau uiraa atoà e topa mai nei i mua i to na aro ma te mataù òre. Ma te òre e faahapa i te huru òhipa o ta rätou e rave nei, te ani nei ra o ia ia faatitiàifaro rätou i ta rätou arataìraa i ta rätou mau tapura òhipa ia au i te mea i tïtauhia ai rätou.

Eiaha e no te mea e, e tiàraa to rätou, e e toroà mana hoì, e tano ai ia rätou ia rave noa ma te hiò òre i te fifi o te taata. Ia ìmi ra rätou i te tupuraa no te parau tià. No reira, i ta rätou hiòraa, e ia au i te mau haapiiraa o ta rätou e faaroo ra, eita e òre o Ioane iho taua arii ra. Eita atoà e òre, no te reira tumu i haere rahi mai ai te taata e ìmi ia Ioane.

E parau faahiahia teie ia faaroohia inaha, hou te Fatu a tae mai ai, ua rau atoà te huru o te taata i hinaaro i te ìte ia na. Òre noa atu ai to rätou oraraa e tuàti roa i nià i te mau faaueraa a te Atua. No rätou atoà te parau o Noera. No reira, te tau no te tiaìraa, e ère ia i te tau i faaau – noa - hia no te tahi pae taata. No te taatoàraa ra ia ìte to teie nei ao. Te auraa, e ère i te tau noa no te pureraa, e tau ra no te faaìteraa i teie parau âpi na te mau Vahi atoà e na te mau aroä. Te haere mai nei te Tamaiti a te Atua e faaineine ia tätou.

I mua i te nahoà i taìruru mai, teie to na reo : te haere mai na a te tahi e mana rahi to na i to ù. e òre ia vau e au ia tatara i te tapeà i ta na tamaa. Oia hoì, e ère o ia te arii i faaìtehia e Itaia e te mau perofeta- Ua riro noa rä 0 ia èi reo no te faaineine i te àau o te nunaa ia färii rätou i tera e haere mai rä. E te faaìte atoà ra o ia i to na fäito i mua i taua arii mana rahi ra. Eita e tià ia na ia rave i te tuhaa i faaauhia no te hoê tavini te tatararaa i te tapeà i te tamaa. Te auraa tei raro faahou atu o ia i te fäito o te tavini. Inaha, e fatata atu te tävini i te pae àvae o to na Fatu, àreà o Ioane eita e au ia na ia haafatata atu i reira- Ua päpü maitaì ia Ioane te Vahi e te tiàraa e tano ia na e aita roa atu o ia e hinaaro nei i te haru i te tiàraa e ère i to na. Ua färii atoà o ia i te tuhaa òhipa i faaauhia na na e aita e hinaaro nei i te haru i tei òre i horoàhia na na. Na roto i teie huru vauvauraa na Ioane i te tiàraa o te Fatu te haapäpü nei o ia i te ôtià faaauhia no na.

Ua ìte tätou e i roto i teie ao ta tätou e ora nei, aita ta te taata e haafaufaa maoti, ta na ia hiòraa i to na iho parau. Ua au anei to na huru e aore ia ta na òhipa i to na hinaaro e i muri mai i te reira e hiò atu ai i te mea o ta to na Fatu e hinaaro mai ra ia na. Hau roa atu i teie mahana, na roto i te mau raveà àravihi no te faarahi i te moemoea i te aro o te taata, ia tupu ùàna te faahinaaroraa. E ère teie i te huru âpï, e huru ra e vai nei i roto i te tupuraa taata. I te tau o Ioane i vai atoà na te reira huru. E te tahi hohoà märamarama maitaì o te arii ra o Herota i te òreraa e färii i te haereà mai te arii fanau âpï e aore ia i roto noa iho i te mau pîpî o ta tätou i ìte i te mau tapati i mähemo, tera hinaaro ia noaa te tahi parahiraa rnaitaì aè i to te tahi No reira, te riro nei te huru o Ioane ei haapiiraa e èi haamanaòraa atoà ia tätou i te mea mau e au ia tätou ia rave ia au i te òhipa o ta te Atua e tïtau mai ra ia tätou.

te haere mai na ra te tahi e mana rahi to na i to ù, e òre vau e au ia tatara i te tapeà i ta na tamaa.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens