Overblog Suivre ce blog
Editer l'article Administration Créer mon blog
1 juillet 2015 3 01 /07 /juillet /2015 11:41

Ev. Ruta . 2, 40 - 52

ìrava tumu : ìr 49 E aha ò rua i ìmi ai ia ù ? aita ò rua i ìte, e ia haapaò vau i ta ta ù metua e tià ai.

To te hui faaroo nei, Ia ora na.

Te râ mai â te parau no te aroha ia òutou tei àmui mai i teie nei täpati hopeà roa no teie nei matahiti 2000 ta tätou i ratere mai, mai te avaè Tenuare 2000 e tae roa mai i teie nei avaè Titema. I roto noa tau hora rii, e huri ai tätou i te àpi parau no te matahiti 2000 no te tomo i roto i te hoê â matahiti àpi oia hoì, te matahiti 2001. Mai ta Ìtaia i faahiti na i te pene 66, i te ìrava 23 e riro hoì mai te marama âpï, i tae noa atu i te tahi marama âpï, e mai te täpati âpï, e tae i te tahi täpati, o te haereà mai ia o te taata atoà e haamori ai i mua i ta ù aro, te parau mai ra o Iehova.

Mai tei mataro – noa - hia, e taime rii hopeà teie e faaroo faahou ai tätou i te tahi mau tià faatere o to tätou fenua e na reira atoà i te tahi mau tià faatere faaroo, ia horoà mai i ta rätou mau poroìraa, mau manaònaòraa, mau òpuaraa, mau tapura òhipa, mau àveià, no teie matahiti âpï e haerehia atu nei e tätou i te pae no te faatereraa Hau Fenua, te tiàturi nei o ia i nià i ta na iho mau raveà, i to na iho puai, no te faatupu i te mau òpuaraa ta na i faanaho ma te faataa atoà i te mau tapura faufaa no te faatupuraa i taua mau òpuaraa ra o tei niuhia i nià i te râ manaò e, ia maitaì te oraraa o te huiraatira i Porinetia. Te vai ra te mau òpuaraa tei tae i nià i to na faito areà vêtahi, tei roto noa â ia i te hiòhiòraa e nahea ia faatupu.

I to na pae, ua faataa atoà te Ètaretia i te hoê taime no na no te feruri, no te tauà parau e no te faaoti i te tahi mau parau o ta na e manaò râ, ei maitaì no te nunaa na roto ia i ta na Apooraa Rahi Àmui, te Apooraa hopeà no teie matahiti 2000. I mua i te rau o te mau parau tei hiòhia, no te oraraa ùtuafare e aore ia te oraraa amuiraa, paroita e aore ia àmaa òhipa a te Ètaretia, ua faaìte atoà te Ètaretia i to na mau manaònaòraa i mua i te mau òhipa e tupu ra i roto i to tätou totaiete mäòhi i te pae no te oraraa tivira e aore ia te oraraa faaroo. Hoê o te mau tumu parau o te tià roa ia tätou ia tapeà mai o te parau ia no te faaineineraa, no te haapii - raa. Mai ta tätou i ìte, ua faataa te Hau Fenua i teie matahiti ei matahiti no te reo mäòhi. Ua faataa atoà te Ètaretia i te hoê taime no na no te tauà parau i nià i te òhipa no te haapiiraa e te papaìraa i te reo mäòhi. I te matahiti 2001 te avaè mati, e ravehia ai no te taime matamua roa te parau no te faaineineraa tamau no te mau òrometua atoà a te Etaretia. Mai te peu e ua hiò päpühia te parau no te faaineineraa, no te haapiiraa, tapaò faaìte ia e, te ànanahiraa o te hoê totaiete e aore ia te Ètaretia, ua haamauhia ia i nià i teie parau no te haapiiraa, no te faaineineraa. E no reira, i roto i ta tätou parau no teie nei täpati hopeà no teie matahiti 2000, te faatià nei te papaì evaneria ra o Ruta ia tätou i te òhipa no te haapiiraa i rotopu ia Ietu e te fëia paari o te tunato. Mea huru maere te tupuraa no teie nei òhipa no te mea a tahi, te ìte nei tätou, ia au i ta tätou taiòraa, e tamarii teie oia hoì o Ietu, e horoà nei i te mau parau faahiahia i mua i te mau òrometua, e te feia paari. A piti, te reo no teie nei tamaiti o Ietu i nià i to na na metua tei ìmi ia na e tei parau atu ia raua i roto i te ìrava 49 . E aha ò rua i ìmi ai ia ù ? aita ò rua i ìte, e ia haapaò vau i ta ta ù metua e tià ai.

Maere anaè iho ra te fëia atoà i faaroo ia na ra i to na ìte e ta na parau.

I roto i te hoê faanahoraa haapiiraa faaineineraa, e ère na te tamarii e haapii atu i te taata paari. Na te taata paari râ e haapii i te tamarii. E area rahi te vai ra i rotopu i te hoê tamarii e te hoê taata paari. Te raveà e àifato ai raua o te raveà ia no te haapii. Aita o Ruta i tatara mai ia tätou te huru haapiiraa i ravehia e Ietu. Ia au râ i ta na faatiàraa, e ìte ia tätou e, e tamaiti maramarama mau o Ietu. Eita e òre te ìte, te maramarama, tei roaa ia na no ô mai ia i te Atua ra, i tupu ai te maereraa rahi i roto i te mau òrometua, te fëia paari, no te mau parau tei òre â rätou i faaroo i te parauraahia maori râ, mai roto mai i te vaha o te hoê tamarii. Te ìte ra ia tätou e, ua taui te faanahoraa. Na te tamarii e haapii nei i te fëia paari. Taua faanahoraa ra, e parau tätou e, o te Atua teie e faaineine nei ta na Tamaiti no te vavahi i te hoê faanahoraa mataro – noa - hia, no te ìriti te ùputa o te hoê faanahoraa no te faatupu i te maere e te tauiraa. Te haamanaò mai ra teie parau ia tätou e, te ìte o tei roaa i te taata, ia òhipahia ia no te maitaì o te hoê totaiete e aore ia te Ètaretia. Aita o Ietu i faateitei ia na no te ìte tei roaa ia na. Ua na reira te mau òrometua, te feia paari no te mea tei ia rätou râ te parau no te ìte. Ua moèhia râ ia rätou e, te ìte e horoà te reira na te Atua i te mau taata atoà. O ta Ietu i haamanaò ia rätou. I te ìrava 49 E aha ò rua i ìmi ai ia ù ? aita ò rua i ìte, e ia haapaò vau i ta ta ù metua e tià ai.

Ua ìmi na pue metua i teie tamaiti ia Ietu e toru ruì, ma te manaònaò rahi mai te peu e, e moè roa teie tamaiti, e eita e ìtehia. Eita ihoa e òre teie huru fifi i te tupu no te mea, tei te taime no te hoê mau oroà rarahi tei faatupuhia oia hoì, te oroà pata. Mea rahi te taata. Mai te peu e, eita te tamarii e haapaò – maitaì - hia, e riro o ia i te moè i roto i te rahiraa taata o te reira rii te òhipa i tupu i nià i teie tamaiti ia Ietu. Teie râ, ia hiò maitaì anaè tätou i taua taime ra i moè ai Ietu, eita e òre e, e taime faataahia teie, eita anei te reira te òpuaraa a te Atua no te haafariu te manaò o te taata, tei tutonu roa i nià i te mau faanahoraa atoà no te oroà pata, i nià i ta na iho òpuaraa o ta na e hinaaro i te faaìte na roto i teie tamaiti ia Ietu. Te râ maa taime ïti no to Ietu parahiraa i rotopu i te mau òrometua, i te feia paari, e taime faufaa roa ia. E taime i horoà ai Ietu i te tahi mau parau tei faatupu i te maereraa rahi. Teie râ, hou taua maa taime iti râ, ua faaapiapi - hia ia e teie na metua no Ietu. No te mea ua taupupu roa taua taime ra, i parau ai Ietu i nià ia raua i te ìrava 49 . E aha ò rua i ìmi ai ia ù ? aita ò rua i ìte, e ia haapaò vau i ta ta ù metua e tià ai.

Eita e òre e i teie mahana, ia faaroo tätou te fëia metua i te râ huru taìraa reo mai roto mai i ta tätou mau tamarii, eita tätou e mauruuru. I roto râ i teie nei reo no Ietu, mai te mea ra, teie nau taata e tià atu nei i mua ia na oia hoì o to na iho na metua, e ère ia i te metua mau. Te Metua mau no teie nei tamaiti iti, e ère ia no teie nei ao. E Metua no te râ ao a muri atu, o tei haamata i te faanaho i ta na iho òpuaraa na roto i teie tamaiti ia Ietu. Te ìte faahou râ tätou i ô nei, te tauiraa no te tiàraa Metua. E Metua ê roa to teie nei tamaiti, o tei horoà te ìte taaê i roto ia na no te haapaò i to na hinaaro.

E hoa here ma, i roto noa maa taime iti, e tupu atoà ai te tauiraa. Eita te tau e taui. Te numera noa tei faataa i te hoê tau i te tahi, te taui. Te tauiraa rahi ta tätou e hinaaro nei ia tupu, te tauiraa ia ta te Atua e faatupu i roto i te àau o te taata, to tätou àau. Mai te peu e, e parau noa " E matahiti âpï e taui ia, e mea âpï eita te àau e färii i te taui. aita ia te tauiraa e tupu. Ia tauturu mai te Fatu ia tätou i te färiiraa ia na ei Fatu no te ìte e ei Metua òtahi no tatou paatoà.

Ia ora na.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens