Overblog Suivre ce blog
Editer l'article Administration Créer mon blog
18 février 2015 3 18 /02 /février /2015 21:07

Mau taiòraa.

 

            Etoto               20, 1 – 17.

            Taramo            19

            I Torinetia       1, 22 – 25.

            Ioane               2, 13 – 25.

 

Te huru o Ietu

            Te tupu nei te àrahuta i roto i to tätou àau i teie huru no Ietu i teie poìpoì, o ia te haapii nei i te parau no te maru, te haehaa, te faaòromaì. O ai te tumu no te hau, e aha teie e ìtehia nei te riri ia o Ietu, i te feia tei haere mai e hoo i ta rätou mau ànimara rii no te pupuraa i te tutia i te Atua. E tae noa atu i te feia taui moni, e tapaò faaìte teie e òroà rahi teie e tupu nei i Ierutarema, e rave rahi mau taata e tapapa teie òroà, ia au i te hiòraa aita roa te hoê òhipa i vaiihohia, ua hinaarohia ra eiaha roa te mau taata e haere mai nei i teie òroà ia ère iti noa aè i te tahi mea no te haafaufaaraa i to na tere i roto i teie òroà. Te vahi hooraa ànimara no te tutia, mea faataa mai te, te mau manu rii ra na te feia ravaì – òre ia, te mau mamoe maitaì ra na te feia na vaì ia.

 

            Te faaìte nei o Ietu i te tahi huru to na, i te tuuraa ia na i roto i te puai, ma te rave i te tahi mauhaa, no te hui i nià i te feia e tapi hoo ra i roto i te àua no te fare pure no Ierutarema. Ma te tiàvaru i teie feia i rapae i te àua, e i te parauraa e, aita vau e hinaaro nei ia faarirohia te fare o ta ù metua, ei fare no te eia haru. Tupu atu ra teie parau e, e riro O ia i te itoito i te fare o te Metua.

 

Ietu i Ierutarema.

Te fatata mai ra te òroà pata àti Iuta ra, haere atu ra Ietu i Ierutarema. Te faaìte nei o Ioane te huru o te faaroo o Ietu, e te haapaò i te mau òhipa no te perenina. I ta Ioane papaìraa, e tià ia parauhia e e 7 taime to Ietu faahanahanaraa te mau òroà ra rahi e tupu nei i Ierutarema.   (Ioane 5,1- 6,4 – 7,2 – 10,22 – 11,55 – 12,1 – 13,1). E mau òroà pata e te pätiaraa tiàhapa, o ta Ietu e haapaò nei. Ia au i teie huru no Ietu, e taata O ia mai te mau taata atoà i to na tau tei ìte i te faufaa, no te mau òhipa e tupu ra ei tautururaa i te faaroo o te taata. Ia hiò maitaì - anaè – hia, te àmui nei o Ietu i roto i te nunaa, no te pure, no te himene, te vahi ta te nunaa e haere tei roto atoà O ia. Ei haapäpuraa i to na taamuraa i te nunaa ta te Atua i aroha. E haamata ta Ioane faatiàraa i roto i ta tätou taiòraa, i nià i te parau no te pata àti Iuta i te ìrava 13, e faahope i te ìrava 22, na roto i te pata a Ietu, te pata teretetiano, oia hoì to na tiàfaahouraa.

 

            E teie pata ta Ietu, tei roto i te parau ìte – òre – hia no te pata, i roto i te ora. E na roto i te vavahi ra i te hiero no Ierutarema, no te faatià i te hiero àpi, patuhia i nià i te hinaaro o Ietu tei faatiàhia i roto i te vahi tahuti òre.

 

Ua riro te hiero no Ierutarema, ei vahi tapihooraaa, animara, e tae noa atu i te mau tauiraa moni. I teie òhipa te faaìte nei o Ietu i to na mauruuru òre, te hamani nei O ia i te hoê taura hui, no te tiàvaru i teie feia i rapae.

 

Aita te feruriraa o Ietu i nià i te parau no te maru, e te faaòhieraa i te mau tutia, a te feia tei haere mai, mai te atea mai. Te ìte nei o Ietu i roto i teie faanahoraa, te faufaa òre te mau pupuraa tutia. Eita atu ra mai tei matauhia, ua tae ra i nià i te hoê faito te atearaa te taata i te Atua. I te raveraa i te hoê peu hinaarohia e te taata, no to na hanahana. Ia au i ta na òhiparaa i te faufaa a te Atua no na, eiaha ra no te Atua. No reira eiaha ia tätou e maere i teie huru to Ietu i teie poìpoì i roto i ta tätou nei taiòraa. Te ìte nei tätou i te tahi huru taa ê no Ietu, i te tiàvaruraa i te feia tapihoo, e te feia taui moni. Àreà te tahi pae o te mau taata, aita ia te taiòraa e haapäpu ra ua tiàvaru – atoà – hia rätou.

 

E aha teie ta Ietu e hinaaro nei e faaìte ?

 

         Te hinaaro nei o Ietu e faaìte, eita na te tutia ànimara e faaòre i te hara a te taata i mua i te aro o te Atua. I te mea o te Atua iho te Fatu no teie mau ànimara, o ta te taata e rave nei no te haamauruuru i te Atua, to auraa ra na te Atua noa O ia e haamauruuru ra. No te faaòreraa i teie mau faanahoraa, te horoà nei o Ietu i te parau no te pata àpi, tei na rotohia i to na tiàfaahouraa. Oia hoì, to Ietu tähitiraa i te taata tahuti i roto i te vahi tahuti – òre, o te auraa teie no te parau ra o te pata, i roto i te faufaa tahito ua matau – noa – hia i te parau ìritihia mai, mai Àifti mai i te fenua o te tîtîraa ra. Te auraa mau te òhipa i ravehia e te Atua, mau ti ra ia ua tähiti O ia i to na nunaa mai Àifiti, i roto i te fenua o te täpu. O ta Ietu ia e hinaaro nei i te taata ia tähitihia i roto i te ora àpi, tei parauhia te ORA MURE ÒRE.

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens